2 Pilatori Jesusta taporka:

—¿Kanchu israelcunaj camachejnin canqui?

Jesustaj payman cuticherka:

—Kan ninqui, ajinamin, —nispa.

3 Yupaychana-wasimanta curajcunataj ashqna imasta Jesuspa contranpi willasharkancu. 4 Pilatoka ujtawan tapullarkataj:

—¿Manachu imatapis cutichicunqui? ¡Uyariy, mashqha imastataj contrayquipi willashancu! —nispa.

5 Jesusrí manaña ni imata cuticherkachu. Chayraycutaj Pilatoka mayta tꞌucorka.

6 Cunanka sapa pascuapi Pilatoka costumbremanjina cacharipunan caj wiskꞌachiska runasmanta maykentachus mañaskancuta. 7 Chaypachataj uj runa, Barrabás sutiyoj, carcelpi wiskꞌachiska casharka. Payka chꞌajwachej-masisninwan wiskꞌachiska casharka runata wañuchiskancuraycu. 8 Ashqha runas tantacamuspataj Pilatomanta mañayta kallarerkancu, wiskꞌachiskacunamanta ujta cacharichipunanta costumbremanjina. 9 Pilatotaj paycunata taporka:

—¿Israelcunaj camachejninta cacharimunayta munanquichejchu?

10 Pilatoka yacharka israel curajcuna Jesusta envidiamanta payman jaywaycuskancuta. Chayraycu ajinata taporka.

11 Yupaychana-wasimanta curajcunarí runasman mayta yachaycuchisharkancu Pilatomanta astawanpis mañanancupaj Barrabasta cacharimunanta. 12 Pilatotaj ujtawan chay tantaska runasta taporka:

—¿Imanasajtaj chanta, israelcunaj camachejnin niskatarí?

13 Runacunataj khaparispa cuticherkancu:

—¡Chacataska cachun! —nispa.

14 Pilatorí tapullarkataj:

—¿Ima mana allintataj pay ruwarkarí?

Paycunataj aswan sinchꞌita khaparerkancu:

—¡Chacataska cachun! —nispa.

15 Pilatotaj chay khaparejcunata cusichiyta munaspa, Barrabasta cachariporka. Jesustarí jasutꞌiskanmantaña chacataska cananpaj soldadosman jaywaycorka.

16 Soldadosri gobierno wasi patioman Jesusta pusaycorkancu. Chaypitaj tucuy soldadomasisnincuta wajyarkancu tantacunancupaj. 17 Jesusta asipayanancupajtaj camachejtajina pꞌachallicherkancu culli-puca pꞌachawan. Qhishcamanta uj pilluta simpꞌaspataj umanman churarkancu. 18 Payta napaycuyta kallarerkancu:

—¡Viva, israelcunaj camachejnin! —nispa.

19 Sokoswantaj umanpi wajtasharkancu, thokaycusharkancu, yupaychanancupajjinataj ñaupakenpi konkoriycusharkancu. 20 Jesusta asipayayta tucuskancumanta khepatataj chay culli-puca pꞌachata orkhospa payta pꞌachasninwan pꞌachallichiporkancu. Chanta payta jawaman pusarkancu chacatanancupaj.

21 Jesusta ñanta pusashaspa soldadoska llajtaman uj yaycumushaj runata tariparkancu. Payka Cirene llajtayoj Simón carka, Alejandrojta Rufojtawan tatancu. Soldadostaj Simonta japꞌispa camacherkancu Jesuspa llasa chacatana cruzninta apananta.

22 Llajta jawaman Jesusta pusarkancu Gólgota sutiyoj lugarman. Cay niyta munan Tꞌojlu Lugar. 23 Jesusmantaj mirra jampiwan chajruska vinota ujyachiyta munarkancu. Payrí chayta mana ujyarkachu.

24 Jesusta chacatarkancu. Soldadosri paypa pꞌachasninta partinacunancupaj sorteyanacorkancu pipajchus sapa pꞌacha canman, chayta yachanancupaj.

25 Chacataskancu horaka chaupi pakarinña carka. 26 Chacataska caskanmanta tucuy runas yachanancupaj kelkaska carka: “Israelcunaj camachejnin”. 27 Chaypitaj Jesuswan iscay runa wañuchi suwastawan chacatarkancu, ujninta pañanman ujnintataj llokꞌenman. 28 Ajinapi juntꞌacorka cay kelkaskaka: “Payka juchasapaswan yupaska carka”.

29 Chaynejta purejcunapis umancuta qhiwirispa Jesuspa contranpi sajrata parlasharkancu:

—¡Kan yupaychana-wasita urmachej quinsa pꞌunchaypitaj watejmanta wasichajka! 30 Chacatanamanta uraycamuskayquiwan cacharichicuy, —nispa.

31 Quiquillantataj yupaychana-wasimanta curajcunawan israel yachachejcunawan Jesusta asipayaspa ninacusharkancu:

—Wajcunata cacharicherka, pay quiquinrí mana cacharichicuyta atinchu. 32 Cristo israelcunaj camachejnin sutichacun. Cunanpacha chacatanamanta uraycamuchun, nokaycu chayta ricuspa creenaycupaj, —nispa.

Paywan chacataska cajcunapis sajrata parlaspa cꞌamisharkancu.

33 Chaupi pꞌunchayña cashajtintaj tucuy jallpꞌapi lakhayaycorka chaupi tardecama.

34 Chaupi tardetataj Jesuska sinchꞌita khaparerka:

—Eloi, Eloi ¿lama sabactani? Cay niyta munan: Diosníy, Diosníy, ¿imaraycutaj sakerpariwanquirí?

35 Waquin chaypi cajcunamanta payta uyarispa nerkancu:

—¡Uyariychej, Eliasta wajyashan! —nispa.

36 Ujnin runataj uskhayta rispa esponjata cꞌallcu ujyanaman chhaporka. Chay esponjata sokospi okharispataj Jesuspa siminman churarka chꞌonkananpaj. Chayta ruwajri nerka:

—¡A ver Elías jamonkachus chacatanamanta uraycuchej! —nispa.

37 Jesustaj jatunmanta khaparispa tucucaporka. 38 Yupaychana-wasipi warqhuska caj khatanataj iscayman lliqꞌicorka, patamanta uracama.

39 Jesuspa ñaupakenpi sayashaj romano capitanri Jesús imaynata wañupuskanta ricuspa, nerka:

—Chekapuni cay runaka Diospa Wawan carka, —nispa.

40 Waquin warmistaj caritullamanta khawamusharkancu. Paycuna uqhupi casharkancu Magdala llajtayoj Mariawan Salomewan waj Mariapiwan. Chay waj Mariaka sullcꞌa caj Jacoboj Josejtawan mamancu carka. 41 Chay warmiska Jesús Galileallapiraj cashajtin khatejcunan yanapajcunanpis carkancu. Waj ashqha warmispis cashallarkancutaj Jesuswan cusca Jerusalenman jamojcuna.

42 Chay pꞌunchayka waquichicuna pꞌunchay carka kꞌayantin samacuna pꞌunchay caskanraycu. Chꞌisiyaycojtinña 43 Arimatea llajtayoj José mana manchachicuspa camachej Pilatojman rerka. Chay Joseka curajcunaj tantacuynincumanta carka, cꞌachapaj khawaskataj. Paypis Dios tucuy runasta camachinanta mayta munaj. Payka camachej Pilatoj ñaupakenman Jesuspa cuerponta apacampunanpaj mañaj yaycorka. 44 Pilatoka Jesús wañuskaña caskanmanta tꞌucorka. Chayraycu capitanta wajyaspa taporka chekachus wañuskaña caskanta. 45 Wañuskaña caskanta yachaspataj Joseman nerka:

—Atinqui apacapuyta, —nispa.

46 Josetaj linomanta awaskata rantimorka. Jesusta chacatanamanta uraycuchispataj chay awaskawan maytꞌuycorka. Chanta orkopi uj rumi juscꞌuman pꞌamparka. Chay pꞌampanaka kakapi juscꞌuska jatun carka. Jatun muyu pꞌalta rumitataj pꞌampana juscꞌu puncuman muyuchispa churarka. 47 Magdala llajtayoj Mariataj Joséj maman Mariapiwan ricorkancu maypichus Jesús churaska caskanta.