Uj quiquinchana chunca sipascunamanta
25
‘Ajinaka Dios wiñaypaj camachin, chaypi llancꞌajcunaka rijchꞌacuncu chunca sipascunaman. Paycunaka cꞌanchanasnincuta apaspa casaracoj runata suyaj rerkancu. 2 Phishka sipascunari yuyayniyoj caspa waquichicorkancu. Phishka sipascunataj mana yuyayniyoj carkancu. 3 Chay mana yuyayniyoj sipascunari cꞌanchasnincuta aparkancu, manataj kerosenta yapanancupaj aparkancuchu. 4 Yuyayniyoj sipascunarí cꞌanchasnincuta aparkancu. Kerosentataj uj churanapi aparkancu yapanancupaj. 5 Casaracoj runa runasninwan unayta khepacojtin puñuywan tucuynincu cꞌaywisharkancu puñurparerkancutaj. 6 Chaupi tutaña cashajtintaj uj sinchꞌi khapariy uyaricorka: “¡Casaracoj runa jamushanña! ¡Taripamuychej payta!” 7 Chanta tucuynin chay sipascuna rijchꞌarispa jataricorkancu. Chaymantataj cꞌanchanasnincuta waquicherkancu. 8 Mana yuyayniyojcunarí nerkancu yuyayniyoj sipascunata: “Kerosenniyquichejmanta koriwaycu. Cꞌanchanasniycu wañupushancuña”, nispa. 9 Yuyayniyoj sipascunataj cuticherkancu: “Mana. Kosuyquichejman chayka, kancunapajpis nokaycupajpis pisinman. Astawanpis riychej vendejcunajman rantinayquichejpaj”, nispa. 10 Paycuna rantej rinancucamataj casaracojka runasninwan jamorka. Waquichiska cajcunataj casaracoj runawan runasninwan ima casamiento wasiman yaycorkancu. Chaymantataj puncu wiskꞌacaporka. 11 Khepamanta chay waj sipascuna chayamorkancu. Nerkancutaj: “¡Señorníy, Tatáy, puncuta qhicharimuwaycu!” nispa. 12 Casaracoj runataj cuticherka: “Niyquichej chekamanta mana rejsiyquichejchu”.13 Jesuska runasman nerka:
—Chayraycu kancunapis rijchꞌariskas suyaychej. Imaraycuchus mana yachanquichejchu noka, Diospa cachaska Runan, maycꞌajchus cutimunayta. Ima pꞌunchaychus ima horachus cutimunayta mana yachanquichejchu.
Uj quiquinchana patronpa jaywaskan kolkemanta
14 ‘Chaywanpis nokaj camachinaypaj cutimunayka rijchꞌacun uj caruman rej patronman. Chay patronka ripushaspa camachisninta wajyarka. Chaymantataj capuyninta paycunaman jaywaycorka. 15 Uj camachinman korka phishka warankajina kolketa. Ujmantaj korka iscay warankajina kolketa. Uj cajmantaj korka uj warankajina kolketa. Sapa ujman korka ruwayta atiskancumanjina. Chaymantataj caruman rerka. 16 Chanta chay phishka warankajina kolketa japꞌejka rerka. Ajinaspataj chay kolketa sumajta purichimorka. Uj phishkatawantaj mirachimorka. 17 Ajinallataj chay iscay warankatajina kolketa japꞌejpis uj iscaytawan mirachimorka. 18 Uj warankatajina kolketa japꞌejrí rerka. Ajinaspataj patronninpa kolkenta jallpꞌaman pꞌampaskata pacaycamorka.
19 ‘Chay camachicunaj patronnincoka ashqha watasmanta cutimorka. Chaymantataj patronka kolkemanta yachananpaj paycunawan parlarka. 20 Payman chay phishka warankajina kolketa japꞌejka jamorka. Payri uj phishka waranka kolketawan apamorka. Patronninmantaj nerka: “Señor, phishka warankajina kolketa kowarkanqui. Khawaymá, uj phishkatawan mirachimuni”. 21 Patronnintaj payta nerka: “Walejpacha, cꞌacha, juntꞌaj camachíy. Chay pisi kolkepi sumajta juntꞌarkanqui. Cunantaj ashqhamanwanraj ruwapunawayquipaj churaskayqui. Chaywanpis nokawan cusca cusicunayquipaj jampuway”, nispa. 22 Chanta chay iscay warankajina kolketa japꞌejpis kayllaycamuspa nillarkataj: “Señor, iscay warankajina kolketa kowarkanqui. Khawaymá, uj iscay warankatawan mirachimorkani”. 23 Patronnintaj nerka: “Walejta ruwarkanqui, cꞌacha, juntꞌaj camachíy. Chay pisi kolkepi sumajta juntꞌarkanqui. Cunantaj ashqhamanwanraj ruwapunawayquipaj churaskayqui. Chaywanpis nokawan cusca cusicunayquipaj jampuway”, nispa. 24 Uj warankajina kolketa japꞌejpis kayllaycamuspa nerka: “Patronníy, rejsiyqui kanka ancha rumi sonko runa caskayquita. Mana tarpuskayquimanta cosechanquipis. Mana kanpata cajtapis japꞌinqui. 25 Chayraycu manchachicorkani. Kolkeyquitataj riytawan sumajta jallpꞌaman pꞌampaskata wakaycharkani. Cayka kolkeyqueka. Japꞌicapuy”. 26 Patronnintaj payman cuticherka: “Khella, sajra camachi. Yacharkanqui mana tarpuskaymanta cosechaj caskayta, mana nokajta cajtapis japꞌej caskayta. 27 Yachashaspa ¿imaraycutaj kolkeyta mirachejcunaman mana korkanquichu? Cutimuspa miraynintawan kolkeyta japꞌicapuyman carka”, nispa. 28 Chayraycu chaypi cajcunaman nerka: “Cay runamanta kolketa khechuychej. Chay chunca warankajina kolkeyojman kopuychej”, nerka patron. 29 Imaraycuchus Diospa niskanta japꞌicojmanka astawan koska canka. Manataj pisenkachu jaycꞌajpis. Mana japꞌicojmantarí pisi japꞌicuskanpis khechuska canka. 30 Cay manacaj camachitari jawa lakhaman wijchꞌumuychej. Chaypi wakaytawan quiru cꞌarucuytawan ñacꞌarenka, —nispa nerka Jesús.
Tucuy caj runaman Cristo konka ruwaskancumanjina
31 Nillarkataj:
—Noka, Diospa cachaska Runanka, atiyniywan cutimusaj tucuy angelesta pusaspa. Chaypacha tiyaycusaj camachinaypaj tucuy atiyniywan. 32 Tucuy llajtasmanta runastaj ñaupakeypi tantaskas cankancu. Uj michejka ovejasta cabrasmanta tꞌakan. Ajinallatataj nokapis chekanta ruwaj runasta sajrata ruwaj runasmanta tꞌakasaj. 33 Chekanta ruwajcunata pañayman churasaj. Sajrata ruwajcunata llokꞌeyman churasaj. 34 Chanta noka, Camachej, pañaypi cajcunata nisaj: “Jampuwaychej, Dios Tataypa sumajpaj khawaskasnin. Cay pacha ruwacuymantapacha nokawan cusca kancuna camachinayquichejpaj waquichiska carka. Chayraycu cunan nokawan cusca camachiychej. 35 Imaraycuchus yarkhachicojtiy miqhuchiwarkanquichej. Chꞌaquichicushajtiy ujyanata kowarkanquichej. Forastero purishajtiypis wajyariwarkanquichej. 36 Pꞌachamanta pisichicojtiy pꞌachata kowarkanquichej. Onkoska cashajtiy watucuwarkanquichej. Carcelpi wiskꞌaska cashajtiy watucoj jamuwarkanquichej”. 37 Chanta chekata ruwaj runaska cutichiwankancu: “Camachiwajníy, ¿maycꞌajtaj yarkhachicojta ricususpa miqhucherkaycurí? Chayrí chꞌaquichicushajtiyqui ¿maycꞌajtaj ujyacherkaycurí? 38 Forastero purishajta ricususpa ¿maycꞌajtaj wajyarerkaycurí? Chayrí pꞌachamanta pisichicojta ricususpa ¿maycꞌajtaj pꞌachallicherkaycurí? 39 Onkoskata ricucuspa chayrí carcelpi wiskꞌaska cashajtiyquipis ¿maycꞌajtaj watucoj jamorkaycurí?” nispa. 40 Noka, Camachejnincutaj, paycunaman cutichisaj: “Chekamanta cay uj pisipaj khawaska hermanoypaj imallatapis ruwaporkanquichej chayka, nokapaj ruwapuwarkanquichej”.
41 ‘Noka, Camachejnincoka, chanta nillasajtaj llokꞌeypi cajcunata: “Kancuna juchachaska cajcuna riychej caymanta. Supay Satanaspaj cachasninpajwan uqhu pachapi wiñaypaj lauraj nina waquichiska cashan. Chayman kancunaka riychej. 42 Imaraycuchus yarkhachicojtiy miqhunata mana kowarkanquichejchu. Chꞌaquiska cashajtiy yacuta mana jaywariwarkanquichejchu. 43 Forasterojina purishajtiy mana wajyariwarkanquichejchu. Pꞌachamanta pisichicojta ricuwaspa mana pꞌachallichiwarkanquichejchu. Onkoska cashajtiy, carcelpi wiskꞌaska cashajtiypis mana watucuwarkanquichejchu”. 44 Chanta paycunaka cuticherkancu: “Camachiwajníy, ¿maycꞌajtaj yarkhachicojta ricususpa chayrí chꞌaquiskata chayrí forastero purishajta, chayrí pꞌachamanta pisichicojta chayrí onkoskata chayrí carcelpi wiskꞌaskata ricususpapis mana yanaparerkaycuchu?” 45 Chanta noka, Camachejnincoka, paycunaman cutichisaj: “Pisipaj khawaska cajpaj imallatapis mana ruwaporkanquichejchu chayka, chekamanta nokapajpis mana ruwapuwarkanquichejchu”. 46 Chayraycu kancunaka wiñay ñacꞌariyman riychej. Chekanta ruwaj runasrí wiñay causayniyoj nokawan cankancu.