1 อึณ บอ ปึอน โอย ซีแง, อาดาวีด เฆ ดูอี อี โดบ อัน, เฆ บอ วี ตัห ฌัม ดี มืง ฌีกาลาด. ดอ ตู กอย เฆ, เฆ ดูอี อามาเลก แฮะ ตัห กาโฆห ดี มืง อี กอย นา เตต ตึอน. บอ มืง ฌีกาลาด ตึอน, เฆ แฮะ ปยาต, แฮะ ดึห เงา โดะ กาซึม โตต มืง ตี. 2 เฆ แฮะ เหมต ฮาว บอ อีบึณ เฆ แคง มืง ตึอน, บอ อี เตียะ อี ตาง. เฆ ยี ตู ง็อห. เฆ เหมต ฮาว ปาย ตี.

3 อาดาวีด เฆ ดูอี อี โดบ อัน, ดอ ตัห ฌัม เฆ ดี มืง ฌีกาลาด ตึอน, เฆ บอ ยึร อี แฮะ โดะ มืง เฆ, แฮะ เหมต ฮาว ฆอน อีมาย, ฆอน อีบึณ บอ อีบึณ เฆ.

4 อาดาวีด บอ ดูอี อี โดบ อัน, เฆ บอ ยาม ตาง ตาง. เฆ บอ ยาม กอ ฮู มึห แฮณ ดี ยาม.

5 อีบึณ อาดาวีด อา วี ตึอน มืร แฮะ ฮอต ดึห ฮาว. อี มูห นาง เอฮีนอง อี มูห ดูอี มืง เยจาเรลัะ ตึอน, บอ นาง เอพีเฆลา อี มูห ดูอี ฆาเมลัะ ตึอน, อี ดึอม มูห อีบึณ อานาบาลัะ ตึอน.

6 อาดาวีด แฮะ หณาบ กาเซา ดี น็อห อัน โกบ คราม เฆ ดูอี อี โดบ อัน ดึห มาว วึณ ดี อัน. บอ เฆ แฮะ กลึร, โกบ อี เฮา แฮะ เหมต ฮาว ฆอน อีบึณ บอ ฆอน อีมาย เฆ. มาแล, อาดาวีด วี โหลห เฌาพรา อี มูห เฌาพรา ปี กรึบ อัน, แตห อึณ วี แบน แฮณ ดี น็อห อัน.

7 อาดาวีด บอ กาลาง ดี อาบาทา อี มูห ฆอน อาฮีมาเลก ตึอน. อัน ต็อห, “หมาณ ซีโตว เอโพด แม ตึอน, ดึห ตัห ดี โอว.”

8 อาดาวีด บอ ดีหมอด ดี เฌาพรา ต็อห, “โอว ดี ปึอน คูงครัห โดบ พึง เฆ ตึอน? โอว ดี ครับ เฆ?” เฌาพรา มืร วี ต็อห, “ฮาว โดบ, แม ดี ครับ เฆ อาคัร หมาน. แม ดี วี ปึอน โตต ดอน โมยว.

9 อาดาวีด บอ ดูอี อี โดบ อัน เดา มาย็อห วี ตึอน, เฆ บอ ฮาว ฌัม ดี โรง อึม เบเซา. มัง อี บอ ฆืด กอย ดี ตี.

10 เฆ อาดา อา มาย็อห วี, เฆ แฮะ นูน กาเซา, อาว ฮู จาว กาโลห โรง อึม เบเซา ตึอน. โคว, เฆ บอ ฆืด กอย ดี ตี. อาดาวีด เฆ ดูอี พวน มาย็อห วี, เฆ บอ โดบ คูงครัห อึณปัว.

11 เฆ บอ กาตูณ ดูอี แอฆึบ อู วี, อี กอย โดง ฆลัง. เฆ บอ ดึห ตัห อัน โดง กอย อาดาวีด. เฆ บอ ดัว คามูน ดี อัน. อัน บอ โฮม. เฆ บอ ดัว บอ อึม, แตห อัน เดียง.

12 ดีแคลบ เบล ดีปู อู บลาก, บอ เบล มางูน กาฮ็อห อา ดีแคลบ, เฆ บอ ดัว ดี อัน. อัน แฮะ ฮอต โฮม, อัน บอ วี มึห แฮณ. อาต ตี, แฮะ ปึอน โอย หมึร ดี โอย ซีแง, อัน ตู ปึอน ดี โฮม ดี เดียง มาเซ.

13 อาดาวีด บอ ดีหมอด อัน ต็อห, “แม โดบ อาเซ? แม ตัห นา เหมา?” อัน วี ต็อห, “โอว นี, โอว มูห ดูอี แอฆึบ อี แฮะ กาดูห ดี แบน หมาย ดูอี อามาเลก ตึอน. ดา กาณา โอว แฮะ เบลห แวน โอว. โคว, อาต ตี โอย ซีแง โอว มึห เซา.

14 เย แฮะ กาโฆห นา เตต มืง เคเรซี, อี กอย กาตัด นัมมูกซารา ดี กาแต มืง ยูดา, บอ นา เตต แคง กาดาย มืง ฆาลีบ ตึอน. เย แฮะ โดะ แวน บอ มืง ฌีกาลาด ตึอน.”

15 อาดาวีด วี ดีหมอด อัน ต็อห, “แม ดี แยต โอว โลง โดง กอย พึง เฆ ตี?” อัน วี ต็อห, “แตห แม ดืง ดี เฌาพรา, แกวะ แตห แม ง็อห ยัม โอว, แกวะ แตห แม วี อาบ วีว โอว ดี ดา กาณา โอว. เซ อึณ ปาย ตี โอว ดี แยต แม โลง โดง กอย พึง เฆ ตี.”

16 ปัน ตี ดูอี ตึอน บอ แยต โลง อัน. เฆ บอ ฌัม ดี ตึอน, เฆ ดูอี ตึอน แฮะ งยา โฮม ปี ดี โฮม. เฆ บอ ฆา โดบ. เฆ แฮะ กอย กาลัต ดอน นา ดอน โปละ แดง กาดาย ดี ตึอน. โคว, โดว ซัดดาวา, โกรวกราม แปะ แฮะ ปึอน เฆ มืร, แฮะ กืน กาเซา. เฆ แฮะ พาด ตัห โกรว ตี แคง มืง ดูอี พีลีที บอ แคง มืง ยูดา.

17 อาดาวีด บอ กาโฆห ดี เฆ. ซีณ บา ดี อับ ตี, กอ วี ฌัม บา ดี อับ แคหณา, ดูอี เฆ ตึอน อาว ฮู ลอด คอ อู วี. อึณ ยี มึห พวน มาย็อห วี, เฆ อี มูห ฆอน ดีรอย อี ป็อะ มังปร็อง กาฮาต. มี เฆ แฮะ ฮาว เตา, แฮะ ลอด.

18 อาดาวีด บอ วี ปึอน วีว โตต ดอน โมยว แปะ แฮะ ดึห ฮาว เฆ ตึอน. อีบึณ อัน อา วี ตึอน มืร, อัน แฮะ วี ปึอน ตัห.

19 ดูอี ดี ตาง, ฆอน ดีรอย, ฆอน อีบึณ, ฆอน อีมาย บอ โกรวกราม แปะ แฮะ พาด ฮาว เฆ ตึอน, อาว ฮู มึห มาเซ ปี ตู ปึอน เฆ. อาดาวีด แฮะ ฮอต วี ปึอน โตต ดอน โมยว.

20 อาดาวีด บอ แวด บอ พึง มาบู, พึง มามัก ดูอี อามาเลก เฆ ตึอน, แตห เฆ แยต นา อาต พึง มาบู บอ พึง มามัก เฆ. อาดาวีด ต็อห, “อานี มูห โกรวกราม ปี พาด ปึอน โอว ดี เฆ.”

21 อาดาวีด แฮะ วี ตัห ฌัม โดง กอย เฆ ดูอี อาดา อา มาย็อห วี, อี แฮะ นูน อาว ฮู จาว ฮาว, อี แฮะ ฆืด กอย ดี โรง เบเซา ตึอน. เฆ อี ฆืด ตึอน บอ กาโพรม ดี ฮาว รวห อาดาวีด เฆ ดูอี อี แฮะ โดบ ฮาว อัน ตึอน. ดอ ตัห ฌัม กาตัด อาดาวีด ดี เฆ, อัน บอ กาลาง โฆรห ดาคึย ดี เฆ.

22 ดอ อัน ตี กาแต เฆ ดูอี อี โดบ ฮาว อาดาวีด ตึอน, เฆ อี มูห ดูอี ฮาย, ดูอี อี วี ดี พาด โกรว อี ตึอน, เฆ กาลาง ต็อห, “เฆ อี ตู ฮาว โดบ เอ, เฆ ตู ปึอน โกรวกราม ปี ดึห ตัห เอ. แตห เฆ ดึห เลห ฮาว มี อีบึณ, ฆอน วา เฆ.”

23 อาดาวีด บอ ซูงพยาด ต็อห, “อึย เบ บีนอง ดอน อี, เบ ตู ปึอน โบง ปาย ตี. โกรวกราม แปะ แฮะ จอย เฌาพรา แตห เอ วี ดึห วีว, เบ ตู ปึอน ดึห มี ดี เบ. เฌาพรา แฮะ ร็อก กาเว เอ, วี แตห เอ แป ดูอี อี แฮะ กาโฆห ดี เอ.

24 แกวะ แตห อาเซ โทม โฆรห ตี. บอ เบ อี แฮะ กาโฆห บอ พึง เฆ อี บัร โกรวกราม เอ ดี ปึอน การัม ดอน อี.”

25 ซีณ ซีแง ตี, กอ ฌัม อาตึร นี, เฆ ดูอี อีซาเรลัะ โดบ ทูงฆยาม เฆ ตี.

26 อาดาวีด แฮะ วี ฌัม มืง ฌีกาลาด, อัน บอ ดึห โกรวกราม แปะ แฮะ พาด ตัห เฆ ตึอน มัง โมยว, ดัว ฮาว ดี ดูอี อี แบน ดา ตาง แคง มืง ยูดา อี มูห ฆึก อัน. อัน บอ ต็อห, “เบ ยอด, คอซอง อาดา เบ นี, อึณ มูห โกรว ปี พาด ตัห โอว ดี รันซู เฌาพรา.”

27 อัน ดัว คอซอง ตี ดี เฆ อี กอย แคง มืง เบดาเอน บอ แคง มืง ราโมด นา เตต ตึอน, 28 มืง ยาตีรา, มืง อารอ, มืง ซีพามูด, มืง เอซาตามอ, 29 มืง ราคาลัะ, มืง อี กอย กาแต เยราแมเอน บอ มืง โดง กอย ดูอี อากีนี, 30 มืง ฮอมัะ, มืง บาอาซาน, มืง อาทัก, 31 มืง เฮโบรว บอ โดง มูห มืง เฆ เรา อี มูห โดง แฮะ ดึอม เครียง อาดาวีด บอ เฆ ดูอี อี โดบ อัน. เฆ ดา ตาง แคง มืง เฆ ตี, เฆ บอกาเฆลียด แฮะ ปึอน คอซอง ปี ตึย อาดาวีด.