—Wakaychacuychej fariseospa puraj uya caynincumanta. Chay puraj uyaka tꞌanta pokochina levadurajinamin. 2 Tucuy sumaj khataska cajpis kꞌala khataraska canka. Pacaska cajtaj sutꞌinchaska canka. 3 Arí, lakhapi parlaskayquichejka cꞌanchaypi uyariska canka. Wasi cꞌuchupi runaj ningrillanman chhichiskayquichejpis ashqha runasman^a khapariska canka, —nispa.

4 Yachacojcunanta Jesús nerka:

—Munacuskasníy, niyquichej ama ni jaycꞌaj manchachicunayquichejta cuerpollata wañuchejcunataka. Wañuchiskancumanta astawanka mana ni imatapis ruwancuñachu. 5 Noka niskayquichej pita manchachicunayquichej caskanta. Diosta manchachicuychej. Payka causayta khechuspa wiñay ninaman wijchꞌunanpaj atiyniyojmin. Chayraycu niyquichej: Diosta manchachiycuychej.

6 ‘Runas phishka phichitanca pꞌisketusta vendencu iscay phatitaspi. Chaywanpis cay phichitanquitasmanta Dios mana konkapunchu. 7 Kancunarí ashqha phichitanquitasmantaka may astawan yuyanarajmin canquichej. Umayquichejpi chujchaspis ujmanta uj yupaskas cancu. Amaña manchachicuychejchu.

8 ‘Chaywanpis kancunata niyquichej: Pillapis runaspa ñaupakencupi nokaj camachiy caskanta willacun chayka, nokapis paymanta willallasajtaj. Noka, Diospa cachaska Runan, paymanta angelesninpa ñaupakencupi camachiy caskanta willasaj. 9 Runaspa ñaupakencupi mana camachiychu caskanta willajtaka nokapis paymanta willallasajtaj mana camachiychu caskanta Diospa angelesninpa ñaupakencupi.

10 ‘Pillapis noka, Diospa cachaska Runanpa contranpi sajrata parlan chayka, parlaskanmanta perdonaska canka. Santo Espíritoj contranpi sajrata parlajrí mana perdonaskachu canka.

11 ‘Tantacuna-wasiman, camachejcunaman, autoridadcunamanpis apasonkachej. Chaypacha ama chhicata manchachicuspa yuyaychejchu imaynatachus cutichinayquichejmanta chayrí imatachus ninayquichejmanta. 12 Santo Espiritumin chay ratupi yachachisonkachej imatachus ninayquichej caskanta, —nerka Jesús.

13 Chay ashqha runasmanta ujnin Jesusta nerka:

—Yachachejníy, nipuway waukeyta chayakeyta tꞌakapunawanta, —nispa.

14 Jesustaj nerka:

—Amigo ¿pitaj kancunapaj churawarka capuyniyquichejta tꞌakajta?

15 Chanta nillarkataj:

—Sumajta khawacuychej wakaychacuychejtaj tucuy munapayaymanta. Arí, runaka mana astawan causaytaka atinmanchu may chhica capuyniyoj cashaspapis, —nispa.

16 Chaymantaka uj quiquinchanawan parlarka. Nerkataj:

—Carka uj khapaj runa. Paypa haciendantaj may ashqhata pokorka. 17 Chanta kallarerka tanteyacuyta: Mana campoy canchu pokopuwaskanta jallchꞌanaypaj. ¿Imanasajtajrí? 18 Cayta ruwasaj. Pirwasniyta urmachispa aswan jatuchejta sayachisaj. Chaycunapitaj tucuy pokopuwaskanta tucuy capuyniytawan wakaychasaj. 19 Sonkoyta nisaj: May chhica capuyniy ashqha watapaj wakaychaska cashan. Cunanka samacapusaj, miqhucusaj, ujyacusaj, cusicusajtaj, nispa. 20 Diosrí payta nerka: “¡Mana yuyayniyoj runa! Cunan chꞌisipacha causayniyquita kopunayqui tiyan. Waquichiskasniyquita ¿pitaj japꞌenkarí?” 21 Ajinamin cashan pay quiquinpaj khapaj capuyta tantaj runawanka. Chay runaka Diospa khawayninpi mana imayoj, —nerka Jesús.

22 Chaywanpis Jesús yachacojcunanman nillarkataj:

—Chayraycu niyquichej amaña anchata llaquicuychejchu yuyaspa imatachus causanayquichejpaj miqhunayquichejta. Amañataj anchata yuyaychejchu cuerpoyquichejmanta imawanchus pꞌachallicunayquichejtaka. 23 Causayniyquichejka miqhunamanta astawanrajmin. Cuerpoyquichejpis pꞌachamanta astawanrajmin. 24 Sumajta reparacuychej alkamarismanta. Paycunaka mana tarpuncuchu nitaj ruthuncuchu. Mana canchu jallchꞌanancu ni pirwancupis. Chaywanpis paycunataka Dios miqhuchin. Kancunarí pꞌiskosmanta niskaka may astawanraj canquichej Diospajka. 25 Kancuna chay imasmanta anchata llaquicushajtiyquichejpis ¿uj chhica pꞌunchaycunatawan causayta atiwajchejchu? 26 Ancha pisi cajllatapis mana atispaka ¿imaraycutaj chhicata yuyashanquichej chay waj imasmanta?

27 ‘Sumajta reparaychej loma tꞌicasmanta imaynata wiñancu. Tꞌicaska mana llancꞌancuchu nitaj phushcancuchu. Chaywanpis niyquichej: Cay ujnin tꞌicajina cꞌachitutaka ni camachej Salomonpis, tucuy khapaj cayninwan, pꞌachallicorkachu. 28 Ajinata Dios pꞌachallichin khorata. Cunan pꞌunchay chajrapi cashancu. Kꞌayataj hornopi ruphachiska cankancu. ¿Manachu Dios astawanraj kancunataka pꞌachallichisonkachej? ¡May pisita Diospi japꞌicunquichej! 29 Amataj miqhunayquichejta ujyanayquichejtaka mascꞌaychejchu llaquicuspa. 30 Cay pacha runasmin Diosta mana rejsispa tucuy cay imasta mascꞌaspa causancu. Dios Tatayquichejka yachanmin cay imaspi pisichicuskayquichejtaka. 31 Astawanpis mayta munaychej tucuy imapi Dios Camachejniyquichej cananta. Chaymanta miqhunata pꞌachata ima yapasonkachej.

32 Dios Tatayquichejka yuyaskanmanjina munan Camachejniyquichej cayta. Chayraycu ama manchachicuychejchu, juchꞌuy tropa ovejasníy. 33 Capuyniyquichejta vendeychej. Qhuyacuywantaj wajcha runasman koychej. Cayta ruwaspa janaj pachapi khapaj cajta jallchꞌacushanquichej, manataj jaycꞌajpis cayka tucuconkachu. Jakayman mana yaycuyta atinchu suwa, nitaj thutapis thutaspa tucuchiyta atinchu. 34 Maypichá munaska khapayniyquichejpis cashan chaypipuni yuyayniyquichejpis cashan.

35 ‘Waquichiskaspuni caychej cutimunay pꞌunchaypaj. 36 Imaynatachus camachis camachejnincuta suyancu, ajinata kancunapis suyawaychej. Chay camachicunaka camachejnincuta casamientomanta cutimunanta suyancu. Ajinapi chayamojtincama puncuta quicharipuncu. 37 Camachejka chayamuspa paycunata rijchꞌashajta taripan. ¡May cusiskas chay camachicunaka! Chekamanta niyquichej: Pay waquichiconka paycunata tiyaycuchispataj miqhunata jaywanka. 38 Chaupi tutatapis chayrí gallo wakaytapis chayamunman. Sichus paycunata waquichiskasta taripan chayka, may cusiskas cancu chay camachicunaka. 39 Chay jawapis cayta yachaychej: Sichus uj wasiyoj yachanman ima ratutachus wasinman suwa jamunanta chayka, wakaychanman. Manataj sakenmanchu suwa juscꞌuspa wasinman yaycunanta. 40 Kancunapis waquichiskas cashaychej. Imaraycuchus mana suyanquichej cutimunayta, chay horatamin noka, Diospa cachaska Runan, cutimusaj.

41 Chanta Pedro taporka:

—Señorníy, ¿cay quiquinchanataka nokallaycupajchu parlashanqui chayrí tucuy runaspajchu?

42 Señortaj cuticherka:

—Parlashani juntꞌaj, sumaj yuyayniyoj khawapojmanta. Payjinataj caychej. Patronka payta churan camachisninta camachinanpaj, horasninpi miqhuchinanpajpis. 43 May cusiska chay khawapojka patronnin cutimojtin payta taripan ruwananta ruwashajta. 44 Chekamanta patronnenka tucuy capuyninta khawapunanpaj payta churanka. 45 Chay camachinrí sonkonpi ninman: “Patronniyka khepaconkaraj”, nispa. Chanta camachi kharista camachi warmistawan makarayta kallarin. Kallarintaj miqhuyllata, ujyayllata machacapuytawan. 46 Paypa patronnenka cutimonka mana yuyaskan horata. Chayamuspataj paytaka sinchꞌita ñacꞌarichenka, tucuy mana casojcunawan cuscataj churanka.

47 ‘Uj camachirí patronninpa munayninta yachashaspa mana waquichicunmanchu nitaj munaynintapis ruwanmanchu. Chay camacheka sinchꞌi ñacꞌarichiska canka. 48 Uj camachirí mana yachaspa sajrata ruwanman. Chay camacheka pisi ñacꞌarichiskalla canka. Uj runa ashqhata japꞌispaka ashqhallatataj cutichipunan tiyan. Uj khawapojpis ashqha ruwanasta japꞌispaka astawan ashqha ruwanasllatataj juntꞌanan tiyan.

49 Astawanpis Jesús nerka:

—Cay pachapi ninata japꞌichej jamorkani. Mayta munayman japꞌichiskaña cashananta. 50 Astawanrí sinchꞌi ñacꞌariyman^b yaycunay tiyan. Chaytataj muchunay tiyan juntꞌanaycama. 51 ¿Yuyanquichejchu runas uqhu allillanta causacunancupaj jamuskayta? Niyquichej, mana ajinachu. Astawanrí jamuskaywan runas tꞌakanaconkancu. 52 Chekamanta cunanmantapachaka uj wasipi phishka tiyacojcuna tꞌakanaconkancu. Quinsa iscaypa contranpi churanaconkancu, iscaytaj quinsaj contrancupi. 53 Tatan khari wawanpa contranpi churaconka, khari wawantaj tatanpa contranpi, maman warmi wawanpa contranpi, warmi wawantaj mamanpa contranpi, suegran khachunanpa contranpi, khachunantaj suegranpa contranpi churaconka, —nispa.

54 Chaywanpis Jesús ashqha runasman nerka:

—Cay Israel jallpꞌanchejpi, inti yaycuynejmanta phuyu llojsimojta ricuytawancama ninquichej: “Sumajta paramonka”, nispa. Parantaj. 55 Uramanta wayramojtintaj ninquichej: “Sinchꞌi koñi canka”, nispa. Ajinapunitaj tucun. 56 ¡Puraj uya runas! Cay pachata janaj pachatawan khawaspa imayna tiempochus cananta yachanquichej. Chanta ¿imaraycutaj mana reparanquichejchu imatachus Dios niyta munan cunan pꞌunchay ruwaskasniywan?^c 57 ¿Imaraycutaj kancuna quiquiyquichejka mana reparanquichejchu chekan cajmantarí?

58 ‘Contrallicusojniyqui curajpaman pusasojtenka, ñanllataraj rishaspa uskhayta paywan allinyacuy. Allinyacuy amaña jatun curajman pusasunanpaj nitaj soldadoman jaywaspa carcelman wiskꞌachisunanpaj. 59 Chekatapuni mana allinyacuwaj chayka, carcelmanta mana llojsimunquichu tucuy phatasta cutichipunayquicama, —nerka Jesús.