1 ปัน ตี อาดาวีด บอ ร็อห ดูอี อีซาเรลัะ โอย หมึณ วี, แดะ เฆ ตัห กาฌูะ โตต. 2 บอ อัน บอ เฆ ดูอี อี โดบ อัน, เฆ บอ เลห แคง มืง บาอาลา อี กอย แคง กาดาย มืง ยูดา ตึอน บอ ฮาว, ต็อห ดี ดึห ฌีดืก เฌาพรา. ฌีดืก ตี, เฆ แตห อัน จืร โดบ ปี จืร เฌาพรา. อัน จืร เฌาพรา อี อึบ โตต ดอน โมยว. โดง กอย อัน เฌา ตี มูห ดี กาแต ราง อามู อามาด เฌาพรา อี จืร เครูบ, อี กอย แดง ฌีดืก ตี. 3 เฆ บอ ดึห ฌีดืก เฌาพรา, ดาง แดง ลักเลา กามาย. เฆ ดึห เลห แคง กาง อาพีนาดาบ อี กอย นา กัว. อาอูฌาฮา บอ อาฮีออ ฆาย มูห ฆอน อาพีนาดาบ ตึอน. ฆาย วี แบน อี แวด ลักเลา กามาย อี ดาง ฌีดืก ตี. 4 อาฮีออ ยี แยต นา อาต ฌีดืก เฌาพรา ตี. 5 อาดาวีด เฆ ดูอี อีซาเรลัะ บอกาเฆลียด บอ โคย กาเซา. เฆ บอ บัห ดีง แบน โมยว แบน โมยว, กัร ฆรึง, บูด เวา, โชห แชณ บอ ฆา แคะ ปี ปึอน เฆ, แตห อึณ ล็อะ น็อห เฌาพรา.

6 ดอ ฌัม เฆ ดี โอ็ง กางน็อห อานาโคน, มามัก บอ ดีปลาด. โคว, อาอูฌาฮา ตึอน บอ ปา ฌีดืก เฌาพรา ตี, โยว อัน โจห. 7 ปัน ตี เฌาพรา บอ รู ดี อาอูฌาฮา. เฌาพรา บอ ดัม หมาบ ดี อัน โกบ แฮะ ปา อัน ฌีดืก อัน. อัน บอ ยัม โคบ ฌีดืก เฌาพรา อู เฌณ.

8 ปาย ตี อาดาวีด อาว ฮู ดาคึย โกบ แตห เฌาพรา อาอูฌาฮา ยัม. โคว, กอ ฌัม อาตึร, โดง ตี แฮะ จืร เพเรดอาอูฌาฮา.^a

9 ซีแง ตึอน อาดาวีด บอ โยว เฌาพรา. อัน บอ ต็อห, “เซ อึณ ปาย ตี, เหมา อึณ ดี ปาย ฌีดืก เฌาพรา ดี ฌัม โดง กอย โอว?” 10 โคว, อัน หณัม ดึห ตัห ฌีดืก เฌาพรา ตี โดง กอย อัน แคง มืง อาดาวีด ตึอน. เฆ วี ฆอด ฮาว ดี กาง อาโอวเบนเอโดม อี มูห ครึร ดูอี ตึอน. 11 วาย อัน ตี ฌีดืก เฌาพรา บอ กอย แคง กาง อาโอวเบนเอโดม แตห อึณ กอ โนะ โอย มาเฆียน. เฌาพรา บอ ม็องการา ดัว ดี อาโอวเบนเอโดม บอ ดี เฆ ดูอี แคง อึณโฮม อัน บอกาเฆลียด.

12 อี บอ วี กาลาง ดี อาดาวีด ต็อห, “เฌาพรา แฮะ ม็องการา แตห ดี อาโอวเบนเอโดม บอ เฆ ดูอี แคง อึณโฮม อัน ดอน อี โกบ แฮะ กอย ฌีดืก เฌาพรา แคง กาง อัน.” แฮะ ฮอต, อาดาวีด บอ ฮาว ดึห ฌีดืก เฌาพรา ดี กาง อาโอวเบนเอโดม ตึอน, วี ดึห ตัห ดี มืง โดง กอย อัน. น็อห อัน บอ ฌอนโฌม บอ โคย.

13 เฆ อี ฆอด ฌีดืก เฌาพรา ตึอน, เฆ บอ ฮาว เดา อึณฌาบ, อาดาวีด บอ ดึห มัก โดว อี ฆลัณ ซีคยา อู โดว, หลู ดี เฌาพรา. 14 อัน บอ ชึบ ซีโตว เอโพด ปี ด็อะ ตา กาตัม ลูย บอ ฆา แคะ ปี ปึอน ฆา อัน, แตห อึณ ล็อะ น็อห เฌาพรา. 15 ปัน ตี อาดาวีด บอ ดูอี อีซาเรลัะ บอกาเฆลียด, เฆ บอ กาโพรม ดี โคย ซีนัน ซีนืง, บูด เวา บอ บัห ดีง, ตัห โดบ ฌีดืก เฌาพรา.

16 ดอ ตัห ฌัม ฌีดืก เฌาพรา แคง มืง อาดาวีด ตึอน, นาง มีคาลัะ อี มูห ฆอน อาซอลู ตึอน กอย บาง กาเดา มาโลห ยอด, บอ ยึร อาดาวีด แฮะ ฆา, แฮะ ลัม นา อาต เฌาพรา. แคง น็อห อัน, อัน ตู โรวเซ อาดาวีด, ทาง อาว กาอาบ อัน โบง ฌึร ตี.

17 เฆ บอ ดึห ฌีดืก เฌาพรา ตึอน, เบลห อูน ซีคยา แคง ทึบ บีก แปะ แฮะ โบง อาดาวีด อาดา ฌีดืก ตี. อาดาวีด บอ หลู อี โดะ ดี เงา บอ หลู ปี หลู อี กอย กาฌูะ โฮม รึม. 18 อาดาวีด แฮะ ฮอต หลู ปี หลู ดอน โมยว, อัน บอ หมาณ เฌาพรา อี อึบ โตต ดอน โมยว แตห อัน ม็องการา แตห ดี เฆ ดูอี บอกาเฆลียด. 19 อัน บอ มึห ปี กาซาง ดี ดูอี เฆ ตึอน ดอน อี. แคง พึง ดูอี อีซาเรลัะ บอ อีบึณ อีมาย, อัน บอ กาซาง คามูน อู วี อู ดีแคลบ, ยัง อู วี อู ดีกลวน บอ เบล มางูน กาฮ็อห อู วี อู ดีแคลบ. แฮะ ฮอต, ดอน อี บอ วี เวณ ดี กาง อัน.

20 วาย ตี อาดาวีด บอ ฮาว ดี กาง อัน, ต็อห ดี ม็องการา แตห ดี เฆ แคง อึณโฮม อัน. ดอ อัน ตี นาง มีคาลัะ อี มูห ฆอน อาซอลู ตึอน, อัน บอ เลห บัร ดี รวห อัน. อัน ต็อห, “อาตึร นี คูนดีคัม ดูอี อีซาเรลัะ แฮะ แตห อี ยึร อาพูง ดังโคว อัน, แฮะ บูต แวน ครึง ปี ตา อัน นา อาต เฆ อี มูห หมาย อัน, บอ อีบึณ บอ อีมาย เฆ แฮะ ยึร. อัน แฮะ แหนน ดูอี อี ตู มึห ซาเร.”

21 อาดาวีด วี กาลาง ดี นาง มีคาลัะ ต็อห, “โอว แฮะ ฆา นา อาต เฌาพรา อี แฮะ ร็อห โอว, แตห โอว กาดาง ฆูณ แม บอ บีนอง วอแว ฆูณ แม. อัน เฌา แฮะ แตห โอว แบน คูนดีคัม อี อึบ ดูอี อาโมยว อัน อี มูห อาโมยว ดูอี อีซาเรลัะ. โคว, โอว ฆา นา อาต เฌาพรา. 22 อาว วัน แคะ ตี. โอว ดี ปีเตียม โอว แดง ตี. นา อาต หมาย อีบึณ ปี กาลาง แม ตี, โอว ยี วี มึห ซาเร.” 23 ปัน ตี นาง มีคาลัะ ตึอน อี มูห ฆอน อาซอลู ตึอน ตู มึห ฆอน กอ ฌัม กัด ยัม อัน.