—Kancunaka inti yaycupushajtin ninquichej: “Kꞌayaka sumaj pꞌunchay canka, phuyu puca pucata antawaramuskanraycu”. 3 Tutamantataj ninquichej: “Cunan pꞌunchayka parankachá yanata phuyumushan”, nispa. Kancunaka phuyusta khawarispa yachanquichej imayna pꞌunchaychus cananta. Diospa ajllaska Runanmanta ricuchinastarí mana yachanquichejchu reparayta. 4 Cay sajra ruwajcunawan Diosta wasanchajcunawanka tꞌucunapaj uj ricuchinata mañashancu. Diospa willajnin Jonaspa ricuchinalla paycunapaj cashan manataj wajka, —nispa.

Paycunata sakespataj riporka.

5 Yachacojcunanka barcopi kochaj ujnin chimpaman chayarkancu. Chaypiña paycunaka tꞌantata mana apacuskancuta yuyaricorkancu.

6 Jesusri paycunaman nerka:

—Reparacuychej, sumajtataj khawacuychej fariseocunaj saduceocunaj tꞌanta pokochinancumanta, —nispa.

7 Yachacojcunataj paycuna uqhullapi tapunacusharkancu mana tꞌantata apacamuskancuraycu chayta parlaskanta.

8 Jesusri yuyashaskancuta reparaspa paycunaman nerka:

—¿Imaraycutaj kancuna uqhullayquichejpi tapunacushanquichej tꞌantata mana apacamuskayquichejmanta? ¡Kancunaka ancha pisita Diospi japꞌicunquichej! ¿Manarajchu reparanquichej? 9 ¿Nitajchu yuyarinquichej miqhuchiskayta phishka tꞌantasllamanta phishka waranka runasman? ¿Konkapunquichejchu mashqha canastasta chay puchojta juntꞌachiskayquichejta? 10 ¿Nitajchu yuyarinquichej kanchis tꞌantasmanta tawa waranka runasman miqhuchiskaymanta? ¿Maycꞌa jatuchej canastasta juntꞌataj puchorkarí? 11 Wakaychacuychej saduceowan fariseowan partecunaj tꞌanta pokꞌochinancumanta nisuskayquichejta ¿imaraycutaj mana entienderkanquichejchu? Mana tꞌantamantachu parlarkayquichej, —nispa.

12 Chantaraj yachacojcunanka entienderkancu Jesuska mana tꞌanta pokochina levaduramantachu parlaskanta. Manachayrí fariesocunaj saduceocunaj llulla yachachinasnincuwan ama pantachiskas canancuta paycunaman parlaskanta entienderkancu.

13 Jesuska Filipo jallpꞌapi Cesarea llajta chaynejman chayarka. Chaymantataj yachacojcunanta taporka:

—Noka, Diospa cachaska Runanmanta parlaspa, runaska ¿pi caskaytataj nincurí?

14 Paycunataj cuticherkancu:

—Waquin nincu bautizaj Juan causarimpuskanta. Waquintaj nincu Diospa unay willajnin Elías cutimuskanta. Waquinrí nincu Diospa unay willajnin Jeremías chayrí Diospa unay willajcunanmanta uj caskayquita, —nispa.

15 Paycunamantaj nerka:

—Kancunari ¿pi caskaytataj ninquichej? —nispa.

16 Simón Pedrotaj nerka:

—Kanka wiñay causaj Diospa ajllaska Wawan, Cristo canqui.

17 Jesustaj payman cuticherka:

—Kan, Jonaspa wawan Simón, may cusiska canqui. Chekatapuni niskayquitaka mana runallachu sutꞌinchasorka. Manachayrí janaj pacha Dios Tatay caytaka sutꞌinchasorka. 18 Noka nillayquitaj kanka Pedro caskayquita. Chaytaj niyta munan rumi. Ujchaska ajllacuskasniytaj sinchꞌi rumi patapi wasichaskajina cancu. Uqhu pacha supay Satanás^a chayta manapuni atipankachu. 19 Llavesta koskayqui Dios camachin, chayman runas yaycunancupaj. Cay pachapi imatapis runas ruwanancuta ninqui chayka, janaj pachapipis niskallataj canka. Cay pachapi imatapis runas ama ruwanancuta ninqui chayka, janaj pachapipis ajina niskallataj canka, —nispa.

20 Chanta Jesuska yachacojcunanman camacherka amaraj pimanpis willanancuta pay Diospa ajllaskan Cristo caskantaka.

21 Chaypachamantapacha Jesuska yachacojcunanman sutꞌita willayta kallarerka:

—Jerusalén llajtaman rinaypuni tiyan. Chaypitaj israel curajcuna, yupaychana-wasimanta curajcunawan israel yachachejcunapiwan anchata ñacꞌarichiwankancu. Paycunaka wañuchiwankancupis. Quinsa pꞌunchaymantataj causarimpunay tiyan.

22 Pedrotaj Jesusta wajnejman pusaspa payta cꞌamerka:

—Señorníy, amapuni ajina cananpaj, Dios kanta qhuyasuchun.

23 Jesusrí Pedroman cutiricuspa nerka:

—Anchuriy nokamanta. ¿Supay Satanásjina juchaman urmachiwaytachu munanqui? Kanka mana Diospa yuyaskanmanjinachu yuyashanqui manachayrí runaj yuyayninmanjinalla, —nispa.

24 Chanta Jesuska yachacojcunanman nerka:

—Pichari yachacojniy cayta munajka paypa tucuy munayninta sakepunan tiyan. Chaywanpis nokaraycu pay quiquin muchunan tiyan wañunancama. Nokatataj casunawanpuni tiyan. 25 Chekatapuni pichari causayninta payllapaj wakaychacuyta munajka mana wiñay causayniyojchu canka. Picharí causayninta cay pachapi chincananta sakejka nokata casuskanraycu chayka, chekatapuni wiñay causayniyoj canka. 26 Reparaychej: Sichus uj runa tucuy cay pacha capuytapis japꞌinman, wiñaypajtaj chincapunman chayka ¿ima allintaj paypaj canmanrí? Yachanchejjina runaka causayninta ranticuyta mana atinchu tucuy cay pacha capuywanpis astawan valorniyoj caskanraycu. 27 Imaraycuchus noka, Diospa cachaska Runan, cutimusaj Dios Tataypa atiyninwan cachamuska angelesninwan cusca. Chaypachataj sapa ujman ruwaskanmanjina kopusaj. 28 Niyquichej chekamanta noka camachinaypaj jamusaj. Waquin caypi cashajcunamantari mana wañuspa nokata jamushajta ricuwankancu, —nispa nerka Jesús.