—Riychej chimpa ranchoman. Chaypitaj uj china burrota malton burrowan wataskata tarinquichej. Phascaraspataj cayman khatimuychej. 3 Mayken tapusunquichejman chayka, niychej: “Señorninchej cay burrosta munan”, nispa. Cunitan cutichisonka.

4 Chayka ruwacorka Diospa niskan juntꞌacunanpaj. Paypa unay willajnin palabranpi nerka:

6 Yachacojcunari rispa Jesuspa niskanmanjina ruwamorkancu. 7 China burrota malton burrotawan Jesusman khatimorkancu. Ponchosta caronaycorkancu. Jesustaj chay malton burroman llokꞌarka. 8 May ashqha runastaj paycunallamanta ponchosta Jesuspa ñanninpi mastꞌarkancu. Waquinri sachꞌa ramasta cꞌutumuspa ñanninpi mastꞌarkancu. 9 Chay ashqha runas waquenka Jesuspa ñaupakenta risharkancu, waquintaj khepanta. Khaparisharkancutaj:

—¡Jatunchaska cachun Diospa ajllaskan!^a ¡Yupaychaska cachun Diospa cachamuska Runanka! ¡May jatunchaska cachun janaj pachapi caj Dioska! —nispa.

10 Jesús Jerusalén llajtaman yaycojtin tucuy chay llajtapi tiyacoj runas mayta jataririspa mayta tꞌucorkancu. Tapunacusharkancutaj:

—Cay runa ¿pitaj canman?

11 Chay ashqha runasri cutichinacusharkancu:

—Diospa willajnin Jesusmin. Payka Galilea jallpꞌamanta Nazaret llajtayoj, —nispa.

12 Chanta Jesuska yupaychana-wasinpa pationman yaycorka. Chaypi tucuy vendejcunata rantejcunatawan jawaman kharkorka. Kolke trocajcunaj mesasnincuta tejrararka. Jaywana paloma 13 vendejcunaj tiyanancutapis tejrarallarkataj. Paycunamantaj nerka:

—Dios palabranpi nin: “Yupaychana-waseyka nokamanta mañacuna wasimin canan tiyan”. Kancunarí pacaymanta suwanayquichejpaj ruwaycacapunquichej, —nispa, Jesús nerka.

14 Yupaychana-wasipitaj ciegos, wistꞌus Jesusman kayllaycorkancu. Jesustaj paycunata thañicherka. 15 Jesuska chay onkoskasta thañichispaka uj tꞌucuna imata ruwarka. Yupaychana-wasipipis wawaska mayta khaparisharkancu: “¡Diospa ajllaskan^b jatunchaska cachun!” nispa. Chay imasta uyarispa yupaychana-wasimanta curajcunawan yachachejcunawanka mayta phiñacorkancu. 16 Jesusmantaj nerkancu:

—¿Uyarinquichu cay wawacunaj nishaskancuta?

Paytaj nerka:

—Arí, kancunari ¿manachu jaycꞌajpis Diospa palabranpi cayta leerkanquichej? Nin:

17 Chanta Jesús runasta sakepuspa llajta jawa Betaniaman riporka. Betaniaka Jerusalén kayllapimin. Chaypitaj chay tuta khepacorka.

18 Tutamanta llajtaman cutimushaspa Jesuska yarkhachicorka. 19 Ñan kayllapi uj higo sachꞌata ricuspataj chimpaycorka. Manataj tarerkachu higostaka, manachayrí laphisllata. Paytaj nerka:

—Ni jaycꞌajpis pokoyniyqui cachunchu.

Chaymanta higo sachꞌaka chꞌaquerpariporka. 20 Yachacojcunanka chayta ricuspa tꞌucorkancu. Tapucorkancutaj:

—¿Imaynapitaj chaypachita cay higo sachꞌaka chꞌaquirpariporka?

21 Jesuska cutichispa nerka:

—Noka niyquichej chekatapuni mana iscayrayaspa Diospi japꞌicuwajchej chayka, higo sachꞌawan ruwarkani ajinata ruwaytapis atinayquichejta, chaymanta astawanpis. Sichus cay orkota niwajchej: “Caymanta okhariska cay, jatun kochamantaj wijchꞌuycuska cay” chayka, wijchꞌuycuska canka. 22 Imallatapis tucuy sonkowan Diospi japꞌicuspapuni mañacuwajchej chayka, chayta pay kosonkachej.

23 Yupaychana-wasi patioman yaycuspa Jesús yachachisharka. Ajinapitaj yupaychana-wasimanta curajcunawan israel curajcunapiwan Jesusman kayllaycorkancu. Taporkancutaj:

—¿Pejpa atiyninwantaj cay imasta ruwanqui? ¿Pitaj cay imasta ruwanayquipaj atiyta kosorka?

24 Jesustaj paycunaman cuticherka:

—Kancuna uj tapuriynillayman cutichiwaychej. Chanta nokapis cutichiskayquichej ima atiywanchus chay imasta ruwashaskayta. 25 ¿Pitaj Juanta cachamorka runasta bautizananpaj? ¿Dioschu chayrí runaschu?

Paycunapura unanchaspa ninacusharkancu:

—Dios payta cachamuskanta nisunchej chayka, payka tapuwasunchej: “¿Imaraycutaj payta mana creerkanquichejchu?” 26 Runaspa atiynincuwan niytarí, manchachicunchej llajtantin phiñacunanta. Imaraycuchus tucuy paycunaka Juanta sumajpaj khawaspa Diospa willajninpaj japꞌicuncu, —nispa.

27 Chaymantataj Jesusman cutichispa nerkancu:

—Mana yachaycuchu, —nispa.

Paytaj nerka:

—Ni nokapis willaskayquichejchu ima atiywanchus tucuy chayta ruwaskayta.

28 Jesús paycunaman parlashaspa nerka:

—¿Imaynataj richꞌasunquichej? Uj runa iscay wawasniyoj carka. Curaj cajman kayllaycuspataj nerka: “Wawáy, cunan pꞌunchay uva huertaypi llancꞌamuy”, nispa. 29 Chay wawanrí cuticherka: “Mana munanichu”, nispa. Khepamanta “mana” niskanmanta phuticorka. Chaymanta llancꞌaj rerka. 30 Uj caj wawawanman tatan kayllaycuytawan quiquillantataj nerka. Chay wawantaj cuticherka: “Ya, tatáy, llancꞌamusaj”, nispa. Payrí mana llancꞌaj rerkachu. 31 Chay iscay wawasmanta ¿maykennincutaj tatancoj munayninta ruwarka? —taporka Jesús.

Paycunari cuticherkancu:

—Curaj caj wawan, —nispa.

Jesustaj paycunaman nerka:

—Chekamanta niyquichej manacajpaj khawaska impuesto japꞌejcunaraj khencha warmiswan Diospi japꞌicuypi atipasuskayquichejta, pay camachin, chayman yaycunancupaj. 32 Imaraycuchus bautizaj Juanka willasorkachej chekanta ruwaspa causanayquichejta. Kancunataj payta mana casorkanquichejchu. Impuesto japꞌejcunawan khencha warmiswanrí payta casorkancu. Astawanpis kancunaka Diosman cutiriskancuta ricuspapis Juanta mana uyarerkanquichejchu casunayquichejpaj.

33 ‘Cay waj quiquinchanayta uyariychej. Carka uj patron. Paytaj uvasta jallpꞌanpi plantarka. Chaycunatataj perkawan muyucherka. Chaypi uj uva sarunata chꞌirwanata ruwacherka uj alto wasitawan khawanapaj.

‘Chaymantataj chay jallpꞌanta pokoshajta japꞌinancupaj llancꞌajcunaman sakeycorka. Payri caruman riporka. 34 Uva pallana tiempo kayllamushajtintaj camachisninta llancꞌajcunaman cacharka uvasta japꞌinancupaj. 35 Llancꞌajcunarí camachista japꞌiycorkancu. Ajinapi ujninta sinchꞌita makaycorkancu. Ujninta wañucherkancu. Ujnintataj rumiswan chꞌankaycorkancu. 36 Patronka ujtawan waj camachisninta cachallarkataj. Chay ñaupaj cachaskanmanta astawan ashqha camachista cacharkapis. Llancꞌajcunari quiquillantataj paycunata ruwaycorkancu.

37 ‘Patronka sonkonpi nerka: “Wawaytaka jatunpaj khawankancupuni”, nispa. Chayraycu tucuy chay khepantaka wawanta llancꞌajcunaman cacharka. 38 Llancꞌajcunari wawanta ricuytawan paycuna uqhu ninacorkancu: “Cay wawan jallpꞌataka tatanmanta japꞌenka. Chayraycu chay japꞌinan jallpꞌata japꞌirparisun nokanchejpata cananpaj. Jamuychej payta wañuchinachej”, nispa. 39 Chaymantataj paycunaka wawanta japꞌispa jallpꞌa jawaman wijchꞌorkancu wañucherkancutaj.

40 Ajinata niytawan Jesuska paycunata tapurerka:

—Uva jallpꞌayoj Señor cutimuspa ¿imanankataj chay llancꞌajcunatarí?

41 Paycunataj cuticherkancu:

—Chay sajra runastaka mana qhuyaspa wañurachenka. Jallpꞌantataj waj llancꞌajcunaman koponka. Uva pokojtincama japꞌinanta tiemponpi llancꞌajcunaman chay jallpꞌanta konka, —nispa.

42 Jesusri paycunaman nerka:

—¿Manachu jaycꞌajpis Diospa palabranta leerkanquichej? Nin: “Wasichajcuna uj rumita khawaspa wijchꞌorkancu. Wasita sinchꞌita sayachinanpaj chay wijchꞌuska rumeka aswan sumaj cashan tucuy waj rumismanta niskaka. Chaytaka Señor Dios ruwan, nokanchejpajtaj uj tꞌucuna”.

43 ‘Chayraycu niyquichej Dios camachin, chayman kancuna Israel llajtayojcuna, mana yaycuyta atinayquichejta. Dios camachin, chayman paypa munayninta ruwajcunalla yayconkancu. Ajinapi waj llajta canka pay camachinanpaj. 44 Noka, Diospa cachaska Runan, wasi kallarina rumijinamin, cani. Ajinataj chay rumiman urmacoj runaka tꞌunaska canka. Pimanchari chay rumi urmanka payka ñutꞌuska canka.

45 Yupaychana-wasimanta curajcunawan fariseo partecunawan chay quiquinchanata uyarerkancu. Repararkancutaj paycunawan Jesús chay imasta rijchꞌanachiskanta. 46 Chayraycu imaynapipis payta japꞌiycuchinancupaj mayta churacorkancu. Ashqha runastarí manchachicorkancu Jesusta Diospa willajninpaj khawaskancuraycu.