1 เฆ ดูอี อีซาเรลัะ ปี วี กาโทะ ฮาว กอย ดี ฆลัง แคง มืง โมวอาบ อี กอย นา ดอย แบลง อึม ยอดาน อี กอย โคบ มืง เยรีโคว.

2 คูนดีคัม อาบาลาก อี มูห ฆอน อาจีพอ อี อึบ มืง โมวอาบ, อัน บอ ยึร ลอง แปะ แฮะ โบง เฆ ดูอี อีซาเรลัะ ดี ดูอี อาโมวรีด. 3 บอ อัน บอ ดูอี แคง มืง อัน ตี, เฆ บอ โยว กาเซา โกบ ดูอี อีซาเรลัะ แฮะ กืน กาเซา.

4 เฆ ดูอี โมวอาบ บอ วี กาลาง ดี เฆ ดา ตาง อี อึบ มืง มีดีอาน ต็อห, “ดูอี พึง กืน พึง ตาง ดี บอ ตัห ปยาต โตต โคบ โดง กอย เอ นี ดอน บลาก. เฆ ดี บอ ปี มามัก ตัห โฮม เปต แคง โดง นา.” อาคราว ดอ อัน ตี อึณ มูห คูนดีคัม อาบาลาก อี มูห ฆอน อาจีพอ ตี อี อึบ มืง โมวอาบ.

5 อัน บอ วี จัร ดาลาม อัน ฮาว โดง กอย อาบาลาอัม อี มูห ฆอน อาปอซอ อี กอย ดี มืง เบซอ. มืง เบซอ ตี บอ กอย โคบ แบลง อึม อูพาราด โดง กอย เฆ ดูอี อาเมา. อัน แตห เฆ แดะ ตัห อาบาลาอัม บอ กาลาง ดี อัน ต็อห, “ดอ ตี นี, อึณ แฮะ มึห ดูอี อาดา อู โมยว, เฆ แฮะ เลห ตัห แคง มืง แอฆึบ, แฮะ ปลึก บอ กาดาย นี. เฆ แฮะ วี ตัห กอย โคบ โอว. 6 เฆ แฮะ มึห โปลม, มึห แฮณ หลึอม โอว. โอว หมาณ, แตห แม ตัห ดืง เฆ กาดาง โอว. เซ แม โบง ปาย ตี โอว ดี บอ กาโฆห แป เฆ, โอว ดี บอ ปึอน ดี โฮว เตา เฆ ตัะ มืง โอว นี. โอว แฮะ นับ, เซ แม ม็องการา ดัว ดี อาเซ, อัน ดี ปึอน นา หมึอม. เซ แม วี ดืง วี เหมา, อัน โลว คัม โฆรห ดืง ตี.”

7 ปาย ตี เฆ ดา ตาง แคง มืง โมวอาบ บอ ดา ตาง แคง มืง มีดีอาน, เฆ บอ ฮาว โดง กอย อาบาลาอัม. เฆ บอ ดึห ฮาว บอ คอซอง, อี มูห รูห ปี กาลาง ดา เบดาง. เฆ บอ กาลาง โฆรห ปี ต็อห คูนดีคัม อาบาลาก ตึอน ดี อัน.

8 อาบาลาอัม วี ต็อห ดี เฆ, “แตห เบ ตัม ดี นี อาดา คอ อู หมึร. แคหณา โอว ดี วี กาลาง ดี เบ ปี ต็อห เฌาพรา ดี โอว.” ปาย ตี เฆ ดา ตาง แคง มืง โมวอาบ ตึอน, เฆ บอ ตัม โดง กอย อาบาลาอัม ตี.

9 เฌาพรา วี ดีหมอด อาบาลาอัม ต็อห, “ดูอี อี ตัห โดง กอย แม ตี, เฆ ตัห โกบ มาเซ?”

10 อาบาลาอัม วี ต็อห, “คูนดีคัม อาบาลาก อี อึบ มืง โมวอาบ, อัน แฮะ จัร ดูอี เฆ นี ตัห กาลาง ดี โอว ต็อห, 11 ‘อึณ แฮะ มึห ดูอี อู โมยว, เฆ แฮะ เลห แคง มืง แอฆึบ, แฮะ ตัห ปลึก โตต กาดาย นี. โอว หมาณ, แตห แม ดืง ดูอี เฆ ตี, แตห โอว กาโฆห แป เฆ, แตห โอว ปึอน ดี โฮว เตา ดูอี เฆ ตี ตัะ มืง โอว นี.’”

12 เฌาพรา วี ต็อห ดี อาบาลาอัม, “แม ตู ปึอน ฮาว โดบ เฆ. แม ตู ปึอน ดืง, ตู ปึอน ต็อห มาเซ ดี ดูอี เฆ ตี. เฆ มูห ดูอี แปะ แฮะ ม็องการา ดัว โอว.”

13 บอ ฌัม ปา แคหณา ซีณวัห, อาบาลาอัม บอ ยีต, กาลาง ดี เฆ ดา ตาง คูนดีคัม อาบาลาก ตึอน ต็อห, “แตห เบ วี วีว ดี มืง เบ. เฌาพรา ตู แตห โอว ฮาว รึม โดบ เบ.”

14 ดา ตาง เฆ ตี บอ วี วีว, กาลาง ดี คูนดีคัม ลอง อาบาลาอัม ตู แบน ตัห โดบ เฆ.

15 แฮะ ฮอต, คูนดีคัม อาบาลาก ปี วี จัร ดูอี อัน ปอ อู พึง ฮาว, แตห เฆ กืน หลึอม บรีม, วี จัร เฆ อี มูห ดา ตาง อี มึห ปวน หลึอม เฆ พึง อาต ตึอน, แตห เฆ วี ฮาว. 16 เฆ บอ วี ฮาว, ตัห ฌัม โดง กอย อาบาลาอัม, กาลาง โฆรห ปี จัร คูนดีคัม เฆ กาลาง. เฆ ต็อห, “คูนดีคัม อาบาลาก หมาณ, แกวะ แตห อึณ มึห มาเซ อี รัน อี พยาก แม, อี โบง แกวะ แตห แม ปึอน ดี ฮาว โดง กอย โอว. 17 โอว ดี ดัว กืน รูห ดี แม. แม หมาณ แคะ เหมา, โอว ดี ดัว. แตห แม ดืง แล ดูอี อาโมยว ตี กาดาง โอว.”

18 อาบาลาอัม วี ต็อห ดี เฆ, “เซ คูนดีคัม ปี บอ ดัว รึอน เฆ ครีว ดี โอว, แตห อึณ กอ โนะ แคง โฮว อัน มืร, โอว ตู ปึอน หลึร โฆรห เฌาพรา ปี กรึบ โอว. ปี บอ มูห อี อาเร เตียะ อาเร ตาง, โอว ตู ปึอน โบง ดอ เหมา. 19 เซ อึณ ปาย ตี หมึร อาตึร แตห บอ เบ ตัม ดี นี, แตห โอว บัร ดี โทม ปี ดี กาลาง เฌาพรา ดี โอว ปอ อึณ ปัว, แตห โอว นับ, โยว เฌาพรา ดี ต็อห มาเซ.”

20 บอ ฌัม แคง หมึร, เฌาพรา วี ต็อห ดี อาบาลาอัม, “เซ ดูอี เฆ ตี บอ ตู จู ดี แดะ แม, แตห แม ฮาว โดบ เฆ. มาแล, แตห แม โบง มี แคะ ปี กาลาง โอว ดี แม.”

21 บอ ฌัม ปา แคหณา ซีณวัห, อาบาลาอัม บอ แรน กอบ มาลา อัน, บอ ฮาว โดบ เฆ อามู อามาด คูนดีคัม อี อึบ มืง โมวอาบ ตึอน. 22 ปาย ตี เฌาพรา บอ รู กาเซา ดี อาบาลาอัม โกบ แฮะ ฮาว อัน โดบ เฆ ตึอน. อัน มืร ป็อะ มาลา อัน. บอ แดเจณ อัน อา วี แฮะ ฮาว โดบ อัน. ดอ อัน ตี อามู อามาด เฌาพรา บอ จ็อง กาแต อึณเตณ, บัร ดี แร อึณเตณ อัน. 23 มาลา อัน ตึอน บอ ยึร, อามู อามาด เฌาพรา แฮะ ทอด มาปัวะ ลาง, บัร กาแต อึณเตณ, อัน บอ วี วัห ฮาว แคง โดง นา. อาบาลาอัม บอ มัห มาลา อัน, แตห อัน วี ฮาว โดบ อึณเตณ.

24 แฮะ ฮอต, อามู อามาด เฌาพรา ปี วี ตัห จ็อง กาแต อึณเตณ โดง กาเคียะ, กาซืร มึห โล็ง มาน มางูน บอ อา บลาก อึณเตณ. 25 มาลา อัน ตี, แฮะ วี ยึร อามู อามาด เฌาพรา ปอ อู เฌณ, อัน บอ แตห โดว อัน ฮาว ทีะ ดี โล็ง อาดา อู บลาก, แตห เปลา อาบาลาอัม ทีบ ดี โล็ง ตี. ปาย ตี อาบาลาอัม ปี วี มัห มาลา อัน ตี ปอ อู เฌณ.

26 แฮะ ฮอต, อามู อามาด เฌาพรา ตึอน ปี วี กาโลห แยต นา อาต, ปี วี ฮาว จ็อง โดง กาเคียะ กาเซา, แกวะ แตห อึณ ซี มึห นา ดี วัห บลาก เหมา. 27 ดอ วี ยึร มาลา อามู อามาด เฌาพรา คา นี, อัน บอ กาดูห ดี อีด กาตับ ดี กาดาย. ปาย ตี อาบาลาอัม บอ รู กาเซา บอ ดึห อึณกรวน อัน, มัห มาลา อัน ตึอน. 28 แฮะ ฮอต ปาย ตี เฌาพรา บอ โบง แตห มาลา อัน นับ ดี กาลาง โฆรห, บอ ต็อห ดี อัน, “โอว แฮะ โบง มาเซ ดี แม, แตห แม มัห โอว กอ โนะ โอย เฌณ?”

29 อาบาลาอัม วี ต็อห ดี มาลา อัน ตี, “แม นับ ดี ณ็อะ โอว. โอว กาปรา แตห โอว มึห ดี โฆ็ง มาปัวะ ลาง, แตห โอว ง็อห แตห แม ยัม ดอ ตี นี.”

30 มาลา ตึอน วี ต็อห ดี อาบาลาอัม, “โอว แฮะ มูห มาลา ปี ดึอม ป็อะ แม เซเซ กอ ฌัม อาตึร นี. โอว แฮะ ดึอม มึห ดี โบง ดี แม ปาย นี?” อัน วี ต็อห, “อาว ดึอม มึห.”

31 แฮะ ฮอต, เฌาพรา วี แตห อาบาลาอัม ยึร อามู อามาด เฌาพรา แฮะ โฆ็ง มาปัวะ ลาง, จ็อง กาแต อึณเตณ. ปาย ตี อาบาลาอัม บอ มูด ฆึบ ดี กาดาย อู เฌณ.

32 อามู อามาด เฌาพรา วี ต็อห ดี อัน, “เหมา อึณ ปาย ปี มัห แม มาลา แม กอ โนะ โอย เฌณ? โอว แฮะ ตัห แคร แม, ตู ซี แตห แม เลห อึณเตณ คา นี. มาแล, แม ยี แนะ อี ซี โบง ปี ตู อึง โอว. 33 มาลา แม ตี, อัน แฮะ ยึร โอว, อัน แฮะ วัห โอว บอ โอย เฌณ. เซ อัน ตู วัห โอว, โอว แฮะ ฮอต ง็อห ยัม แม. มี มาลา แม ตี ดี ลอด ยัม.”

34 อาบาลาอัม วี ต็อห, “อึร, โอว แฮะ ฮอต กาลึบ. โอว มืร ตู นับ, อึณ มูห แม เฌา อี แร อึณเตณ โอว. ดอ ตี นี, โดง ดี ฮาว โอว ตี, เซ อึณ ตู หมึอม ฮาว, โอว ดี วี วีว นา ปัน.” 35 มาแล, อามู อามาด เฌาพรา วี ต็อห ดี อัน, “แตห แม ฮาว โดบ ดูอี เฆ ตี. มาแล, แม โลว กาลาง มี แคะ ปี จัร โอว แม กาลาง.” แฮะ ฮอต, อาบาลาอัม บอ ฮาว โดบ เฆ.

36 คูนดีคัม อาบาลาก บอ ยึร ลอง อาบาลาอัม แฮะ ตัห, อัน บอ ฮาว บัร ดี รวห อึณเตณ อาบาลาอัม ดี มืง เฆ ดูอี โมวอาบ อี กอย โคบ แบลง อึม อารานูน ตึอน. อึณ บอ มูห กาอูน กาดาย มืง โมวอาบ. 37 คูนดีคัม อาบาลาก บอ กาลาง ดี อาบาลาอัม ต็อห, “แม ยึร, โอว แฮะ จัร ดูอี โอว ฮาว แดะ แม. เหมา อึณปาย ปี ตู ตัห แม โดง กอย โอว? แม โยว โอว ตู นับ ดี มยูก แม?”

38 อาบาลาอัม วี ต็อห, “นี, โอว แฮะ ฮอต ตัห ดอ ตี นี. มาแล, โอว ตู นับ โยว โอว ดี ปึอน กาลาง โฆรห ปี อึง แม. โอว โลว กาลาง มี โฆรห ปี จัร เฌาพรา โอว กาลาง.”

39 ปาย ตี อาบาลาอัม บอ โดบ คูนดีคัม อาบาลาก ตึอน, ฮาว ดี มืง กีรียาดฮูจูด. 40 บอ ฌัม ดี ตี, คูนดีคัม อาบาลาก บอ ง็อห หลู มามัก เฆ มาบู. อัน บอ ตึย ฮาว ดี อาบาลาอัม บอ ดี เฆ ดา ตาง อัน อี กอย ดี ตี. 41 บอ ฌัม ปา แคหณา ซีณวัห, คูนดีคัม อาบาลาก บอ แดะ โฮะ อาบาลาอัม แดง นอน โดง จืร บามูดบาลัะ, แตห อัน ปึอน ยึร บาง โดง คยัะ ดูอี อีซาเรลัะ มัง อี.