1 อึณ บอ มึห คูนดีคัม อี กอย แคง มืง อาราด, อัน มูห ดูอี อาโมยว กานัณ. อัน กอย แคง มืง กานัณ บลาก นา เตต. อัน บอ ยึร ลอง เฆ ดูอี อีซาเรลัะ แฮะ ตัห โดบ อึณเตณ อาทารีน, อัน บอ แรน ดา ซึก อัน, ฮาว กาโฆห ดี เฆ. อัน บอ ปึอน ดี เหมต ดูอี เฆ มัง อี. 2 เฆ ดูอี อีซาเรลัะ บอ วี กาแซณ ดี เฌาพรา ต็อห, “เซ แม เฌา อาบ แตห เย ออง ดูอี, เย ดี ปยาต มืง เฆ ตี, แตห อึณ กอ ลึร โตต.” 3 เฌาพรา บอ โทม โฆรห เฆ ดูอี อีซาเรลัะ ตี. อัน บอ กอย บลาก เฆ, แตห เฆ แป ดูอี กานัณ เฆ ตี. ปาย ตี เฆ บอ ปยาต มืง ตี บอ ดูอี อี กอย แคง มืง ตี บอกาเฆลียด. โดง ตี, เฆ บอ แตห อึณ จืร ฮอมัะ.

4 เฆ ดูอี อีซาเรลัะ บอ ยีต ดี นอน โฮวรา ตึอน, วี ฮาว โดบ อึณเตณ อี วี โลง ดีโหนง เรณ, แตห อึณ แลบ มืง เอโดม ตึอน. อึณเตณ ปี ว็อะ เฆ ตี, อึณ หณาบ กาเซา. โคว, อึณ บอ แบน ดีหลัห, แบน กลึร ดี เฆ ดูอี อีซาเรลัะ. 5 เฆ บอ กาลาง กาบัห ดี เฌาพรา ฆาย อาโมวแซ ต็อห, “เหมา อึณ ปาย ปี แยต เลห แม ดี เย แคง มืง แอฆึบ, วี แตห เย ตัห ยัม แคง แปร กาฮ็อห นี? เย มืร ตู มึห อึม, ตู มึห คามูน. ปี ดี โฮม อี เปล ซาเละ นี, เย แฮะ ฮอต ปึร.”

6 ปาย ตี เฌาพรา บอ จัร มาฮัณ อี มึห อาย ปี เงา, แตห เฆ ตัห โดง กอย เฆ. มาฮัณ ตี บอ โฌะ ยัม กืน กาเซา เฆ ดูอี อีซาเรลัะ. 7 แฮะ ฮอต, เฆ บอ วี กาลาง ดี อาโมวแซ ต็อห, “โกบ แฮะ กาบัห เย ดี เฌาพรา บอ ดี แม, แฮะ แบน ดูก, แบน หมาบ ดี เย. เย หมาณ, แตห แม วี ซาคึร ดี เฌาพรา, แตห อัน เฌา ดึห แวน มาฮัณ เฆ นี.” ปาย ตี อาโมวแซ บอ วี ซาคึร ดี เฌาพรา ดาง เฆ ดูอี กืน.

8 เฌาพรา วี ต็อห ดี อาโมวแซ, “แตห แม โบง ราง มาฮัณ อู โดว, วี ดึก ดี กาแดะ ร็อง. วี เหมา แปะ แฮะ โฌะ มาฮัณ ตึอน, เซ อัน วี ซากึห ยอด, อัน ดี วี แกน ดาคึย.” 9 ปาย ตี อาโมวแซ บอ ดึห บ็อง เดณ, วี โบง ราง มาฮัณ, เบลห กาแดะ ร็อง. เฆ แปะ แฮะ โฌะ มาฮัณ ตึอน, วี เหมา อี ซากึห ยอด ราง มาฮัณ ตี, อัน วี แกน กอย ดาคึย ฆยามซา.

10 วาย อัน ตี เฆ ดูอี อีซาเรลัะ บอ เลห ดี ตี, วี กาโทะ ฮาว ดี โดง อี จืร ออโบด. 11 เฆ วี เลห ดี โดง อี จืร ออโบด ตี, ปี วี ฮาว คยัะ ดี โดง อี จืร อียาอาบารีม อี กอย แคง แปร กาฮ็อห นา เลห ซีแง มืง โมวอาบ. 12 วาย ตี เฆ ปี วี กาโทะ ฮาว กอย โคบ ดีลัยะ จารีด. 13 แฮะ ฮอต, เฆ ปี วี กาโทะ ฮาว ปอ อึณปัว. เฆ ปี วี ฮาว กอย นา เตต แบลง อึม อารานูน อี กอย แคง แปร กาฮ็อห อี ลาย กาฌาบ ดี มืง ดูอี อาโมวรีด ตึอน. แบลง อึม อารานูน ตี กาคัน มืง โมวอาบ ฆาย มืง อาโมวรีด. 14 โคว อัน ตี แคง บับ อี แค ลอง เฌาพรา จอย อี กาโฆห, อึณ แฮะ แดม ต็อห, “มืง วาแฮม กอย ดี ดีลัยะ ซูพา. แคะ กอย แบลง อึม ดีแตด เฆ ดี โดบ แบลง อารานูน. 15 ดีลัยะ ตี อึณ บอ โต็ง, บอ โลง กอ ฌัม มืง อารา. อึณ บอ โดบ กาอูน กาดาย มืง โมวอาบ.”

16 เฆ ปี วี ยีต ดี ตี, ปี วี กาโทะ ฮาว โดง มึห อึม คึม อี จืร บีรา. ลอง โดง ตี เฌาพรา แฮะ กาลาง ดี อาโมวแซ ต็อห, “แดะ กาฌูะ เฆ ดี ตี, โอว ดี ดัว อึม ดี เฆ.” 17 ดอ อัน ตี เฆ ดูอี อีซาเรลัะ บอ ต็อห โหมว ลอง อัน ตี. เฆ ต็อห, “อึย อึม คึม, แตห แม โตห เลห อึม. เย ดี ต็อห โหมว ลอง แม. 18 แม มูห อึม คึม ปี ฆึห อูน เฆ ฆอน คูนดีคัม. บอ เฆ ดา ตาง แคง มืง แฮะ ลาย จอย แตห อึณ แบน. เฆ แฮะ ฆึห ตา ฆล็อง เลียห บอ อึณกรวน เฆ, แตห อึณ มึห.”

วาย อัน ตี เฆ ปี วี กาโทะ ฮาว โดง จืร มาดทานา. 19 เฆ ปี วี ยีต ดี มาดทานา ตี, ปี วี กาโทะ ฮาว ดี นีฮาเลลา, วี ฮาว บอ ดี ปาโมด. เฆ ปี วี ยีต ดี ปาโมด ตี, 20 ปี วี ฮาว แคง กาดาย ดูอี โมวอาบ อี กอย ดี นอน ปีซากา. แดง นอน ตี แฮะ ปึอน วี มางัห โลง แคง แปร กาฮ็อห.

21 ดอ อัน ตี เฆ ดูอี อีซาเรลัะ บอ วี จัร ดาลาม เฆ ฮาว โดง กอย คูนดีคัม อาซีโฮน อี มูห ดูอี อาโมวรีด, แตห เฆ หมาณ ดี อัน ต็อห, 22 “เย หมาณ ดี กาโลห ฮาว กาแต มืง แม นี. บอ เย บอ โดว ซัดดาวา เย, ตู วัห อึณเตณ, ตู ลึบ แณต โดง นา เฆ มาน มางูน อี เฮา. อึม คึม แคง มืง เบ นี, เย มืร ตู เดียง. เย ดี ฮาว ซืร โดบ อึณเตณ ตาง นี. แตห แม แตห เย กาโลห ปวน กาดาย แคง มืง แม นี.”

23 มาแล, คูนดีคัม อาซีโฮน ตู แตห เฆ ดูอี อีซาเรลัะ กาโลห ฮาว กาแต มืง อัน ตี. อัน บอ วี แรน ดา ซึก, ฮาว แคง แปร กาฮ็อห โดง จืร ยาฮาด. อัน บอ ฮาว กาโฆห ดี เฆ ดูอี อีซาเรลัะ ดี ตี. 24 เฆ ดูอี อีซาเรลัะ บอ วี ปึอน ดี ง็อห ยัม กืน กาเซา รันซู เฆ. เฆ บอ วี ปึอน บอ กาดาย เฆ. อึณ บอ จูห ดี แบลง อึม อารานูน กอ วี ฌัม ดี แบลง อึม ยาโบก อี กอย ดี กาอูน กาดาย ดูอี อัมโมน เฆ ตึอน. เฆ บอ ฆืด ดี ตี. โคว, ดูอี อัมโมน อี กอย ดี กาอูน กาดาย ตี แฮะ บัร ซีคยา กาอูน มืง เฆ. 25 ปาย ตี เฆ ดูอี อีซาเรลัะ บอ ปึอน มืง ดูอี อาโมวรีด แบน โปละ แบน โปละ. เฆ แฮะ ปึอน บอ มืง เฮซาโพน บอ ดอน โปละ อี กอย โรบ มืง ตึอน. เฆ บอ วี ฮาว กอย แคง มืง ตี. 26 มืง ตาง เฮซาโพน ตี มูห โดง กอย คูนดีคัม อาซีโฮน อี มูห ดูอี อาโมวรีด ตึอน. ดอ มึอน อัน แฮะ ดึอม กาโฆห ดี คูนดีคัม โมวอาบ, วี ปึอน ดี อึบ มืง บอ มืง กอ ฌัม ดี แบลง อึม อารานูน ตึอน.

27 โคว อัน ตี เฆ อี ต็อห โหมว, เฆ แฮะ ต็อห,

“แตห เอ ฮาว ดี มืง เฮซาโพน, แตห เอ วี อึณปราย มืง คูนดีคัม อาซีโฮน, แตห อึณ วี หมึอม. 28 เงา แฮะ เลห แคง มืง เฮซาโพน, แฮะ กูห เลห ตัห แคง โดง กอย คูนดีคัม อาซีโฮน. อึณ กาซึม บอ มืง อารา อี กอย แคง มืง โมวอาบ บอ ดูอี อี กอย แดง นอน นา กัว แบลง อึม อารานูน ตึอน. 29 อึย เบ ดูอี แคง มืง โมวอาบ, เบ แฮะ ฌัม ดูก. อึย เบ ดีแบ เฌา เคมูซา, เบ แฮะ ลึร ชึม. เฌา ปี กรึบ เบ ตี แฮะ แตห ฆอน อีมาย เบ โลว เตา ดา ซึก, แฮะ แตห ฆอน อีบึณ เบ กาดูห ดี คัม คูนดีคัม อาโมวรีด เหมต เฆ. 30 โดง นา เบ มืร แฮะ ฮอต ลึร โตต จูห ดี มืง เฮซาโพน กอ วี ฌัม ดี มืง ดีโพน. เย มืร แฮะ ปยาต แบน มืง แบน มืง กอ วี ฌัม มืง นอพัะ อี ลาย กาฌาบ ดี มืง เมเดพา.” แคะ ตี แปะ แฮะ ต็อห เฆ.

31 ปัน อัน ตี เฆ ดูอี อีซาเรลัะ บอ ปึอน ดี กอย แคง มืง ดูอี อาโมวรีด.

32 อาโมวแซ ปี วี จัร ดูอี เฆ ฮาว คยอง ดี ยอด ปี ดี ปาย ดี กาโฆห ดี มืง ยาเฌรา. แฮะ ฮอต, เฆ บอ ปึอน โตต เรา เฆ อี กอย นา เรต มืง ตี. เฆ บอ วี โฮว เลห ดูอี อาโมวรีด อี กอย ดี ตี. 33 เฆ ปี วี วัห ฮาว โดบ อึณเตณ อี ฮาว ดี มืง บาซัน. คูนดีคัม อาออคัะ อี กอย ดี มืง บาซัน ตี, อัน บอ แยต ดา ซึก อัน, ฮาว กาโฆห ดี ดูอี อีซาเรลัะ ดี มืง เอตารี.

34 เฌาพรา วี ต็อห ดี อาโมวแซ, “แม แกวะ โยว อัน. โอว ดี แตห แม แป อัน บอ ดูอี อัน บอ กาดาย อัน. แตห แม โบง ดี อัน, แตห อึณ ปี ปี โบง แม ดี คูนดีคัม อาซีโฮน อี แฮะ อึบ ดูอี อาโมวรีด, อี กอย แคง มืง เฮซาโพน ตึอน.”

35 ปาย ตี เฆ ดูอี อีซาเรลัะ บอ ปึอน ดี ง็อห คูนดีคัม อาออคัะ บอ ฆอน อีมาย อัน บอ เฆ ดูอี อัน, แกวะ แตห อึณ ซี ฆืด คอ อู วี. เฆ บอ ปึอน โตต มืง อัน.