2 Pascua miqhuypi casharkancu. Supay Satanastaj Judasta sonkonpi yuyaychaskaña Jesusta jaywaycunanpaj. Judaska Simonpa wawan, Iscariote niska carka. 3 Jesusri yachaskaña tucuy imata atiyninman Tatan jaywaskanta. Yachaskañataj Diosmanta jamuskanta Diosman cutipushaskantapis. 4 Chay tucuyta yachaspataj Jesuska miqhuymanta jatarispa ponchonta lluchꞌucun, camachijinataj pꞌachallicun. 5 Mayllacunaman yacuta jichꞌaycuspa yachacojcunanpa chaquisninta mayllayta kallarin, chanta toallawan chꞌaquichin. 6 Chaquisnincuta mayllaspa Simón Pedroman chayan. Payri Jesusman nin:

—Señorníy ¿maytataj chaquisniyta mayllawanquirí?

7 Jesustaj payman cutichin:

—Kan mana yachanquichu cunan noka ruwashani, chayta. Khepatarí yachanqui, —nispa.

8 Pedroka nin:

—¡Ni jaycꞌaj chaquisniytaka mayllawanquimanchu! —nispa.

Jesustaj cutichin:

—Mana mayllayquimanchu chayka, mana nokawan ujchaskachu canqui, —nispa.

9 Simón Pedrotaj nin:

—Señorníy, ama chaquisnillaytaka, manachayrí maquisniyta umaytawan mayllaway, —nispa.

10 Jesustaj payman nin:

—Llimphuchaskaña cajka manaña mayllanachu. Manachayka chaquisnillanta mayllana tiyan juchamanta llimphuchaska caskanraycu. Kancunaka llimphuchaskasña canquichej, astawanrí mana tucuyniyquichejchu, —nispa.

11 Jesuska yacharka pichus payta jaywaycunanta. Chayraycu nerka: “Mana tucuyniyquichejchu juchamanta llimphuchaskas canquichej”, nispa.

12 Chaquisnincuta mayllaytawan pꞌachanta churacorka. Ujtawan tiyaycuspataj paycunaman nerka:

—¿Entiendenquichejchu cayta kancunawan ruwaskayta? 13 Kancuna sutichawanquichej, “Yachachejníy, Señorníy”, nispa. Chaypuni caskayraycu chekata niwanquichej. 14 Imaynatachus noka, Señorniyquichej mayllayquichej, ajinallatataj kancunapis chaquisniyquichejta mayllanacuychej. 15 Ricuchiyquichejña kancunapura quiquillantataj ruwanayquichejpaj. 16 Chekatapuni niyquichej, camacheka mana aswan curajpaj khawaskachu camachejninmantaka. Nitaj cachaskapis aswan curajpaj khawaskachu cachamojninmanta niskaka. 17 Sichus cayta yachanquichej chayka, cusiska canquichej cayta ruwaspa.

18 ‘Maykencunachus ajllacuskasniy cancu paycunata noka rejsini. Chayraycu mana tucuy kancunamantachu parlashani. Nokamanta Diospa palabranpi cay kelkaska juntꞌacunan tiyan. Nin: “Tꞌantayta miqhojka contraypi sayaycuspa chaquinta okharin”, nispa. 19 Manaraj cayjina cashajtin willayquichej ruwacojtinña yachanayquichejpaj. Nokaka niskaymanjina caskaytataj creenquichej. 20 Chekatapuni niyquichej: Cachamuwajniyta japꞌejka nokata cusiywan japꞌiwan. Nokata japꞌejka cachamuwajniyta cusiywan japꞌin, —nerka Jesús.

21 Chay imasta nispataj Jesuska sonkonpi mayta llaquicorka nerkataj:

—Chekatapuni niyquichej: Kancunamanta ujniyquichej jaywaycuwaj rishan, —nispa.

22 Yachacojcunantaj tꞌucuspa paycunapura khawanacorkancu. Ni imata yachaspataj pimantachus parlaskanta yachayta munasharkancu. 23 Yachacojcunanmanta ujnin, Jesús munacorka chay, paywan cusca tiyaska casharka. 24 Ajinapi Simón Pedroka chay yachacojman chꞌillmipayarka pimantachus Jesús parlashaskanta tapunanpaj. 25 Chay yachacojka Jesusman astawan kayllaycurispa taporka:

—Señorníy ¿pitaj chayrí? —nispa.

26 Jesustaj cuticherka:

—Noka tꞌantata jokꞌochaspa payman kosaj. Chaymin payka, —nispa.

Ajinaka tꞌantata jokꞌochaspa Simonpa wawan Judas Iscarioteman korka. 27 Chay tꞌantata japꞌejtincama supay Satanás Judasman yaycorka. Jesusri Judasta nerka:

—Imatachus ruwashanqui chayta ruwallayña uskhayta, —nispa.

28 Chaypi tiyaska cashajcunamantarí imapajchus parlaskanta ni mayken repararkancuchu. 29 Judaska kolke jallchꞌajnincu carka. Chayraycu waquin yuyarkancu Jesús payman cayta niskanta jatun pꞌunchaycunapaj rantinanpaj, chayrí, wajchasman konanpaj. 30 Ajinata tꞌantata japꞌiytawancama Judaska llojserka. Tutataj carka.

31 Judas llojsejtincamataj Jesuska nerka:

—Cunanka noka, Diospa cachaska Runan, jatunchaskaña cashani, Diospis nokawan jatunchaska cashan. 32 Chayraycu ajinallatataj paywan Dios jatunchawanka. Cunanpachataj jatunchawanka. 33 Munaska wawasníy, manaña unaytañachu kancunawan casaj. Mascꞌawanquichejtaj. Israel curajcunaman nerkani, ajinallatataj cunan kancunamanpis niyquichej: Noka ripushani, chayman kancuna mana atinquichejchu chayamuyta. 34 Uj mosoj camachiskata koyquichej: Kancunapura munanacuychej. Imaynatachus nokapis munacorkayquichej quiquinta kancunapis munanacuychej. 35 Ajinata purajmanta munanacuspa causajtiyquichej tucuy runas yachankancu yachacojcunay caskayquichejta, —nerka Jesús.

36 Simón Pedrori payta nerka:

—Señorníy ¿maymantaj rishanqui?

Jesustaj cuticherka:

—Noka rishani, chaymanka cunan mana khatiwayta atiwajchu. Khepatarí khatiwanqui, —nispa.

37 Pedroka payta nerka:

—Señorníy ¿imaraycutaj cunan khatisuyta mana atiymanchu? Kanraycu causayniyta konaypajpis waquichiska cani, —nispa.

38 —¿Causayniyquita nokaraycu kowajchu? Chekatapuni niyqui: Manaraj gallo wakashajtin quinsa cutita ninqui, nokata mana rejsiwaskayquita, —nispa.