Jesús yachachin Diosmanta mañacuyta
11
Uj lugarpi Jesús Diosmanta mañacusharka. Tucushajtintaj yachacojcunanmanta ujnin nerka:—Señorníy, Diosmanta mañacuyta yachachiwaycu. Juanpis yachacojcunanta Diosmanta mañacuyta yachacherka, ajinata, —nispa.
2 Chayraycu Jesús paycunata nerka:
—Diosmanta mañacushaspaka niychej:
Janaj pachapi caj Tataycu, tucuy runas sutiyquita yupaychachuncu.
Mayta munaycu tucuyta camachinayquita.
Janaj pachapi munayniyqui ruwacushan, ajinallataj cay pachapipis ruwacuchun.
3 Causanaycupaj miqhunaycuta kowaycupuni sapa pꞌunchay.
4 Juchasniycuta khechuspa perdonawaycu;
nokaycupis perdonaycu tucuy juchata nokaycuman ruwajcunata.
Llaquiycunapi callpachawaycu ama juchallicunaycupaj, —nispa.
El Padre Nuestro
Uj quiquinchana mayta mañacoj amigomanta
5 Chaywanpis paycunata nerka:
—Kancunamanta ujniyquichej chaupi tutata amigonpa wasinman rispa ninman: “Amigóy, quinsa tꞌantasta ayniriway. 6 Uj amigoy ñan puriymanta cunallan chayamun wasiyman. Manataj ni imay canchu payman jaywarinaypaj”, nispa. 7 Amigoyquitaj wasi uqhumanta cutichispa nimunman: “Amaña molestawaychu. Puncoka tutapaj sumaj wiskꞌaskaña cashan. Wawasniytaj puñushancu nokawan. Mana atinichu jatarimuyta kosunaypaj”, nispa. 8 Chekatapuni chay runa manapis jatarinmanchu tꞌantata kosunanpaj amigon caskayquiraycu. Mayta mañacuskayquiraycurí jatariconka imatachus mañacuskayquitataj kosonka. 9 Astawanpis niyquichej: Mañacullaychejpuni, Diosmin kosonkachej. Mascꞌallaychejpuni, Diosmin tarichisonkachej. Wajyallaychejpuni,a Diostaj puncuta kancunaman quicharisonkachej. 10 Sapa uj mana sakespa mañacojka japꞌinpuni; mana sakespa mascꞌajtaj tarinpuni; mana sakespa wajyajmanpis puncoka quichariconkapuni, —nispa.
11 Jesús nillarkataj:
—Wawayqui tꞌantata mañacusojtin ¿payman uj rumita kowajchu? Chayrí, challwata mañacusojtin ¿paymanka uj catarita jaywawajchu? 12 Chayrí, runtuta mañacusojtin ¿uj atoj-atojta jaywawajchu? 13 Nipunichá. Kancuna tatas, pantaj runas cashaspapis, yachanquichej allin cajta koyta wawasniyquichejman. May astawanraj Dios Tatayquichejka janaj pachamanta Santo Espirituta konka paymanta mañacushajcunaman, —nispa.
Jesús chayrí Beelzebú
14 Jesús supayta uj runamanta kharkosharka. Chay runaka supayniyoj caskanraycu upa carka. Paymanta supay llojsejtintaj upaka parlarka. Runastaj parlaskanmanta tꞌucorkancu. 15 Waquincunarí nerkancu:
—Jesuska supaycunata kharkoshan curaj caj supay Beelzebúj atiyninwan, —nispa.
16 Waquintaj mana creeskancuchu Dios payta cachamuskanta. Chayraycu Jesusmanta mañasharkancu chayta ricuchinanta, uj janaj pachamanta tꞌucunata ruwaspa. 17 Jesusrí yuyaskasnincuta yachaspa paycunata nerka:
—Uj llajtapi tiyacojcuna paycunapura makanacojtincoka llajtancu chincapun; uj familiapis chhokonacuspa tucucun. 18 Ajinallataj Satanaswan cashan. Camachisnillantaj paywan makanacojtincoka atiynin tucuconka. Cayta niyquichej Beelzebúj atiyninwan supaycunata kharkoskayta niskayquichejraycu. 19 Ajinapis canman chayka, khatejcunayquichej ¿ima atiywantaj supaycunata kharkoncurí? Paycuna sutꞌitaka ricuchisonkachej. 20 Astawanrí noka Diospa atiyninnejta supaycunata kharkoskayka niyta munan Dios kancuna uqhupiña caskanta camachinanpaj, —nispa.
Nerkataj:
21 —Uj callpayoj runa makanaswan sumaj waquichin wasinta. Ajinapi khawajtin capuynenka sumaj wakaychaska cashan. 22 Uj astawan callpayoj runachus payman jamuspa atiparpan chayka, atinicuska makanasninta khechun. Capuynintataj chay callpayojka amigosninwan jaywanaycucun. [Nokapis ajinallatataj supay Satanasta atipaspa millay supaycunata kharkoshani.]b
23 ‘Mana nokaman sayacojka contraypi churacun. Mana nokata yanapawajtaj jarcꞌawan, —nispa.
Runaman cutimoj supaymanta
24 Jesús cay quiquinchanawan parlarka:
—Runamanta millay supaychus llojsin chayka, chꞌaquinejpi khasillata purin samariyta mascꞌaspa. Mana tarispataj nin: “Llojsimorkani, chay runaman cutiycapusaj”, nispa. 25 Supayka cutimuspa chay runata taripan uj pichaska sumaj allinchaska chꞌusajc wasitajina. 26 Chanta rispa paymanta aswan sajra kanchis supaycunata pusamun. Chaycuna yaycuspa runapi tiyacuncu. Ajinapi chay runaka khepata aswan millayman tucupun ñaupajmanta niskaka, —nispa.
Casucuymanta
27 Chay imasta Jesús parlashajtin uj warmi ashqha runaspa chaupincumanta khaparerka: —¡May cusicuyniyojmin onkocusorka ñuñuchisorkataj, chay warmeka! —nispa.
28 Jesusrí nerka:
—Cusicuyniyojllataj cancu Diospa niskanta uyarej casojcunaka, —nispa.
Bendecidos Son Aquellos que Escuchan y Obedecen
Jonás uj ricuchina
29 Ashqha runas payman yapacamushajtincu, Jesús kallarerka parlayta:
—Cunan pꞌunchay runaska sajracuna caspa uj ricuchinata mañashancu creenawancupaj. Diospa unay willajnin Jonaswan ruwacuskanjina chaylla cashan. 30 Jonaska uj ricuchina carka Nínive llajtapi tiyacoj runaspaj. Ajinallataj noka, Diospa cachaska Runanpis, uj ricuchina casaj cunan pꞌunchay runaspaj. 31 Sabá llajtata camachej warmeka ancha carumanta jamorka Salomonpa yachayninta uyarej. Reparaychej, kancunawan caypi cashani, Salomonmanta aswan curaj. Chayraycu Diospa cꞌajaj phiñacuynin pꞌunchaypi chay camachej warmi cunan pꞌunchay runasta juchachanka. 32 Ninivepi tiyacojcuna Jonaspa willaraskanta uyarispa juchasnincuta sakerkancu Diosman cutirinancupaj. Reparaychej, caypi cashani Jonasmanta aswan curaj. Chayraycu Diospa cꞌajaj phiñacuynin pꞌunchaypi Ninivepi tiyacojcuna cunan pꞌunchay runasta juchachankancu.
Uj quiquinchana cꞌanchaymanta
33 ‘Ni pipis uj cꞌanchayta japꞌichispa pacaycunchu; nitaj wichꞌi uraman churanchu. Astawanpis pataman churan yaycojcuna cꞌanchayta ricunancupaj. 34 Ñawiyqui cꞌanchayllawan ricun cuerpopaj. [Ajinallataj sonkoyquipis Diospa cꞌanchayninwan reparan. Sichus llimphu sonkoyoj canqui chayka, tucuy causayniyqui cꞌanchayniyojmin. Sajra sonkoyoj canquirí tucuy causayniyqui lakhapachamin.]d 35 Pajtataj Diospa cheka cꞌanchaynin causayniyquipi mana cashanmanchu. 36 Tucuy causayniyqui chay cꞌanchaywan juntꞌa cajtin, mana ni ima sajra yuyay kanpi canchu. Uj lliphipej cꞌanchaypis cꞌanchashasunquimanjina, Diospa cheka yachachiynenka cꞌanchasunqui, —nerka Jesus.
Jesús cꞌamin fariseosta
37 Jesús parlashajtin uj fariseo paywan miqhunanpaj wajyarka. Ajinamanta fariseoj wasinman yaycuspa miqhoj tiyaycucorka. 38 Israelcunaj mayllacunancu yachacuskancumanjina maquisninta mana mayllacuspa Jesús miqhusharka. Chayta ricuspa fariseoka tꞌucorka. 39 Jesusrí payta nerka:
—Kancuna fariseoska vasota chuwata jawallanta mayllanquichej. Sonkoyquichejrí munapayaywan sajra yuyaywan juntꞌa cashan. 40 ¡Mana yuyayniyojcuna! Dios jawanta ruwarka uqhunta payllataj ruwarka. ¿Chayta manachu reparanquichej? 41 Wajcha runasman tucuy sonkowan qhuyaspa koychej. Ajinapitaj tucuy ima llimphu cashan kancunapaj.
42 ‘¡Phutiy, ari, kancuna fariseospajka! Sapa chuncamanta ujta Diosman koshanquichej. Chayta koshanquichej yerbabuenamanta, rudamanta, chayjina juchꞌuy imasmantawanpis. Astawanpis runasman chekanta ruwayta Diosta munacuytawan konkapunquichej. Chaycunata ruwanayquichej carka, juchꞌuy imastapis ama konkaspalla.
43 ‘¡Phutiy, ari, kancuna fariseospajka! Tantacuna-wasispi curajcunaj tiyanasnincupi tiyacuyta munanquichej. Plazaspi sumajta napaycuchicuyta munallanquichejtaj.
44 ‘¡Phutiy, ari, kancuna fariseospajka! Pacaska aya pꞌampanasjina canquichej. Runaska mana yachaspa chay ismuyniyquichej patata purincu, —nispa.
Jesús cꞌamin israel yachachejcunata
45 Chaymanta israel yachachejcunamanta uj cutichispa Jesusta nerka:
—Yachachej, chayta nispaka nokaycutapis pꞌenkachillawaycutaj, —nispa.
46 Jesusrí nerka:
—¡Phutiy, ari, kancuna israel yachachejcunapajka! Kancuna yachachinasniyquichej llasa kꞌepistajina waj runaspaj waquichinquichej. Chaytataj camachinquichej runasta ruwanancuta kꞌepistajina kꞌepirichispa. Kancunarí chay camachiskasta ni casojllapis churacunquichejchu.
47 ‘¡Phutiy, ari, kancunapajka! Diospa unay willajcunanpa pꞌampanasnincuta cꞌachachashanquichej. Tatasniyquichejtaj chay willajcunata wañucherkancu. 48 Chay cꞌachachaskayquichejwanka ricuchishanquichej tatasniyquichejpa ruwaskancuwan ujlla caskayquichejta. Paycunaka Diospa willajcunanta wañucherkancu; kancunataj pꞌampanasnincuta cꞌachachanquichej.
49 ‘Chayraycu Dioska yachayninpi nin: “Paycunaman cachasaj willajcunaytawan cachasniytawan. Paycunamanta waquinta wañuchenkancu, waquintataj ñacꞌarichenkancu”. 50 Cay pacha kallaricuymantapacha Diospa unay willajcunanmanta ashqhas wañuchiskas carkancu. Tucuy chay wañuchiskacunamanta cay pꞌunchay runas juchachaskas cankancu. 51 Sumajta reparanayquichejpaj niyquichej: Abel sutiyojmanta Zacariascama cay pꞌunchay runas Diosman cuentata konancu tiyan. Zacariaska yupaychana-wasej ñaupakenpie wañuchiska carka.
52 ‘¡Phutiy, ari, kancuna israel yachachejcunapajka! Diosta rejsinancupaj yachachinasta runasmanta pacarkanquichej. Kancuna quiquiyquichejpis Diosta rejsej mana churacorkanquichejchu. Diosta rejsiyta munajcunatapis jarcꞌarkanquichej, —nerka Jesús.