1 อาโมวแซ วี ต็อห, “อานี มูห ดารา ปี โลว โดบ เบ แคง มืง ปี ดี ดัว เฌาพรา ดี เบ. อัน บอ มูห เฌาพรา ปี กรึบ เฆ ฆูณ ดัง เบ. โจว กอย เบ แดง กาดาย นี, เบ บอ โลว โบง โดบ ดารา นี. 2 แคง มืง ปี ดี ฮาว ดึห เบ ตี, เบ โลว ปยาต แวน โตต โดง กรึบ เฆ ดี เฌา แบน โมยว แบน โมยว. อึณ บอ มูห แดง นอน จา บอ แดง นอน ดีเตียม, อึณ บอ มูห ดี ดัง เฮ ตาง, เบ โลว ปยาต แวน โตต ดอน โปละ. 3 เบ โลว ปยาต แวน บอ กาโช็ง หลู เฆ บอกาเฆลียด. เบ บอ โลว มัห กาลาต มาว โดง กรึบ เฆ, บอ ดึห ร็อง นาง กานัม อี จืร เอซูรา, โดะ แคง เงา บอ ฆัร เกห อารึบ ราง ดอน โมยว, แกวะ แตห อาเซ ซี นัมโหลห โดง กอย เฆ ตี ดอ เหมา.

4 เฌาพรา ปี กรึบ เบ, เบ ตู ปึอน กรึบ ปี เฆ แฮะ กรึบ เฌา แบน โมยว แบน โมยว. 5 แคง กาดาย มืง ดี ฮาว กอย เบ ดอน ครึร, เฌาพรา ดี บอ ร็อห อู โปละ, แตห อึณ แบน โดง กอย อัน. แตห เบ ปึอน ดี กรึบ อัน ดี ตี. 6 โดง ตี เบ โลว ดึห ตัห ปี ดี หลู เบ ดอน โมยว. อึณ บอ มูห ปี หลู อี โดะ ดี เงา, ปี หลู ฆึร บูน อู บูน, ปี หลู แบน โมยว แบน โมยว แปะ แฮะ กาแซณ เบ ดี หลู, ปี หลู ปี ซี หลู เบ บอ ปี หลู อี มูห ฆอน ฆีณ โดว อาโล็ง แคง พึง มาบู เฆ มามัก เบ. เบ โลว ดึห ตัห หลู โตต ดี ตี. 7 ดี ตี บอ เบ บอ ดูอี แคง อึณโฮม เบ, เบ ปึอน ดี กอย ดี อาต เฌาพรา บอ โฮม ดาคึย, โฮม โบยว โกบ แฮะ ม็องการา ดัว เฌาพรา ดี ปี รัณ เบ.

8 ปัน อัน ตี เบ ตู ปึอน โบง ปี ปี โบง เอ อาตึร นี. เอ ซี โบง โดบ ปี อึง เอ ราง อาเซ ราง อัน. 9 โคว, เบ หณัม ฌัม โดง ดี ปึอน เบ ดีเหลา. เบ มืร หณัม ปึอน คาฆูน ปี ต็อห เฌาพรา ดี ดัว ดี เบ. 10 เซ เบ แฮะ ฮอต กาโลห อึม แบลง ยอดาน, เบ มืร แฮะ ฮาว กอย แคง มืง แปะ แฮะ ดัว เฌาพรา แตห อึณ แบน คาฆูน ดี เบ. เบ มืร แฮะ กอย ดาคึย, อาว ฮู มึห รันซู, อาว ฮู มึห อาเพ อาเร มาเซ. 11 ปัน อัน ตี เฌาพรา อี มูห เฌาพรา ปี กรึบ เบ, อัน ดี ร็อห อู โปละ, แตห อึณ แบน โดง ดี ตัห กรึบ เบ ดี อัน. ดี ตี เบ โลว ดึห ตัห ปี ดึอม กาลาง โอว ดี เบ อี มูห ปี ดี หลู อี โดะ ดี เงา, ปี ดี หลู ฆึร บูน อู บูน, บอ ปี ดี หลู แปะ แฮะ กาแซณ เบ ดี หลู. 12 ดี ตี เบ ดี บอ โบยว ดาคึย ดี อาต เฌาพรา. บอ เบ บอ หลูกหลาน เบ บอ หมาย เบ บอ เฆ ดูอี อาเลวี อี กอย โดบ เบ แคง มืง เบ, เฆ อี ตู ปึอน คาฆูน ปี ปึอน เบ, เบ บอกาเฆลียด ดี โบยว ดาคึย ปาย ตี. 13 เบ ยี โลว ซาดีก, เบ ตู ปึอน หลู ปี ดี หลู โดง ซี หลู เบ. 14 เฌาพรา ดี ร็อห อู โปละ แคง กาดาย แคง ครึร เบ อู ครึร, แตห อึณ แบน โดง ดี หลู เบ ดี อัน, แตห เบ หลู ปี ดี หลู เบ มี อู โปละ ตี. ปี ดี หลู เบ อี โดะ ดี เงา, บอ ปี ดี หลู อาโมยว เฮา แคะ ปี ดึอม กาลาง โอว ดี เบ, เบ แฮะ ปึอน หลู โตต ดอน โมยว ดี ตี.

15 ปี บอ แฮะ ปาย ตี มืร, เบ ยี แฮะ ปึอน ง็อห โดว ซัดดาวา เบ แคง มืง เบ ดอน โปละ บอ โฮม ยัง โดว ตี แคะ ซี โฮม เบ, แตห อึณ บอ ปี เบ โฮม ยัง มังเฆียห เฆ ยัง มาฌัะ. บอ เฆ อี ซีงา โดบ ปี ดัม ดารา บอ เฆ อี ตู ซีงา โดบ ปี ดัม ดารา, เฆ ดอน อี แฮะ ปึอน โฮม ยัง ตี, แตห อึณ โดบ แปะ แฮะ ม็องการา ดัว เฌาพรา ดี เบ. 16 มาแล, เบ ยี ตู ปึอน โฮม หนาม อัน. เบ โลว ฮูห แวน แดง กาดาย, แตห อึณ ปี เบ ฮูห แวน อึม. 17 โกรว แปะ แฮะ ฮอต หลู ดี เฌาพรา, อาว ปึอน โฮม โดง กอย เบ. อึณ บอ มูห โหงว เฆ เบล มางูน บอ นามัน อี มูห ปี หลู ฆึร บูน อู บูน บอ มาบู เฆ มามัก อี มูห ฆอน ฆีณ โดว อาโล็ง บอ มูห ปี กาแซณ เบ ดี หลู บอ ปี ซี หลู เบ ราง เบ บอ ปี หลู แบน โมยว แบน โมยว, เบ ตู ปึอน โฮม โดง กอย เบ. 18 ปี หลู เบ ฌึร ตี ดอน โมยว เบ ยี โลว โฮม ดี อาต เฌาพรา โดง ดี ร็อห เฌาพรา. บอ เบ บอ หลูกหลาน เบ บอ หมาย เบ บอ เฆ ดูอี อาเลวี, เบ บอกาเฆลียด แฮะ ปึอน โฮม รึม, โฮม ดาคึย โดง ตี. 19 เบ ยี โลว ซาดีก, แกวะ แตห เบ ปีว เฆ ดูอี อาเลวี โจว กอย เบ แคง มืง ตี.

20 เซ เฌาพรา ปี กรึบ เบ ฮี ปีว็อห ปีเลห กาอูน กาดาย เบ, เซ อึณ แฮะ โดบ แปะ แฮะ ดึอม กาแซณ อัน ดี เบ, เซ เบ ปี วี ต็อห, ‘โอว ซี โฮม ยัง,’ โกบ ม็อก กาเซา เบ ดี ยัง, แตห เบ โฮม แคะ ปี ซี โฮม เบ. 21 เซ เฌาพรา แฮะ ร็อห โดง ดี กรึบ เบ ดี อัน, เซ อึณ แฮะ กาโต็ง กาเซา ดี โดง กอย เบ, เบ แฮะ ปึอน ดึห มาบู เฆ มามัก แปะ แฮะ ม็องการา ดัว เฌาพรา ดี เบ, วี ง็อห โฮม แคง มืง เบ, แตห อึณ โดบ ปี กาลาง โอว ดี เบ. 22 แตห เบ โฮม ปี เบ โฮม ยัง มังเฆียห เฆ ยัง มาฌัะ. บอ เฆ อี ซีงา โดบ ปี ดัม ดารา บอ เฆ อี ตู ซีงา โดบ ปี ดัม ดารา แฮะ ปึอน โฮม ดอน อี. 23 มาแล, เบ แกวะ โฮม หนาม อัน. โคว, อาซาก กอย แคง หนาม. อาว ปึอน โฮม อาซาก โดบ ยัง. 24 เบ แกวะ โฮม หนาม. เบ โลว ฮูห แวน แดง กาดาย, แตห อึณ ปี เบ ฮูห แวน อึม. 25 เซ เบ บอ โทม ดารา ตี, อึณ ดี บอ ล็อะ น็อห เฌาพรา. อึณ ดี บอ แบน นา บอด นา หมึอม ดี เบ บอ ดี หลูกหลาน เบ.

26 แตห เบ บอ ดึห ปี ดี หลู เบ บอ แปะ แฮะ กาแซณ เบ ดี หลู, ฮาว โดง ร็อห เฌาพรา, แตห เบ ปึอน ดี กรึบ อัน. 27 แตห เบ หลู ปี ดี หลู อี โดะ ดี เงา แดง กาโช็ง หลู ดี เฌาพรา อี มูห เฌาพรา ปี กรึบ เบ. บอ ยัง บอ หนาม แตห เบ หลู แดง กาโช็ง ตี. หนาม เบ ยี โลว ฮูห โคบ กาโช็ง ตี. อี มูห ยัง, เบ ปึอน โฮม. 28 แตห เบ โฆยวฆยา ดี โดบ ปี ดัม โอว ดี เบ ตี ดอน โมยว. แตห อึณ บอ แบน นา บอด นา หมึอม ดี เบ บอ ดี หลูกหลาน เบ เซเซ. โคว, เบ ดี โบง อี มูห อี หมาน อี ล็อะ น็อห เฌาพรา ปี กรึบ เบ.

29 เฌาพรา อี มูห เฌาพรา ปี กรึบ เบ, อัน ดี บอ ปยาต แวน เฆ ดูอี อี กอย แคง มืง โดง ดี ฮาว ดึห เบ ตี. เบ มืร ดี บอ ปึอน ดี อึบ ดี บึง มืง ตี. 30 วาย แฮะ ฮอต เตา ดูอี เฆ ตี ดี อาต เบ, วาย แฮะ กอย ดาคึย เบ แคง มืง เฆ, เบ แกวะ วี ดีหมอด ลอง เฌา ปี กรึบ เฆ. ลอง อัน ตี, อึณ ดี วี แบน ปี ยอต เฆ คืม ดี เบ. อาว โลว ดีหมอด ต็อห, ‘ดูอี เฆ นี, เหมา เฆ ปาย ดี กรึบ เฌาพรา เฆ? ซอ ซี เทว ดี ณึง เฆ.’ อาว ปึอน โบง ปาย ตี ดอ เหมา. 31 แกวะ แตห เบ กรึบ เฌาพรา ปี เฆ กรึบ เฌา เฆ. โคว, เฆ โบง แบน โมยว แบน โมยว ปี กาอีห บอ ปี ฌ็อง เฌาพรา. เฆ บอ นับ ดี ดึห ฆอน อีบึณ บอ ฆอน อีมาย เฆ, โดะ แคง เงา, หลู ดี เฌา ปี กรึบ เฆ.

32 แตห เบ โบง โดบ ซีคยา แคะ ปี กาลาง โอว ดี เบ นี. แดง ตี อาว โลว วี ปัว. บอ แคะ ตี อาว โลว ปีโยม.”