2 Ninacusharkancutaj:

—Ama jatun pꞌunchaycunapeka japꞌiycuchisunchu, ama manchay chꞌajwata runas okharinancupaj, —nispa.

3 Betania llajtapi Jesús casharka, lepra onkoyniyoj niska Simonpa wasinpi. Chaypi miqhushajtintaj uj warmi yaycumorka, cꞌachitu rumi^b yuritupis okhariska. Yuritoka nardo purumanta sumaj kꞌapayniyoj aceitejinawan juntꞌa carka. Chaytaj ashqha kolkewan rantiska carka. Warmitaj yurituta pꞌaquerkospa chay kꞌapayniyoj aceitejinata Jesuspa umanman jichꞌaycuspa jawiycorka. 4 Chaypi cajcunamantataj waquin phiñacuspa paycunapura ninacusharkancu:

—¿Imaraycutaj cay sumaj kꞌapayniyoj aceitejinata usuchishanrí? 5 Uj wata pagopajjina vendecunman carka. Chay kolketaj wajcha runasman koska canman carka, —nispa.

Mayta phiñacuspa warmitaka sinchꞌita cꞌamerkancu.

6 Jesusrí nerka:

—Sakeychej. ¿Imaraycutaj payta llaquichishanquichejrí? Chaywanka may sumaj cajta ruwapuwarka nokapaj. 7 Wajcha runaska kancunawanpuni cashancu. Maycꞌajpis paycunata yanapayta munanquichej chayka, atillanquichej. Nokarí mana unaytañachu kancunawan casaj. 8 Payka atiskanta ruwarka. Jawiwaspa pꞌampacuyniypaj waquichiwarka ñaupajtaña manaraj wañushajtiy. 9 Chekata niyquichej: Tucuy cay pachapi sumaj willanasta mayllapipis willaraspaka, chaypi cay warmej ruwaskanmantapis parlankancu paymanta yuyaricuspa, —nerka Jesús.

10 Iscariote niska Judaska Jesuspa chunca iscayniyoj cachasninmanta ujnin carka. Payka yupaychana-wasimanta curajcunaman Jesusta jaywaycunanpaj rerka. Nerkataj:

—Noka Jesusta jaywaycuskayquichej, —nispa.

11 Chayta uyarispa paycunaka mayta cusicorkancu. Judastataj nerkancu:

—Payta jaywaycuwaskaycumanta kanman kolketa kosajcu, —nispa.

Ajinamanta Judaska unanchacuspa mascꞌaj churacorka maycꞌajchus aswan allin canman Jesusta jaywaycunanpaj.

12 Mana pokochinayoj tꞌanta miqhuna pꞌunchaycuna chayamorka. Ñaupaj caj pꞌunchaypeka wañuchinancu carka pascua corderota. Chay pꞌunchaypi yachacojcunan Jesusta nerkancu:

—Pascua miqhunata miqhunayquipaj ¿maypitaj munanqui waquichimunaycuta?

13 Ajinapi yachacojcunanmanta iscayta cacharka. Paycunatataj nerka:

—Riychej llajtaman. Chaypitaj uj yacu pꞌuñuta apaj runawan tincunquichej. Payta khatiychej. 14 Yaycuskan wasipitaj wasiyoj runata niychej: “Yachachejninchej nisunqui: ‘Nokapaj sala ¿maypitaj cashan yachacojcunaywan pascua miqhunata miqhunaypaj?’ nispa”.

15 Paytaj uj jatun salata altos wasipi ricuchisonkachej. Chay salataj allinchaska tucuy imayojña cashan. Chaypi waquichimuychej nokanchejpaj, —nispa.

16 Chaymanta llajtaman rispa chay iscay yachacojcunaka tarerkancu tucuy imasta Jesuspa niskanmanjina. Chanta pascua miqhunata waquicherkancu.

17 Chꞌisiyaytataj Jesús chay chunca iscayniyojwan chayman chayarka.

18 Tiyacuspa miqhushajtincutaj Jesús nerka:

—Chekata niyquichej: Kancunamanta ujniyquichej nokawan miqhojmin jaywaycuwanka, —nispa.

19 Paycunari llaquicuyta kallarerkancu, ujmanta ujtaj Jesusta nerkancu:

—¡Mana nokaka caymanchu! —nispa.

20 Jesusri paycunata nerka:

—Kancuna chunca iscayniyoj yachacojcunaymanta uj cashan. Payka nokawan cusca tꞌantata chuwapi chhapushan. 21 Noka, Diospa cachaska Runanka, rishani, Diospa palabranpi nokamanta niskanmanjina. Astawanrí ¡ay phutiy, ari, noka jaywaycojpajka! Allin canman carka chay runapajka mana nacecunan, —nerka Jesús.

22 Miqhushajtincutaj Jesús tꞌantata maquisninwan japꞌispa Diosman graciasta korka. Chanta tꞌantata partispa sapa ujman jaywaspataj nerka:

—Cayta miqhuychej. Cayka cuerpoy ninacun, —nispa.

23 Copatapis japꞌispa Diosman graciasta kospa paycunaman jaywarka. Tucuynincutaj ujyarkancu.

24 Paycunaman Jesús nerkataj:

—Cay yawarniyka Diospa mosoj traton atiyniyoj cananpaj jichꞌaskamin. Yawarniyka ashqha runacunapaj jichꞌaska canka paycuna ama wiñaypaj wañunancupaj. 25 Chekata niyquichej: Manaña ujyasajchu cay uvasmanta ruwaskata chay pꞌunchaycama. Chanta mosojta ujyasaj Tataywan kancunapiwan,^c —nerka Jesus.

26 Chanta Diosta yupaychanancupaj taquiytawan chay salamanta llojsispa Olivos orkoman rerkancu.

27 Yachacojcunamantaj Jesús nerka:

—Cunan tuta tucuyniyquichej nokata sakerpayawanquichej. Cayka canka Diospa palabranpi niskanmanjina: “Michejta wañuchisaj, ovejastaj chꞌekeraskas cankancu”. 28 Astawanrí wañuymanta causarimuspa Galileaman ñaupaskayquichej, —nerka Jesús.

29 Pedrotaj Jesusman nerka:

—Tucuynincu sakerpayasuncuman chaypis, nokaka manapuni, —nispa.

30 Jesustaj Pedrota nerka:

—Chekata niyqui: Cunan tutapacha, manaraj gallo iscay cutita wakashajtin, kanka quinsa cutitaña ninqui, nokata mana rejsiwaskayquita, —nispa.

31 Pedroka atipacuspa sinchꞌiwan nerka:

—Sichus kanwan cusca wañunay canman chaypis, ni jaycꞌaj nisajchu, kanta mana rejsisuskaytaka, —nispa.

Ajinallatataj tucuynincu nerkancu.

32 Jesuska Getsemaní niska huertaman chayaspa yachacojcunanman nerka:

—Caypi tiyaricushaychej noka Diosmanta mañacamunaycama, —nispa.

33 Jesusri pusacorka Pedrota, Jacobota, Juantawan. Sonkonpitaj kallarerka may llaquiywan tꞌucurayayta jatun phutiyninpi. 34 Paycunatataj nerka:

—Manchay llaquiska cani, llaquiywantaj wañunayashaniña. Caypi suyaychej, wakaychacuychejtaj, —nispa.

35 Ajinapi Jesuska tumpatawan ñauparispa uyan pampacama cꞌumuycorka. Diosmantataj mañacorka, sichus aticunman chayka, chay manchay ñacꞌariynenka khechuska cananta.

36 Mañacuspataj nerka:

—Munaska Tatáy, kanpajka tucuy ima aticun. Cay ñacꞌariypi wañunayta nokamanta khechupuway. Astawanrí ama nokaj munayniyka ruwacuchunchu, manachayka kanpa munayniyqui ruwacuchun, —nispa.

37 Chanta cutimuspa chay quinsantinta puñushajta taripaspa, Pedrota nerka:

—Simón ¿puñushanquichu? ¿Manachu uj ratullatapis rijchꞌariska cayta aterkanqui? 38 Rijchꞌariskas wakaychacuychej Diosmanta mañacuychejtaj juchaman ama urmachiskas canayquichejpaj. Allin cajta ruwayta munashanquichej, chaypajrí kancunaka mana callpayojchu canquichej,^d —nerka Jesús.

39 Chanta ujtawan rispa chay quiquillantataj Diosmanta mañacusharka. 40 Ujtawan cutimuspapis paycunata puñushajllatataj tariparka, puñuywan atipaskas cashaskancuraycu. Chaymantataj ni imata aterkancuchu cutichiyta. 41 Quinsa caj cutipi cutimuspataj paycunata nerka:

—¿Puñushanquichejpunichu? ¡Puñucullaychej! ¡Chayllataña! Chay hora chayamunña. Uyariychej: Noka, Diospa cachaska Runanka, juchasapaspa maquisnincuman jaywaycuskaña cashani. 42 ¡Jataricuychej, jacu ripuna! ¡Khaway, jaywaycuwajniyka kayllamushanña! —nerka Jesús.

43 Jesús parlashajtillanraj Judaska riqhurimorka. Payka Jesuspa chunca iscayniyoj cachasninmanta ujnin carka. Paywan cuscataj ashqha runas jamorkancu tꞌujsina espadaswan makana cꞌaspiswan. Paycunaka israel curajcunaj cachamuskasnincu carkancu.

44 Jaywaycoj Judaska pusamuskacunanman ñaupajtaña yachaycuchiska:

—Pitachari noka napaycuspa muchꞌaycusaj, chaymin canka. Payta japꞌycuychej. Pusanquichej sumaj wakaychaskata, —nispa.

45 Ajinaka chayamuytawancama, Jesusman kayllaycuspa, “¡Yachachejníy!” nispa, may munacuywanjina muchꞌaycorka. 46 Chay runastaj Jesusta japꞌiycorkancu.

47 Chaypi cajcunamanta ujnintaj espadanta siqꞌicuspa uj runata, wajtaspataj, ningrinta cꞌuturparerka. Chay cꞌuturpariska runari yupaychana-wasimanta curajpa camachin carka. 48 Churanacojcunanman Jesuska nerka:

—¿Runa wañuchi suwata japꞌejjinachu nokata japꞌej jamunquichej espadaswan cꞌaspiswan? 49 Sapa pꞌunchay yupaychana-wasi patiopi yachachispa nokaka kancunawan carkani, manataj japꞌiycuwarkanquichejchu. Astawanrí ajina canan tiyan Diospa palabran juntꞌacunanpaj, —nispa.

50 Chaymantataj Jesusta sakerpayaspa, tucuynin yachacojcunan aykecorkancu.

51 Uj waynari jatun llijllanawan khataycucuska Jesusta khatispa risharka. Paytataj japꞌiycunayasharkancu. 52 Payrí llijllananta sakerpayaspa kꞌalalla aykecorka.

53 Ajinamanta yupaychana-wasimanta curajpa ñaupakenman Jesusta pusarkancu. Chaypitaj chay israel curajcuna tucuynincu tantacorkancu.

54 Pedrotaj Jesusta carullamanta khaticuspa yaycorka curajpa wasi pationcama. Payka chaypi caj yanapajcunawan cusca nina kayllapi kꞌoñicuspa tiyaricusharka.

55 Jesus chay tantacuypi cashajtin curajcunaka contranpi willajcunata mascꞌasharkancu payta wañuchinancupaj. Chaypaj iscay quiquin willaskasta mana tarerkancuchu. 56 Ashqha llulla willajcuna Jesuspa contranpi willasharkancu. Willaskasnincuri mana quiquinchu carka. 57 Waquin llulla willajcunaka curajcunaj ñaupakencupi nisharkancu:

58 —Nokaycu Jesusta uyarerkaycu nishajta: “Noka cay maquiwan ruwaska yupaychana-wasita urmachisaj. Chanta quinsa pꞌunchaypi wajta wasichasaj mana maquiwan ruwaskata”, —nispa.

59 Chaywanpis chay willaskasnincoka mana quiquinchu carka.

60 Chanta yupaychana-wasimanta curajka paycunaj ñaupakencupi sayarispa Jesusta taporka:

—¿Manachu cutichicunqui? ¿Imatataj chay runas contrayquipi willashancurí?

61 Jesusrí chꞌinlla carka nitaj ni imata cuticherkachu. Watejmanta curajka Jesusta tapullarkataj:

—¿Kanchu Cristo, yupaychaska Diospa Wawan canqui?

62 Jesús cuticherka:

—Noka cani. Noka, Diospa cachaska Runanta, ricuwanquichejtaj curaj atiyniyoj Dioswan cusca camachishajta. Chaywanpis phuyus chaupita atiyniywan janaj pachamanta jamushajta ricuwanquichej, —nerka Jesús.

63 Chay niskanta uyarispataj curajka pꞌachasninta lliqꞌicorka may phiñacuskanta ricuchinanpaj. Nerkataj:

—Manaña astawan willajcunata munanchejchu. 64 Kancuna uyarinquichejña cayjinata Diosta phiñachiskanta. ¿Kancunaman, imaynataj rijchꞌasunquichejtaj? —nispa.

Tucuynincutaj Jesusta wañunanpaj juchacharkancu.

65 Paycunamanta waquintaj kallarerkancu Jesusman thokaycuyta. Uyanta khataycuspataj sajmashaspa nerkancu:

—Sutꞌinchay ¿pitaj sajmasunqui?

Yanapajcuna Jesusta pusashaspa sinchꞌita makarkancu.

66 Pedro chay wasi patiopi cashajtintaj chayman jamorka curajpa wasi camachisninmanta uj imilla. 67 Payka Pedrota nina kayllapi kꞌoñicushajta ricorka. Payta khawaycuspataj nerka:

—Kanpis Nazaretmanta Jesuswanmin casharkanqui, —nispa.

68 Pedrotaj mananchacuspa nerka:

—Imatachus nishanqui mana yachanichu nitaj entiendenichu, —nispa.

Chayta nispa puncunejman rerka. Gallotaj wakarka. 69 Imillaka watejmanta Pedrota ricuytawan chaypi cajcunaman nerka:

—Cay runaka Jesuswan purejcunamantamin, —nispa.

70 Pedrori ujtawan mananchacorka. Uj chhicamantataj chaypi cajcunaka Pedrota nisharkancu:

—Kanka paycunamantapuni canqui, Galileamanta caskayquiraycu. Parlaskallayquipi sutꞌi cashanqui, —nispa.

71 Chaymantataj Pedroka niyta kallarerka:

—¡Mana chekata parlani chayka, Dios wañuchiwachun! ¡Pimantachus parlashanquichej, chay runataka mana rejsinichu! —nispa.

72 Chay quiquinpachataj iscay caj cutita galloka wakarka. Pedrotaj chayta uyarispa Jesuspa cay niskanta yuyaricorka: “Manaraj gallo iscay cutita wakashajtin, kanka quinsa cutitaña ninqui, nokata mana rejsiwaskayquita”, nispa. Uyariskantawantaj sinchꞌita wakarka.