2 —¿Imaraycutaj yachacojcunayqui unay curajninchejpa yachachiska ruwanasnincuta pꞌaquincu? Yachacuskanchejmanjina yachacojcunayqueka maquisnincuta mana mayllacuncuchu miqhunancupajka. ¿Imaraycutaj ajinata ruwancurí?

3 Jesustaj cutichispa nerka:

—Unay runasmanta yachacuskallayquichejta casushanquichej. Chanta ¿imaraycutaj kancunapis mana casunquichejchu Diospa camachiskanta? 4 Imaraycuchus Dioska nerka: “Tatayquita mamayquita jatunpaj khaway. Tatanpaj chayrí mamanpaj sajrata parlajka wañuchiska canan tiyan”, nispa. 5 Kancunarí yachachinquichej uj runa atillan niyta tataman chayrí mamaman: “Mana atinichu yanapasuyta. Kosunay carka chaytaka Diosmanña korkani”. Chay “korkani” nejka manaña jatunpaj tatanta mamantapis khawanchu. 6 Chaywanri Diospa camachiskanta pꞌaquinquichej yachacuskasniyquichejta ruwanayquichejpaj. 7 ¡Puraj uya runas! Allinta Diospa unay willajnin, Isaiaska, kancunamanta sutꞌincharka. Kelkaskanpi Dios nin:

10 Chanta chay ashqha runasta paynejman wajyaspa nerka:

—Sumajta uyariwaychej niskasniyta entiendenayquichejpaj. 11 Siminnejta yaycoj miqhunaka runaj yuyayninman juchawan mana chꞌichichanchu. Manachayrí runaj sonkonpi sajra yuyaskan siminnejta llojsimun. Chay parlaskanmin runataka chꞌichichaspa juchallichin, —nispa.

12 Chanta Jesuspa yachacojcunanka payman kayllaycuspa nerkancu:

—¿Yachanquichu chay fariseo runas niskayquita uyarispa phiñacuywan khesachasuskancuta?

13 Payri cuticherka:

—Tucuy yachachinas^a mana janaj pachapi tiyacoj Dios Tataymanta cajka kꞌala tucuchiskas cankancu. 14 Sakeychej chaycunata munaynincumanjina ruwanancuta. Paycuna ciegosjina cancu Diospa yachachinasninmantaka. Chaywanpis waj ciegosta pusajcunajinataj cancu. Sichus uj ciego ciegollatataj pusanman chayka, iscaynincu cusca tꞌokoman urmayconkancu, —nispa.

15 Pedrori Jesusta nerka:

—Chꞌichichanamanta niskayquita sutꞌinchawaycu, —nispa.

16 Paytaj cuticherka:

—Kancunapis ¿manallatajchus yuyayniyoj canquichej? 17 ¿Manachu entiendenquichej? runaj miqhuskanka wijsanman yaycuskanta chaymantataj jawaman llojsipun. 18 Astawanpis runaj sonkon sajrata yuyaskanmanta llojsimoj parlaskanmin runataka juchallichin. 19 Imaraycuchus runaj sonkonmanta sajra yuyaycuna llojsimun. Chaymanta runata wañuchin, khenchachacun, sajra puriypi causan, suwacun, llullacuytawan willan runa-masinmanta, Diospaj sajrata parlan. 20 Chaycunamin Diospa ñaupakenpeka jucha cancu. Runaj sonkontataj chꞌichichan. Maquista mana mayllacuspa miqhuyrí manapuni runaj sonkontaka chꞌichichanchu, —nispa.

21 Jesuska chaymanta llojsipuspa Tiro llajta Sidón llajta chaynejman riporka. 22 Chaypitaj tiyacoj Canamanta uj warmi. Paytaj Jesusman jamorka. Khaparispataj paymanta mayta mañacorka:

—Tucuy atiyniyoj Señor, Diospa ajllaskan Cristo^b canqui. ¡Qhuyacuway nokamanta! Ususiyta supay mayta ñacꞌarichishan, —nispa.

23 Jesusrí warmiman ni uj palabratapis cuticherkachu. Chayraycu yachacojcunanka Jesusman kayllaycuspa mayta mañarkancu:

—Cachapuy chay warmita. Payka khepanchejta khaparispa jamushan, —nispa.

24 Jesusri cuticherka:

—Dios Tatayka israel aylluymanta chincaska cajcunallaman cachamuwan. Paycunaka ovejasjina Diospa chekan ñanninmanta pantaporkancu, —nispa.

25 Chaywanpis chay warmeka kayllaycuspa Jesusman cꞌumuycorka yupaychananpaj. Nerkataj:

—¡Señor, yanapariway ari! —nispa.

26 Jesusrí cuticherka:

—Wawaspa tꞌantancuta okharispa alketusman karaycoyka mana allinchu, —nispa.

27 Warmiri nillarkataj:

—Arí, Señor, chaywanpis alketuspis miqhuncupuni dueñosnincoj miqhuy tꞌunasnin mesamanta tꞌacacojtenka, —nispa.

28 Chanta Jesuska payman cutichispa nerka:

—Doña, may sumajta nokapi japꞌicunqui. Munaskayquimanjina ruwaska cachun, —nispa.

Chay quiquinpacha ususenka thañicaporka.

29 Jesuska jakaymanta llojsispa Galilea kocha cantonejman rerka. Orkoman rispataj chaypi tiyaycucorka. 30 May ashqha runas payman kayllaycorkancu. Paycunataj apamorkancu wistꞌusta, ciegosta, mana rimarejcunata, ñucꞌusta, ashqha waj onkoyniyojcunatawan. Jesuspa ñaupakenman chay onkoskasta churaycorkancu. Payri paycunata thañicherka. 31 Ajinaka chay ashqha runas mayta tꞌucorkancu. Uyarerkancu mana rimarejcuna parlashajta. Ricorkancu ñucꞌus thañicojta, suchus purishajta, ciegos ricushajta. Israel runaspa Diosnincutataj jatunchaspa yupaycharkancu.

32 Jesuska yachacojcunanta payman wajyaspa nerka:

—Sonkoy nanawan cay ashqha runasmanta. Quinsa pꞌunchaytaña nokawan cusca cashancu. Miqhunancupaj manaña ni imapis canchu. Mana miqhuskata cachapuytari mana munanichu, ñanta rishaspapis yarkhaywan llauchhuyapuncuman, —nispa.

33 Chanta yachacojcunan nerkancu:

—Cay chꞌinnejpi cashanchej ¿imaynapitaj ashqha miqhunata tarisunman cay chhica runasta miqhuchinanchejpajrí?

34 Jesusri taporka:

—¿Mashqha tꞌantastaj capusunquichej?

Paycunataj cuticherkancu:

—Kanchis tꞌantaslla pisi challwitaspiwan, —nispa.

35 Chanta Jesuska runasta camacherka pampaman tiyaycucunancuta. 36 Chay kanchis tꞌantasta maquisninpi japꞌerka challwitastawan. Chaycunamantataj Diosman graciasta korka. Ajinaspa chay tꞌantasta challwitastawan partispa yachacojcunanman jaywallarkapuni. Paycunataj chay ashqha runasman jaywararkancu. 37 Tucuynincutaj miqhorkancu sajsacunancucama. Chaywanpis tꞌunasmanta puchuska kanchis jatun canastas juntꞌaraj carka. 38 Miqhojcunaka tawa warankajina kharis carkancu. Warmispis wawaspis miqhullarkancutaj. 39 Ajinata Jesús miqhuchiytawan runasta cacharpayarka. Chaymantataj barcoman yaycuspa Magdala jallpꞌaman riporka.