1 แตห แม เฌา โบง แตห เฆ รันซู แม กาย็อห ฮาว ดอน นา ดอน โปละ, แตห บอ เฆ อี ฌ็อง แม เฌา เตา.

2 แตห เฆ บอ หราย ปี คูน บูด ดัก เงา. แตห แม เฌา โฮว เตา เฆ ปาย ตี. แตห เฆ ดูอี ฮาย ดูอี มืก บอ ชึม โตต. แตห อึณ ปี บลัม อี ลาต ดอ กอย โคบ เงา.

3 อี มูห เฆ ดูอี น็อห ซืร น็อห หมาน, แตห เฆ ยี โบยว ดาคึย, แตห เฆ บอ เกยา บอ โคย ดี อาต เฌาพรา.

4 แตห เบ ต็อห โหมว อี อืบ เฌาพรา. แตห เบ ต็อห โหมว อี อืบ ปวน อัน เฌา. แตห เบ อืบ อัน เฌา อี กอย แคง อึณอูะ. อัน เฌา แฮะ มูห เฌาพรา. แตห เอ บอกาเฆลียด อืบ อัน เฌา.

5 อัน เฌา บอ กอย แคง โดง บอด. อัน ยอด ลึมลา เฆ ฆอน ซีปรัห ปี ฆูณ เฆ. อัน บอ ม็องการา ดัว ดี เฆ ยา ซีปรัห ดอน อี.

6 เฆ อี ตู มึห ฆึก, อัน เฌา โบง แตห เฆ วี มึห อึณโฮม, มึห กาง. เฆ อี กอย แคง กาปึม, อัน เฌา แตห เฆ วี เลห, ต็อห โหมว ดาคึย. อาเซ ยี แวน เฌาพรา, อัน เฌา ดี วี แตห เฆ กอย แคง แปร กาฮ็อห, โดง ง็อง.

7 อึย แม เฌาพรา, ดอ แยต แม เฌา ดี อาต เฆ ดูอี อี มูห ดูอี อาโมยว แม, ดอ ฮาว เฆ แคง แปร กาฮ็อห ตึอน,

8 มาอีม แฮะ เยณ. บอ ฆลาย แฮะ โจห โลง แคง ฆางหราว อาต ตัห แม เฌา. บอ นอน ซีนาย แฮะ ดีเยณ ดอ กาปลูห แม เฌาพรา, อี มูห เฌาพรา ปี กรึบ เย ดูอี อีซาเรลัะ.

9 แม เฌาพรา บอ โบง แตห ฆลาย โจห กืน กาเซา. แตห อึณ จอย บอ มืง อี มูห คาฆูน ปี ดัว แม ดี เย.

10 เฆ ดูอี อาโมยว แม เฌา, เฆ แฮะ ลึบ กอย แคง มืง ตี. แม เฌาพรา มึห น็อห ดีฮาง. โคว, แม นับ ดี ดัว แคะ ปี โลว เฆ ดูอี ฆีน, ดูอี พลาน.

11 เฌาพรา กาลาง โฆรห. แฮะ ฮอต, อึณ วี มึห เฆ อีบึณ กืน อี กาลาง ลอง อัน ตี ดี อี เฮา.

12 เฆ แฮะ ต็อห, “คูนดีคัม เฆ ดา ซึก แฮะ ปีครัน เฆ ดี เตา. เฆ อีบึณ วี ดึห โกรว แปะ แฮะ อูน รันซู เฆ ตี, วี ลาย กาซาง.”

13 เฆ มืร ต็อห, “อึย, เบ ดูอี อี วาด เงา, อี กอย โดง กอย มาบู, แตห เบ นับ, เฆ อีบึณ ตึอน แฮะ ปึอน รึอน เฆ ครีว กืน กาเซา. อึณ บอ มึห อารึบ มาโบลย ปี ปีด อี รึอน ดี เพียง อัน, บอ ครีว ดี ฮึก อัน.”

14 เฌาพรา อี ตาง หลึอม โตต ดอน โมยว บอ อึบ โตต ดอน โมยว, อัน แฮะ แตห เฆ คูนดีคัม กาย็อห. ดอ อัน ตี อึณ แฮะ ปี อึม ดาด โจห ดี นอน ซาลาโฆม ตึอน.

15 เฆ นอน อี กอย แคง มืง บาซัน มูห นอน จา, นอน อี มึห กาแดะ อี จา กาเซา.

16 อึย เบ ดูอี อี กรึบ แดง กาแดะ นอน จา ตี, อาว โลว เบ หลัยะ เฆ ดูอี อี กรึบ เฌาพรา แดง นอน อี มูห โดง กอย เฌาพรา. อัน เฌา ดี บอ กอย ดี นอน อัน เซเซ.

17 เฌาพรา มึห ลักเลา กืน กาเซา, อี ปึอน ป็อะ กาโฆห ดี อี. อาว วัน แบน หมึณ แบน หมึณ. อัน เฌา แฮะ ตัห ดี นอน ซีนาย วี ฮาว ฌัม โดง บอด, โดง กรึบ ซาคึร ดูอี ดี อัน.

18 อัน เฌา แฮะ แดะ ดูอี กืน กาเซา โฮะ โดบ อัน นา แดง. อัน เฌา บอ ดึห ลักซอง ดี เฆ ดูอี แปะ แฮะ กาโฆห ออง อัน. ปาย ตี, เฌาพรา แฮะ โบง แตห อัน ปึอน ดี วี กอย โดง กอย อัน ตี.

19 แตห เอ อืบ เฌาพรา อี แฮะ คยอด เอ. ดอน ซีแง ดอน ซีแง อัน บอ จอย เอ ดอ มึห เอ ดูก.

20 เฌาพรา ตี มูห เฌาพรา อี คยอด ดูอี. อัน บอ มูห เฌาพรา อี อึบ เอ. อัน บอ นับ ดี ทูด เลห เอ แกวะ แตห อาซาก เอ ชึม.

21 อัน เฌา ดี บอ ฆลอก ฆีณ เฆ รันซู อัน อาคัร หมาน. เฆ อี โบง หมาบ เซเซ, อัน ดี บอ แตห อาซาก เฆ ชึม.

22 เฌาพรา ต็อห, “เฆ อี มูห รันซู แม, โอว ดี ดึห เลห เฆ ดี มืง บาซัน. โอว บอ แตห เฆ เลห แคง อึม นัมมูกซารา อี ลึก กาเซา,

23 แตห แม วี แณต ฮาว แดง หนาม เฆ, แตห บอ มาโซว แม ปึอน ดี โฮม ดี เลียะ แพ หนาม เฆ.”

24 อึย เฌาพรา, เย แฮะ ปึอน ดี ยึร แม เฌา ตัห. เย บอ ยึร เฆ อี กืน อี โดบ แม. เย แฮะ ยึร แม อี มูห เฌาพรา ปี กรึบ เย บอ คูนดีคัม อี อึบ เย. แม เฌา แฮะ วี ตัห โดง บอด, โดง กรึบ ซาคึร อี ดี แม.

25 เฆ อี นับ ดี ต็อห โหมว, เฆ บอ แยต ดี อาต. เฆ อี บัห ดีง บอ โดบ ดี ปัน. เฆ อีบึณ อี นับ ดี กัร ฆรึง บอ ฮาว โดบ เฆ.

26 เฆ บอ ต็อห, “แตห เอ อืบ เฌาพรา กาแต เฆ ดูอี ปี อึบ อัน เฌา. เอ ดูอี อีซาเรลัะ, แตห เอ กาโพรม ดี อืบ เฌาพรา.”

27 อึณ บอ มึห ดูอี แบน ครึร แบน ครึร. อึณ จูห ดี ครึร อาเบนยาม อี เปรต หลึอม อี เฮา. อึณ บอ มึห เฆ ดา ตาง ยูดา อี กืน กาเซา, บอ เฆ ดา ตาง แคง ครึร อาเฌบูโลน, บอ เฆ ครึร อานาบทาลี, เฆ บอกาเฆลียด แฮะ กาโดบ ตัห.

28 อึย แม เฌาพรา, แม แฮะ ดึอม บยัะ ปวน แม ดี เย. ดอ ตี นี, เย หมาณ, แตห แม เฌา วี บยัะ ปวน ตี ดี เย ปอ อู เฌณ.

29 แม เฌาพรา, แม มึห โฮว แคง มืง เยรูซาแลม. เฆ คูนดีคัม แคง มืง อี เฮา, เฆ ดี ตึย ตัห ลักซอง เฆ ดี แม เฌา.

30 แตห แม เฌา บอ มาโนว เฆ ดูอี แคง มืง แอฆึบ อี ปี มาโดว แปร อี ฮาย กาเซา, อี กอย แคง นัง โฆ็ลง. แตห แม มาโนว บอ เฆ ดูอี เฮา อี ปี มัก ดีโซว อี กอย กาแต เฆ ฆอน มามัก. แตห เฆ วี คัม ดี โฆม, คัม ดี โยม, แตห เฆ กอ วี ตัห หลู รึอน เฆ ดี แม เฌา. บอ เฆ อี อึง ดี กาโฆห, แตห เฆ เตา กาย็อห ฮาว ดอน บลาก.

31 เฆ ดูอี แอฆึบ ดี ตึย ดาลาม เฆ ตัห ฌัม โดง กอย แม เฌา. เฆ ดูอี อี กอย มืง กูซา,^a เฆ บอ ปีครัน เฆ ดี ตัห กรึบ เฌาพรา.^b

32 อึย เบ ดูอี อี กอย ดอน มาน ดอน มืง แดง กาดาย นี, แตห เบ บอ ต็อห โหมว, อี อืบ เฌาพรา. แตห เบ ต็อห โหมว ทัม, อืบ อัน เฌา.

33 อึณ มูห อัน เฌา อี อึบ โตต แคง เบลณ, อี แฮะ ดึอม มึห ซีณ ดอ มึอน. อึณ มูห อัน เฌา อี นับ ดี กาลาง โฆรห ตาง ปี ฮัม เบล กาซัห.

34 แตห เบ บอ กาลาง บยัะ ลอง อาพูง ดังโคว เฌาพรา. ปวน อัน อึบ เฆ ดูอี อีซาเรลัะ. อาพูง ดังโคว อัน แฮะ ปึอน ยึร แคง เบลณ.

35 แม เฌาพรา, แม แฮะ หมึอม อาม กาเซา ดอ เลห ตัห แม โดง กอย แม อี บอด กาเซา. เฌาพรา ปี กรึบ เฆ ดูอี อีซาเรลัะ, อัน บอ นับ ดี ดัว โปลม, ดัว แฮณ ดี ดูอี ปี อึบ อัน. แตห เอ บอกาเฆลียด บอ อืบ อัน เฌา.