Llancꞌajcunamanta uj quiquinchana
20
‘Dios tucuyta camachejtenka uj sumaj patronjinamin canka. Chay patronka tutamanta llojserka llancꞌajcunata mincꞌacamoj. Chaymantataj uvas huertanpi llancꞌanancupaj camacherka. 2 Llancꞌajcunawantaj sumajta parlarka uj pꞌunchay llancꞌaskancumanta kopunanta. Chaymantataj paycunata huertanpi llancꞌajta cacharka. 3 Chaupi pakarinjina llojsispa waj llancꞌajcunatawan ricorka. Chay llancꞌajcunaka llancꞌayta mascꞌajcunaj tantacunancu chaypi sayacusharkancu. 4 Patronka paycunata nerkataj: “Kancunapis huertaypi llancꞌaychej. Nokataj cajmanjina jornalta pagaskayquichej”, nispa. Llancꞌajcunari rerkancu. 5 Watejmanta patronka llojsillarkataj chaupi pꞌunchaytajina. Quiquillantataj llancꞌajcunata pusamorka. Chaymantataj jatun tardetajina ajinata ruwarka. 6 Ujtawanpis mascꞌaj llojsillarkataj chꞌisiyaytaña. Llancꞌayta mascꞌajcunaj tantacunancu, chaypi wajcunatawan tarillarkataj. Paycunatapis nillarkataj: “¿Imaraycutaj tucuy cay pꞌunchayninta mana llancꞌaspa sayacushanquichejrí?” 7 Paymantaj nerkancu: “Mana pipis mincꞌawaycuchu llancꞌapunaycupaj”, nispa. Payri paycunaman nerka: “Kancunapis huertaypi llancꞌaychej”, nispa. 8 Inti yaycuytataj patronka khawapoj runanman nerka: “Llancꞌajcunata wajyay kolketa paycunaman pagapunayquipaj. Khepa jamojcunaman ñaupajta koy. Chaymantataj ñaupaj jamojcunaman”, nispa. 9 Chꞌisiyayllataña llancꞌajcuna tucuynin pꞌunchay llancꞌaskamantajina japꞌerkancu. 10 Tucuy chay pꞌunchay llancꞌajcunarí yuyarkancu aswan ashqhata japꞌinancuta. Astawanpis paycunaka ujcunajinallatataj japꞌerkancu. 11 Chanta chay tucuy pꞌunchaynintinta llancꞌajcunaka patronpa contranpi thutorkancu 12 nispa: “Chay chꞌisiyayllata jamojcunaka uj horallata llancꞌarkancu. Nokaycumanrí paycunamanjinalla pagapuwarkaycoka. Tucuynin pꞌunchayta manchay ruphaypi muchuspa llancꞌarkaycoka”, nispa. 13 Patrontaj ujnincuman cutichispa nerka: “Causaj-masíy, mana chꞌauquiyashayquichu. ¿Manachu parlaskanchejmanjina pagapuyqui? 14 Pagota japꞌiskayquiwan kanka ripuy. Noka munani cay khepa jamojcunaman kancunamanjinallataj koyta. 15 ¿Manachu atiyman capuyniywan munaskaymanjina ruwaytarí? Chayrí ¿cꞌacha runa caskaymantachu phiñaska khawashawanqui?” 16 Ajinatamin khepa cajcunaka ñaupaj cajpi cankancu. Ñaupajpi cajcunataj khepapi cajcuna cankancu. Chekamanta Dioska ashqhasta wajyan. Ajllaska cajcunarí pisislla cancu.Jesús watejmanta sutꞌinchan wañuchiska cananmanta
17 Jesuska Jerusalén llajtaman llojsisharka yachacojcunawan. Chay chunca iscayniyojllata ñanmanta wajnejman pusaspa nerka:
18 —Allinta reparaychej Jerusalén llajtaman rishaskanchejta. Chaypitaj noka, Diospa cachaska Runan, yupaychana-wasimanta curajcunaman yachachejcunamanwan jaywaycuska casaj. Paycunataj wañunaypaj juchachawankancu. 19 Waj llajtayoj runasman jaywaycullawankancutaj. Chanta chay runaska asipayawankancu jasutꞌiwankancu, chacataycuwankancupis. Nokataj quinsa caj pꞌunchaypi causarimpusaj.
Uj warmi wawasninpaj Jesusmanta mañacun
20 Chanta Zebedeoj warmin wawasninwan Jesusman kayllaycorka. Konkoricuspataj nerka:
—Uj imata niricuskayqui, —nispa.
21 Paytaj nerka:
—¿Imatataj munanquiri?
Paytaj cuticherka:
—Atiyniyquiwan camachinayquipaj tiyaycuspa churapuway cay iscay wawasniyta, ujnin pañayquipi ujnintaj llokꞌeyquipi [sumajpaj khawaskas canancupaj.]a
22 Jesusrí cuticherka:
—Kancunaka mana yachanquichejchu imatachus mañaskayquichejta. Manchayta ñacꞌanay tiyan. Chayka uj jayawan juntꞌaska copajina. ¿Ñacꞌariy wañunaycama nokajina muchuyta atiwajchejchu?
Paycunataj nerkancu:
—Arí, atiycu.
23 Jesustaj paycunaman nerka:
—Arí juntꞌa copata ujyanquichej nokajina. Wañuycama ñacꞌariymantaj yaycunquichej nokajina. Nokawan cusca tiyaycucuspa camachinayquichejpajka ujta pañayman ujtataj llokꞌeyman churayka mana nokamantachu. Manachayrí picunapajchá waquicherka chaycunallata Dios tiyaycuchenka, —nispa.
24 Tucuy chayta uyariytawan chunca yachacojcunaka phiñacorkancu chay iscay waukecunapaj. 25 Jesusrí paycunata wajyaspa nerka:
—Yachanquichejjina llajtasta camachejcunaka chaypi tiyacojcunata llaquichispa camachiskancuta. Llajtapi callpayojcunapis atiynincumanjina tucuy imapi casuchicuncu. 26 Kancunarí amapuni ajinaka caychejchu. Manachayrí kancuna uqhumanta atiyniyoj cayta munajka tucuy sonkowan yanapasojniyquichej canan tiyan. 27 Kancuna ughupi curajpaj khawaska cayta munajka casojniyquichej canan tiyan. 28 Noka, Diospa ajllaskanka, mana runas yanapanawancupajchu jamorkani. Manachayrí noka runasta yanapanaypaj jamorkani. Astawanpis paycunaj wañunancumanta noka wañusaj juchancumanta cacharichinaypaj. Ajinallataj kancunapis canayquichej tiyan.
Jesús khawarichin iscay ciegosta
29 Jesús yachacojcunanwan Jericó llajtamanta llojsishajtin ashqha runas payta khatisharkancu.
30 Ñannejpi iscay ciego runas tiyacusharkancu. Jesús chaynejta puriskanta uyarispataj khaparerkancu:
—¡Diospa ajllaskan,b nokaycuta qhuyacuwaycu!
31 Chay ashqha runastaj cꞌamerkancu:
—Chꞌin caychej, —nispa.
Paycunarí aswan sinchꞌiwan khaparispa nerkancu:
—¡Diospa ajllaskan, nokaycuta qhuyacuwaycu! —nispa.
32 Jesús sayaricuspa paycunata wajyarka. Nerkataj:
—¿Imatataj kancunapaj ruwapunayta munashanquichej?
33 Paycuna cuticherkancu:
—Señor, ricuyta munaycu.
34 Jesusri qhuyacuywan ñawisnincuta llanqharerka. Chay quiquinpacha ricorkancu Jesusta khaterkancutaj.