—Ñanniyquichejpaj ama ni imatapis apacuychejchu. Nitaj cꞌaspita purinayquichejpaj, nitaj wayakata nitaj tꞌantata nitaj kolketa nitaj iscay camisastapis apacuychejchu. 4 Mayken wasillamanpis wajyaricusonkachej chayka, chaypi cacuychej llajtamanta llojsipunayquichejcama. 5 Runas mana wajyasojtiyquichejka chay llajtamanta llojsipuychej. Chaquisniyquichejmantataj jallpꞌanta thalaycarpaychej chay runaspa contrancupi. Chaywan runas yachankancu Diospa willanasninta khesachaskancuta, —nispa.

6 Chanta Jesuspa cachasnin llojsispa purerkancu ranchomanta rancho. Tucuynejpi sumaj willanasta willarasharkancu onkoska runastataj thañichisharkancu.

7 Jesuspa tucuy ruwaskasninmanta uyarispa camachej Herodes ni imata yuyayta atisharkachu. Waquinmin nisharkancu: “Juan causarimpun wañuymanta”, nispa. 8 Waquintaj nisharkancu: “Elías ujtawan riqhurimun”, nispa. Ujcuna nishallarkancutaj: “Unay willajcunamanta ujninchá causarimpun”, nispa.

9 Herodesrí nerka:

—Noka quiquiy Juanpa umanta khorucherkani. Cunan ¿pitaj cay runa pimanta tucuy cayta uyarishanirí?

Herodeska Jesusta ricuyta munasharkapuni.

10 Jesuspa cachasnin cutimuspa tucuy ruwaskasnincumanta payman willarkancu. Payri paycunata nerka:

—Jacu rina nokanchejpuralla wajnejman, —nispa.

Betsaida llajtanejman rerkancu. 11 Chaynejman riskancuta yachaspa, ashqha runas Jesusta khaterkancu. Jesús paycunata ricuspa nerka:

—Cusicuni jamuskayquichejmanta, —nispa.

Paycunamantaj Dios munacuywan camachin, chaymanta parlasharka. Onkoska runastapis thañichisharka.

12 Chꞌisiyashajtintaj yachacojcunanka kayllaycuspa Jesusta nerkancu:

—Cachapullayña cay ashqha runasta. Richuncu kaylla ranchosman wasisman miqhunata puñunata mascꞌanancupaj chꞌin pampapi caskanchejraycu, —nispa.

13 Jesusrí paycunata nerka:

—Kancuna paycunata miqhuchiychej, —nispa.

Paycunataj cuticherkancu:

—Phishka tꞌantaswan iscay challwitasllapiwan capuwaycu. Tucuy cay runaspaj miqhunata rantej rinaycutachu yuyawaj, nipunichá, —nispa.

14 Chaypimin carkancu phishka warankajina, kharislla yupaska. Jesusrí yachacojcunanman nerka:

—Cay runasta tiyaycuchiychej tꞌaka tꞌakallata phishka chuncamanta phishka chunca, —nispa.

15 Ajinata ruwarkancu. Tucuytaj tiyacorkancu. 16 Chanta Jesuska chay phishka tꞌantasta iscay challwitastawan maquisninpi japꞌerka. Janaj pachata khawarispataj Diosman graciasta korka tꞌantasmanta challwitasmantawan. Chaycunata partispataj yachacojcunaman jaywasharka paycuna runasman konancupaj. 17 Tucuy runastaj miqhuspa sajsacorkancu. Yachacojcunataj chay puchoj partiska miqhunasmanta chunca iscayniyoj canastas juntꞌata okharerkancu.

18 Uj cuti Jesús sapallan Dioswan parlacusharka. Kayllanpitaj yachacojcuna casharkancu. Paycunata Jesús taporka:

—Ashqha runas nokamanta parlaspa ¿pi caskaytataj nincu?

19 Yachacojcunataj payman cuticherkancu:

—Waquin nincu, bautizaj Juan. Waquin nincu, Elías. Waquinri, ujnin Diospa unay willajcunanmanta, chaychá causarimpuskan, nisuncu.

20 Jesús paycunata tapullarkataj:

—Kancunarí, ¿pi caskaytataj ninquichej?

Pedrotaj cuticherka:

—Kan Diospa ajllaskan Cristomin canqui, —nispa.

21 Chanta Jesús paycunata sinchꞌita camacherka ama pimanpis chayta willanancuta.

22 Paycunaman willarka:

—Noka, Diospa cachaska Runan, anchata ñacꞌarinay tiyan Diospa munayninmanjina. Israel curajcunawan yupaychana-wasipi curajcunawan yachachejcunapiwanpis, tucuy paycuna chekatapuni nokata khesachawankancu wañuchiwankancutaj. Quinsa pꞌunchaymantari causarimpunay tiyan, —nispa.

23 Tucuy runasta nisharkataj:

—Pichus munan yachacojniy cayta nokawan riytapis chayka, sakenan tiyan quiquin munayninta. Chaywanpis sapa pꞌunchay nokaraycu pay quiquinpi muchunan tiyan. Nokatataj casunawanpuni tiyan wañunancama. 24 Chekatapuni pillapis causayninta payllapaj wakaychacuyta munajka mana wiñay causayniyojchu canka. Pillapis causayninta cay pachapi chincananta sakejka nokata casuwaskanraycu chayka, chekatapuni payka wiñay causayniyoj canka. 25 Reparaychej: Sichus uj runa cay pachantintapis japꞌinman pay quiquinri wiñaypaj chincapunmantaj chayka ¿ima allin canman paypajrí? 26 Pillapis nokamanta niskasniymantapis pꞌenkacunman chayka, nokapis cutimuspa paymantaka pꞌenkacullasajtaj. Noka, Diospa cachaska Runanka, cutimusaj jatun atiyniywan, Tatay Diospa atiyninwan, angelesninpa atiynincuwanpis. 27 Chekatapuni willashayquichej: Cunan caypi cashajcunamanta waquin mana wañonkancuchu Dios camachinanpaj jamuskanta ricunancucama, —nispa.

28 Chayta niskantawan pusaj pꞌunchaymantajina Jesús orkoman rerka Dioswan parlaj. Pusarkataj Pedrota, Juanta, Jacobotawan. 29 Jesús Diosmanta mañacushajtin uyanpa rijchꞌaynin wajjinaman tucorka. Pꞌachasninpis sumaj yuraj lliphipejjinaman tucorkancu. 30-31 Khaway, iscay runas, Moisés Eliaspiwan, janaj pachamanta Diospa lliphipishaj atiyninwan riqhurimorkancu. Jesuspa wañuyninmanta parlanacusharkancu, chayta Jerusalenpi juntꞌanantaña Diospa yuyaskanmanjina. 32 Pedrotawan paywan cajcunatawantaj puñuy atiparka. Puñushaskancumanta rijchꞌarispataj Jesuspa lliphipej cꞌanchayninta ricorkancu iscay runastawan paywan sayashajta. 33 Chay runas Jesusmanta ripunayashajtincu Pedro Jesusta nerka:

—Yachachejníy, sumajta caypi cashanchej. Ruwaycuman quinsa chꞌujllasta, ujta kanpaj, ujta Moisespaj, ujtataj Eliaspaj, —nispa.

Pedroka chayta nerka mana yachaspa imatachus parlananta.

34 Parlashajtin uj phuyu riqhurimuspa paycunaman uraycamorka. Yachacojcuna phuyupi caspa manchachicorkancu. 35 Phuyumanta uj parlamushajta uyarerkancu:

—Caymin ajllaska Wawayka. Payta uyariychej, —nispa.

36 Chay parlamojta uyarishaspataj Jesusta sapallanta ricorkancu. Chꞌinlla cacorkancu manataj ni piman ricuskancuta willarkancuchu chay pꞌunchaycunapi.

37 Kꞌayantin orkomanta uraycamojtincuña ancha ashqha runas Jesuswan tincorkancu. 38 Chay qꞌisqui runasmanta ujnin khaparerka:

—Yachachejníy, mañacuyqui wawayta thañichinapaj khawaripunawayquita pay sapan waway caskanraycu. 39 Supay payta japꞌishanpuni. Ujllata wawata khaykeyachin. Supaytaj payta tꞌucuchin. Phosokojina llausa surun siminmanta. Supay payta chokaycachachishanpuni manataj payta munanchu sakeyta. 40 Ñapis yachacojcunayquita mañarkaniña supayta kharkonancuta. Paycunarí mana aterkancuchu, —nispa.

41 Jesustaj nerka:

—¡Ay, Diospi mana japꞌicoj nitaj cheka yuyayniyoj runas! ¡Maycꞌajcamataj kancunawan casaj! ¡Maycꞌajcamataj kancunata muchuskayquichej!

Chaymanta jovenpa tatanman cuticherka:

—Cayman pusamuway wawayquita, —nispa.

42 Joven kayllamojtintaj supay pampaman urmachispa tꞌucuwan japꞌiycucherka. Jesusri supayta sinchꞌiwan cꞌamerka, joventataj thañicherka. Chanta joventa tatanman koporka. 43 Tucuy runastaj manchaytapuni tꞌucusharkancu Diospa may jatun atiyninmanta.

Tucuy runas Jesuspa ruwaskasninmanta tꞌucushajtincutaj payka yachacojcunanta nerka:

44 —Cay niskayta yuyayniyquichejpi sumajta japꞌicuychej: Noka, Diospa cachaska Runanka, sajra runaspa maquisnincuman jaywaskaña caj rishani, —nispa.

45 Yachacojcunari mana yacharkancuchu Jesuspa niskanka imatachus niyta munaskanta. Pacaska carka yuyaynincumanta, chayraycu mana repararkancuchu. Chaywanpis chay niskanmanta payta tapuyta manchachicorkancu.

46 Chanta yachacojcunaka churanacuyta kallarerkancu maykenchus paycunamanta aswan curaj cananmanta. 47 Jesusrí yacharka sonkosnincupi tanteyaskancuta. Chayraycu uj wawata japꞌispa ladonpi sayacherka. 48 Chantaka yachacojcunanman nerka:

—Nokapi japꞌicojka cayjina wawata, “Walejta jamunwanqui”, nispaka noka quiquiyta nishawan. Nokata, “Walejta jamuwanqui” niwajka, cachamuwajniytapis nishallantaj. Tucuy kancunamanta aswan pisipaj khawacoj cajmin chekamanta curaj cajka cashan, —nispa.

49 Chanta Juan Jesusta nerka:

—Yachachejníy, ricorkaycu uj runata atiyniyoj sutiyquiwan supaycunata kharkoshajta. Mana kanta nokaycujina khatej caskanraycu payta jarcꞌayta kallarerkaycu, —nispa.

50 Jesús nerka:

—Amaña jarcꞌaychejchu payta. Mana contrayquichejpi cajka kancunaj allinniyquichejpaj cashan, —nispa.

51 Dios janaj pachaman Jesusta ujtawan pusanan carka. Chay pꞌunchaycuna kayllamojtin Jesús ajinata tucuy sonkowan yuyacorka Jerusalenman rinanta. 52 Paypa ñaupakentataj willajcunata cacharka. Rispataj yaycorkancu Samariapi ujnin llajtaman Jesuspaj waquichipunancupaj. 53 Samaritanocunarí Jesús chaypi khepacunanta mana munarkancuchu Jerusalenman rishaskanta sutꞌita reparaskancuraycu. Jerusalenpi tiyacojcunawantaj chejniskas carkancu. 54 Iscay yachacojcunataj, Juan Jacobopiwan, chayta ricuspa Jesusta nerkancu:

—Señorníy ¿munawajchu janaj pachamanta ninata uraycuchimunanchejta cay runasta ruphaycuchinapaj? Elías ruwarka, chayjinata, —nispa.

55 Chanta Jesús paycunaman cutirispa cꞌamerka:

—Mana yachanquichejchu sonkoyquichejpi yuyaskayquichejka maymantachus caskanta. 56 Noka, Diospa cachaska Runanka, runaspa causaynincuta cacharinaypaj jamorkani manataj paycunata tucuchinaypajchu, —nispa.

Chaymanta waj llajtaman riporkancu.

57 Rishajtincutaj, uj runa Jesusta ñanpi nerka:

—Kanwan cusca risaj maymanchá rejtiyquipis, chayman, —nispa.

58 Jesustaj cuticherka:

—Atojcuna juscꞌusniyoj, phawashaj pꞌiskospis thapasniyoj cancu. Noka, Diospa cachaska Runanrí, mana wasiyojchu cani, —nispa.

59 Waj runata Jesús nerka:

—Jamuy, yachacojniy cay, —nispa.

Payrí nerka:

—Señorníy, ñaupajta sakellawayraj tatayta pꞌampamunayta, —nispa.

60 Jesustaj cutichispa nerka:

—Wañuskacuna wañuskasnincuta pꞌampamuchuncu. Kanrí, riy, Dios camachin, chaymanta willarallaypuni, —nispa.

61 Ujnintaj Jesusta nerka:

—Señorníy, khatiskayqui yachacojniyqui canaypaj. Ñaupajtaka sakellaway wasiypi cajcunamantaraj cacharpayacamunayta, —nispa.

62 Jesusrí payta nerka:

—Waquin runas munashancu llancꞌayta Dios tucuyta camachinanpaj, manataj quiquin munaynincuta sakencuchu. Waj ladoman khawaspa surcꞌaj runaka mana allintachu surcꞌan. Ajinallataj quiquin munaynillanta ruwajka mana allinchu llancꞌan Dios tucuyta camachinanpaj, —nispa.