—¿Tucuy cay sumachej rumismanta wasista ricushanquichejchu? Chekamanta caycunaka kꞌalata urmachiskas cankancu. Nitaj uj rumillapis waj rumiwan sayashaj sakeskachu canka.

3 Chanta Jesús Olivos orko patapi tiyaricuskantawan yachacojcunaka sapallancu payman kayllaycorkancu. Taporkancutaj:

—Niwaycu ¿maycꞌajtaj tucuy chayka ruwaconkarí? ¿Ima ricuchinastaj canka cutimunayquimanta cay pachaj tucucunanmantawan?

4 Jesustaj paycunaman cuticherka:

—Sumajta khawacuychej ama pantachiskas canayquichejpaj. 5 Arí, ashqhas llullacuspa sutiypi jamonkancu. Nenkancutaj: “Noka Diospa ajllaskan cani”, nispa. Ashqhasta pantarachenkancu. 6 Reparaychej: Guerrasmanta waj guerra canayashallaskanmantataj uyarinquichej. Guerrasmanta parlajta uyarispapis ama manchachicuychejchu. Chay imaska canancupuni tiyan. Astawanpis manaraj tucucuyrajchu canka. 7 Imaraycuchus uj ayllu waj aylloj contranpi okhariconka. Uj llajtayoj runas waj llajtayoj runaspa contranpi makanacunapaj okhariconkancu. Yarkhaycuna onkoycunapis canka. Jallpꞌapis caynejpi jakaynejpi qharcatitenka. 8 Tucuy chay imasri onkocoj warmej nanaynin kallarinajina sinchꞌi canka. Ajinata runas mayta ñacꞌarenkancu.

9 ‘Chaypachamin sinchꞌi llaquichiskas canayquichejpaj jaywaycusonkachej wañuchisonkachejtaj. Chaywanpis tucuy runas yachacojcunay caskayquichejraycu chejnicusonkachej. 10 Ajina cajtinmin ashqhas Diospa cheka ñanninmanta urmaponkancu. Waquenka paycunapura chꞌatanaconkancu. Waquintaj paycunapura chejninaconkancu. 11 Ashqha llulla willajcuna riqhurimonkancu. Ashqhastataj pantachenkancu paycunapi creenancupaj. 12 Sajra causay juntꞌaycuskanraycutaj runas mana tucuy sonkowan munanaconkancuñachu. 13 Tucuy chay tucucunancama nokapi sinchꞌita japꞌicojrí juchamanta cachariska canka. 14 Dios caypi cashan camachinanpaj, cay sumaj willanasnenka tucuy cay pachapi willaraska canka tucuy runas yachanancupaj. Chanta tucucuyka jamonka.

15 ‘Diospa unay willajnin Danielka nerka Dios millachicun, chay thuñispa tucuchej cananta. Chayta leerkanquichej chayka, sumajta reparaychej. Imaraycuchus chay tucuchejta Diosman tꞌakaska cajpi cashajta ricunquichej. 16 Chaypacha Judea jallpꞌapi cashajcuna orkosman aykecuychej. 17 Wasi jawapi^a cashajpis ama imata orkhoricojllapis wasinman yaycuchunchu. 18 Chajrapi runaka wasiman pꞌachanta okharicoj ama cutichunchu. 19 ¡Phutiy ari, chay pꞌunchaycunapi wijsalliska warmispaj, ñuñushaj wawayojcunapajpis! 20 Kancunari Diosmanta mañacuychej ama para tiempopi aykecunayquichej cananpaj nitaj samacuna pꞌunchaypi. 21 Imaraycuchus chay pꞌunchaycunapi manchay ñacꞌariy canka. Cay pachaj kallaricuyninmanta cunancama mana carkachu chayjina ñacꞌariyka nitaj jaycꞌajpis cankachu. 22 Chay ñacꞌariy tiempota Dios mana pisiyachinman chayka, ni pi causanmanrajchu. Ajllaskasninraycurí Dioska chay ñacꞌariy tiempota aswan pisiman pisiyachenka.

23 ‘Sitajchus nisunquichejman: ¡Khawaychej caypi Diospa ajllaskan Cristo cashan! chayrí ¡Khawaychej, jakaypi cashan! Chayta ama creeychejchu. 24 Imaraycuchus mana cheka caj cristo caspalla Cristojina riqhurimonkancu. Llulla willajcunapis riqhurimonkancu. Paycunaka sumachej ricuchinastawan sumachej tꞌucunastawan ruwankancu. Aticunman chayka, chaywan Diospa quiquin ajllacuskasnintapis cheka cajmanta pantachinancupaj ruwankancu. 25 Manaraj chayta ruwacushajtin ñaupajtaña nerkayquichej. 26 Chayraycu nisunquichejman: “Khawaychej, jakay chꞌinnejpi Diospa ajllaskan cashan”, nispa chayka, ama chayman riychejchu. Chayrí nisunquichejman: “Diospa ajllaskan cay uqhupi pacaska cashan”, nispa chayka, chaytapis ama creeychejchu. 27 Allinta yachaychej: Lliujlliojka inti llojsimuynejmanta inti yaycuynejcama cꞌancharejtin tucuy runas ricuncu. Ajinallatataj cutimojtiy tucuy runas ricuwankancu. 28 Maypichá aya cashan, chaymanmin alkamariska tantacuncu.

29 ‘Chay ñacꞌariskanmanta khepanta inteka lakhayaycaponka. Quillapis manaña cꞌanchamonkachu. Koyllurcunataj janaj pachamanta urmaramonkancu. Cielopi cajcunata Dios cuyuchenka: purichej callpapis pisiyaycaponka. 30 Chanta noka, Diospa cachaska Runan, jatun ricuchinayta janaj pachapi ricuchisaj. Chaypachatajmin cay pacha tucuy ayllusmanta runaska pechoncuta tacacuspa wakankancu. Ñokataj atiywan may lliphipej cꞌanchaywantaj jamusaj. Runastaj ajinata janaj pachamanta phuyu patapi cutimushajta ricuwankancu. 31 Nokataj may sinchꞌi wakaj pututusniyoj angelesniyta cachamusaj. Paycunataj ajllacuskasniyta tucuy cay pacha kayllamanta carumantapis tantayconkancu. 32 Cay higo sachꞌawan quiquinchanamanta yachacuychej. Higo sachꞌaj ramanka wawaramuspa laphisnin pꞌuturamun. Ajina cajtintaj yachanquichej kꞌoñi tiempoka chayamushaskantaña. 33 Ajinallataj kancunapis tucuy chay willarasuskayquichejta juntꞌaskata ricuspaka yachaychej ñapis noka cutimushaskaytaña. 34 Niyquichej chekamanta tucuy chayka ruwacunanta manaraj cay pꞌunchay runas wañurapushajtincu. 35 Cielopis jallpꞌapis tucucaponkancu. Cay niskasniyrí mana tucucaponkachu.

36 ‘Ima pꞌunchaychus ima horachus cutimunayta, ni pi yachanchu. Manamin janaj pachamanta cachamuska angelespis yachancuchu nitaj noka, Diospa Wawanpis yachanichu. Dios Tatalla yachan. 37 Astawanrí imaynachus carka unay runa Noé causashajtin, ajinallataj canka noka, Diospa cachaska Runan, ujtawan riqhurimojtiy. 38 Unay sinchꞌi para pꞌunchaycuna manaraj chayamushajtincu runaska miqhunasta miqhusharkancu. Machasharkancu casaracusharkancutaj. Ajinata causasharkancu Noé jatun barcoman yaycunan pꞌunchaycama. 39 Chay runasrí mana reparacorkancuchu sinchꞌi para tucuy paycunata apacapunancama. Ajinallataj canka noka, Diospa cachaska Runan, cutimunaycama. 40 Chaypachaka iscay runas chajrapi cankancu. Ujnin caj nokaman pusaska canka ujninri sakeska canka. 41 Iscay warmis cusca maranpi cutashankancu. Ujnin nokaman pusaska canka. Ujninri sakeska canka.

42 ‘Kancunaka manamin yachanquichejchu ima pꞌunchaychus noka Señorniyquichej cutimunaytaka. Chayraycu waquichiskas caychej. 43 Sumajta reparaychej. Uj wasiyoj runa ima horatachus wasiman suwa jamunanta yachanman chayka, waquichicunman. Manataj sakenmanchu juscꞌuspa wasiman yaycunantaka. 44 Ajinaka kancunapis waquichiskas caychej. Imaraycuchus ima horatachus mana suyanquichej cutimunayta, chay horata noka, Diospa cachaska Runan, cutimusaj.

45 ‘Parlani uj chekanta juntꞌaj sumaj yuyayniyoj camachimanta. Patronnenka payta churarka wasinpi camachisninman horasninpi miqhuchinanpaj. 46 May cusiska chay khawapojka patronnin cutimojtin payta taripan ruwananta ruwashajta. 47 Chekamanta patronnenka tucuy capuyninta khawapunanpaj chay camachita churanka. 48 Sajra camachirí sonkonpi ninman: “Patronniyka khepaconkaraj”, nispa. 49 Kallarintaj camachi-masisninta makaspa apaycachayta. Machajcunawantaj miqhoj ujyaj churacun. 50 Mana suyaskan pꞌunchayta, mana yuyaskan horata patronnenka cutimonka. 51 Camachintataj puraj uyacunawan cuscata sinchꞌita nacꞌarichenka. Chaypitaj quiru cꞌarucuyta wakanka, —nispa nerka Jesús.