1 อึย แม เฌาพรา, โอว บึง แม เฌา. โอว หมาณ, แกวะ แตห โอว โลว ซาย อี ดอ เหมา. โกบ มึห แม เฌา น็อห หมาน น็อห หมึอม เซเซ, โอว หมาณ, แตห แม เฌา คยอด โอว.

2 แตห แม เฌา โทม โฆรห โอว บอ จอย แตห โอว ลอด ครัน ครัน. แตห แม เฌา แบน ปี ดาอาง มาว อี มูห โดง บึง โอว. แตห แม เฌา คยอด โอว, แตห แม บอ ปี โดง ปึอน โอว ดี เครียง ซีคยา.

3 แม เฌาพรา, แม แฮะ ปี ดาอาง มาว บอ โดง ปึอน โอว ดี บึง ดี เครียง. โกบ มึห แม เฌา ปวน ตาง, แตห แม บอ อึบ บอ แยต โอว.

4 โกบ บึง โอว ดี แม, แตห แม เฌา ดึห เลห โอว แคง ยอต ปี ดีณ อูน อี ดี โอว.

5 โอว ดี อาบ น็อห พึอม โอว ดี แม, แตห แม เฌา ยอด แมน. แม เฌาพรา มูห เฌาพรา อี โบง นา มูห นา หมาน, แม ดี บอ คยอด โอว.

6 แม เฌาพรา, แม ฌ็อง เฆ อี กรึบ อารึบ, ต็อห อึณ มูห เฌาพรา. โอว ยี บึง แม เฌาพรา.

7 โอว ดี บอ โคย กาเซา โกบ ร็อก กาเว แม เฌา ดี โอว. แม เฌา แฮะ ยึร โตต อี ดูก อี หณาบ ดี น็อห โอว.

8 แม ยี ตู อาบ โอว ดี รันซู โอว. แม เฌา บอ แยต โอว ฮาว โดง กาว็อห, โดง ซีคยา.

9 อึย แม เฌาพรา, โอว หมาณ, แตห แม เฌา กาเว โอว. โอว แฮะ กาดูห ดูก ตาง. อึณ บอ ปี โดว โบ็ง โอว บอ งาย โอว บอ แคง วัต แคง น็อห โอว แฮะ ฮอต ลึร โตต โกบ ดูก ตาง ตี.

10 โคว, อาซาก โอว มืร บอ ปวน ฮาว, โอว มืร บอ กลึร บอ เหงา ดอน ซีนัม. กาอาง โอว เฆ โปลม โอว บอ ดีหลัห โตต โกบ ดูก โอว ตี.

11 โกบ แฮะ กืน เฆ รันซู โอว, เฆ อี กอย กาตัด โอว, เฆ บอ แนนัะ โอว. เฆ อี ลาย ดึอม ดี โอว, เฆ วี กาอีห กาเซา โอว. เฆ ฮี ยึร โอว โดบ อึณเตณ, เฆ บอ เตา เฆ.

12 เฆ แฮะ ปีว โอว ปี เฆ ปีว ดูอี ยัม. โอว บอ ปี กาโละ อี กาลาต.

13 โอว ยึร เฆ ดูอี กืน พูพาบ กาย็อง โอว. เฆ อี หมึอม โยว บอ กอย ดอน บลาก. เฆ บอ ลาย ซังคยาง ดี แวน โอว. เฆ บอ คราม ดี ง็อห ยัม โอว.

14 โอว ยี บึง แม เฌาพรา. โอว ต็อห, “แม เฌาพรา มูห เฌาพรา ปี กรึบ โอว.”

15 แม เฌาพรา บอ นับ โตต, อึณ ดี ปาย เหมา ดี โอว. โอว หมาณ, แตห แม แตห โอว ลอด ตัะ เฆ รันซู โอว, เฆ อี โบง นา จีจีว ดี โอว.

16 โอว หมาณ, แตห แม เฌา กาเว โอว อี มูห แดเจณ แม นี. โกบ มึห แม เฌา น็อห ร็อก กาเว เซเซ, แตห แม เฌา คยอด โอว.

17 โกบ ซาคึร โอว ดี แม เฌาพรา, แกวะ แตห โอว โลว ซาย อี. แตห เฆ ดูอี มืก, ดูอี ฮาย ตี วี โลว ซาย อี. แตห เฆ โจห โตต แคง มืง มารานัะ, แกวะ แตห เฆ ซี ปึอน กาลาง โฆรห.

18 เฆ อี นับ ดี กาโลว, แตห ซีดัะ เฆ วี เฮต. เฆ อี แนนัะ ดูอี น็อห ซืร น็อห บอด, บอ เฆ อี มึห น็อห ปีคึก, โบง นา จีจีว, แตห เฌาพรา โบง, แกวะ แตห เฆ ปึอน ดี กาลาง โฆรห มาเซ.

19 แม เฌาพรา แฮะ แรน อูน ปี ดี เฆฌู แม ดี เฆ อี โรวเซ แม. ดอน อี แฮะ นับ แคะ หมึอม แม. เซเซ แม ดี โบง นา หมึอม ดี ดูอี อี บึง แม.

20 แม เฌาพรา ดี บอ ดึห เครียง เฆ โดง กอย แม. แม ตู แตห อี ปึอน ดี โบง นา ตู หมึอม ดี เฆ. แม เฌา บอ ยอด ลึมลา เฆ โดง กอย แม. แม เฌาพรา ตู แตห อี ปึอน ดี กาเอห กาแทณ ดี เฆ.

21 โอว อืบ แม เฌาพรา โกบ แฮะ แตห แม เฌา โอว ยึร น็อห ร็อก กาเว แม อี หมึอม อาม กาเซา. ดอ กอย รันซู โรบ โอว ปี เฆ กอย โรบ มืง, แม เฌา แฮะ ร็อก กาเว โอว.

22 ดอ โยว กาเซา โอว, โอว แฮะ กาลึบ ดี ต็อห, “เฌาพรา ตู ยอด โอว. เฌาพรา แฮะ ฮอต แวน โอว.” มาแล, โอว แฮะ วี ซาคึร ดี แม เฌาพรา, แม เฌา ยี วี โทม โฆรห ปี ซาคึร ปี หมาณ โอว.

23 อึย เบ ดูอี อี บึง เฌาพรา, แตห เบ ร็อก เฌาพรา. เฌาพรา ดี บอ ยอด แมน เฆ อี มึห น็อห ซืร น็อห หมาน. เซ อึณ ยี มึห ดูอี อี มึห น็อห ปีคึก, อัน เฌา ดี ดัม กาเซา หมาบ ดี เฆ.

24 อึย เบ อี บึง เฌาพรา, แกวะ แตห เบ โยว. แตห เบ บอกาเฆลียด มึห น็อห ยัะ, น็อห โปลม.