1 อึย แม เฌาพรา, โอว ดี บึง แม เฌา. โอว หมาณ, แกวะ แตห โอว หมึอม ซาย ดอ เหมา.

2 แตห แม เฌา จอย โอว แคะ มึห แม น็อห ซืร น็อห หมาน. แตห แม เฌา โทม โฆรห ปี ซาคึร โอว บอ คยอด โอว.

3 แม เฌา แฮะ ปี ดาอาง มาว โดง บึง โอว เซเซ. แม เฌา แฮะ ปี มัง ฆ็อง, แฮะ ปี บอ โดง บึง โดง อีง โอว, อี แร อี ฆ็อง โอว.

4 อึย แม เฌาพรา, โอว หมาณ แตห แม เฌา คยอด โอว, แตห โอว ลอด ตัะ เฆ ดูอี ฮาย ดูอี มืก บอ เฆ ดูอี ตู หมึอม อี ฮาย กาเซา เฆ ตึอน.

5 อึย แม เฌาพรา อี อึบ โตต ดอน โมยว, โอว บอ หน็อะ อึณด็อะ กาเซา แม เฌา. โอว แฮะ หณึม บึง แม เฌา ซีณ ดีแตด โอว.

6 โอว ดี บึง หณึม แม เฌา บอ โจว โอว. แม เฌา มืร, แฮะ แร แฮะ ฆ็อง โอว ซีณ ดอ ฆึอด โอว. โอว ดี อืบ แม เฌา เซเซ.

7 โอว แฮะ แบน ลักซานา ดี อี เฮา อี กืน กาเซา. มาแล, แม เฌาพรา บอ มูห โดง บึง โดง เครียง ซีคยา โอว ดี โอว.

8 ดอน ซีแง โอว ดี ต็อห โหมว อี อืบ แม เฌา บอ กาลาง แคะ ตาง อาพูง ดังโคว แม เฌา.

9 เซ โอว ฮี กัด ฮี แฆ, อาว ฮู มึห โปลม มึห แฮณ, แม เฌา แกวะ เบลห แกวะ แวน โอว.

10 เฆ รันซู โอว บอ เหรต ดี ง็อห ยัม โอว. เฆ บอ กาลาง กาบัห ดี โอว.

11 เฆ บอ ต็อห, “เฌาพรา แฮะ ฮอต เบลห แวน อัน. แตห เอ คูงครัห เหมต อัน, อาว มึห อาเซ อี ดี จอย ดี คยอด อัน.”

12 โอว หมาณ แตห แม เฌา ตัห กอย รึม โดบ โอว. แตห แม เฌา ตัห จอย โอว ครัน ครัน.

13 เฆ อี ซี กาแคณ ดี โอว, แตห เฆ วี ชึม โตต. เฆ อี ซี โบง นา จีจีว ดี โอว, แตห เฆ วี ซาย อี เฮา บอ ชึม ซาเร.

14 โอว ดี บอ หน็อะ อึณด็อะ แม เฌาพรา เซเซ. โอว ดี บอ อืบ แม เฌา หลึอม อาต นี.

15 ดอน ซีแง ดอน ซีแง, โอว ดี บอ กาลาง นา บอด นา หมึอม แม เฌา บอ ลอง แม เฌา คยอด อี. อึณ แฮะ กืน กาเซา แปะ แฮะ โบง แม เฌา, อาว ฮู ฮอต ดี ตีห.

16 อึย แม เฌาพรา อี อึบ โตต แคง ฆางหราว, โอว ดี แค ลอง แปะ แฮะ โบง แปะ แฮะ บยัะ แม เฌา น็อห ซืร น็อห หมาน แม ดี อี. โอว ดี กาลาง มี ลอง นา บอด นา หมึอม แปะ แฮะ โบง แม เฌา.

17 ซีณ ดีแตด โอว แม เฌา แฮะ มาโนว โอว. โอว มืร แฮะ กาลาง อี หมึอม อาม แปะ แฮะ โบง แม เฌา กอ ฌัม ดอ ตี นี.

18 อึย แม เฌาพรา, เซ โอว ฮี กัด, ฮึก ฆีณ โอว มืร แฮะ ลูย, แม เฌา แกวะ เบลห แกวะ แวน โอว. แตห โอว กาลาง บยัะ อาพูง ดังโคว บอ ปวน แม เฌา ดี เฆ ดูอี ดอ ตี นี, บอ ดี เฆ อี ดี ฆึอด วาย นี.

19 อึย แม เฌาพรา, น็อห ซืร น็อห หมาน แม เฌา แฮะ จา กาเซา กอ ดูห เบลณ. ลอง แปะ แฮะ โบง แม เฌา แฮะ อาเร ตาง กาเซา, อาว มึห อาเซ อี ปี แม เฌา.

20 แม เฌา แฮะ แตห โอว ยึร อี ตู หมึอม อี ฮาย กาเซา. แม เฌา ปี วี แตห โปลม แตห แฮณ ดี โอว, วี แตห โอว ดาคึย ฆยามซา. แฮะ ปี แม เฌา แฮะ ดึห เลห โอว แคง กาเดา บาเรว.

21 แม เฌา วี โบง แตห โอว มึห โกรวกราม กืน, วี แตห โอว ฆยามซา ดาคึย.

22 อึย เฌาพรา, แม เฌา บอ มูห เฌาพรา ปี กรึบ โอว. โอว ดี บัห ดีง บอ อืบ แม เฌา โกบ โบง แม นา มูห นา หมาน เซเซ. แม เฌาพรา อี ซีงา บอด, อี มูห เฌาพรา ปี กรึบ เฆ ดูอี อีซาเรลัะ, โอว ดี บัห ดีง ต็อห โหมว, อืบ แม เฌา.

23 ดอ บัห โอว ดีง ตี, โอว ดี บอ กาลาง โฆรห ดาคึย แดะ แม เฌา. โอว ดี บอ ฮับ บอ น็อห บอ พึอม โอว, ต็อห โหมว โกบ แฮะ คยอด แม เฌา ดี โอว.

24 ดอน ซีแง ดอน ซีแง, โอว ดี กาลาง นา มูห นา หมาน แปะ แฮะ โบง แม เฌา. โคว, แตห เฆ อี ซี โบง นา จีจีว ดี โอว, วี ชึม ซาเร บอ ซาย อี.