Jesús supayta atipan
4
Jesús Jordán mayumanta ripuspa Santo Espirituwan juntꞌa carka. Santo Espiritutaj chꞌin pampapi pusaycachaspa paywan casharka. 2 Chaypachataj tawa chunca pꞌunchaycunantinpi supay Satanás Jesusta juchallichiyta munasharka. Jesustaj chay pꞌunchaycunapi mana ni imatapis miqhorkachu. Chay khepata pay yarkhachicorka. 3 Ajinata supay Satanás Jesusman nerka:—Sichus Diospa Wawan canqui chayka, camachiy cay rumita tꞌantaman cutinanta, —nispa.
4 Jesustaj payman cuticherka:
—Diospa palabranpi nin: “Runaka mana miqhunallawanchu causanan. Manachayrí Diospa tucuy palabranwan causanan”, —nispa.
5 Chanta supay Satanás Jesusta pusarka orko pataman. Uj ratullapi cay pachapi caj tucuy camachiska llajtastataj payman ricucherka. 6 Nerkataj:
—Kanman koskayqui atiyta camachinayquipaj tucuy cay llajtasta khapaj capuynincutawan. Nokaman jaywaska carka. Chayraycu jaywani pimanchus munani. 7 Sichus kan konkoricuspa yupaychawanquiman chayka, tucuy kanpata canka, —nispa.
8 Jesustaj payman cuticherka:
—Dios palabranpi nin: “Señor Diosnillayquita yupaychanqui. Pay sapallanman konkoricuspa casunqui”, —nispa.
9 Chanta supay Satanás Jesusta Jerusalenman pusarka. Yupaychana-wasej patanpi sayaricherka. Jesusta nerkataj:
—Sichus Diospa Wawan canqui chayka, cay patamanta chay uraman phinquiycuy pampaman. 10 Diospa palabranpi nin:
Dios camachenka angelesninta kanta wakaychasunancupaj.
11 Nintaj:
Angelesninta camachenka kanta wakaychasunancupaj.
Maquisnincuwantaj kanta japꞌisonkancu rumisman ama urmanayquipaj.
12 Jesús payman cuticherka:
—Dioska nin: “Ama Señor Diosniyquej atiyninta manacajpaj mañacuychu”, —nispa.
13 Supay Satanás tucuy imaymana pantachinaswan munasharka juchallichiyta Jesusta. Mana atispari payta sakerpaspa chincaporka uj pꞌunchaycama.
El Diablo Tienta a Jesús
Jesús kallarin llancꞌayninta Galilea jallpꞌapi
14 Chanta Galilea jallpꞌaman Jesús cutipuspa Santo Espíritoj atiyninwan juntꞌa carka. Runastaj tucuy chay jallpꞌanejpi Jesusmanta uyarerkancu. 15 Tantacuna-wasisnincupi paycunata yachachisharka. Tucuy runastaj payta curajpaj khawarkancu.
Jesús willaran Nazaretpi
16 Chanta Jesús Nazaret llajtaman rerka. Chaypi uywaska carka. Rejpuni payka, samacuna pꞌunchay tantacuna-wasiman yaycorka. Runaspa ñaupakencupitaj leenanpaj sayaricorka. 17 Diospa unay willajnin Isaiaspa libron Jesusman jaywaska carka. Librota quicharispataj tariparka maypichus kelkaska cashan:
18 Santo Espíritu nokawan cashan wajchacunaman sumaj willanasta apamunaypaj Dios ajllacuwaskanraycu.
Dios cachamuwarka juchapi wiskꞌaska runasman cachariskas canancuta willaranaypaj.
Cachamuwarkataj cheka cajta mana ricojcunata cheka cajta ricuchinaypaj, phutiywan ñitꞌiskacunata cacharichinaypajpis.
19 Cachamullawarkataj willaranaypaj cunanpacha Dios runasta payman chimpanancupaj wajyaskanta.
20-21 Jesús librota wiskꞌaspataj libro wakaychajman jaywaporka. Tucuy tantacuna-wasipi cajcuna payta sumajta khawasharkancu. Jesustaj tiyaycucuspa kallarerka yachachiyta. Nerkataj:
—Diospa palabranmanta cay leeskayka cunan pꞌunchay juntꞌacushan nokata uyariwaskayquichejpi, —nispa.
22 Tꞌucuspataj tucuy runas nisharkancu:
—Chekatapuni paypa yachachiskasnin allin cashan, may cꞌacha, —nispa.
Tapunacusharkancutaj:
—¿Manachu pay Joséj wawan?
Nazaret llajtayoj runas Jesusta khesachancu
23 Jesustaj nerka:
—Chekatapuni khepapi nokata cay niyta niwanquichej: “Onkoskasta thañichej cashaspaka kan quiquiyquita thañichicuy. Capernaum llajtapi jatun ruwaskasniyquimanta uyarerkaycu. Cunan cay llajtayquipipis quiquinta ruway”, —nispa.
24 ‘Nokarí niyquichej chekamanta: Willajnincuta quiquin llajta-masisnin mana nincuchu: “Walejta jamunqui”, nispaka. 25-26 Uyariwaychej: Sumajta yachashanquichej Diosmanta unay willaj Elías causashajtin jatun yarkhay caskanta. Chay yarkhay carka tucuy jallpꞌaspi, quinsa wata sojta quillayojta mana paraskanraycu. Chaypacha Israel jallpꞌapi ashqha viudas carkancu. Eliasrí ni maykennincumanpis cachaskachu carka. Manachayrí Sidón jallpꞌa Sarepta llajtayoj uj viudallaman cachaska carka. 27 Diosmanta unay willaj Eliseo causashajtinpis ashqha lepra onkoyniyoj runas Israel jallpꞌapi callarkancutaj. Paycunamantarí ni uj thañichiskachu carka. Manachayrí Siria jallpꞌamanta uj runalla, Naamán sutiyoj, thañichiska carka, —nispa.
28 Chayta uyarispa tucuy runas tantacuna-wasipi mayta rabiacorkancu. 29 Jatarispataj llajta jawaman Jesusta kharkorkancu. Payta kharkospa llajta jatarichiskancu, chay orko pataman pusarkancu. Chay kakamanta paytaka chokaycuyta munarkancu. 30 Payrí chay runaspa chaupincuta purispa riporka.
Jesús Proclama el Cumplimiento de las Escrituras
Supayniyoj runa tantacuna-wasipi
31 Chanta Jesús Galilea jallpꞌa Capernaum llajtaman uraycorka. Samacuna pꞌunchaypitaj tantacuna-wasipi runasta yachachisharka. 32 Paycunataj tꞌucorkancu yachachiskanmanta imaraycuchus Diospa atiyninwan yachacherka.
33 Tantacuna-wasipi millay supayniyoj runa carka. Sinchꞌita khaparerkataj:
34 —Nazaret llajtayoj Jesús ¿imaman chapucuwaycu? ¿Tucuchinawaycupajchu jamunqui? Sumajta yachani pichus caskayquita. Kan Diospa ajllaskana canqui, —nispa.
35 Jesusrí sinchꞌiwan camacherka supayta:
—Chꞌin cay. Llojsiy paymanta, —nispa.
Runaspa chaupincupitaj supay chay runata pampaman chokaycuspa paymanta llojserka mana ni imanaspalla. 36 Tucuy runastaj mayta tꞌucorkancu ninacusharkancutaj:
—¿Imayna yachachiytaj cayrí? Atiywan cay runaka sajra supaycunata camachin, paycunataj llojsillancu, —nispa.
37 Tucuy chay jallpꞌa muyuynintinpi tiyacojcunataj Jesusmanta uyarerkancu.
Ashqha runasta thañichin
38 Tantacuna-wasimanta Jesús llojsispa Simonpa wasinman yaycorka. Simonpa warminpa maman sinchꞌi kꞌoñi onkoywan casharka. Jesustataj mañacorkancu:
—Señorníy, yanaparipuwaycu payta, —nispa.
39 Onkoskaj kayllanpi sayaspataj, Jesús sinchꞌiwan camachispa kꞌoñi onkoyninta kharkorka. Onkoskataj thañicaporka. Chay quiquinpacha jatarispa thañiska warmeka miqhunata paycunaman jaywarka.
40 Inti chincaycushajtintaj tucuy runas onkoska llajta-masisnincuta Jesusman apamuyta kallarerkancu. Tucuy laya onkoywan onkoska runasta apamushallarkancupuni. Jesustaj sapa ujman maquisninta churaspa paycunata thañicherka. 41 Chaywanpis ashqha runasmanta supaycunata kharkorka. Supaycunataj khaparisharkancu:
—Kan Diospa Wawan Cristo canqui, —nispa.
Jesusrí paycunata sinchꞌita cꞌamispa mana sakerkachu parlanancuta chayta sumajta yachaskancuraycu.
42 Kꞌayantin pakarin Jesús llajtamanta llojsispa uj chꞌinnejman riporka. Chay ashqha runasrí payta mascꞌasharkancu. Jesuswan tincuspataj payta jarcꞌayta munasharkancu. Nerkancutaj:
—Ama sakerpariwaycuchu, —nispa.
43 Payrí cuticherka:
—Waj llajtasmanpis rinay tiyan sumaj willanasta willaranaypaj. Imaraycuchus Dios cachamuwarka willaranaypaj pay caypiña caskanta camachinanpaj, —nispa.
44 Jesustaj israelcunaj tantacuna-wasisnincupi willarashallarkapuni.