คาน 11
ลอง โดว ซัดดาวา อี ปึอน โฮม ฆาย อี ตู ปึอน โฮม
1 เฌาพรา วี จัร อาโมวแซ ฆาย อาโรน, 2 แตห ฆาย วี กาลาง ดี เฆ ดูอี อีซาเรลัะ ต็อห, “โดว ซัด อี กอย แดง กาดาย นี, อาว มูห ดอน โมยว เบ แฮะ ปึอน โฮม. 3 แคะ บอ มึห โดว ซัด อี มึห ฆีบ รา บอ นับ ดี โซห ปี โฮม อัน, ฌึร ตี ดอน โมยว เบ แฮะ ปึอน โฮม.
4 มาแล ปี บอ ต็อห ปาย ตี มืร, โดว อี โซห ปี โฮม อัน, ฆีบ อัน ยี ตู รา บอ โดว อี มึห ฆีบ รา ยี ตู โซห ปี โฮม อัน อาว ปึอน โฮม. เซ อึณ มูห มังปร็อง กาฮาต, อัน แฮะ โซห ปี โฮม อัน, ฆีบ อัน ยี ตู รา. โคว, อาว ปึอน โฮม, อึณ ตู ซีงา บอด ดี เบ. 5 มายูน แปร มืร, อัน แฮะ โซห ปี โฮม อัน, อัน ยี ตู มึห ฆีบ อี รา. โคว, อึณ ตู ซีงา ดี เบ. 6 มา อายูน มืร, แฮะ โซห ปี โฮม อัน, ยี ตู มึห ฆีบ อี รา. บอ อาตี อาว ซีงา ดี เบ. 7 บอ มาเลต, ฆีบ อัน ปี บอ แฮะ รา, อัน ยี ตู โซห ปี โฮม อัน. โคว, อึณ แบน อี ตู ซีงา ดี เบ. แกวะ แตห เบ โฮม. 8 ยัง โดว ซัด ฌึร ตี, เบ ตู ปึอน โฮม. โดว ยัม เฆ มืร, เบ แกวะ ดึร. อึณ แบน อี ตู ซีงา ดี เบ. 9 แคะ กอย โดว แคง อึม มืร, โมยว อี มึห กูก เฆ แฆด, แฮะ หมึอม โฮม ดอน โมยว. 10 แคะ กอย โดว อี มึห พึอม แบน โมยว แบน โมยว อี กอย แคง อึม, อี ตู มึห กูก เฆ แฆด, อึณ แบน โตต อี หมึอม กาอีห, หมึอม กาดาต ดี เบ. 11 เบ โลว มาด อึณ แบน อี ตู ซีงา. ยัง มืร, อาว โลว โฮม. โดว ยัม มืร, เบ แกวะ ดึร, แกวะ ปา ดอ เหมา. 12 แคะ กอย โดว อี มึห พึอม อี กอย แคง อึม, อี ตู มึห กูก เฆ แฆด, อึณ แบน อี หมึอม กาอีห ดี เบ.
13 อาโมยว มาซีม ปี ตู ปึอน โฮม เบ, อี หมึอม กาอีห หมึอม กาดาต ดี เบ อึณ บอ มูห มาลังดา, มาฆลาง ตาง, มาตีตูด, 14 มาฆลาง ดอน โมยว, 15 มากาอัะ ดอน โมยว, 16 มาดีโบะ ดอน โมยว, 17 มาซีม แกวัก, 18 มาเบบ กากา, มาตีตูด บอ มาลังดา อี โฮม โดว อี แฮะ ฮอต ยัม, 19 มาโนกกอน, มาโนกยาง, มาปราณ บอ มากาลัะ.
20 บอ มาวัะ โมยว อี มึห เพียง บอ นับ ดี มึอน ฮาว, อี มึห พวน เปลา ดอน โมยว, อึณ แบน โตต อี หมึอม กาดาต ดี เบ. 21 มาแล, อึณ มึห มาวัะ มัง โมยว อี มึห เพียง บอ ตา เปลา เฆ, นับ ดี แดน นับ ดี ดัณ, ฌึร ตี เบ แฮะ ปึอน โฮม. 22 อึณ บอ มูห มาอาโม็ง, มาอาโฌ็ง, มาอาตอน บอ มาอาโม็ง เงียน. ฌึร ตี ดอน โมยว, เบ แฮะ ปึอน โฮม. 23 มาแล, มาวัะ อี มึห เพียง, อี มึอน พวน เปลา, ดอน โมยว แฮะ แบน โตต อี หมึอม กาอีห ดี เบ.
24 ปาย ตี แคะ กอย โดว ซัด แปะ แฮะ กาลาง ตี ดอน โมยว, เฆ บอ นับ ดี แตห เบ ตู ซีงา. อาเซ ตา ดึร, ตา ปา โดว ยัม เฆ ตี, บอ อัน ตู ซีงา ฌัม บา ดี อับ. 25 อาเซ ปา โดว ซัด ฌึร ตี อี แฮะ ยัม, อัน โลว วี บาย แวน, ลัห บอ ครึง ปี ตา อัน. บอ โดว อัน อาว ฮู ซีงา ฌัม บา ดี อับ.
26 โดว ซัด อี มึห ฆีบ, ยี ตู รา ซีคยา บอ ตู โซห ปี โฮม อัน, อึณ แบน อี ตู ซีงา บอด ดี เบ. อาเซ ตา ดึร โดว ยัม เฆ, บอ อัน อาว ฮู ซีงา บอด. 27 แคง โดว ซัด พวน เปลา ตี, โดว อี ฌาบ ฮาว ดี กาบา เปลา อัน, ฌึร ตี ดอน โมยว อาว ซีงา อาว บอด ดี เบ. อาเซ ตา ดึร ตา ปา โดว ยัม เฆ, บอ อัน อาว ฮู ซีงา ฌัม บา ดี อับ. 28 อาเซ ปา โดว ยัม ซัด ฌึร ตี, อัน โลว วี บาย แวน, วี ลัห ครึง ปี ตา อัน. อัน อาว ฮู ซีงา บอด ฌัม บา ดี อับ. โดว ซัด ฌึร ตี, อาว ซีงา, อาว บอด ดี เบ.
29 โดว ซัด อี มึอน แดง กาดาย นี, อี ตู ซีงา บอด ดี เบ, อึณ บอ มูห มาบูย, มาหนาย, มาร็องกาง ดอน โมยว, 30 มาต็อกแก, มาแลน, มาอาเปลียะ, มากาปึร บอ มาอาโฆย. 31 โดว อี มึอน ฌึร ตี ดอน โมยว, อาว ซีงา ดี เบ. อาเซ ตา ดึร ตา ปา โดว ยัม ซัด ฌึร ตี, อัน อาว ฮู ซีงา ฌัม บา ดี อับ. 32 เซ โดว ยัม ซัด ฌึร ตี ฮี โจห แคง ครึง ตา โมยว เหมา อาว ต็อห, โมยว ตี แฮะ ฮอต กาดาต, อาว ฮู ซีงา. อึณ บอ มูห ครึง ตา อี มูห เฮ, บอ มูห บีก เฆ ฮูน โดว ซัด, บอ มูห กาตัม, แคะ กอย ครึง ตา ดอน โมยว แฮะ ฮอต แบน โตต อี ตู ซีงา. อึณ โลว แจ แคง อึม. อาว ฮู ซีงา ฌัม บา ดี อับ. วาย ตี, แฮะ วี ซีงา. 33 เซ โดว ยัม ฌึร ตี โจห แคง กาโละ, แคง ซีลัยะ กาดาย, แคะ ปี มึห อี กอย แคง กาโละ ตี, แฮะ ฮอต กาดาต โตต. โลว มัห กาลาต กาโละ เฆ ซีลัยะ ตี. 34 เซ อึณ มึห อึม อี แฮะ กอย แคง กาโละ อี ตู ซีงา, อึม ตี วี ตา ดึร ปี ดี โฮม อี หมึอม โฮม, อึณ แตห บอ ปี ดี โฮม ตี แบน อี กาดาต. บอ อึม เดียง อี กอย แคง กาโละ บอ แคง ซีลัยะ ฌึร ตี แฮะ ฮอต กาดาต โตต. อาว ฮู ปึอน เดียง. 35 แคะ กอย ครึง ตา ดอน โมยว, เซ โดว ยัม ฌึร ตี โจห ดึร, อึณ แบน อี ตู ซีงา. บอ มูห กาฟาง, บอ มูห กาโละ กาดาย, แฮะ ฮอต แบน โตต อี ตู ซีงา. อึณ โลว ปยาต แวน, แฮะ แบน อี หมึอม กาอีห, หมึอม กาดาต ดี เบ. 36 เซ อึณ ยี มูห อึม โตห บอ อึม คึม, อึณ ตู แบน อี กาดาต. แฮะ ซีงา โตต ดอน โมยว. อึณ มึห มี อี ตา ดึร โดว ยัม ตี, อัน ตู ซีงา. 37 เซ โดว ยัม ฌึร ตี โจห แดง ครึง ซีมา ปี โลว ซัม เบ, ครึง ซีมา ตี, ตู แบน อี กาดาต. 38 มาแล, เซ โดว ยัม ตี โจห แดง ครึง ซีมา แปะ แฮะ แจ อูน แคง อึม, ครึง ซีมา ตี แฮะ ฮอต กาดาต, อาว ฮู ซีงา.
39 เซ อึณ มูห โดว ซัด ปี ปึอน โฮม เบ, เซ อัน ยี ยัม, อาเซ บอ ตา ดึร, ตา ปา โดว ยัม ตี, อัน อาว ฮู ซีงา ฌัม บา ดี อับ. 40 อาเซ ยี โฮม โดว ยัม ตี, อัน โลว วี ลัห ครึง อัน. โดว อัน มืร, อาว ฮู ซีงา ฌัม บา ดี อับ. อาเซ ดึห ฮาว แวน โดว ยัม ตี, บอ อัน โลว ลัห ครึง อัน. โดว อัน มืร, อาว ฮู ซีงา ฌัม บา ดี อับ.
41 แคะ กอย โดว อี มึอน แดง กาดาย นี ดอน โมยว แฮะ หมึอม กาอีห, อาว หมึอม โฮม. 42 อึณ บอ มูห โดว อี หลัน ฮาว, โดว อี มึอน ฮาว, โดว อี ฮาว พวน เปลา, โดว อี ฮาว เปลา กืน, อึณ แบน โตต อี หมึอม กาอีห, แกวะ แตห เบ โฮม. 43 โดว ฌึร ตี ดอน โมยว, แกวะ แตห เบ โฮม. แกวะ แตห อึณ แบน ตู ซีงา บอด ดี เบ. 44 โอว มูห อัน เฌา อี มูห เฌาพรา ปี กรึบ เบ. โอว แฮะ ซีงา บอด. โคว, เบ โลว แตห บอ โดว เบ แบน อี ซีงา บอด. แกวะ แตห โดว อี หลัน แดง กาดาย ตี โบง แตห เบ แบน อี ตู ซีงา บอด. 45 โอว มูห เฌาพรา อี แฮะ ทูด เลห เบ แคง มืง แอฆึบ, แตห โอว แบน เฌาพรา ปี กรึบ เบ. โอว แฮะ ซีงา บอด. โคว, แตห บอ เบ แบน ดูอี อี ซีงา บอด.