1 อานี อึณ บอ วี มูห แปะ แฮะ กาลาง เฌาพรา ดี อาอีซายัะ อี มูห ฆอน อาโมด. อัน แฮะ กาลาง ปี ดี โบง อัน ดี มืง ยูดา ฆาย มืง เยรูซาแลม. อัน แฮะ ต็อห,

2 “ปัน ดี ฌัม อาคราว อาต ดี ฮอต โตต, อึณ ดี มึห นอน โดง กอย โฮว เฌาพรา, เฆ ดูอี ดี โรวเซ อัน หลึอม นอน ดอน นอน. อึณ ปี อัน ดี บอ ดีเฆต แคะ กอย นอน บอกาเฆลียด. แคะ กอย ดูอี อาโมยว เฮา บอกาเฆลียด เฆ ดี ตัห โดง กอย นอน ตี.

3 เฆ ดี บอ ต็อห, ‘ตัห, แตห เอ โฮะ ดี นอน อี มูห โดง กรึบ ดูอี ดี เฌาพรา. แตห เอ โฮะ ดี โฮว เฌาพรา อี มูห เฌาพรา ปี กรึบ เฆ ดูอี อีซาเรลัะ. อัน เฌา ดี บอ มาโนว เอ, แตห เอ นับ ดี โบง ปี อึง อัน.’ โคว, เฆ ดูอี แคง มืง เยรูซาแลม, เฆ ดี บอ นับ ดารา เฌาพรา. เฆ มืร ดี บอ โทม โฆรห เฌาพรา. แฮะ ฮอต, เฆ ดี วี กาลาง แตห บอ อี เฮา กอ นับ.

4 อัน เฌา ดี บอ ซูงพยาด อามู เฆ ดูอี อาโมยว เฮา. อัน ดี บอ มาโนว ดูอี แบน โมยว แบน โมยว. มาปัวะ ลาง เฆ เฆ ดี บอ วี จึม แตห อึณ แบน บลา อึณแท. บลา เลียห เฆ มืร, เฆ ดี บอ วี จึม แตห อึณ แบน อึณวาต. ดูอี อู มืง มืร, อาว ฮู วี กาโฆห ดี ดูอี ปอ อู มืง. เฆ มืร อาว ฮู โลว เฮน ปี ดี ปาย ดี ลาย กาโฆห.

5 อึย เบ หลูกหลาน อาโกบ, ตัห แตห เอ โบง โดบ ดารา เฌาพรา อี ปี บลาง ปี ดัว อัน เฌา ดี เอ.

6 อึย เบ หลูกหลาน อาโกบ, เบ แฮะ แวน เฆ ดูอี อี มูห อาโมยว เบ. โคว, แคง มืง เฆ, เฆ แฮะ แดะ ตัห ดูอี กืน แคง มืง บลาก นา เลห ซีแง, แตห เฆ ตัห โบง อาดาด. อึณ มืร มึห ดูอี กืน อี แบน ดา เบดาง ปี เฆ ดูอี พีลีที อี แฮะ กอย โนะ แคง มืง เฆ. แคะ กอย เฆ ดูอี กืน, เฆ แฮะ วี โดบ ทูงฆยาม ดูอี อาโมยว เฮา เฆ ตี.

7 แคง มืง เฆ ตี แฮะ มึห รึอน เฆ ครีว กอ โนะ. โกรวกราม เฆ มืร แฮะ กืน กาเซา กอ ฮู นับ แคะ บอ มูห. อึณ มืร มึห บอ มังปร็อง บอ ลักเลา ปี ป็อะ ดา ซึก. เฆ แฮะ กืน กาเซา, กอ ฮู นับ แคะ บอ กืน.

8 แคง มืง เฆ ตี บอ อารึบ ราง แฮะ โนะ บอ มืง. เฆ วี กรึบ ปี โบง เฆ ตา แด เฆ.

9 โคว, เฆ ดี บอ วี โจห เตียม. เฆ ดี บอ วี ซาย อี. แม เฌา, แกวะ แตห แม ฆ็อห แวน หมาบ เฆ ตี.

10 แตห เบ เตา ฮาว เครียง แคง กาเดา มาว. แตห เบ บอ ฮาว เครียง แคง กาเดา กาดาย, แตห เบ ลอด ปัน ดี รู กาเซา เฌาพรา บอ ปัน ดี บยัะ เฌาพรา อาพูง ดังโคว อัน.

11 เฆ ดูอี อี ปีพูง เฆ, เฆ ดี บอ หราย โตต. ดูอี อี มึห น็อห ปีคึก เฆ ดี บอ วี โจห เตียม. ปัน อัน ตี อึณ มึห มี เฌาพรา อู กาดัง ปี ปึอน เอ อืบ มยูก.

12 เฌาพรา อี อึบ โตต ดอน โมยว แฮะ อูน อู ซีแง, แตห อัน แวน โตต เฆ อี มึห อาพูง ดังโคว ตาง บอ เฆ อี ปีพูง เฆ, แตห เฆ วี โจห เตียม.

13 อัน เฌา ดี บอ แวน โตต เฆ อี ปีพูง ปีจา เฆ. อึณ บอ มูห เฮ อารีด อี กอย ดี นอน เลบานูน, บอ เฮ เทเรบ อี แฮะ ตาง แฮะ จา อี กอย ดี มืง บาซัน.

14 บอ มูห บอ นอน ตาง นอน จา ดอน โปละ

15 บอ แคะ กอย โฮว จา โฮว ตาง บอ แรง มืง อี มัน ซีคยา

16 บอ รึร ซังโพว อี ตาง บอ อาโมยว อี ชีด ดอน โมยว, เฌาพรา ดี แตห อึณ หราย โตต ดอน โมยว.

17 ปัน อัน ตี เฆ ดูอี อี ปีพูง เฆ, เฆ ดี วี โจห โดง เตียม. ดูอี อี ปีคึก, เฆ โลว วี โฆม อี. เฆ ดี วี อืบ มยูก มี เฌาพรา อู กาดัง.

18 แคะ กอย อารึบ ราง, เฆ ดี หราย โตต บอกาเฆลียด.

19 ปัน ดี ตัห โลง อัน เฌา กาดาย ดี ดียูห ดีเยณ, เฆ ดูอี ดี บอ เตา ฮาว เครียง เฆ แคง กาเดา มาว บอ แคง กาเดา ดาอาง. เฆ ดี บอ ฮาว เครียง เฆ บอ แคง กาเดา กาดาย โกบ โยว กาเซา เฆ เฌาพรา บอ โกบ แฮะ บยัะ เฌาพรา อาพูง ดังโคว อัน บอ อาโรง บลาง อัน.

20 เซ ฮี ฌัม ซีแง ตี, เฆ ดูอี ดี บอ ดึห อารึบ ราง ปี โบง เฆ. บอ มูห รึอน, บอ มูห ครีว อาว ต็อห, เฆ ดี บอ วี แวน อารึบ เฆ ตี โดง กอย มาบูย เฆ มากาลัะ.

21 ปัน ดี ตัห โลง เฌาพรา กาดาย ดี ดียูห ดีเยณ, เฆ ดี บอ เตา ฮาว เครียง เฆ แคง กาโอ็ง นอน บอ แคง ดัห มาว โกบ แฮะ โยว กาเซา เฆ เฌาพรา บอ โกบ แฮะ บยัะ เฌาพรา อาพูง ดังโคว อัน บอ อาโรง บลาง อัน.

22 แกวะ แตห เบ น็อห ตาง ดี ดูอี อี โลว ฮึห พึอม ดี ฆูงมูห เฆ. โคว, เฆ ตู มึห ดีโคว มาเซ.”