—¡Yachachejníy, khaway, cay wasichaycunata! ¡May jatuchej rumis wasispis cancu! —nispa.

2 Jesustaj payman nerka:

—Tucuy cay jatun rumi wasista ricushanquichej, chaycunaka urmachiskas cankancu. Ni uj rumillapis sayashaj sakeskachu canka, —nispa.

3 Chanta yupaychana-wasej chimpan Olivos orkoman chayaspa Jesús tiyaycucorka. Chaypi sapallan tiyacushajtintaj Pedro, Jacobo, Juan, Andreswan payman jamuspa taporkancu:

4 —Willawaycu ¿maycꞌajtaj ajina canka? ¿Imastaj ricuchiwasajcu tucuy cay imas tucucunayashaskantarí? —nispa.

5 Jesús paycunaman parlayta kallarerka:

—Sumajta khawacuychej ama pantachiskas canayquichejpaj. 6 Sutiypi ashqha runas llullacuspa jamonkancu. Nenkancutaj: “Nokamin Cristoka cani”, nispa. Ashqhastataj pantarachenkancu.

7 ‘Chaywanpis guerrasmanta uyarispa guerrasmanta parlajta uyarispapis ama manchachicuychejchu. Cay imaska cananpuni tiyan. Astawanrí manaraj tucucuyrajchu canka. 8 Uj ayllu waj aylloj contranpi okhariconka. Uj llajtayoj runas waj llajtayoj runaspa contranpi okhariconkancu. May sinchꞌita jallpꞌapis qharcatitenka caynejpi jakaynejpitaj. Manchay yarkhaycuna canka. Chay imasrí onkocoj warmej nanayninpa kallariyninjina cashan.

9 ‘Astawanka kancuna quiquiyquichejta khawacuychej. Israel curajcunaj ñaupakencuman jaywaycusonkachej. Tantacuna-wasispitaj sekꞌosonkachej. Camachejcunaj ñaupakencuman curaj camachejcunaj ñaupakencumanpis pusasonkachej yachacojcunay caskayquichejraycu. Ajinapi kancuna paycunaman willaranquichej. 10 Manaraj tucucuytari sumaj willanaska willaraskaraj canan tiyan tucuy runasman. 11 Curajcunaman jaywaycoj pusasojtiyquichejka, ama ñaupajta sonkoyquichejpi manchachicuspa yuyaychejchu imatachus ninayquichejta. Astawanpis Santo Espíritoj chay ratupi sonkoyquichejman churaskanta, chayta niychej. Manamin kancunallachu parlajcunaka canquichej, manachayrí Santo Espíritu. 12 Uj waukeka waukenta jaywayconka wañuchiska cananpaj. Uj tatapis wawanta jaywayconka. Wawaspis tatasnincoj contrancupi okharicullankancutaj wañuchichinancupaj. 13 Kancunatapis tucuy runas chejnisonkachej yachacojcunay caskayquichejraycu. Tucucuycama Diospi confiacuspa muchojrí wiñay causayniyoj canka.

14 ‘Leejka cayta sumajta reparachun: Dios millachicun, chay thuñispa tucuchejta, maypi mana cananchu ricunquichej. Chayta ricuspaka Judea jallpꞌapi cashaj runas orkosman aykecuchuncu. 15 Pillapis wasimanta jawapi^a cashajka ama yaycuchunchu capuyninta okharicojka. 16 Pillapis chajrapi cashajka amallataj cutiycuchunchu ponchonta okharejka. 17 ¡Ay phutiy, ari, chay pꞌunchaycunapi wijsayoj warmispaj ñuñushaj wawitasniyojcunapajpis! 18 Diosmanta mañacushaychej ama para tiempopi^b aykecunayquichej cananpaj. 19 Chay pꞌunchaycunapeka ñacꞌariy canka. Chayjina ñacꞌariyka mana carkachu cay pacha kallariypi Dios tucuy imata ruwaskanmantapacha cunancama. Nitaj jaycꞌajpis ajinaka cankachu. 20 Sitajchus Señor Dios chay ñacꞌariy tiempota mana pisiyachinmanchu chayka, ni pi causanmanrajchu. Astawanrí paypa ajllacuskasninraycu chay tiempota pisiyachenka yuyaskanmanjina.

21 ‘Chay pꞌunchaycunapi sitajchus pipis nisunquichejman: “¡Khaway, caypi Cristo cashan!” chayrí “¡Jakaypi cashan!” chayka, ama payta creeychejchu. 22 Llulla cristocuna llulla willajcunapis riqhurimonkancu. Chaywanpis ricuchinasta tꞌucuna ruwanastawan ruwankancu Diospa ajllacuskasnintapis pantachinancupaj, sichus aticunman chayka. 23 Kancunaka allinta khawacuychej. Tucuy imata manaraj ruwacushajtin ñaupajtaña nerkayquichej.

24 ‘Astawanrí chay pꞌunchaycunapi runas ñacꞌariskancumanta khepanta inti lakhayaycaponka quillapis manaña cꞌanchamonkachu. 25 Patamanta koyllurcuna urmarankancu. Cielopi cajcunata Dios cuyuchenka. 26 Chaymantamin runas ricuwankancu jamushajta phuyus chaupita. Noka, Diospa cachaska Runanka, jatun atiyniywan lliphipej cꞌanchaywanpis jamusaj. 27 Chaypacha Dioska angelesninta cachaspa ajllacuskasninta tucuy cay pachamanta tantachimonka.

28 ‘Cay quiquinchanata higo sachꞌamanta yachacuychej: Maypachachus ramasnin kꞌomeryamun laphisnin pꞌuturamushajtinñataj kancuna yachanquichej kꞌoni tiempo chayamushaskantaña.

29 Ajinallatataj chay manchay imasta ricuspaka yachanquichej cutimunay pꞌunchayka kayllallapiña caskanta. 30 Chekata niyquichej: Tucuy cay imaska canka manaraj cay pꞌunchay runas wañurapushajtincu. 31 Cielospis jallpꞌapis tucucaponkancu; nokaj niskasniyrí wiñaypaj mana tucucaponkachu. 32 Chay pꞌunchaytarí ni pi yachanchu ima ratuchus cananta, Tatay Dioslla yachan. Ni janaj pachapi angeles nitaj noka, paypa Wawanpis, yachanichu.

33 ‘Rijchꞌariskas sumajta khawacushaychej, Diosmanta mañacuspapuni. Manamin yachanquichejchu ima ratutachus cutimunayta. 34 Uj wasiyoj runaka caruman rinanpaj, wasinmanta manaraj llojsishaspa camachisninman atiyta kon ruwananmanjina sapa uj ruwashananpaj. Puncu khawajtapis camachin, pay cutimunanpaj rijchꞌariska wakaychananta. 35 Ajinata kancunapis rijchꞌariskas allinta wakaychacushaychej. Manamin yachanquichejchu ima ratutachus noka, Señorniyquichej, jamunayta, chꞌisiyaycuytachus, chaupi tutatachus, gallo wakaytachus, chayrí sutꞌiyamuytachus. 36 Pajtataj, ujllata mana yuyaskayquichejta Señorniyquichej cutimunman puñushajtataj taripasunquichejman. 37 Kancunaman niskaytaka tucuyman nishani: ¡Rijchꞌariskas allinta wakaychacushaychej! —nerka Jesús.