—Suchuycurichiy barcoyquita cantomanta as pisita yacuman, —nispa.

Chaymanta barcopi tiyaycucuspa Jesús yachachisharka kocha cantopi chay ashqha cajcunaman. 4 Paycunaman parlayta tucuspa Simonta nerka:

—Kochaj uqhunnejman barcota apay. Yacumantaj chꞌipasniyquichejta churaycuychej challwasta japꞌinayquichejpaj, —nispa.

5 Simón cuticherka:

—Señorníy, tutantinta sinchꞌita llancꞌarkaycu nitaj uj challwatapis japꞌerkaycuchu. Chaywanpis niwaskayquiraycu chꞌipasta yacuman churaycusaj, —nispa.

6 Ajinata challwiris chꞌipasta yacuman churaycorkancu. May ashqha challwastataj japꞌiskancumanta chꞌipasnincoka lliqꞌicusharkancu. 7 Maquisnincuwantaj wajyarkancu challwiri-masisnincuta barconcuwan yanapaj jamunancuta. Jamojtincutaj iscaynin barcosman challwasta juntꞌacherkancu. Barcostaj chincaycunayasharkancu ancha juntꞌa caskancuraycu. 8 Simón Pedrotaj chayta ricuspa Jesuspa ñaupakenpi konkoricuspa nerka:

—Señorníy, ripullay nokamanta juchasapa runalla caskayraycu, —nispa.

9 Simontaj tucuy paywan cajcunapis mayta tꞌucorkancu ashqha challwasta japꞌiskancumanta. 10 Ajinallatataj Zebedeoj wawasnin Jacobowan Juanwan mayta tꞌucorkancu. Paycuna Simonpa challwiri-masisnin carkancu. Jesustaj Simonman nerka:

—Amaña manchachicuychu. Ñaupajta challwiri carkanqui. Cunanmantapachataj Diospi japꞌicunancupaj runasta nokaman pusamuwanqui, —nispa.

11 Barcosnincutataj kocha cantoman aysamorkancu. Chaymantaka tucuy imasta sakerparispataj Jesusman cꞌascaporkancu yachacojcunan canancupaj.

12 Uj cuti Jesús uj llajtapi cashajtin chaypi uj manchay lepra onkoyniyoj runa carka. Chay runataj Jesusta ricuspa pampacama cꞌumuycuspa mañacorka:

—Señorníy, sichus munanqui chayka, llimphuchawaspa thañichiwayta atinqui, —nispa.

13 Jesús maquinwan payta llanqharispa nerka:

—Munani. Thañiskaña canqui, —nispa.

Onkoyniyoj runataj chay quiquinpacha thañiska carka. 14 Jesustaj payta camacherka:

—Ama pimanpis cay imasmanta willaychu. Manachayrí chekanta riy Jerusalenman yupaychana-wasipi ruwanayojman. Kan quiquiyqui khawachicamuy paywan. Chanta thañicuskayquimanta Moisespa camachiskanmanjina Diosman jayway. Ajinamanta tucuy yachankancu thañicuskayquita, —nispa.

15 Chaywanpis tucuynejpi runas Jesusmanta uyarerkancu. Ashqha runastaj jamusharkancu uyarej, onkoynincumanta thañicojtaj. 16 Jesusrí sapallan chꞌinnejcunaman rej Diosmanta mañacunanpaj.

17 Uj pꞌunchay Jesús yachachishajtin ashqha fariseocuna israel yachachejcunapiwan tiyaskas uyarisharkancu. Paycunaka jamorkancu tucuy Galilea llajtasmanta, Judea llajtasmanta, Jerusalén llajtamantapis. Jesustaj onkoska runasta thañichisharka atiyninwan. 18 Ajinapi runas uj mana cuyurej runata callapunpi wantuspa riqhurimorkancu. Sinchꞌitataj mascꞌasharkancu Jesuspa ñaupakenman imaynata wantuycuyta. 19 Chay tucuywanpis Jesusman chimpaycuchiyta manapuni aterkancuchu runas chaypi ancha qꞌisqui caskanraycu. Ajinamanta wasi pataman llojsispa tejasta orkospataj juscꞌuta ruwarkancu. Chaynejtataj mana cuyurej runata wantuspa uraycucherkancu Jesuspa ñaupakenman runaspa chaupincupi. 20 Jesustaj paypi japꞌicuskancuta repararka. Mana cuyurej runatataj nerka:

—Wawáy, juchasniyqui kanmanta khechuskaña cancu, —nispa.

21 Chaymanta israel yachachejcuna fariseopiwan tanteyacuyta kallarerkancu: “¿Pitaj cay runa ajinata parlaspa Diosta phiñachejrí? Dioslla juchasta khechuytaka atin”, nispa.

22 Jesús sumajta yachaspa yuyashaskancuta paycunaman cuticherka:

—Amaña sonkosniyquichejpi ajinata tanteyacuychejchu. 23 Cay runaman nejtiy “juchayqui perdonaskaña”, nispaka mana ricunquichejchu chekachus manachus caskanta. Astawanrí cay mana cuyurej runata jatarichiyman chayka, ricuwajchej. 24 Noka, Diospa cachaska Runan caspa, cay pachapi atiyniyoj cani juchasta perdonanaypaj. Chay cheka caskanta yachanayquichejpaj, cay mana cuyurej runata nini: Kanta niyqui: Jataricuy, callapuyquita okharicuspa ripuy wasiyquiman, —nispa.

25 Chay quiquinpachataj runaspa ñaupakencupi runa jatarerka. Callapunta okharicuspa Diosta yupaychaspataj wasinman riporka. 26 Tucuy runastaj mayta tꞌucorkancu Diostataj yupaycharkancu. Mayta manchachicuspataj nerkancu:

—Cunan pꞌunchay may jatuchej tꞌucunasta ricushanchej, —nispa.

27 Chaycuna khepata Jesús llajtamanta llojserka. Uj impuesto japꞌejta, Leví sutiyojta, ricorka impuesto japꞌina wasipi tiyacushajta. Payta khawarispataj nerka:

—Yachacojniy cay, —nispa.

28 Levika tucuy imata sakerpaytawan jatarispataj Jesusta khaticorka.

29 Wasinpi Leví uj jatun miqhunata waquicherka Jesuspaj. Ashqha impuesto japꞌejcunata waj runastawan wajyarka paycunawan miqhunancupaj. 30 Fariseos paycunaj yachachejcunancupiwan thutorkancu Jesuspa yachacojcunantataj taporkancu:

—¿Imaynatataj impuesto japꞌejcunawan juchasapaspiwan cusca tiyaycucuspa miqhushanquichej?

31 Jesús paycunaman cuticherka:

—Onkoska runaslla medicotaka munancu, manataj sano runaska. 32 Juchasapasta wajyaj jamorkani paycuna sajra ruwaskasnincuta sakespa Diosman cutirinancupaj. Manataj jamorkanichu chekan cajcunata wajyaj, —nispa.

33 Chay runastaj Jesusta nerkancu:

—Juanpa yachacojcunan qꞌisquita ayunancu. Ajllaska horaspipuni Diosmantapis mañacuncu. Ajinallatataj fariseospa yachacojcunancupis ruwancu. ¿Imaraycutaj kanpata miqhushallancu ujyashallancurí?

[Cayta taporkancu Jesuspa mosoj yachachiyninta mana entiendeskancuraycu.]^b 34 Jesustaj paycunaman cuticherka:

—Casamientoman wajyaskacunaka casaracoj khari paycunawan cashanancama cusiywan miqhuncupuni. 35 Khepa pꞌunchaycunapi casaracoj khareka paycunamanta khechuska canka. Chaypacha yachacojcunayka phutiywan mana miqhonkancuchu, —nerka Jesús.

36 Chaywanpis mosoj yachachiyninmanta Jesús cay quiquinchanawan paycunaman willarka:

—Ni pipis uj mosoj pꞌachamanta uj remiendota orkhonmanchu uj maucꞌa pꞌachaman siraycunanpajka. Sichus chayta ruwanman chayka, chay mosoj pꞌachaka lliqꞌerkoska canman. Chaywanpis maucꞌa cajka mana quiquinchu canman mosojwanka. 37 Uj imatawan niskayquichej: Ni pipis mosoj pokoshaj vinota maucꞌa vino churana karasmanka jichꞌanchu. Sichus chayta ruwanman chayka, mosoj vinoka karasta phatarparichinman. Vinoka jichꞌacunman, karasri lliqꞌiycucuncuman. 38 Mosoj vinotaka mosoj karasman churana tiyan. 39 Chaywanpis ni pipis ashqha watasniyoj vinota ujyashaspa mosoj vinota munanchu. Astawanpis nin: “Ashqha watasniyoj vinoka nokapaj cosamin”, —nispa.