—¡Khaway, munacuskayqueka onkoska cashan! —nispa.

4 Jesusri chayta uyarispa nerka:

—Cay onkoyka mana wañuypajchu. Manachayrí Dios jatun atiyninta ricuchinallanpajmin. Cay onkoynejtataj noka, Diospa Wawan, jatunchaska casaj, —nispa.

5 Jesusri munacorka Martata, ñañan Mariata, Lazarotawan. 6 Onkoska caskanta uyarispapis chaypi iscay pꞌunchaycunatawan kheparicorka. 7 Chaymantataj yachacojcunanman nerka:

—Jacu ripunachej ujtawan Judea jallpꞌaman, —nispa.

8 Yachacojcunantaj payman nerkancu:

—Yachachejníy, cunallan curajcunaka chꞌankaycusuyta munasharkancoka. ¿Ujtawanchu chayman rinquirí?

9 Jesustaj paycunaman cuticherka:

—Uj pꞌunchayka chunca iscayniyoj horasniyoj. Pꞌunchaypi purejri mana urmanchu cꞌanchay caskanraycu. [Quiquillantataj Diospa munayninta juntꞌanaycama mana urmasajchu. 10 Astawanpis mana Diosmanjina causayman chayka, urmayman,]^a —nispa.

11 Chayta niytawan paycunaman nerka:

—Munaska Lazaronchej puñushan. Nokarí payta rijchꞌarichimoj risaj, —nispa.

12 Yachacojcunantaj payman nerkancu:

—Señorníy, puñuspachá thañiconka, —nispa.

13 Jesusrí wañuyninmanta parlarka. Paycunataj yuyarkancu puñuspa samaricuymanta parlashaskanta. 14 Chayraycu Jesuska sutꞌita paycunaman nerka:

—Lazaroka wañupun. 15 Mana jakaypi caskaymantataj cusiska cani kancunaraycu astawan nokapi japꞌicunawayquichejpaj. Cunanka jacu rinachej paypaman, —nispa.

16 Mellizo niska Tomastaj yachacoj-masisninman nerka.

—Jacu nokanchejpis paywan cusca wañumunanchejpaj, —nispa.

17 Jesustaj Betaniaman chayamuspa tawa pꞌunchay pꞌampaskataña Lazarota tariparka. 18 Betania llajtari Jerusalenmanta cuscan leguapijina carka. 19 Chayraycu ashqhas israelcunamanta jamorkancu Martata Mariatapis hermanoncumanta sonkochaj. 20 Ajinapitaj Martaka Jesús chayamushaskanta uyarispa paywan tincoj llojserka. Mariataj wasillapi tiyaricusharka. 21 Jesuswan tincuspataj Martaka nerka:

—Señorníy, caypichus cawaj carka chayka, hermanoyka mana wañupunmanchu carka. 22 Chaywanpis yachani imatapis mañacuskayquita Dios kosunanta, —nispa.

23 Jesustaj payman nerka:

—Hermanoyqui causarimonka, —nispa.

24 Martari payman nerka:

—Arí, yachani causarimunanta chay khepa pꞌunchaypi runas causarimonkancu, chaypeka, —nispa.

25 Jesustaj payman nerka:

—Noka cani causarichej. Nokataj cani causayta koj. Nokapi japꞌicojka wañunman chaypis causarimonka. 26 Tucuy nokapi japꞌicuspa causajcunataj ni jaycꞌaj wiñaypaj wañonkancuchu. ¿Chayta creenquichu? —nispa.

27 Martataj nerka:

—Arí, Señorníy, tucuy sonkoywan creeni cay pachaman jamoj Diospa Wawan Cristo caskayquita, —nispa.

28 Chayta niytawan ñañan Mariata wajyaj rerka. Pacayllamantataj payman nerka:

—Yachachejninchej caypi cashan wajyarisunqui, —nispa.

29 Uyariytawancamataj Mariaka uskhay uskhayllata jataricorka payman rinanpaj. 30 Jesusri manaraj ranchoman yaycorkarajchu. Aswanka Marta paywan tincorka chayllapiraj casharka. 31 Mariata sonkochanancupaj wasipi cashaj israelcunataj ricorkancu payta uskhayllata llojsiskanta. Paycunataj yuyarkancu pꞌampaskaman wakaj rishaskanta. Chayraycu payta khaterkancu.

32 Mariataj Jesús casharka, chayman chayarka. Jesusta ricuytawantaj chaquisninman wijchꞌuycucuspa nerka:

—Señorníy, caypichus cawaj carka chayka, hermanoyka mana wañupuwanmanchu carka, —nispa.

33 Jesusrí pay wakaskanta paywan cusca jamoj israelcuna wakaskancutapis ricorka. Chayraycu sonkonpi sinchꞌita llaquicorka paytaj qharcatiterka. 34 Nerkataj:

—¿Maypitaj payta pꞌamparkanquichejrí?

Paycunataj nerkancu:

—Señorníy, jamuy ricunqui, —nispa.

35 Jesustaj wakarka. 36 Chayta ricuspa israelcuna nerkancu:

—¡Khaway, may chhicatachus payta munacorka! —nispa.

37 Paycunamanta waquintaj nerkancu:

—Cay runaka ciegoj ñawisnintapis quicharerka. Chanta ¿manachu Lazarota wañuymanta jarcꞌanman carka?

38 Pꞌampana juscꞌuman chayamuspa Jesús ujtawan sonkonpi sinchꞌita llaquicorka. Chay pꞌampanari orko cꞌuchupi ruwaska carka. Jatun pꞌalta rumiwantaj wiskꞌaska carka. 39 Jesusri nerka:

—Rumita okhariychej, —nispa.

Wañojpa hermanan Martataj nerka:

—Señorníy, asnashanña; tawa pꞌunchay pꞌampaskaña, —nispa.

40 Jesustaj payman nerka:

—¿Manachu nerkayqui, nokapi japꞌicuwanqui chayka, Diospa jatun atiyninta ricunqui?

41 Runastaj rumita okharerkancu. Jesusri patata khawarispa nerka:

—Tatáy, graciasta koyqui kanman uyariwaskayquimanta. 42 Yachanitaj uyariwaskayquitapuni. Cay ashqha runasraycutaj chayta nerkani paycuna creenancupaj kan cachamuwaskayquita, —nispa.

43 Chayta niytawantaj jatunta khaparerka:

—Lázaro, llojsimuy, —nispa.

44 Wañuska runataj llojsimorka, chaquisnin maquisnin maytꞌuska, uyanpis maychus pꞌampanapaj khataska. Jesustaj paycunaman nerka:

—Phascaraychej, sakeychej rejta, —nispa.

45 Ashqhas israelcunamanta Jesuspi japꞌicorkancu chay ruwaskanta ricuspa. Chay japꞌicojcunaka Mariata sonkochaj jamojcunamanta carkancu. 46 Waquin chay jamojcunamantari Jesuspa ruwaskanta fariseosman willaj rerkancu. 47 Chayraycu yupaychana-wasimanta curajcuna fariseocunapiwan jatun tantacuyta^b wajyacorkancu. Nisharkancutaj:

—Chay runaka ashqha ricuchinasta ruwashan. ¿Nokanchejri imatataj ruwashanchejrí? 48 Sichus payta sakellasunchej chayka, tucuy paypi japꞌiconkancu. Roma runastaj jamuspa atiyninchejta khechuwasun. Yupaychana-wasita llajtanchejtapis paycunallaña camachenkancu, —nispa.

49 Yupaychana-wasimanta curajka chay wata casharka Caifás sutiyoj. Payri tantacojcunamanta carka. Nerkataj:

—¡Kancunaka ni imata yachanquichejchu! 50 Cayta mana reparanquichejchu: Kancunapajka aswan allin cashan uj runa wañunan tucuy Diospa ajllaska runasninpaj, manataj tucuynincuchu wañunanka, —nispa.

51 Chaytaka mana payllamantachu nerka. Astawanpis yupaychana-wasimanta curaj chay wata caskanraycu sutꞌincharka Jesús wañunanta Diospa ajllaska israelcunanpaj. 52 Manataj israelcunallapajchu wañunan carka, manachayrí tucuy cay pachapi caj ajllacuskasninpaj. Wañunan carka tucuy Diospa wawasnin tucuynejmanta ujchaska canancupaj. 53 Chay pꞌunchaymantapacha chay camachejcunaka Jesusta wañuchinancupaj unancharkancu.

54 Chayraycu Jesuska manaña israelcunaj ñaupakencupi purerkañachu. Astawanrí Efraín llajtaman riporka. Chay llajtari chꞌin pampa kayllapi carka. Chaypitaj yachacojcunanwan caricorka.

55 Israelcunaj pascuancu pꞌunchaycuna kayllaña casharka. Ashqha runastaj tucuy camposmanta Jerusalenman rerkancu. Paycuna pascua ñaupajta sonkoncuta llimphuchaj cancu Diosta yupaychanancupaj. 56 Chay runastaj Jerusalenpi Jesusta mascꞌasharkancu. Yupaychana-wasipi sayashaskancupitaj paycunapura tapunacusharkancu:

—¿Imatataj yuyanquichej? ¿Jesuska manachu cay jatun pꞌunchaycunapaj jamonka?

57 Yupaychana-wasimanta curajcuna fariseoswan cayta camachiskancu: “Jesús maypichá cashaskanta yachajka willawaycu payta japꞌinaycupaj”, nispa. Chayraycu chay runaska ajinata parlasharkancu.