โอว วี ยึร ปอ อู โมยว อี ตู หมึอม อี จีจีว กาเซา แดง กาดาย ครึม เบลณ นี. อึณ บอ ดูก หณาบ กาเซา ดี ดูอี. 2 อึณ มึห ดูอี อู วี, เฌาพรา แฮะ แตห อัน ครัม บอ มึห โกรวกราม กืน, แตห อี เฮา มืร โรวเซ อัน. ปาย ตี อัน แฮะ มึห เฌะฌูง โตต ดอน โมยว แคะ ปี ซี ปึอน น็อห อัน. เฌาพรา ยี ตู แตห อัน ปึอน ดี บึง. ดูอี ปอ อู วี อี ตู ลาย บาะ ลอง อัน ตี, อัน ยี วี ปึอน ดี ตัห บึง. ลอง อัน ตี, อึณ บอ มูห อี ดีโลย ดีลาย อี ตู หมึอม อี จีจีว กาเซา.

3 อึณ มืร มึห ดูอี ปอ อู วี, อัน มืร แฮะ มึห หลูกหลาน กืน กอ โนะ แบน มาย็อห. อาซาก อัน มืร แฮะ โต็ง กาเซา. เซ อัน ยี ตู ปึอน ดี บึง โกรวกราม อี ดี แตห อัน โบยว ดาคึย บอ อี ตู ดีบ โดว ยัม อัน แตห อึณ กาดาน ดี อาพูง เฆ ซาเร อัน. อาซาก อัน ปี บอ แฮะ เหลณ แคะ เหมา อาว ต็อห, ฆอน อางัะ อี แฮะ ยัม แคง วัต มา อัน, อึณ แฮะ หมึอม ดี อัน หลึอม ดูอี วี ตี. 4 ฆอน อางัะ อี หณัม ฆึอด ตี, อัน ตู มึห ดีโคว มาเซ. อัน แฮะ วี โบยห หราย แคง อับ ว็อง แตห อี ปีว อัน. 5 อัน ปี ซัะ ยึร บลาง ซีแง, ปี ซัะ นับ ลอง มาเซ มืร, อัน ยี แฮะ ดาคึย ฆยามซา หลึอม ดูอี วี ตึอน. โคว, อัน ตู โลว คัม ดูก มาเซ. 6 ดูอี วี ตึอน, อาซาก อัน ปี บอ โต็ง แบน อา แหรณ ซีนัม มืร, อัน ยี ตู ปึอน ดี บึง โกรวกราม อัน บอ ตู ปึอน กอย โบยว ดาคึย. ดี กาแดะ อัน, บอ อัน บอ ฆอน อางัะ ตึอน ดี บอ ฮาว ฌัม อู โปละ.

7 แคะ ปี โฆยวฆยา ดูอี ดี โบง, อึณ แบน อาฆยึร อาดา วัต โดว บรีม อัน. แคะ ปี ซี โฮม อัน, อึณ ยี ตู เบระ ดี น็อห อัน.

8 ดูอี อี มึห อางยาน ตู หมึอม หลึอม ดูอี รึร. ดูอี ฆีน ดูอี พลาน อี นับ ดี กอย ซีคยา นา อาต อี เฮา ตู มึห อาฆยึร มาเซ.

9 เซ น็อห เอ แฮะ จู แฮะ หนีม แคะ มึห เอ, อึณ บอ หมึอม หลึอม น็อห ลามาก อี ซี ปึอน กาปัว เซเซ. ลอง อัน ตี มืร, อึณ บอ มูห อี ดีโลย ดีลาย, อึณ บอ ปี อี ซี ปา คูน.

10 โมยว อี แฮะ มึห แดง กาดาย ดอ ตี นี, ดูอี แฮะ ฮอต แตห อึณ มึห จืร อัน. บอ ลอง ปี ปาย ดูอี เฆ แฮะ ฮอต นับ. ดูอี ตู ปึอน วี กาแคณ ดี วี อี แฮะ มึห โปลม เฆ แฮณ หลึอม อัน.

11 เซ แม กาลาง โฆรห กืน, อี ดีโลย ดีลาย ดี แว แบร กืน. อึณ มืร ตู แบน อาฆยึร ดี อาเซ.

12 โคว, อาว มึห อาเซ ดี บอ ปึอน นับ ลอง อี หมึอม อาดา ดูอี ดอ มึห อัน อาซาก อี ตู โต็ง อี ปี กามึก อี ดีโลย ดีลาย. อาว มึห อาเซ อี ปึอน วี นับ ลอง ปี ปาย ดูอี แดง กาดาย ครึม เบลณ นี วาย แฮะ ฮอต ยัม อัน.