Caná llajtapi casamiento
2
Quinsa caj pꞌunchaypi Galilea jallpꞌa Canapi uj casamiento carka. Chaypitaj Jesuspa maman casharka. 2 Jesuspis yachacojcunanwan chay casamientoman wajyariskas carkancu. 3 Vino tucucapojtintaj maman Jesusta nin:—Manaña vinoncu canñachu, —nispa.
4 Jesustaj nin:
—Mamáy, chayka nokallamanta. Horayka manaraj chayamunchu, —nispa.
5 Mamanri yanapajcunaman nin:
—Imatachus nisonkachej chayta ruwaychej, —nispa.
6 Chaypitaj carka rumimanta sojta yacu pꞌuñus israelcuna llimphuchacunancupaj churaska. Chay pꞌuñusmanka sapa ujman pachaj botellajina yaycoj. 7 Jesustaj paycunata nin:
—Chay pꞌuñusman yacuta juntꞌachiychej, —nispa.
—Cunan wiserkospa apaychej dispenseroman, —nispa.
Paycunataj aparkancu. 9 Dispenseroka yacumanta ruwaska vinota mallerka. Payri mana yacharkachu maymantachus caskanta. Yacu wisej yanapajcunalla yacharkancu. Chaymanta dispenseroka casaracojta wajyaspa nin:
10 —Tucuy runamin ñaupajta sumaj caj vinota runasman jaywan. Runas sajsajtincutaj khepata lakꞌallataña jaywan. Kanrí cay sumaj vinota cunancama wakaychaskanqui, —nispa.
11 Cay ricuchinaspa kallariyninta Jesús ruwarka Galileapi caj Caná llajtapi. Chayta ruwaspa atiyninta runasman ricucherka. Yachacojcunantaj paypi japꞌicorkancu.
12 Chaymanta Jesús Capernaum llajtaman riporka. Pay, maman, waukesnin, yachacojcunan rerkancu. Chaypi pisi pꞌunchaycunallatawanña cacorkancu.
Yupaychana-waseka Dios Tatanpata
13 Israelcunaj pascua pꞌunchaycunancu kayllamusharkaña. Jesustaj Jerusalén llajtaman rerka. 14 Chayaspataj yupaychana-wasej pationpi tariparka chay vendej runasta. Paycuna vendej cancu Diosman jaywanaspaj bueycunata, ovejacunata, palomacunata. Taripallarkataj kolke cambiajcunata tiyaskasta. 15 Chaypi caj phalasmanta sekꞌonata ruwaspa Jesús yupaychana-wasimanta tucuy paycunata kharkomorka ovejasnincutawan bueyesnincutawanpis. Cambiajcunaj kolkesnincuta jichꞌarka mesasnincutapis tijrarka. 16 Palomata vendejcunaman nerkataj:
—Caycunata jawaman apaychej. Amañataj Tataypa wasinta khatu wasiman tucuchiychejchu, —nispa.
17 Yachacojcunanri Diospa palabranpi cay niskanta yuyaricorkancu: “Yupaychana-wasiyquita tucuy sonkoywan munacuskayraycu wakaychanaypaj causayniyta kosaj”.
18 Israel curajcuna chay ruwaskanmanta Jesusta nerkancu:
—Nokaycuman ricuchiwaycu ima atiywanchus chayta ruwaskayquita, —nispa.
19 Jesustaj paycunaman cuticherka:
—Ruwaskayquichejwan tucuchillaychej cay yupaychana-wasita. Nokataj quinsa pꞌunchaypi cayta jatarichisaj, —nispa.
20 Chay curajcunataj nerkancu:
—Tawa chunca sojtayoj wataspi wasichacushan cay yupaychana-waseka. Kanrí ¿quinsa pꞌunchaypichu cay yupaychana-wasita jatarichiwaj? —nispa.
21 Caytarí mana chay yupaychana-wasimantachu Jesús nerka. Manachayrí quiquin cuerponmanta parlasharka. 22 Jesús wañuymanta causarimojtin yachacojcunan yuyaricorkancu chayta niskanta. Diospa palabrantataj creerkancu, Jesuspa niskantapis.
Jesuska runaj yuyayninta yachan