—Yachachejníy, yachaycu Diosmanta cachamuska yachachej caskayquita. Mana Dios paywan cajtenka ni pipis ruwayta atinmanchu kanpa ruwaskayquijina ricuchinastaka, —nispa.

3 Jesusri payman nerka:

—Chekatapuni niyqui: Diosta Camachejninpaj rejsinanpaj uj runa watejmanta naceska canan tiyan, —nispa.

4 Nicodemo payta nerka:

—¿Imaynatataj uj runa machuña caspa watejmanta nacecuyta atinman? ¿Imaynataj chayrí? Ni jaycꞌaj atinmanchu uj runa mamanpa wijsanman ujtawan yaycuyta nacecuytatajka, —nispa.

5 Jesusri cuticherka:

—Chekatapuni niyqui: Diosta Camachejninpaj rejsinancupaj uj runaka yacunejta Santo Espiritunejtapis nacecunan tiyan. [Ajinapi juchamanta llimphuchaska cajtin, Santo Espíritu mosoj causayta kon.]^a 6 Runamanta nacecojka runalla. Santo Espiritumanta nacecojrí Diospa wawanmin. 7 Ama tꞌucuychu, “Watejmanta nacecunayquichej tiyan”, nisuskaymanta. 8 Wayraka maymanchá munan chayman wayrallan. Wayraskanta uyarispataj wayra caskanta reparanqui. Maymanta jamuskanta mayman riskantataj mana yachanquichu. Ajinamin Santo Espiritumanta nacecojka, —nerka Jesús.

9 Nicodemotaj payta taporka:

—¿Imaynataj cayka canmanrí?

10 Jesustaj payman cuticherka:

—Chay israelcunaj yachachejnin canqueka. ¿Manachu yachanqui cay imasmanta? 11 Chekatapuni niyqui: Yachaskaycu chayta parlaycu, ricuskaycu chaytataj willaycu. Willaskaycutari mana japꞌinquichejchu. 12 Cay pacha imasmanta nerkayquichej manataj creerkanquichejchu. Chanta ¿imaynatataj creewajchej janaj pacha imasmanta willayquichejman chayka?

13 ‘Ni pipis janaj pachaman wicharerkachu, manachayrí janaj pachamanta uraycamojlla, Diospa cachaska Runallan. Payka Dioswanpuni tiyacun. 14 Moisespis unayña chꞌin pampapi uj catarita cꞌaspipi warqhuspa okharerka onkoska runas khawanancupaj. Diospi japꞌicuspa, chay catarita khawaskancuraycu, Dios paycunata thañicherka. Ajinallataj Diospa cachaska Runan okhariska canan tiyan 15 tucuy runa paypi japꞌicojka wiñay causayniyoj cananpaj.

16 Dioska tucuy runasta maytapuni munacorka. Chayraycumin cꞌata Wawanta korka. Cay pachaman payta cachamorka paypi tucuy japꞌicojka ama wiñaypaj wañupunanpaj astawanrí wiñay causayniyoj cananpaj. 17 Diosrí mana cay pacha runasta juchachananpajchu Wawanta cachamorka, manachayrí cay pacha runas paynejta juchamanta cachariskas canancupaj. 18 Paypi japꞌicojka mana juchachaskachu. Paypi mana japꞌicojrí juchachaskañamin, Diospa cꞌata Wawanpi mana japꞌicuskanraycu. 19 Cheka cꞌanchay Cristoka tucuy runasman jamorka. Runastaj sajra lakhayayta astawan munacorkancu paymanta niskaka, ruwaskasnincu sajra caskanraycu. Chayraycu Dioska paycunata juchachan. 20 Sapa uj manacajta ruwajka cheka cꞌanchayta chejnin. Manataj Cristoman jamunchu ruwaskasnin sajra caskan mana ricuchiska cananpaj. 21 Cheka cajta ruwajrí Cristoman jamun sumaj ruwaskasnin sutꞌi ricuchiska cananpaj, Diospa atiyninnejta ruwaska caskanraycu.

22 Chay khepata Jesús yachacojcunanwan llojserka Judea jallpꞌaman. Chaypitaj caricorka paycunawan runasta bautizaspa. 23 Juanpis bautizashallarkataj Enonpi Salim kayllapi, chaypi ashqha yacu caskanraycu. Runastaj jamullaj cancu bautizacoj. 24 Juanri manaraj carcelpi wiskꞌaskarajchu carka. 25 Ajinapi chay bautismo jawa uj japꞌinacuy kallaricorka Juanpa yachacojcunanwan uj israel runawan. 26 Yachacojcunantaj Juanman jamuspa nerkancu:

—Yachachejníy, Jordán mayu chimpapi kanwan carka chay runa, paymanta willarkanquipis. Chay runaka cunan bautizashan tucuytaj payman rishancu, —nispa.

27 Juantaj cuticherka:

—Dios kojtillan runaka imatapis japꞌiyta atin. 28 Kancuna quiquiyquichej yachanquichej cay niskayta: Noka mana chay Cristochu cani. Manachayka paypa ñaupakenta Diospa cachamuskallan cani, —nispa.

29 Nerkataj:

—Casamientopijina casaracoj kharimin curajpaj khawaskaka casaracushaskanraycu. Amigonrí paywan cashaspa payta uyarispataj anchata cusicun. Ajinallataj nokapis may cusiska cani Jesús jatunchaska caskanraycu. 30 Payka astawan astawanraj curajpaj khawaska canan tiyan. Nokataj astawan pisillapajña khawaska canay tiyan.

31 ‘Diosmanta jamojka tucuy runasmanta aswan atiyniyojmin, payka aswan curaj caskanraycu. Cay pachamanta runaka cay pacha imasllamanta parlan cay pachallamanta caskanraycu. Diosmanta jamojrí tucuy runasmanta aswan curajmin. 32 Diosmanta ricuskanta uyariskantataj willan. Runasrí willaskasninta mana japꞌincuchu. 33 Willaskanta japꞌicoj runarí ricuchin Dios wiñaypaj cheka caskanta. 34 Diospa cachamuska Wawanka Diospa niskasninta parlan. Diostaj Espiritunta mana michꞌacuspa payman kon. 35 Dios Tataka Wawanta munacun, tucuy imatataj churarkaña paypa atiyninpi cananpaj. 36 Wawanpi japꞌicojka wiñay causayniyojmin. Wawanpi japꞌicuyta mana munajrí wiñay causayman mana yayconkachu. Astawanpis Diospa cꞌajaj phiñacuynin chay runapaj wiñaypaj cashan, —nerka Juan.