อาโยวบา วี ต็อห, “ดอ ตี นี โอว โลว คัม เฆ อี ซี หนึม หลึอม โอว วี กาโพรม ดี กาณัห โอว. ฆูณ ดูอี เฆ ตี, โอว ยี ตู มาด เฆ ดาน มาโซว อี บัร มาบู เฆ มาแป โอว.

2 ดูอี อี แฮะ ดีหลัห อึณ จัม ตู แบน อาฆยึร มาเซ ดี โอว. แคะ มึห เฆ โปลม เฆ แฮณ, แฮะ ฮอต หราย โตต.

3 ดูอี เฆ ตี แฮะ ฆีน แฮะ พลาน กาเซา. เฆ มืร แฮะ เอต ปี ดี โฮม บอ กาปราณ กาเซา ปี ดี โฮม. เฆ บอ กาดูห ดี เหรต ปี ดี โฮม แคง หมึร, ฮาว แคง แปร กาฮ็อห โดง ตู มึห อี กอย.

4 เฆ บอ นับ ดี เบต โฮม เดา อี กอย แคง แปร บอ ดึห โฮม เรียห เฮ อี กอย แคง แปร กาฮ็อห.

5 เฆ บอ โลว คัม อี เฮา โฮว เตา เฆ บอ ดัด กาลาง โฆรห ตาง, แตห อึณ กอ ปี อี ดัด คูงครัห ดา ปรา.

6 เฆ บอ กาดูห ดี เตา เครียง กอย แคง ดีลัยะ อี หมึอม โยว, บอ แคง กาเดา มาว บอ แคง กาเดา แคง ดีโฆละ.

7 เฆ บอ หงูน บอ ยาม กอย แคง นัง กาหลึบ. เฆ บอ กอย ลาย กาเซียะ ครึม ยวน.

8 เฆ ปี ฆอน ดูอี รึร บอ ฆอน ดูอี อี ตู มึห ดีโคว. อึณ มืร ตู มึห อาเซ อี นับ จืร เฆ. เฆ บอ กาดูห ดี คัม อี เฮา โฮว เลห เฆ นา เรต เรา เรต มืง.

9 ดอ ตี นี, หลูกหลาน ดูอี เฆ ตี วี ปี วาณาก กาณัห โอว. โอว แฮะ แบน ปี กาณัห เฆ บอ ปี แนนัะ เฆ.

10 เฆ มืร แฮะ กาอีห แฮะ ฌ็อง โอว บอ วัห โต็ง โดง กอย โอว. เฆ มืร ยัะ ปัต นา โอว.

11 ดอ ตี นี เฌาพรา แฮะ โบง แกวะ แตห โอว มึห โปลม มึห แฮณ ปี วัน อัะ แฮะ กาดัด. โคว, ดูอี เฆ ตี บอ โบง แตห อึณ บยัะ ลอง ตู โรวเซ เฆ ดี โอว.

12 พึง ดูอี อี ตู หมึอม เฆ มืร ตัห กาปลูห บลาก อาอัห โอว, บอ คัด เปลา โอว, แตห โอว เกห. เฆ โบง ปาย ตี แตห เฆ ปึอน ดี ปยาต แวน โอว.

13 เฆ มืร ปยาต อึณเตณ โอว, แตห เฆ ปึอน ดี แวน โอว. ปี โบง เฆ ตี มืร ออง, อาว มึห อาเซ แคร เฆ.

14 เฆ ตัห โดง กอย โอว ปี ดา ซึก ตัห แคง กาเดา แรง มืง แปะ แฮะ บลูห หลูห เฆ. เฆ มืร ตัห แบน พึง แบน พึง โฮะ แดง แรง อี แฮะ ราม แฮะ ลึร กาปยาต ตึอน.

15 โอว มืร แฮะ กาตูณ แฮะ ยึร อี หมึอม โยว กาเซา. อาพูง ซาเร โอว มืร แฮะ ฮอต หราย โตต, อึณ บอ ปี คูน แฮะ ตัห บูด แวน. โกรวกราม โอว มืร แฮะ กาโชต ฮาว ดอน บลาก ปี อึณอูะ.

16 ดอ ตี นี น็อห โอว แฮะ ฮอต ลึร โตต โกบ ดูก ตาง แปะ แฮะ คัม โอว ดอน ซีแง ดอน ซีแง.

17 แคง หมึร กาอาง โอว มืร แฮะ เซา บอ โดว. อี เซา แคง โดว โบ็ง โอว ตี, อาว เยน ดอ เหมา.

18 อึณ ปี อัน เฌา อี มึห ปวน อี แฮณ กาเซา แฮะ ปา โอว แตห ครึง ตา โอว กอ กาปยาต โตต. อึณ บอ ปี อัน แฮะ ปา ดึก ซีโตว โอว ดี แมง โอว.

19 อึณ ปี อัน เฌา แฮะ ฌูน โจห โอว แคง โณะ ณัะ. โอว มืร แฮะ ปี กาปูห เฆ กาฟาง.

20 อึย แม เฌาพรา, โอว แฮะ ดัด แดะ แม เฌา, แม เฌา ยี ตู อึร โฆรห โอว. ดอ ยีต ซาคึร โอว ดี แม เฌา มืร, แม เฌา ยึร โอว, ยี ตู โทม โฆรห ปี ซาคึร โอว.

21 อึณ ปี แม เฌา โคย ดี โบง นา จาว ดี โอว. แม แฮะ ตา อาพูง ดังโคว แม คาหนาบ โอว.

22 แม เฌา มืร แฮะ จัร คูน ตัห บูด โอว, แตห โอว บึณ โดบ คูน ตี. อึณ ปี แม เฌา แฮะ โจะ เบลห โอว โดง แฮณ กาเซา คูน, แตห โอว กอ ลาเลียะ โฮะ ลาเลียะ โลง.

23 โอว แฮะ ฮอต นับ, แม เฌา แฮะ ซี แตห โอว ยัม, แม วี ตึย โอว ฮาว โดง ดี เบลห อูน แม ดูอี ดอน อี อี ซี อีม, อี ซี กอย ดอ ตี นี.

24 แฮะ หมาน, อึณ ตู ดึอม มึห อาเซ อี จอย ดูอี อี แฮะ ฌัม ดูก หณาบ. เซ อัน หมาณ, แตห อี จอย อัน, แตห อัน ลอด ตัะ ดูก ตี, อาว มึห อาเซ อี โทม.

25 โอว ยี แฮะ ดึอม กาดูห ดี ยาม ดอ ยึร โอว เฆ ดูอี อี แฮะ ฌัม ดูก. น็อห โอว บอ กลึร ดอ ยึร โอว เฆ ดูอี แฮะ เอต แฮะ ฌูด ลูด.

26 มาแล, ดอ หน็อะ บัร โอว ปัน ดี ตัห นา บอด นา หมึอม, อี ฮาย อี จีจีว ยี วี ตัห. ดอ หน็อะ บัร โอว ดี ยึร นา บลาง, อับ ว็อง ยี วี ตัห.

27 แคง น็อห โอว แฮะ กาฟัร กาเฟียน, อาว เยน ดอ เหมา. ดอ ตัห ฌัม ดูก ตาง ตี อึณ บอ กางยา โอว ดอน ซีแง.

28 โจว อาซาก โอว นี, แฮะ อับ ว็อง ดีตีณ, อาว มึห บลาง ซีแง. โอว มืร ยีต จ็อง กาแต เฆ ดูอี กืน, บอ ดัด แดะ เฆ แตห เฆ ตัห จอย โอว.

29 โฆรห ปี ดัด แดะ โอว ตี, อึณ บอ มูห โฆรห กลึร บอ โฆรห ง็อง, บอ ปี แคะ ฮัม มาโซว แปร, บอ ฮัม มาซีม กาฮาต.

30 ฮูน โอว มืร, แฮะ ว็อง แฮะ อึณบูต โจห. โดว โอว มืร แฮะ กาฮัวะ แฮะ ดาด ปี เงา.

31 ดีง ปี บัห โอว บอ วี เลห ฮัม ปี อี หงูน อี กลึร. เวา ปี บูด โอว, บอ วี เลห ฮัม ปี อี ยาม.”