1 แดเจณ เฌาพรา แฮะ ต็อห, “อึย เบ อี กอย แคง ฆูน อึม, แตห เบ โทม โฆรห โอว. เบ อี กอย โต็ง, แตห เบ ยึร ปี กาลาง โอว. เฌาพรา แฮะ แดะ โอว ซีณ อาต ฆึอด โอว. อัน แฮะ ดึอม กาลาง จืร โอว, แตห อี นับ.

2 อัน เฌา แฮะ แตห โอว กาลาง โฆรห อี นับ ดี ดึร น็อห อี ปี มาปัวะ ลาง อี ลัม กาเซา. อัน แฮะ บัร รีด โอว ปี อัน แตห โอว กอย ครึม ยาบ แด อัน. อัน เฌา แฮะ ร็อห โอว ปี ดูอี ร็อห บลา อัะ อี บัต ซีคยา, อี กอย แคง บัยะ บลา.

3 อัน เฌา มืร แฮะ ต็อห ดี โอว, ‘อึย เบ ดูอี อีซาเรลัะ, เบ มูห แดเจณ โอว. โกบ ยึร อี เฮา ปี ปาย เบ, อาพูง ดังโคว โอว ดี บอ ลึห ซีคยา ดี เฆ ดูอี กืน.’

4 โอว ยี วี ต็อห, ‘โอว แฮะ ฮอต โบง ฆาน กืน. มาแล, อึณ ยี ตู แบน อาฆยึร มาเซ. โอว แฮะ ฮอต โบง แคะ มึห โอว โปลม, อึณ ยี ตู มึห ดีโคว.’ ปาย ตี โอว บอ วี หณึม บึง เฌาพรา, แตห อัน จอย โอว, ดัว รูห แคะ ปี โบง ปี รัณ โอว ตี.

5 ซีณ อาต ฆึอด โอว, เฌาพรา แฮะ แตห โอว แบน แดเจณ อัน อี ดี แดะ เฆ อาโมยว อาโกบ วี ตัห กาดึก กาด็อะ ดี อัน. เฆ ดูอี อีซาเรลัะ ยี ตู ตัห. อึณ ปี บอ แฮะ ปาย ตี มืร, เฌาพรา แฮะ แตห โอว มึห อาพูง ดังโคว, แตห โอว มึห บอ โปลม เฆ แฮณ.”

6 เฌาพรา บอ ต็อห, “แม แฮะ แบน แดเจณ โอว, โอว แฮะ แตห แม วี แตห แฮณ ดี น็อห เฆ ดูอี อีซาเรลัะ. โอว มืร แตห แม มึห ปวน ดี วี แดะ ตัห กาฌูะ เฆ ดูอี อีซาเรลัะ อี ซี ฆีด ซี กอย, แตห เฆ วี ตัห กอย โดง กอย บรีม เฆ. แดง ตี, แม ดี แตห อึณ บลาง บอ ดี ดูอี ดอน โมยว แดง กาดาย นี, แตห อึณ บอ คยอด เฆ อี กอย โดง ซืด กาดาย.”

7 เฌาพรา อี ซีงา บอด อี มูห เฌาพรา ปี กรึบ เฆ ดูอี อีซาเรลัะ อี นับ ดี ทูด เลห ดูอี, อัน วี กาลาง ดี ดูอี อี คัม ดูก. อัน บอ กาลาง ดี ดูอี อี แบน ปี ลูกตาย อี เฮา, อี ปี ฌ็อง อี เฮา ดอน มืง, บอ ดี ดูอี อี กาดูห ดี แบน หมาย คูนดีคัม. อัน ต็อห, “เฆ คูนดีคัม ดี บอ วี ยึร แม, เฆ ดี บอ วี โรวเซ แม. บอ เฆ ฆอน ดา กาณา บอกาเฆลียด ดี บอ วี ยึร ลอง ปี ดี โบง เฌาพรา, เฆ ดี บอ วี มูด ฆึบ ดี อาต แม, วี โรวเซ แม. โคว, เฌาพรา อี ซีงา บอด บอ มึห น็อห ซืร น็อห หมาน อี แฮะ ร็อห แม, อี มูห แดเจณ อัน.”

8 เฌาพรา ปี วี ต็อห, “เซ ฮี ฌัม อาคราว ปี อึง โอว, โอว ดี บอ โทม ปี ซาคึร ปี หมาณ แม. เซ ฮี ฌัม อาคราว ดี คยอด โอว ดี แม, โอว ดี จอย แม. โอว ดี ยอด แมน แม บอ ฆ็อง แร แม บอ ดัว กาดีก ซัดฌา ดี แม, แตห อึณ แบน ปี ปี กาแซณ โอว ดี ดูอี อีซาเรลัะ. โอว ดี แตห เฆ วี กอย แคง มืง เฆ อี แฮะ ราม ดอ ตี นี, แตห เฆ บอ วี ปึอน ดี บึง คาฆูน ดา ดา เฆ.

9 แม ดี กาลาง ดี เฆ ดูอี อี โจห กาปึม ต็อห, ‘แตห เบ เลห ฮาว ดาคึย ดาคึย.’ บอ ดี เฆ อี กอย แคง อับ ว็อง แม ดี ต็อห, ‘แตห เบ เลห.’ ดูอี เฆ ตี, เฆ ดี ปี มาบู อี วีน ดี แล บอ ปึอน ดี โฮม เปต ดอน นอน.

10 เฆ มืร ตู เอต อึม, ตู เอต ปี ดี โฮม. ซอดาด อี กาฮัวะ กาเซา แคง แปร กาฮ็อห มืร ตู แบน ปาย เหมา ดี เฆ. โคว, ดา อี ร็อก กาเว เฆ แฮะ ตึย เฆ ฮาว โดง มึห อึม โตห.

11 โอว ดี บอ โบง อึณเตณ ตาง อี กาโลห นอน ตาง ดอน นอน. อึณเตณ อี โจห เตียม, โอว ดี อึณปราย แตห อึณ กอ จา.

12 ดูอี ปี อึบ โอว ตี, เฆ ดี ตัห โดง โต็ง กาเซา. เฆ ดี บอ ตัห บลาก นา กัว, ตัห บอ บลาก นา เฆต ซีแง บอ นา มืง ซีนีม.”

13 อึย เบ อี กอย แคง ฆางหราว, แตห เบ ต็อห โหมว. เบ อี กอย แดง กาดาย, แตห เบ ดาคึย. บอ เบ นอน บอกาเฆลียด, แตห เบ ต็อห โหมว อี โบยว โบยว เกยา เกยา. โคว, เฌาพรา แฮะ โบง แตห เฆ ดูอี ปี อึบ อัน ฆยามซา. อัน ดี กาเว เฆ ดูอี อี แฮะ คัม ดูก ตาง.

14 มาแล, ดูอี แคง มืง ฌีโอน ยี วี ต็อห, “เฌาพรา แฮะ ฮอต เบลห แวน เย. อัน แฮะ ฮอต ปีว เย.”

15 ปาย ตี เฌาพรา ปี วี ต็อห, “เบ ดึอม ยึร อีบึณ อี นับ ดี วี ปีว ฆอน อัน? เบ นับ ลอง อีบึณ อี ตู วี กาเว ฆอน อัน? ปี บอ แฮะ มึห อีบึณ อี แฮะ ปีว ฆอน อัน ปาย ตี มืร, โอว ยี ตู ปีว เบ ดอ เหมา.

16 โอว แฮะ แดม อูน จืร เบ แคง กาบา แด โอว. แรง มืง เบ มืร โอว บอ ยอด เซเซ.

17 เฆ ฆอน เบ อี ดี วี ตัห ตึอน, เฆ ดี บอ ตัห ครัน ครัน. เฆ อี ปยาต อี พาด ดึห โกรวกราม เบ, เฆ ดี บอ เลห เตา ตัะ เบ.

18 แตห เบ กาบัด ยอด ดอน บลาก. เฆ ดูอี กืน แฮะ ฮอต กาฌูะ กาดึม, วี ตัห โดง กอย เบ. โอว เฌาพรา ต็อห อาคาคัร ดี เบ, เบ ดี วี ปึอน ดี โบยว ดาคึย บอ ปึอน ดี ปีพูง เบ โกบ เฆ ดูอี กืน ตี. เบ ดี บอ ปี เอา กามาย อี แฮะ ชึบ ซีโลบ ดูย หนาง บอ ตา ครึง ครีว เฆ รึอน.

19 มาน มืง เบ อี แฮะ ลึร แฮะ ราม ตึอน, ดอ ตี นี อึณ ดี วี ดีแตด กาเคียะ อาดา เฆ ดูอี อี ดี วี ตัห กอย โดง ตี. เฆ อี แฮะ โบง แตห มืง เบ ลึร ตึอน, เฆ ดี วี เตา ฮาว กอย โต็ง เบ.

20 เฆ ฆอน เบ อี ฆึอด วาย แฮะ คัม เบ ดูก ตาง ตี, อู ซีแง เจว เจว เฆ ดี วี ต็อห ดี เบ, ‘มืง โดง กอย เอ นี, อึณ ดีแตด, อึณ กาเคียะ กาเซา อาดา เอ. แตห เบ วี ฮาว เหรต กาดาย อี กาว็อห หลึอม นี, แตห เอ ปึอน ดี กอย.’

21 แฮะ ฮอต ปัน อัน ตี, เบ ดี วี กาพา แคง น็อห เบ ต็อห, ‘อาเซ แฮะ ฆึอด ฆอน เฆ นี ดัว ดี เย อี มูห ดูอี หมัน อี ตู ดึอม มึห ฆอน? เย แฮะ กอย ราง เย, ตู มึห ดี เฮียง ฆอน. เย แฮะ คัม อี เหมต เย, แบน ดูอี ปี โฮว แวน เฆ มืง เตต มืง ตัะ. อาเซ แฮะ วี ดึห ตัห ฆอน เฆ นี? ฆอน เฆ นี บอ ตัห นา เหมา?’”

22 เฌาพรา อี อึบ โตต ดอน โมยว, อัน แฮะ วี กาลาง ต็อห, “แตห เบ ยอด, โอว ดี ตา แด โอว ยับ ตัห ดูอี ดอน มืง. โอว ดี บอ บยัะ ปวน โอว ดี เฆ ปี ดา ซึก เบลห อาลาม เฆ โดง แฮะ ออง เฆ. ปัน ตี ดูอี เฆ ตี, เฆ ดี บอ โจะ ตัห ฆอน กาโณม เบ, โปว ตัห บอ ฆอน ดีบยา เบ แดง ยัะ เฆ, วี ตัห ตึย โดง กอย เบ.

23 เฆ คูนดีคัม ดี วี แบน ฆูณ เฮียง เบ. เฆ นาง ฮอคัม ดี บอ แบน มา แฆบ เบ. เฆ ดี บอ วี โฆม มูด ตัห โดง กอย เบ, แตห อึณ บอ บยัะ เฆ โรวเซ เบ. ปัน อัน ตี เบ ดี วี นับ โอว มูห เฌาพรา, นับ บอ ลอง เฆ อี หน็อะ อึณด็อะ โอว, เฆ ตู หมึอม ซาย ดอ เหมา.”

24 เซ ดา ซึก อี มึห โปลม ตาง แฮะ พาด ดึห โกรวกราม อี, อาว มึห อาเซ อี ยัะ วี ตัห ดึห วีว. บอ, เซ ดา ตาง แฮะ คร็อง ดูอี ตู หมึอม แคง กาปึม, อาว ปึอน แตห อัน วี เลห.

25 โคว, เฌาพรา วี ต็อห, “ลอง อัน ตี ปี บอ แฮะ หมาน มืร, โอว ยี ตู โบง แตห อึณ แบน. เฆ ดูอี ปี คร็อง เฆ ดา ซึก แคง กาปึม, เฆ ยี ดี ปึอน ดี ลอด เลห. โกรวกราม แปะ แฮะ ฮอต ดึห ฮาว เฆ ดูอี อี มึห โปลม ตาง แฮะ ปึอน วี ดึห เลห. โคว, โอว อี ดี กาโฆห ดี เฆ อี กาโฆห ดี เบ. โอว ดี คยอด เลห เฆ ฆอน เบ.

26 โอว ดี โบง แตห เฆ อี คาหนาบ เบ วี ลาย โฮม ยัง เฆ, แตห เฆ วี ลาย เดียง หนาม เฆ ปี เฆ เดียง อึม มางูน อี ซีแงห. แคะ กอย ดูอี แดง กาดาย บอกาเฆลียด, เฆ ดี บอ นับ, โอว มูห เฌาพรา อี แฮะ คยอด เบ บอ ทูด เลห เบ. โอว มูห อัน เฌา อี มึห อาพูง ดังโคว ตาง, อี อึบ ดูอี อาโมยว อาโกบ.”