1 ดอ อัน ตี อาโยวบา ปี วี กาลาง ฮาว ปัว.

2 อัน ต็อห, “อาลึร โอว บอ กาปรา กาเซา, แตห อึณ วี แบน ปี ดอ มึอน ซีนัม เฆ มาเฆียน อี แฮะ ปวน ตัห, ซีแง ตี เฌาพรา แฮะ จอย โอว.

3 ดอ อัน ตี, อึณ ปี เงา ออม อัน เฌา ซี บลาง บอ บลาง แดง ฆีณ โอว. โอว มืร บึง บลาง อัน เฌา ตี บอ ปึอน กาโลห ฮาว ซีคยา ซีคยา แคง อับ ว็อง.

4 โอว บอ วี ซี แตห อึณ ปี ดอ ซี มึห โอว โปลม เฆ แฮณ. ดอ อัน ตี เฌาพรา มืร ลาย แบน อู ฆึก ดี โอว. อัน เฌา มืร ม็องการา ดัว ดี โอว.

5 ดอ อัน ตี เฌาพรา อี อึบ โตต ดอน โมยว มืร กอย รึม โดบ โอว. เฆ ฆอน โอว มืร กอย รึม โดบ โอว.

6 มามัก เฆ มาแป มืร มึห อึม ปู กืน ดัว ดี โอว. อึม นามัน มืร แหล ตัห กืน แคง มาว อี กรีด นามัน.

7 ดอ โฮะ โอว ดี บาง มาโลห มืง โดง กาฌูะ กามวน เฆ ดา ตาง, โอว มืร ฮาว ตูต โดง แฮะ แรน อูน เฆ อาดา โอว.

8 เฆ ดูอี หนึม มืร ยึร โอว, เฆ มืร วัห โดง ดี ว็อะ โอว. บอ ดูอี กัด ดูอี แฆ มืร ยีต จ็อง, โฆม บอ โรวเซ โอว.

9 แคะ กอย เฆ ดา กาณา มืร เยน, อาว มึห อี โฆรห. เฆ บอ วี กาบีด โมต เฆ ตา แด เฆ.

10 แคะ กอย เฆ อามู อามาด คูนดีคัม มืร ซีต็อง เยน, ตู ยัะ โฆรห มาเซ.

11 แคะ กอย เฆ อี แฮะ ดึอม โทม โฆรห โอว, เฆ มืร อืบ มยูก โอว. เฆ อี แฮะ ดึอม ยึร โอว, เฆ มืร กาลาง นา หมึอม ลอง โอว.

12 โคว, เฆ ดูอี ดูก ดูอี ฆีน บอ เฆ ฆอน ซีปรัห อี ตู มึห อี จอย เฆ, เฆ แฮะ ตัห หมาณ ดี โอว, โอว มืร จอย เฆ.

13 เฆ ดูอี อี แฮะ รีน ดี ยัม, เฆ แฮะ วี ม็องการา ดัว ดี โอว. โอว มืร โบง แตห เฆ ยา ซีปรัห วี โคย ดาคึย, ต็อห โหมว.

14 โอว แฮะ โฆยวฆยา ดี โดบ นา ซืร นา หมาน เซเซ ปี โอว แฮะ ชึบ ครึง. ปี โบง โอว, แฮะ ปี ซีโตว ตาง บอ กามัยะ ปี ชึบ โอว.

15 งาย โอว แฮะ บยัะ แหน อึณเตณ ดี เฆ ดูอี งาย อับ, บอ เปลา โอว แฮะ ฮาว กาดาง เฆ ดูอี อี ตู ปึอน ฮาว.

16 โอว แฮะ ปี ฆูณ เฆ ดูอี พลาน, โอว บอ แฌด ดี ยอด อามู เฆ ดูอี อาโมยว เฮา.

17 อึณ ปี โอว แฮะ บัก แวน แปละ ดูอี ฮาย ดูอี มืก, บอ วี ดืด เลห ดี โมต เฆ แปะ แฮะ ก็อะ ฮาว เฆ.

18 โอว มืร ทาง อาซาก โอว ดี โต็ง, บอ โอว ดี ยัม ดาคึย ดาคึย แคง กาง โดง กอย โอว.

19 โอว มืร ทาง โจว อาซาก โอว, อึณ ดี ปี เฮ อี มึห เรียห อี ลึบ โลง ฌัม แคง อึม. อึม ดีงาน มืร ดี แตห รา อัน อัม ณัะ เซเซ.

20 อาพูง ดังโคว โอว มืร ดี มัน ซีคยา เซเซ. อัะ ปี โฆ็ง โอว มืร ดี บอ กยัะ เซเซ.

21 ดอ ดัว โอว อากยาม อางยาน ดี อี, เฆ มืร แฮะ กอย เยน เยน บอ บัร ดี โทม ซีคยา ซีคยา โฆรห โอว.

22 วาย แฮะ ฮอต โอว กาลาง โฆรห ตี, เฆ มืร อาว ฮู มึห ปี ดี วี เวียะ มาเซ. โฆรห ปี กาลาง โอว, อึณ บอ โทม ดาคึย ดี เฆ.

23 เฆ บัร โอว ปี ดูอี บัร ฆลาย. เฆ บอ โทม โฆรห โอว ปี กาดาย หณอด อึม ฆลาย อี โจห อาคราว ดียาง.

24 โอว มืร เอว กาณัห ดี เฆ ดูอี อี ตู มึห โดง ดี บึง, อึณ บอ แตห เฆ อาม. ดอ ยึร เฆ นา โอว แฮะ ซาบลาง ดาคึย ปาย ตี อึณ แบน โปลม แบน แฮณ ดี น็อห เฆ.

25 โอว บอ แบน ดา ตาง เฆ บอ แหน บยัะ อี หมึอม อี ตู หมึอม ดี เฆ. โอว มืร แยต เฆ ปี คูนดีคัม แฮะ แยต ดา ซึก อัน. โอว บอ จอย แตห น็อห เฆ วี หนีม วี เยน ดอ ตู มึห เฆ ดี หน็อะ อึณด็อะ มาเซ.”