4 Samaria jallpꞌanejta rinan carka. 5 Ajinapi Samaria jallpꞌapi uj llajtaman chayamorka, Sicar sutiyojman. Chay llajtari Joséj jallpꞌan kayllapi carka. Tatan Jacobka unayña chay jallpꞌata Joseman koska. 6 Chaypitaj Jacobpa yacu pujyun carka. Puriskanmanta ancha saycꞌuska caspa Jesuska pujyu canto perkapi tiyaricorka samaricunanpaj. Chaupi pꞌunchayjinaña carka.

7-8 Jesusta sapallanta sakespa yachacojcunan llajtaman miqhunata rantej rerkancu. Chaycamataj uj samaria warmi Sicarmanta yacuta orkhoj jamorka. Jesustaj payta nin:

—Yacuta koriway, —nispa.

9 Chay warmitaj Jesusman nin:

—Israel runa caspa ¿imaynatataj noka samaria warmimanta yacuta mañacuwanquirí?

Israelcuna samariacunawan mana parlajchu cancu. Chayraycu warmeka ajinata taporka.

10 Jesusri payman cutichin:

—Dios mana michꞌacuspa runasman koskanta, ichapis mana yachanquichu. “Yacuta koriway”, nisojtapis ichapis mana rejsinquichu. Yachawajchus chayka, kan nokamanta mañacuwanquiman carka. Nokataj causachej yacuta koyquiman carka, —nispa.

11 Warmi payman nin:

—Señor, aysanayqui mana capusunquichu, pujyupis ancha uqhurajtaj cashan. ¿Maymantataj chay causachej yacu capusunquimanrí? 12 Ñaupa tatanchej Jacob cay pujyuta kowarkanchej. Cay pujyumanta pay, wawasnin, uywasnincupis ujyarkancu. Cunan ¿kan aswan curajchu paymanta cawaj?

13 Jesusri payman cutichin:

—Cay yacumanta ujyajka watejmanta chꞌaquichicun. 14 Nokaj koskay yacuta ujyajrí wiñaypaj ni jaycꞌajpis chꞌaquichiconkachu. Astawanpis koskay yacoka paypi yacu pujyujina canka. Wiñay causaypaj phullchimonka, —nispa.

15 Warmeka payman nin:

—Señor, chay yacuta koriway ama chꞌaquichicunaypaj nitaj cayman yacuman jamunaypajpis, —nispa.

16 Jesustaj payta nin:

—Riy, kosayquita wajyamuy. Chanta cutimuy, —nispa.

17 Warmeka cutichin:

—Mana kosayojchu cani, —nispa.

Jesusri payman nin:

—Chekata ninqui, mana kosayoj caskayquitaka. 18 Phishka cuti kharilliskaña canqui. Cunan causashanqui, chaytaj mana kosayquichu. Caytaka chekata ninqui, —nispa.

19 Warmi payman nin:

—Señor, Diospa willajnin caskayquita reparani. 20 Chayraycu caymanta yachayta munani: Tatasniycu nincu, cay orkopi yupaychanata. Kancuna israelcunataj ninquichej, Jerusalenllapi yupaychana caskanta. ¿Kanrí, ima ninquitaj?

21 Jesustaj payman nin:

—Doña, cay nisuskayta creey: Uj sumaj pꞌunchay chayamunña. Chay pꞌunchaypi Dios Tatata yupaychanquichej ni cay orkopichu nitaj Jerusalenpipischu. 22 Mana entiendeskayquichejta kancunaka yupaychanquichej. Nokaycutaj rejsiskaycuta yupaychaycu. Runasta juchamanta Cacharichejka israelcunamantamin jamun. 23 Arí, pꞌunchaycuna jamushan, cunantaj chay pꞌunchaycunaka. [Cunantajmin cheka yupaychajcuna Dios Tatata tucuy sonkowan cheka yuyaywantaj payta yupaychanancu.]^a Chayjina yupaychajcunata Dios Tataka munan. 24 Diospa caynenka Espiritumin manataj ricucunchu. Payta yupaychajcunataj tucuy sonkowan cheka yuyaywantaj yupaychanancu tiyan, —nin Jesús.

25 Warmeka payman nin:

—Arí, yachani Diospa ajllaskan Cristo jamunanta. Pay chayamuspa tucuy imasta sutꞌinchawasajcu, —nispa.

26 Jesusri payman nin:

—Noka Cristo cani, kanwan parlaspa, —nispa.

27 Ajinata parlashajtincutaj yachacojcunanka cutimorkancu. Tꞌucorkancutaj Jesús uj warmiwan parlashaskanmanta. Chay jawarí mana payta nerkancuchu: “¿Imatataj munanqui?” chayrí “¿Imatataj paywan parlashanqui?” nispapis.

28 Warmirí pꞌuñunta sakespa llajtaman rerka. Chaypitaj runasta nerka:

29 —Jamuychej uj runata ricoj. Payka tucuy ruwaskayta niwan. ¿Manachu cayka Cristo canman? ¿Imaynataj canmanrí?

30 Chanta llajtamanta llojsimorkancu Jesús casharka, chayman jamunancupaj.

31 Chaycamataj yachacojcunanka Jesusta nisharkancu:

—Yachachejníy, miqhullayña, —nispa.

32 Payrí paycunaman nerka:

—Nokajta sumaj miqhunay capuwan. Kancunari chaymanta mana yachanquichejchu, —nispa.

33 Chayraycu yachacojcunanka paycunapura ninacusharkancu:

—Manachá pipis miqhunanpaj apamunmanchu carka, —nispa.

34 Jesustaj paycunaman nin:

—Nokajtaka wajjina miqhunamin. Cachamuwajniypa munayninta ruwanay, paypa ruwayninta tucunaypis miqhunajina nokapajka. 35 Caypi caj chajrasta ricuspa nishanquichej, tawa quillaraj cashan cosecha okharinapajka. Nokataj niyquichej: Allinta khawariychej ricunayquichejpaj cay waj laya chajrasta. Runaska pokoska chajrajinañamin. Wiñay causayman pusananchejtaj cosecha okhariyjina. 36 Okharejka cusiywan chay wiñay causaypaj pokoyta okharishanña. Ajinapi tarpojka okharejwan cusca cusicuncu. 37 Cayka Diospa cosechanmanta nincujina: “Ujmin tarpojka wajtaj okharejka”, nispa. 38 Diospa cosechanpeka noka kancunata cacharkayquichej mana llancꞌaskallayquichejmanta okharimunayquichejpaj. Wajcuna llancꞌarkancu okharinayquichejpaj.

39 Chay samaria llajtamanta cajcuna ashqhas Jesuspi japꞌicorkancu warmej willaskanraycu: “Jesús tucuy ruwaskayta niwan”, nispa. 40 Chay samaria runastaj payman chayamuspa nisharkancu:

—Nokaycuwan kheparicuy, —nispa.

Ajinamanta chaypi iscay pꞌunchaycunata khepacorka. 41 Aswan ashqhastaj Jesuspi japꞌicorkancu paypa niskanta uyarispa. 42 Warmita nisharkancutaj:

—Mana kanpa niskallayquimantachu paypi japꞌicuycu, manachayrí pay quiquinta uyariskaycuraycu. Yachaycutaj cay runaka chekapuni cay pacha runasta juchamanta Cacharichej caskanta, —nispa.

43 Iscay pꞌunchayta chaypi caskanmanta Jesuska llojserka Galileaman rinanpaj. 44 Quiquin Jesusri cayta nerka: “Uj willajka pisipaj khawaskamin paypa quiquin llajtanpeka”, nispa. 45 Chayraycu Galileaman rerka. Chaymanjinataj Jerusalenpi jatun pꞌunchaycunapi tucuy ruwaskanta ricuskancuraycu Galilea runaska Jesusta cusiywan japꞌerkancu. Paycunapis jatun pꞌunchaypaj Jerusalenpi caskancu.

46 Ajinapi Jesús Galilea jallpꞌa Caná llajtapi yacuta vinoman tucucherka, chay llajtaman ujtawan chayamorka. Chaypachataj Capernaum llajtapi uj camachej runa carka. Paypa wawantaj onkoska casharka. 47 Cay runa uyarerka Jesús Judeamanta Galileaman jamushaskanta. Chayraycu pay jamorka Jesusman, niricusharkataj:

—Señorníy, waway wañojña rishan. Jamuy Capernaumman payta thañichipunawayquipaj, —nispa.

48 Ajinapi Jesús payman nerka:

—Sichus ricuchinasta mana ricuwajchej chayka, ni jaycꞌaj nokapi japꞌicuwanquichejmanchu, —nispa.

49 Camachejka payman nerka:

—Señorníy, jamullayña manaraj wawitay wañupushajtin, —nispa.

50 Jesús payta nerka:

—Rillayña, wawayqueka causashan, —nispa.

Jesuspa niskanta creespa chay runaka riporka. 51 Ripushaspataj camachisninwan ñanpi tincorka. Chay camachisnenka Capernaummanta payman willaj jamusharkancu. Willarkancutaj:

—Wawayqui causashan, —nispa.

52 Camachejka paycunata taporka:

—¿Ima horasmantañataj allinyacun?

Paymantaj nerkancu:

—Kayna chaupi pꞌunchaytajina sinchꞌi kꞌoñi onkoynin chincaporka, —nispa.

53 Tatantaj repararka chay horapi Jesús payman, “Wawayqui causashan”, niskanta. Paytaj Jesuspi japꞌicorka tucuy wasinpi cajcunapis.

54 Chay jatun ruwaskanwan Jesuska iscay caj cutitaña Galileapi atiyninta ricucherka. Cayri carka Judeamanta cutimuspa.