1 ดอ แฮะ ฮอต กาโลห เฆ ดูอี บอกาเฆลียด ดี อึม แบลง ยอดาน ตึอน, เฌาพรา วี กาลาง ดี อาโยวซูอา ต็อห, 2 “แตห แม ร็อห ดูอี ฆึร ดี อา วี กาแต เฆ ดูอี อีซาเรลัะ, ร็อห ดอน ครึร อู ครึร อู วี. 3 จัร เฆ ดึห มาว ฆึร ดี อา โบ็ง กาแต อึม ยอดาน โดง จ็อง เฆ ดา อี หลู ดี เฌาพรา ตึอน. แตห เฆ ฆอด ฮาว มาว ตี, ฮาว อูน โดง ดี คยัะ เบ หมึร อาตึร นี.”

4 แฮะ ฮอต, อาโยวซูอา วี แดะ เฆ ดูอี ฆึร ดี อา วี แปะ แฮะ ร็อห อูน อัน ตึอน, อี มูห อู ครึร อู วี. 5 อัน ต็อห ดี เฆ, “แตห เบ ลึบ โลง แคง แบลง ตี, วี ฮาว นา ดอย ฌีดืก เฌาพรา ปี กรึบ เบ. แตห เบ ดึห ดี ฆอด มาว อู วี อู โบ็ง อาดา ดูอี อีซาเรลัะ ดอน ครึร. 6 มาว ตี, แตห อึณ แบน อี ดัว ซาดีก ดี เบ, แตห เบ โหลห แปะ แฮะ ดึอม โบง เฌาพรา. นา อาต ฮาว, เซ หลูกหลาน เบ บอ ดีหมอด เบ ต็อห, ‘มาว นี มูห ลอง มาเซ?’ เซ เฆ บอ ดีหมอด ปาย ตี 7 เบ โลว ต็อห ดี เฆ, ‘ดอ ดึห เย ฌีดืก เฌาพรา, กาโลห อึม แบลง ยอดาน นี, อึม นี แฮะ ฮีด อู เฌณ.’ ปาย ตี มาว เฆ นี แบน อี ดัว ซาดีก, แตห เฆ ดูอี อีซาเรลัะ โหลห เซเซ อี แฮะ โบว แบน ดี นี.”

8 เฆ ดูอี อีซาเรลัะ มืร โบง โดบ ปี กาลาง เฌาพรา ดี อาโยวซูอา ตี. เฆ มืร ดึห มาว ฆึร ดี อา โบ็ง กาแต แบลง อึม ยอดาน ตึอน, แตห อึณ โดบ ครึร ดูอี อีซาเรลัะ ฆึร ดี อา โมยว. เฆ มืร ดึห ฮาว เบลห กาฌูะ อูน โดง คยัะ เฆ. 9 อาโยวซูอา วี ดึห มาว ฆึร ดี อา โบ็ง ตี, วี เบลห กาจ็อง กาแต อึม โดง แณต เฆ ดา อี หลู ดี เฌาพรา อี กาฆอด ฌีดืก เฌาพรา ตึอน. มาว เฆ ตี ซี กอย ดี ตี กอ ฌัม อาตึร นี.

10 เฆ ดา อี หลู ดี เฌาพรา อี แฮะ กาฆอด ฌีดืก เฌาพรา, เฆ แฮะ จ็อง กาแต แบลง อึม ยอดาน ตี, แตห อึณ กอ ฮอต โตต แปะ แฮะ กาลาง เฌาพรา ดี อาโยวซูอา ลอง ปี ดี โลว วี กาลาง อัน ดี เฆ ดูอี กืน. ลอง อัน ตี อึณ บอ โดบ ปี กาลาง อูน อาโมวแซ ดี อาโยวซูอา. ปาย ตี เฆ ดูอี กืน แฮะ ปีครัน เฆ ดี กาโลห อึม ตี ดอน อี. 11 เฆ ดูอี บอกาเฆลียด แฮะ ฮอต กาโลห ฮาว ปวน โตต, ฌีดืก เฌาพรา บอ เฆ ดา อี หลู ดี เฌาพรา บอ วี ฮาว, แตห บอ เฆ ฌัม บลาก นา ดอย, แตห เฆ ดูอี กืน ปึอน ดี ยึร. 12 อี มูห ครึร อารูเบน, ครึร อาฆัด บอ ครึร อามานาเซ อาดา อู กาแต อี โฆ็ง ครึง กาโฆห ตึอน, เฆ บอ กาโลห แยต ดี อาต ดูอี อีซาเรลัะ, แตห อึณ โดบ ปี ดึอม กาลาง อูน อาโมวแซ. 13 เฆ ดา ซึก อี แฮะ แรน โดว บอ โฆ็ง ครึง กาโฆห, อี แฮะ กาโลห, เฆ กอย พวน หมึณ วี. เฆ แฮะ กาโลห ดี อาต เฌาพรา, ฌัม แคง ฆลัง นา เรต มืง เยรีโคว.

14 ซีแง ตี, เฌาพรา แฮะ แตห เฆ ดูอี อีซาเรลัะ รีมาด อาโยวซูอา, แตห อัน มึห อาพูง ดังโคว ตาง. เฆ มืร โรวเซ อัน บอ โจว อัน, ปี ดอ โรวเซ เฆ อาโมวแซ ตึอน.

15 ดอ อัน ตี เฌาพรา วี กาลาง ดี อาโยวซูอา ต็อห, 16 “แตห แม จัร เฆ ดา อี หลู ดี เฌาพรา อี กาฆอด ฌีดืก เฌาพรา ตึอน, แตห เฆ เลห แคง อึม แบลง ยอดาน ตี.”

17 อาโยวซูอา มืร กาลาง ดี เฆ ดา อี หลู ดี เฌาพรา อู เฌณ ต็อห, “แตห เบ เลห ตัห แคง อึม ตี.”

18 ดอ แฮะ โฮะ เฆ ดา อี หลู ดี เฌาพรา อี กาฆอด ฌีดืก เฌาพรา, ฌัม ดี บาง แบลง อึม แดง กาดาย เฮณ ตี, ดอ อัน ตี อู เฌณ, อึม มืร วี แหล ตัห กอ โนะ ลูต, ฌัม ดี โคบ อัน ปี บรีม.

19 เฆ ดูอี อีซาเรลัะ แฮะ กาโลห อึม แบลง ยอดาน ตี ดอ ฌัม มาเฆียน ดอ โฆว, ซีแง ฆึร. เฆ มืร เลห โดง กอย เฆ โคบ บาง อึม แบลง ยอดาน, วี คยัะ ดี โดง จืร ฆีลัะฆา อี กอย ดี กาอูน กาดาย นา เลห ซีแง มืง เยรีโคว ตึอน. 20 มาว ฆึร ดี อา โบ็ง ปี ดึห เลห เฆ แคง แบลง อึม ยอดาน ตึอน, อาโยวซูอา วี กาจ็อง อูน ดี โดง จืร ฆีลัะฆา ตี. 21 อัน วี กาลาง อูน ดี เฆ ดูอี อีซาเรลัะ ต็อห, “นา อาต นี ฮาว, เซ หลูกหลาน เบ บอ ดีหมอด ต็อห, ‘มาว นี, อึณ มูห ลอง มาเซ?’ 22 เบ วี โลว กาลาง ดี เฆ ต็อห, ‘ดอ กาโลห เฆ ดูอี อีซาเรลัะ ดี อึม แบลง ยอดาน นี, เฆ แฮะ ฮาว แดง กาดาย เฮณ. 23 โคว, เฌาพรา ปี กรึบ เบ แฮะ โบง แตห อึม แบลง ยอดาน นี ฮีด, แตห เย ดอน อี กอ ปึอน ดี กาโลห ซีคยา ฮอต โตต. อึณ แฮะ ปี ดอ แฮะ โบง อัน เฌา แตห อึม ดีโหนง เรณ ฮีด อาดา เอ ตึอน. 24 ปาย ตี แตห ดูอี แดง กาดาย นี นับ บอกาเฆลียด แคะ ตาง อาพูง ดังโคว เฌาพรา, แตห บอ เบ นับ ดี โรวเซ เฌาพรา ปี กรึบ เบ เซเซ.’”