4 Runas ashqha llajtasmanta Jesusman jamorkancu. Ashqha runas tantacojtincutaj Jesús cayjinata quiquincharka:

5 —Uj runa mujuta tꞌacaj llojserka. Tꞌacashajtin waquin mujoka ñan pataman urmarka. Chay muju saruska carka. Pꞌiskostaj pallacaporkancu. 6 Waquin mujutaj pisi jallpꞌayoj rumi pataman urmarka. Llojsispataj chꞌaquicaporka mana jokꞌo caskanraycu. 7 Waquin mujoka qhishcas chaupiman urmarka. Cusca llojsimuspa qhishcaska trigota sipiycaporka. 8 Waquin mujutaj sumaj jallpꞌaman urmarka. Chay mujuri wachaspa sapa ujmanta pachajman pokorka, —nispa.

Chayta niytawan Jesús sinchꞌita nerka:

—¡Ningriyoj cajka sumajta uyarichun! —nispa.

9 Jesuspa yachacojcunan payta taporkancu:

—¿Ima ninayantaj cay quiquinchanarí?

10 Jesustaj nerka:

—Imaynatachus Dios runasta camachin, chay yachachinaska pacaska carka. Cunanrí kancunallaman Dios chay imasta sutꞌinchashasunquichej. Waj runasmantaj quiquinchanaswan yachachiska cashan. Chayraycu ricuncu manataj ricuskancuta entiendencuchu. Uyarincu manataj uyariskancuta reparancuchu.

11 ‘Chay quiquinchana cayta ninayan: Mujoka Diospa niskanmin. 12 Waquin mujus ñan kayllaman urmarkancu. Ajinallatataj runas Diospa niskanta uyarincu. Chay quiquinpachataj supay Satanás jamuspa Diospa niskanta sonkoncumanta orkhopun. Manataj sakenchu runas Diospa niskanta japꞌicunancuta cachariskas canancupaj. 13 Waquin mujustaj pisi jallpꞌayoj rumi pataman urmarkancu. Ajinallatataj waquinpis Diospa niskanta uyarispa cusiywan creellancu. Sonkoncumanrí mana sumajta yaycunchu. Pisi saphiyojjina cancu. Chayraycu pisi ratullapaj Diospa niskanta japꞌicuncu. Llaquiycuna jamojtinrí chay runas sumaj ñanmanta pantapuncu. 14 Waquin mujustaj qhishca chaupiman urmarkancu. Ajinallatataj waquinpis Diospa niskanta uyarincu. Chay runasrí anchataraj yuyashancu cay pacha imasmanta. Munashancu ancha khapaj capuyta causaynincupi yankha cusiytawan. Tucuy cay imas Diospa niskanta sipiycapuspa causaynincupi mana sakencuchu wiñananta. Nitaj pokoynenka canchu. 15 Waquin mujustaj allin jallpꞌaman urmarkancu. Ajinallatataj waquin runaspis cꞌacha sonkoncuwan Diospa niskanta sumajta casullancupuni. Paycunaka pokoyniyoj cancu Diosta cusichincutaj, —nispa.

16 Jesús nerkataj:

—Runas uj cꞌanchata japꞌichispa mana mancawan cꞌumpuycuncuchu. Nitaj tiyana uramanpis churancuchu. Astawanpis pataman churancu runas yaycuspa cꞌanchata ricunancupaj. [Imaynatachá cꞌanchaywan lakhapi cajcuna riqhurincu, ajinallataj mana yachaska cajpis uj pꞌunchay yachaconka. 17 Ajinallataj Diospa niskanwan cashan. Waquin runaspajka pacaska cashan. Nokarí reparanancupaj yachachispa Diospa niskanta sutꞌinchashani.]^a 18 Chayraycu sumajta khawacunayquichej tiyan imaynata uyarishaskayquichejta. Diospa niskanta japꞌicojmanka astawan koska canka. Mana japꞌicojmantarí japꞌiskanta yuyaskanpis khechuska canka, —nispa.

19 Jesuspa maman waukesninpiwan payta watoj jamorkancu. Payman mana chimpayta aterkancuchu qꞌisqui runas chaypi caskancuraycu. 20 Runas Jesusman cayjinata willarkancu:

—Mamayqui waukesniyquipiwan jawapi sayashancu tincusuyta munaspa, —nispa.

21 Jesustaj paycunaman nerka:

—Diospa niskasninta uyarincu casushancutaj, chaycunamin nokaj mamay waukesniypis cancu, —nispa.

22 Uj pꞌunchay Jesús uj barcoman yaycorka yachacojcunanwan. Paycunatataj nerka:

—Jacu rina kocha chimpaman, —nispa.

Ajinatataj rerkancu. 23 Rishajtincutaj Jesús puñucaporka. Uj sinchꞌi wayra lomasmanta uraycamuspa kochaman wayramorka. Ajinamanta barcoman yacu juntꞌaycuspa chincaycuchinayasharka. 24 Yachacojcunantaj Jesusman kayllaycuspa rijchꞌacherkancu:

—¡Yachachiwajníy! ¡Yachachiwajníy! Chincarishanchej, —nispa.

Paytaj rijchꞌarispa sinchꞌiwan camacherka sinchꞌi wayrata yacutapis okharicamojtapis. Chanta manaña wayrarkachu. Kochapis chꞌinyacaporka. 25 Jesustaj yachacojcunata nerka:

—¿Imaraycutaj Diospi mana japꞌicushanquichejchu?

Paycunarí mayta manchachicuspataj tꞌucorkancu. Ninacusharkancutaj:

—¿Imayna runapunitaj payrí? Camachin wayrata yacutapis. Payta casuncutaj, —nispa.

26 Paycunataj rerkancu Gadara jallpꞌaman. Chay jallpꞌaka Galilea kochaj chimpanpi cashan. 27 Jesús barcomanta jallpꞌaman llojsejtin paywan tincorka llajtamanta uj runa. Chay runaka supaycunayoj carka. Unayña payka mana pꞌachanta churacorkachu. Nitaj wasipipis tiyacojchu, astawanpis panteonpi. 28 Chay runataj Jesusta ricuspa khaparicorka. Jesuspa ñaupakenman konkoricuspa sinchꞌiwan nerka:

—Jesús, cꞌata Diospa Wawan ¿imaman chapucuwanqui? Sumajta mañacuyqui ama ñacꞌarichinawayquita, —nispa.

29 Chayta nerka Jesús sajra supayta runamanta llojsinanta camachishaskanraycu. Ashqha cutista supayka runata tꞌucuta japꞌichej. Runas fierro cadenaswan watanaswanpis payta sumajta wataj cancu. Supayniyoj runarí watanasta pꞌiterkayaj. Supaytaj payta chꞌin lugaresman apaj. 30 Jesustaj payta taporka:

—¿Imataj sutiyqui?

Cuticherkataj:

—Suteyka sojta waranka, Legión, —nispa. Ajina sutichaska carka payman ashqha supaycuna yaycuskancuraycu.

31 Chay supaycuna Jesusta mañacusharkancu:

—Ama uqhu pachaman rinaycuta camachiwaycuchu, —nispa.

32 Chaynejpi ashqha qhuchis orkopi korata miqhusharkancu. Supaycunaka Jesusta mañacorkancu:

—Sakellawaycu chay qhuchisman yaycunaycuta, —nispa.

Jesús paycunata sakellarka. 33 Runamanta llojsispa supaycuna qhuchisman yaycorkancu. Chanta qhuchiska cachaycucuspa kakamanta kochaman chꞌulticorkancu, jekꞌecaspataj wañurarkancu.

34 Cayta ricuspa qhuchi michejcunaka aykecorkancu. Paycunataj llajtapi ranchospipis chay imasmanta willamorkancu. 35 Chanta runas chay imasta ricoj llojserkancu Jesusman chimpaspa. Supaycuna llojserka, chay runatapis ricorkancu. Payka pꞌachalliska yuyayninpi Jesuspa chaquisninpi tiyacusharka. Chayta ricuspa runaska manchachicorkancu. 36 Chay ruwaskasta ricojcunataj jamojcunaman willasharkancu imaynatachus chay runa supaycunamanta cachariska caskanta. 37 Tucuy Gadara jallpꞌamanta runas Jesusta ripunanta mañarkancu anchata manchachicuskancuraycu. Mañaskancumanjinataj Jesús barcoman yaycorka kocha chimpaman cutinanpaj. 38 Chay supaycunamanta cachariska runarí Jesusta nicusharka:

—Sakellaway kanwan rinayta, —nispa.

Jesusrí payta cachaporka:

39 —Cutiriy tatasniyquiman. Willamuy Dios tucuy sumaj ruwapususkanmanta, —nispa.

Ajinamanta payka llajtantinman rispa willarasharka Jesús paypaj ruwapuskanta.

40 Kocha chimpapi ashqha runas Jesusta suyasharkancu. Chayraycu chayman cutejtin tucuynincu payta, “Walejta jamunqui”, nerkancu. 41 Chanta uj runa, Jairo sutiyoj, riqhurimorka. Pay uj curaj runa carka tantacuna-wasimanta. Jesuspa ñaupakenpi konkoricuspa mayta mañacorka Jesús wasinman rinanta, 42 ususin wañupunayashaskanraycu. Paypa sapa ususin carka, chunca iscayniyoj watayojjina. Jesustaj paywan rerka.

Jesús rishajtin ashqha runas qꞌisquicamuspa payta ñitꞌisharkancu. 43 Paycuna uqhupitaj carka uj onkoska warmi. Payka muchorka chunca iscayniyoj watata yawar apaywan. Tucuy capuynintapis tucuycorka medicoswan jampichicuspa. Nitaj ni mayken medicopis payta thañichiyta aterkachu. 44 Chay warmeka Jesuspa khepanman jamuspa ponchon tꞌicasninta japꞌirerka. Chay quiquinpacha yawar apayninmanta thañichiska carka.

45 Jesustaj nerka:

—¿Pitaj japꞌiricuwarkarí?

Tucuy runas nerkancu:

—Ni pipis japꞌiricusorkachu, —nispa.

Chanta Pedro nerka:

—Yachachejníy, ashqha runas qꞌisquicamuspa kanta ñitꞌishasuncu, —nispa.

46 Jesusrí nerka:

—Ujmin japꞌiricuwarka. Chekamanta noka reparani atiyniy uj runata thañichiskanta, —nispa.

47 Chay warmeka ruwaskanmanta yachacuskanta repararka. Chayraycu qharcatitispa Jesusman jamorka, ñaupakenpitaj konkoricorka. Tucuy runaspa ñaupakencupitaj imapajchus Jesusta japꞌiricuskanta willacorka. Imaynatachus chay quiquinpacha thañicuskantawan willacorka. 48 Chanta Jesús payta nerka:

—Mamáy, Diospi japꞌicuskayquiraycu thañiska canqui. Allillanta ripuy, —nispa.

49 Jesús parlashajtillanraj curaj runaj wasinmanta uj runa jamorka willaj:

—Ususiyqueka wañupunña. Amaña yachachejta molestaychu, —nispa.

50 Jesusrí chayta uyarispa Jairota nerka:

—Amaña manchachicuychu. Astawanpis Diosllapi japꞌicuy. Ususiyqueka thañiska canka, —nispa.

51 Chayaspa chay curajpa wasinman yaycorka. Sakellarkataj Pedrota, Juanta, Jacobotawan paywan yaycunancuta wawaj tatanta mamantawan 52 Tucuy runas wawamanta phutiywan manchayta wakasharkancu. Jesusrí nerka:

—Amaña wakaychejchu. Cay wawaka mana wañuporkachu. Manachayrí puñushan, —nispa.

53 Paycunataj wawaka wañuska caskanta yachaspa, Jesusta asipayarkancu. 54 Jesusrí wawata maquinmanta japꞌispa wajyarka:

—Imillita, jatarimuy, —nispa.

55 Imillitataj wañuymanta causarimporka. Chay quiquinpacha jataricorka. Jesusri camacherka payman miqhunata konancuta. 56 Tatasnin mayta tꞌucorkancu. Jesustaj paycunata camacherka ama ni pimanpis chayta willanancuta.