1 เฌาพรา บอ มึห น็อห ซี โบง นา หมึอม เซเซ ดี เฆ ดูอี อีซาเรลัะ. อัน อึง เฆ อี มึห น็อห ลูย น็อห บอด อาคาคัร.

2 อึณ ยี มูห โอว, โอว แฮะ รีน ดี กาลึบ, แฮะ รีน ดี ชึม, ปี ดูอี อี รีน ดี ดีปลาด, รีน ดี เกห.

3 โคว, ดอ ยึร โอว เฆ ดูอี มืก มึห โกรวกราม กืน, บอ เฆ ดูอี ปีคึก เฆ, โอว บอ หลัยะ เฆ.

4 เฆ ตู มึห ดี คัม ดูก มาเซ. เฆ บอ โปลม คัะ, มึห แฮณ.

5 เฆ มืร ตู โลว หณาบ ปี เฆ ดูอี เฮา. เฆ มืร ตู มึห ดูก ดี น็อห ปี เฆ ดูอี เฮา.

6 โคว อัน ตี เฆ ปีคึก น็อห เฆ, แตห อึณ ปี ดูอี อี ฮอย มากาแวะ ดี แมง เฆ. นา ฮาย นา มืก ปี โบง เฆ, อึณ บอ ปี ครึง ปี ชึบ เฆ.

7 งาย เฆ บอ ยอด มี โมยว ตู หมึอม. แคง น็อห เฆ บอ กาพา มี อี ตู บอด. อี ฮาย อี มืก กอ โนะ ลูต แคง น็อห เฆ.

8 เฆ บอ ปี วาณาก บอ กาณัห อี เฮา, บอ กาลาง มี โฆรห ตู หมึอม. โกบ มึห เฆ น็อห ปีคึก, เฆ บอ คราม มี ดี คาหนาบ อี เฮา.

9 เฆ บอ กาลาง โฆรห อี แคณ เฌาพรา อี กอย ฆางหราว, กาลาง โฆรห อี ตู มึห ดีโคว ดี ดูอี แดง กาดาย นี.

10 โคว อัน ตี บอ เฆ ดูอี ปี อึบ เฌาพรา วี ฮาว โดง กอย ดูอี ฮาย เฆ ตี, วี โทม โฆรห ปี กาลาง เฆ. อึณ ปี เฆ ซี แตห อึม บอ แบลง ลึบ แคง โมต เฆ.

11 เฆ บอ ต็อห, “เฌาพรา อี อึบ โตต ดอน โมยว, อัน ตู นับ, อัน ตู ยึร ดอ เหมา.”

12 แตห เบ ยอด, เฆ ดูอี ฮาย ดูอี มืก, เฆ ปาย ตี. เฆ กอย ดาคึย เซเซ, บอ แว ครัม หลึอม บรีม.

13 เซ อึณ ปาย ตี, แปะ แฮะ โบง โอว อี แตห น็อห โอว ซีงา, ตู โบง หมาบ, อึณ ตู มึห อาฆยึร มาเซ.

14 โอว แฮะ คัม ดูก ดอง วัน ดอง คืน. เฌาพรา บอ ดัม หมาบ ดี โอว ดอน หณา.

15 เซ โอว ดี บอ พยาก เฌาพรา ปาย ตี, โอว ดี บอ กาโลว ดี เฆ ดูอี ปี อึบ เฌาพรา.

16 โอว บอ กาดัวะ กาพา, แตห อึณ กาหลูห ดี น็อห โอว ลอง ปี โบง เฌาพรา. อึณ ยี แบน ดูก กาเซา ดี น็อห โอว.

17 วาย ตี, ดอ วี ฮาว โอว แคง โฮว เฌาพรา, โอว บอ วี นับ ซีคยา ปี ดี ปาย ปัน ดี โตต อาซาก เฆ ดูอี ฮาย ดูอี มืก.

18 อึณ ปี แม เฌาพรา แฮะ แตห เฆ กอย โดง เฆลียด กาเซา. แฮะ ฮอต, แม บอ โบง แตห เฆ ลึร ชึม โตต.

19 เฆ ดี ลึร ชึม โตต อู เฌณ. เฆ ดี ฌัม โตต โดง หมึอม โยว กาเซา.

20 อึณ ปี ดูอี อีด อึณบาว. แปร ฮี วัห, ปี อึณบาว อัน แฮะ ฮอต หราย โตต. ปาย ตี แม เฌาพรา ดี บอ โบง แตห เฆ หราย โตต อู เฌณ.

21 ดอ กาดัวะ กาพา โอว ลอง อัน ตี, อึณ แบน กลึร แบน เซา ดี น็อห โอว.

22 โอว มืร ตู มึห อางยาน มาเซ, ปี โดว ซัดดาวา. อาว กาหลูห มาเซ ดี โอว ลอง แม เฌา.

23 มาแล, แม เฌา ยี กอย รึม โดบ โอว, แยต โอว เซเซ.

24 แม เฌา ดี แยต โอว, แตห โอว นับ อากยาม อางยาน แม. แฮะ ฮอต, แม ดี แตห โอว กอย โดง ซีคยา. แม ดี วี มยูก โอว, แตห โอว มึห ซาเร.

25 แดง แม เฌาพรา อู กาดัง นี, โอว ตู มึห ดี บึง มาเซ บอ แคง ฆางหราว บอ แดง กาดาย. อาว มึห มาเซ ปี โลว โอว.

26 น็อห โอว เฆ โดว โอว ปี บอ ดีหลัห กาเซา มืร, แม เฌา ยี วี แตห โปลม แตห แฮณ ดี โอว. แม เฌา บอ มูห ดา กาณา โดง บึง โอว เซเซ.

27 เฆ อี ตู บึง อี กาย็อห ดี แม เฌา, เฆ ดี บอ ชึม อาคัร หมาน. แม เฌา ดี บอ แวน เฆ อี ตู โทม โดบ แม เฌา.

28 อี มูห โอว, โอว ดาคึย เซ โอว กอย โคบ แม เฌา. โอว บอ เครียง โดง กอย เฌาพรา อี อึบ โตต โมยว อี มึห ปวน. โอว ดี กาลาง แปะ แฮะ โบง แม เฌา ดอน โมยว.