1 อาอีซายัะ ปี วี กาลาง ต็อห, “บัร เบ ยอด, อึณ ดี แบน ปาย นี. เฌาพรา อี อึบ โตต ดอน โมยว ดี ปยาต แวน โตต ดอน โมยว อี มูห โดง บึง โดง น็อห ตาง เฆ ดูอี. เฆ ดูอี อี กอย แคง มืง เยรูซาแลม บอ แคง มืง ยูดา บอ มืง, เฆ ดี บอ ชึม โตต ดอน โมยว. แคะ กอย ปี ดี โฮม ปี ดี เดียง เฆ, อัน เฌา ดี ปยาต แวน โตต บอกาเฆลียด.

2 ดูอี เฆ อี กยัะ ดี กาโฆห บอ เฆ ดา ซึก บอ ดา ตาง อี ซูงพยาด ดารา บอ ดา อี บยาน โฆรห เฌาพรา บอ ดา ซารา อี นับ ดี แมน เบดาง บอ ดา ตาง อี อึบ เฆ, อาว ฮู ปึอน ดี บึง เฌาพรา.

3 อึณ บอ มูห บอ ดา โบว อี อึบ ดา ซึก พัน ฆึร วี บอ คูน แคง เรา แคง กาง เฆ บอ ดา ตาง อี ดัว อากยาม อางยาน ดี เฆ บอ ดูอี อี แหลว ดี โบง แบน โมยว แบน โมยว บอ เฆ ดูอี อี นับ ดี โบง มยัะหลัยะ อี หมึอม อาม, อัน เฌา ดี ปยาต แวน โตต ดอน อี.

4 เฌาพรา ดี วี แตห ฆอน อีมาย อี ซี หนึม วี อึบ ดูอี เฆ ตี. บอ ดูอี อี ซี มึห น็อห ฆอน, เฆ ดี วี แบน ดา กาณา เฆ.

5 เฆ ดูอี ดอน อี บอ ลาย คาหนาบ กาแต เฆ นังฆัน. เฆ ดี บอ คาหนาบ ฆึก เฆ อี กอย กาตัด เฆ. ฆอน อี ซี หนึม อาว ฮู รีมาด ดูอี กัด ดูอี แฆ. ดูอี อี ตู มึห ดีโคว อาว ฮู โรวเซ ดูอี อี มึห ซาเร.”

6 อึณ ดี บอ มึห ดูอี อา วี แคง อู อึณโฮม, เฆ ดี บอ วี ร็อห ดูอี แคง อึณโฮม ฆูณ เฆ ต็อห, “แม ซี มึห ดี ตา ครึง, แตห แม วี แบน ดา ตาง อี อึบ เย อี แฮะ ชึม โตต นี.”

7 มาแล, ดูอี วี ตึอน ดี วี ต็อห ดี เฆ, “อาว มูห ปาย ตี. โอว มืร ตู ปึอน จอย เบ. โอว มืร ตู มึห ปี ดี โฮม, ตู มึห ครึง ปี ดี ตา. อาว โลว แตห โอว แบน ดา ตาง เบ.”

8 เฆ ดี ต็อห ปาย ตี โคว, เฆ ดูอี แคง มืง เยรูซาแลม โลว คัม ดูก. มืง ยูดา ดี เกห โตต. โคว, บอ ปี กาลาง เฆ บอ ปี โบง เฆ แฮะ กาบัห ดี เฌาพรา. เฆ แฮะ แนนัะ เฌาพรา อี มึห อาพูง ดังโคว ตาง.

9 ปี โบง เฆ มึห โดง ร็อก โดง ฌ็อง. ปาย ตี อึณ ลึห ซีคยา ลอง หมาบ เฆ. เฆ โบง อี ตู หมึอม, แตห ดอน อี ปึอน ดี ยึร. โคว, อึณ แฮะ ปี ปี โบง เฆ ดูอี แคง มืง โซวโดม ตึอน. เฆ ดี บอ วี ฌัม ดูก ตาง. เฆ แฮะ โบง อี ตู บอด อี ตู หมึอม, แตห อึณ วี แบน ดูก ดี โดว บรีม เฆ.

10 เฌาพรา แฮะ จัร โอว กาลาง ปาย นี. ดูอี น็อห ซืร น็อห หมาน เฆ ดี โบยว ดาคึย. โคว, เฆ ดี วี ปึอน ดี บึง อาฆยึร ปี โบง เฆ.

11 เฆ ดูอี อี ตู หมึอม เฆ ดี ฌัม ดูก ตาง. เฆ ดี บอ วี กาดูห ดี คัม อี ตู หมึอม ดีโลย. นา ตู หมึอม แคะ ปี โบง เฆ ดี อี เฮา, เฆ ดี วี คัม โตต ดอน โมยว.

12 เฌาพรา แฮะ ต็อห, อึณ ดี มึห เฆ ฆอน ดีรอย ดี คาหนาบ เฆ ดูอี ปี อึบ อัน. บอ อีบึณ ดี วี อึบ เฆ. อัน บอ ต็อห, “อึย เบ ดูอี ปี อึบ โอว, ดา ตาง อี แยต เบ เฆ ดี โบง แตห เบ กาลึบ. อึณ ปี เฆ ดี โบง แตห อึณเตณ ปี ดี โดบ เบ กาปยาต ลึร.

13 เฌาพรา แฮะ ตัห ฌัม ดี โดง ซูงพยาด อัน อามู ดูอี. อัน ดี ดัม หมาบ ดี เฆ ดูอี ปี อึบ อัน.

14 อัน เฌา จูห ดี ซูงพยาด อามู เฆ ดา ตาง อี อึบ อี แยต เฆ ดูอี ปี อึบ อัน. อัน ต็อห ดี เฆ, ‘เบ แฮะ พาด ดึห ดี โฮม มาน มางูน อี. แคง กาง เบ มืร, แฮะ โนะ โกรวกราม แปะ แฮะ พาด แฮะ ดึห เบ ดี ดูอี ดูก ดูอี ฆีน.

15 เบ ยี ตู ปึอน คาหนาบ ดูอี ปี อึบ โอว, โบง แตห อึณ ปี เบ แณต กาปยาต เฆ. เบ ยี ตู ปึอน โบง นา จาว ดี ดูอี ดูก ดูอี ฆีน, แตห อึณ ปี เบ โบง นา เฆ ลึร. โอว เฌาพรา อี มึห ปวน ตาง, โอว แฮะ กาลาง ปาย ตี.’

16 เฌาพรา ปี วี ต็อห, ‘ยอด, เฆ อีบึณ แคง มืง เยรูซาแลม แฮะ ปีคึก กาเซา เฆ. เฆ บอ งึห ฆีณ เฆ กอ ปี ฆีณ มาอาโฆย. เฆ บอ นับ ดี กายับ วีว กายับ เวณ งาย เฆ. เฆ บอ นับ ดี ฌาบ ฮาว กาเดียะ, แตห อึณ ลึห ฆรัณ ฮีง แปะ แฮะ ชึบ เฆ ดี เปลา เฆ. 17 มาแล, โอว ดี ดัม หมาบ ดี เฆ อีบึณ แคง มืง เยรูซาแลม ตี. โอว ดี แตห เฆ แบน ฆีณ วัะ, บอ ฆาะ แวน ฮึก ฆีณ เฆ.’

18 ซีแง อัน ตี เฌาพรา ดี ดึห แวน ฮีง ปี ชึบ เฆ ดี เปลา เฆ บอ กาแมะ เซณ บอ ฆังโคว เฆ. 19 อัน ดี ดึห แวน บอ บีโหยะ เฆ ฆันแด บอ กาแมะ ลาย เฆ 20 บอ มาฆีณ ปี ตา เฆ บอ วัน ครีว บอ ซาบรอด ปี ปัก เฆ ดี ณอย เฆ บอ แอบ ซีนัม อูห หงูน บอ ลาบลอย เฆ 21 บอ ซีกานู ปี ดอก เฆ ฌึม บอ ครีว ปี ชึบ เฆ ดี ฆูงมูห เฆ 22 บอ ซีโตว เฆ อี ชีด กาเซา บอ บีก ปี กัน เฆ บอ ซีโตว ตูน ปี ตา เฆ บอ ฮู รึอน เฆ 23 บอ แอบ ฌัม เฆ บอ บีก กาตัม ลูย, บอ ฮึบ บอ กาแมะ ปี กาโหมะ เฆ นา เฆ, อัน เฌา ดี แวน โตต ฌึร ตี.

24 โดง ดึอม อูห หงูน ดี วี อูห อัม, อูห มาลึณ. เฆ อี ดึอม มึห ดี ตา น็องรอด, เฆ ดี วี กาดูห ดี ปัก ตา ปลึง. เฆ อี มึห ฮึก ฆีณ อี ปึอน จัห ปึอน ปัก ดี วี แบน ฆีณ ฆลัะ, ฆีณ ลืม. เฆ อี ดึอม ตา ครึง ชีด, ครึง โคยว ดี วี กาดูห ดี ตา ครึง จาน. เฆ อี มึห นา บอด นา หมึอม ดอน โมยว, อึณ ดี วี แบน อี หมึอม ซาย ดี เฆ.

25 อึย แม มืง ยูดา บอ มืง เยรูซาแลม, อีมาย แม อี กอย แคง มืง, เฆ ดี บอ ยัม ดี มาปัวะ ลาง. ดา ซึก แม อี มึห โปลม ตาง ดี บอ ยัม ดอ กาโฆห เฆ.

26 มืง ตาง ตี ดี บอ เยน บอ ง็อง, อาว ฮู มึห ดูอี. โคว, อึณ ปี มาโลห มืง เฆ ดี บอ หงูน บอ กลึร บอ ยาม. อึณ ปี อีบึณ อี แฮะ ฆลัะ, วี ตูต แดง กาดาย.