1 อึย เบ ดูอี ดอน โมยว, แตห เบ ยึร. เบ ดูอี แดง กาดาย, แตห เบ โทม.

2 เบ ดูอี อี กอย แดง กาดาย บอกาเฆลียด, บอ อี เตียะ อี ตาง, บอ ดูอี ครัม ดูอี ฆีน, แตห เบ กาโพรม ดี โทม.

3 โอว ดี กาลาง โฆรห อี มึห อางยาน. อากยาม อางยาน แคง น็อห โอว, อึณ แตห โอว นับ อาเร แบน โมยว แบน โมยว.

4 โอว ดี โทม โฆรห มากาทัะ บอ บัห ดีง, กาลาง ปี ปาย ซีเพา อัน ตี.

5 โอว ตู โลว โยว มาเซ ดอ ฌัม โอว ดูก ตาง, บอ ดอ มึห รันซู อี กอย โรบ โอว ดอน บลาก.

6 เฆ มูห ดูอี อี บึง โกรวกราม เฆ, เฆ บอ ปีพูง เฆ โกบ กืน โกรวกราม เฆ.

7 อึณ ยี ตู มึห อาเซ อี ปึอน ทูด เลห โดว บรีม อัน, อี ปึอน จึห อาซาก อัน ดี เฌาพรา.

8 โคว, ง็อห ปี โลว อัน ทูด เลห อาซาก อัน ตี, อึณ แฮะ ง็อห กาเซา. บอ กืน แคะ เหมา, อึณ ตู นับ ดี โฆรว.

9 อาว มึห อี ปึอน จึห อาซาก, แตห อัน อีม เซเซ, แกวะ แตห อัน โลว ฮาว กอย แคง บาเรว.

10 ดอน อี นับ, บอ เฆ อี มึห อางยาน บอ เฆ ดูอี รึร, เฆ ดี บอ ยัม. เฆ บอ กาดูห ดี แวน โกรวกราม เฆ, แตห อี เฮา ดึห.

11 เฆ บอ แตห มืง เฆ มึห จืร อี ปี จืร เฆ. เฆ ยี โลว กอย แคง บาเรว, แตห อึณ วี แบน กาง โดง กอย เฆ เซเซ. แตห เฆ บอ กอย ดี ตี แบน ฌาด แบน ฌาด.

12 ดูอี ครัม ปี บอ มึห ปวน แคะ เหมา, อึณ ตู ปึอน คยอด เฆ, แตห เฆ ลอด ยัม. เฆ บอ โลว ยัม ปี โดว ซัดดาวา.

13 เฆ ดูอี รึร หณึม กาลึบ. เฆ ดี กาดูห ดี คัม ปาย นี.

14 เฆ ดี ยัม ปี มาบู. เฆ ดี กอย โตต แคง มืง มารานัะ. แตห เฌา มารานัะ อึบ เฆ. เฆ ดี บอ ฮาว ซืร แคง กาเดา บาเรว. โดว โบ็ง เฆ ดี บอ ลาต หราย โตต. มืง มารานัะ ดี แบน โดง กอย เฆ.

15 เฌาพรา ยี ทูด เลห โอว, แกวะ แตห เฌา มารานัะ ปึอน ดี อึบ โอว. อึณ มูห เฌาพรา อี บัร ดี รวห โอว.

16 เซ อึณ บอ มึห ดูอี มัง อี, อี แฮะ ปึอน โกรวกราม กืน, อี แฮะ ปึอน อาพูง, แฮะ ปึอน ซาเร บอ แฮะ ครัม กาเซา, แกวะ แตห แม หลัยะ เฆ.

17 โคว, เซ เฆ ยัม, เฆ ตู ปึอน ดึห ฮาว โกรวกราม เฆ ตี. บอ อาพูง ซาเร เฆ, เฆ ตู ปึอน ดึห ฮาว โดบ เฆ.

18 เซ อึณ มึห ดูอี อู วี, อัน ปี บอ โบง แตห อึณ ล็อะ น็อห อัน, อี เฮา ปี บอ อืบ อัน โกบ หล็อก อัน,

19 มาแล, บอ อัน ดี บอ ยัม, บอ ฮาว โดบ ดา ดา อัน, อี ตู ปึอน ยึร บลาง ดอ เหมา.

20 ดูอี ฌึร ตี, อัน ตู ปึอน กอย เซเซ. อัน ดี บอ ยัม ปี โดว ซัดดาวา.