1 เฌาพรา แฮะ กาลาง อูน, “แตห เบ เหลา น็อห เฆ ดูอี ปี อึบ โอว, แตห เฆ วี มึห น็อห กรึอม, น็อห ตาง.

2 แตห เบ วี กาลาง โฆรห ดาคึย ดี เฆ ดูอี แคง มืง เยรูซาแลม. แตห เฆ นับ ลอง แฮะ คัม เฆ ดูก ดี รันซู อี กาโฆห ดี เฆ แฮะ ฮอต โตต. แคะ กอย หมาบ เฆ, โอว เฌาพรา แฮะ ฮอต ฆ็อห แวน โตต. โคว, โอว แฮะ แตห เฆ คัม หมาบ เฆ อาดา อา บูน.”

3 อึณ ดี มึห โฆรห ปี ดัด เฆ แคง แปร กาฮ็อห อี ต็อห, “แตห เบ อึณปราย อึณเตณ ปี โลว ว็อะ เฌาพรา, โบง แตห อึณ กอ ซืร.

4 เซ อึณ มึห โดง ดีโฆละ, แตห อึณ วี แพณ. โดง กูก กาดาย, แตห เบ โละ แวน, แตห อึณ วี ฆลัง. เซ อึณ มึห โดง โฆะ แฆะ, แตห เบ โบง แตห อึณ ซืร. โดง ดีโฆละ ดีเฆลียม, แตห เบ ปูน แวน, แตห อึณ ฮาว ดาคึย โตต ดอน โปละ.

5 เซ เอ โบง ปาย ตี อาพูง ดังโคว เฌาพรา ดี บอ ลึห ซีคยา. แคะ กอย ดูอี แดง กาดาย บอกาเฆลียด ดี บอ ยึร ลอง อัน ตี. โคว, เฌาพรา แฮะ ฮอต กาลาง อูน ปาย ตี.”

6 อึณ บอ มึห โฆรห อี ต็อห, “แตห แม ดัด ตาง.” โอว ยี วี ดีหมอด ต็อห, “ลอง มาเซ ปี โลว ดัด โอว?” โฆรห ตี ปี วี ต็อห, “แม โลว กาลาง ต็อห, “เฆ ดูอี บอกาเฆลียด เฆ ดี ปี เปต เฆ แปร. อาพูง ดังโคว เฆ มืร, อึณ ดี ปี โบห อี กอย แคง โดง นา.

7 เปต ดี บอ เฮียะ กาฮ็อห โตต. โบห มืร ดี รัห ดอ บูด เฌาพรา พึอม อัน. แคะ กอย ดูอี, เฆ ดี บอ ปี เปต เฆ แปร อาคัร หมาน.

8 แฮะ หมาน, แปร เฆ เปต ดี บอ เฮียะ กาฮ็อห, บอ โบห อัน ดี เฮียะ กาฮ็อห. โฆรห เฌาพรา ยี กอย เซเซ.”

9 อึย เบ ดูอี อี นับ ดี กาลาง แดง นอน ฌีโอน ลอง อี แตห น็อห ดูอี ดาคึย, แตห เบ โฮะ แดง นอน จา. เบ อี นับ ดี กาลาง แคง มืง เยรูซาแลม ลอง อี แตห น็อห ดูอี ดาคึย, แตห เบ ฮาว ดี มืง แบน มืง แบน มืง แคง อืง ยูดา, แตห เบ ดัด ตาง, แกวะ แตห เบ โยว. แตห เบ กาลาง ดี ดูอี อายูดา ต็อห, “เฌาพรา ปี กรึบ เบ แฮะ ตัห กอย ดี นี.”

10 แตห เบ ยอด, เฌาพรา ดี บอ ตัห บอ บยัะ ปวน อัน. อัน ดี บอ อึบ โตต ดอน โมยว. อัน ดี บอ ดึห ตัห บอ รูห ปี ดี ดัว อัน ดี ดอน อี. อึณ ดี บอ แบน อาฆยึร แคะ กาอาบ ปึอน วี เหมา วี อัน.

11 อัน เฌา ดี บอ เฮียง ดูอี ปี อึบ อัน, แตห อึณ ปี ดูอี อี เฮียง มาบู ยอด ลึมลา มาบู อัน. อึณ ปี อัน ดี ดึห กาฌูะ เฆ ฆอน มาบู บอ โจะ เงียม, โจะ ดี โฆ็ง เฆ. อี มูห มาบู ฆูงงัะ, อัน ดี บอ แกร ดี แวด ฮาว ลอย ลอย.

12 อึณ ตู ดึอม มึห อาเซ อี แฮะ ดึอม ตา แด อัน กาโตม เฆา ดี ยอด อึม อี กอย แบน โปละ แบน โปละ. อึณ มืร ตู มึห อาเซ อี แฮะ กาซาน ดี ยอด ฆางหราว บอ ดึห คอน เฆา ดี ยอด กาปูห อี กอย แดง กาดาย บอ ดึห ลัะจู ซัะ ดี ยอด นอน อี เตียะ อี ตาง.

13 อึณ มืร ตู มึห คอ อู วี อี ปึอน มาโนว เฌาพรา, แตห อัน บยอง ปี เฌณฌา อัน, ดัว บอ อากยาม อางยาน ดี อัน.

14 เฌาพรา ตู ดึอม ซังคยาง ดี อาเซ, แตห อัน นับ อี มูห อี หมาน. อัน เฌา มืร ตู ดึอม เฮน ดี อาเซ, แตห อัน วี นับ ปี ปาย แบน โมยว แบน โมยว, แตห อึณ กาหลูห ดี น็อห อัน.

15 เฌาพรา ยอด ปี ปาย ดูอี บอกาเฆลียด. เฆ บอ ปี อึม อู อึณ จอด อี โจห แคง ปูง. เฆ บอ ปี กาปูห อี กอย แดง ลัะจู. บอ ฆูน อึม, อัน มาด เฆ ปี กาปูห.

16 แคะ กอย เฮ ดี นอน เลบานูน, อาว โกบ ฆลึม อาดา ปีด็อะ เงา. แคะ กอย โดว ซัดดาวา อี กอย แคง แปร ตี, เฆ บอกาเฆลียด ตู โกบ ฆลึม อาดา ดี หลู ดี เฌาพรา.

17 แคะ กอย ดูอี แดง กาดาย บอกาเฆลียด. เฆ ตู มึห ดีโคว มาเซ ดี อาต เฌาพรา. อัน เฌา บอ มาด เฆ ปี โมยว ตู มึห ดีง็อห ดีคัน, ตู มึห อาเร มาเซ.

18 เซ ฮี ปาย ตี เอ ปึอน กาเฆา เฌาพรา ดี อาเซ? เอ ดี ลาย กาเฆา อารึบ อัน เฌา ดี อาเซ?

19 อัน เฌา ตู ปี อารึบ ราง ปี โบง ดูอี. เฆ ดา อี นับ ดี จึม, เฆ โหลว อารึบ บอ ดึห อึม ครีว หลึบ นา เรต. มัง เฌณ เฆ บอ โบง วัน รึอน, ฮับ ดี อารึบ ตี.

20 วี อี ตู แป ดี หลู รึอน เฆ ครีว, อัน บอ วี ฮาว เหรต เฮ อี ตู นับ ดี ปูย, ตู นับ ดี ราม, วี ฮาว ดัว ดา ลักซามา อี แหลว ดี โบง, แตห อัน โบง ราง อารึบ, แตห อึณ บอ ปึอน กอย ซีคยา, แกวะ แตห อึณ เกห.

21 เหมา อึณปาย ปี ตู นับ เบ ลอง ปวน เฌาพรา? เบ ตู ดึอม โทม ลอง อัน? อาว มึห อี ดึอม กาลาง ดี เบ ซีณ ดอ โฆว อัน? เบ ตู ดึอม นับ ลอง เฌาพรา ซีณ ดอ แด อัน เฌา บืน กาดาย นี?

22 อึณ มูห อัน เฌา อี กอย นา แดง, อัน ยอด ดอน นา ดอน โปละ แดง กาดาย นี. อัน มาด เฆ ดูอี แดง กาดาย นี บอกาเฆลียด ปี มา อาโฌ็ง. อัน เฌา มืร แฮะ บลัห ฆางหราว, แตห อึณ ปี อี บลัห บีก ตาง, แตห อึณ แบน ทึบ อี ปึอน กอย นา แคง.

23 อึณ บอ มูห อัน เฌา อี โบง, แตห ฆอน คูนดีคัม แดง กาดาย นี ตู มึห ดีโคว. อัน บอ แตห เฆ ดา ตาง อี ซูงพยาด ดารา แดง กาดาย นี ตู โคว มาเซ.

24 เฆ บอ ปี เฮ ปี ตู ซัม อี บอ กาอาง ซีมา ปี ตู บรัด อี. เรียห ตู ปึอน ลึบ แคง กาดาย. ดอ วี แตห เฌาพรา คูน ตัห บูด เฆ, เฆ บอ วี เฮียะ กาฮ็อห ยัม. ดอ วี มึห คูน ลาง ตัห บูด เฆ, เฆ บอ หราย ปี เดียบ โหงว.

25 “โอว เฌาพรา แฮะ ซีงา บอด. อาว ปึอน กาเฆา โอว ดี อาเซ. อึณ มืร ตู มึห คอ อู วี อี ปี โอว.” แคะ ตี เฌาพรา แฮะ กาลาง.

26 แตห เบ ซากึห ยอด แคง ฆางหราว, อาเซ พาน เบลห ซีมัณ ปี ยึร เบ ตี? อึณ บอ มูห อัน เฌา อี แฮะ ตึย เลห เฆ แบน พึง แบน พึง. เฆ ปี บอ แฮะ กืน แคะ ตี, อัน เฌา ยี นับ โตต บอ ดาง แตห เฆ มึห จืร ดอน โบ็ง. โกบ มึห อัน เฌา ปวน ตาง, เฆ มืร ตู โบยห ตู หราย คอ อู โบ็ง.

27 อึย เบ ดูอี อีซาเรลัะ, เหมา อึณ ปาย ปี หงูน ปี ปึณ เบ ต็อห, “เฌาพรา ตู ยอด ปี ปาย โอว. อัน มืร ตู ดืน อาเร โอว.”

28 แม ตู นับ, ตู ดึอม โทม? เฌาพรา อี กอย เซเซ, อี แฮะ พาน เบลห กาดาย นี, อัน ตู นับ ดี นูน, ตู นับ ดี ดีหลัห. อาว มึห อาเซ อี นับ ปี คราม อัน เฌา ดอ เหมา.

29 อัน เฌา บอ นับ ดี ดัว โปลม เฆ แฮณ ดี เฆ อี แฮะ ดีหลัห อี แฮะ นูน.

30 ดูอี หนึม ซี บอ นับ ดี นูน, ตู มึห โปลม. เฆ ฆอน กาโณม ซี บอ นับ ดี ดีหลัห เกห.

31 มาแล, เฆ อี หน็อะ อึณด็อะ เฌาพรา, เฆ ดี บอ มึห โปลม มึห แฮณ กามาย. เฆ ปี มาฆลาง อี แฮะ มึห เพียง กามาย. เฆ ปี บอ กาแบลบ ฮาว, อึณ ตู ตืก, ตู กาเซา ดี เฆ. เฆ ปี บอ ฮาว โดบ อึณเตณ โต็ง, เฆ มืร ตู นูน แคะ เหมา.