1 อึย แม เฌาพรา, โอว หมาณ, แตห แม เฌา โทม ลอง ดูก ปี กาดูห โอว. เฆ รันซู โอว แฮะ กาชัวะ โอว, ต็อห ดี ง็อห ยัม โอว. โอว หมาณ, แตห แม เฌา บัร รีด โอว.

2 โอว หมาณ, แตห แม เฌา ฆ็อง แร โอว, แกวะ แตห เฆ ดูอี ฮาย ดูอี มืก ปึอน ดี โบง แคะ ปี คราม เฆ. เฆ มูห พึง อี โบง นา ตู หมึอม เซเซ.

3 โฆรห อี เลห แคง โมต เฆ, อึณ ดึร น็อห ดูอี ปี มาปัวะ ลาง อี ลัม. เฆ เหรต โฆรห, แตห อึณ เซา ดี น็อห อี, แตห อึณ ปี อี เยง อัะ ต็อห ดี บัณ อี.

4 เฆ บอ บัณ ดูอี อี ตู มึห หมาบ ดอ ตู นับ อัน โดว อัน. เฆ มืร บัณ อู เฌณ, ตู โยว อาเซ.

5 เฆ บอ ลาย แดะ, ลาย ซังคยาง ปี ดี ปาย เฆ ดี โบง นา ตู หมึอม, แตห เฆ ปึอน ดี ดีณ ยอต ดี อี เฮา. เฆ บอ ลาย ต็อห ราง เฆ, “อาว มึห อี ยึร ปี โบง เอ.”

6 เฆ หล็อก ดี โบง นา ตู หมึอม ดอน โมยว, วี ต็อห, “แฮะ หมึอม กาเซา.” โคว, ปี กาพา เฆ แคง น็อห เฆ, อึณ บอ โฆะ กาเซา.

7 มาแล, ดอ อัน ตี อู เฌณ เฌาพรา ดี วี บัณ อัะ อัน, แตห อึณ ล็อะ เฆ, แตห เฆ เกห ยัม.

8 โฆรห ปี ดึอม กาลาง เฆ, เฌาพรา วี โบง แตห อึณ ดึร เฆ, แตห เฆ วี เกห ชึม โตต. เซ เฆ อี เฮา ยึร ลอง อัน ตี, เฆ บอ กาณัห เฆ.

9 เฆ ดูอี ดอน อี ดี บอ โยว เฌาพรา, เฆ บอ กาลาง แปะ แฮะ โบง เฌาพรา. เฆ บอ วี โหลห บอ กาพา ลอง อัน ตี.

10 แตห เฆ ดูอี อี มึห น็อห ซืร, วี มึห น็อห ดาคึย โกบ แปะ แฮะ โบง เฌาพรา. แตห เฆ อี โบง นา บอด นา หมึอม อืบ อัน เฌา.