1 ฆอน อีมาย อาโรน อี จืร อานาดาบ ฆาย อาบีฮู, ฆาย บอ ดึห ตัห ซีลัยะ ปี โดะ ซีนัม อูห หงูน, ฮับ บอ เงา บอ อึณกรึห อูห หงูน, วี หลู ดี เฌาพรา. ปี หลู เฆ ตี อาว มูห เงา ปี ดัม อูน เฌาพรา แตห เฆ โบง. 2 เฌาพรา บอ แตห เงา เลห โดง กอย อัน, แตห อึณ กาซึม ยัม ฆาย ดี อาต เฌาพรา อู เฌณ. 3 ปัน ตี อาโมวแซ วี ต็อห ดี อาโรน, “อานี แฮะ มูห ปี กาลาง อูน เฌาพรา ดอ ต็อห อัน, ‘เฆ อี โบง ฆาน โอว ดอน โมยว, เฆ โลว โหลห แคะ ซีงา บอด โอว. โอว ดี แตห อาพูง ดังโคว โอว ลึห ซีคยา ดี ดูอี บอกาเฆลียด, แตห เฆ โรวเซ โอว.’” แฮะ ฮอต ปาย ตี อาโรน บอ กอย อาว ฮู โฆรห.

4 อาโมวแซ บอ แดะ อามีซาเอน บอ อาเอนซาพาน, อี มูห ฆอน อาอูซีเอน. อาอูซีเอน บอ มูห ฆูณ แตะ อาโรน ตึอน. อัน ต็อห ดี ฆาย, “ตัห ดึห โดว ยัม บีนอง บาย เลห ดี อาต ทึบ บีก บอด นี, ฮาว นา เรต โดง คยัะ เอ นี.” 5 ฆาย บอ ตัห ดึห โดว ยัม ฆาย ตี ดอ ซี ชึบ เฆ ซีโตว ตูน เฆ, บอ กาโย็ง เลห ฆาย นา เรต, แตห อึณ โดบ ปี ต็อห อาโมวแซ ตึอน.

6 ปัน ตี อาโมวแซ วี กาลาง ดี อาโรน เฆ ฆอน อัน อี จืร อาเลอาซา ฆาย อาอีทามา ต็อห, “อาว โลว บยัะ น็อห กลึร, น็อห เหงา เบ. ฮึก ฆีณ เบ, อาว ปึอน แตห อึณ กาฟัร. ครึง เบ มืร, อาว ปึอน กายาต. เซ เบ ฮี โบง, โยว เบ ยัม, โยว เฌาพรา ดี รู บอ ดี เฆ ดูอี กืน. มาแล, เฆ บีนอง วอแว เบ บอ เฆ ดูอี อีซาเรลัะ บอกาเฆลียด, เฆ แฮะ ปึอน กลึร, ปึอน เหงา โกบ แฮะ ตึย เฌาพรา เงา กาซึม ยัม ฆาย อา วี ตี. 7 แตห เบ กอย ดี บาง มาโลห ทึบ บีก บอด นี, แกวะ เลห นา เรต, โยว เบ ยัม. โคว, เฌาพรา แฮะ ฮอต พ็อห นามัน ดี ฆีณ เบ.” อาโมวแซ แฮะ ฮอต กาลาง โฆรห ตี, เฆ บอ โบง โดบ ปี กาลาง อัน.

8 เฌาพรา วี กาลาง ดี อาโรน ต็อห, 9 “เซ แม บอ ฆอน แม แฮะ เดียง อึม มางูน, บอ อึม ป็อห อาโมยว เฮา, เบ ตู ปึอน ลึบ แคง ทึบ บีก บอด, โยว เบ ดี บอ ยัม. อึณ มูห ดารา ปี โลว โดบ เบ เซเซ ดอน โจว ดอน บาน. 10 เบ โลว นับ ดี กาย็อห, อาโมยว เหมา อี มูห อาดา เฌาพรา, อาโมยว เหมา อี มูห อาดา ดูอี. เบ โลว นับ บอ อาโมยว เหมา มูห อี ซีงา บอด, บอ อาโมยว เหมา มูห อี ตู ซีงา บอด. 11 ดารา ปี ดัว โอว ดี อาโมวแซ, แปะ แฮะ วี กาลาง อัน ดี แม ดอน โมยว, แม โลว วี มาโนว เฆ ดูอี อีซาเรลัะ บอกาเฆลียด.”

12 ปัน ตี อาโมวแซ วี กาลาง ดี อาโรน บอ ดี ฆอน อาโรน อา วี อี ซี ฆีด ตึอน, อี จืร อาเลอาซา ฆาย อาอีทามา. อัน ต็อห, “แตห เบ ดึห ตัห ปี ดี หลู ดีฆาว แบน โมยว แบน โมยว อี ซี ฆีด ดี ปี หลู อี โดะ ดี เงา ตึอน, แตห เบ วี โบง คามูน อี ตู ฮับ ซีนัม บรัห, วี โฮม โคบ กาโช็ง หลู. ปี หลู ตี แฮะ มูห อี ซีงา บอด กาเซา. 13 เบ โลว โฮม คามูน ตี ดี โดง ซีงา บอด. โคว, อึณ แฮะ มูห โกรว เบ ฆอน แม. เบ แฮะ กาอาบ โฮม คามูน ตี. อึณ มูห บูน เบ ปี ดึห เลห ดี ปี หลู อี โดะ ดี เงา. เฌาพรา แฮะ กาลาง อูน ดี โอว ปาย ตี. 14 อึณ บอ มูห บังน็อห บอ ฆึม ปัน อี แฮะ ฮอต มาวัด วีว มาวัด เวณ ดี อาต เฌาพรา, อึณ แฮะ แบน โกรว ดูอี อี หลู ดี เฌาพรา. บอ ฆอน อีมาย ฆอน อีบึณ แม แฮะ ปึอน โฮม. เบ ยี โลว โฮม ดี โดง ซีงา บอด. โคว, ปี หลู นี แฮะ ดึห เลห แคง ปี หลู อี กอย กาฌูะ โฮม รึม อี มูห ปี หลู เฆ ดูอี อีซาเรลัะ. อึณ แฮะ แบน โกรว แม บอ โกรว เฆ หลูกหลาน แม. 15 ฆึม ปัน อี แฮะ ฮอต อาบ ดี เฌาพรา บอ บังน็อห อี แฮะ ฮอต มาวัด วีว มาวัด เวณ บอ เบรียง อี โลว โดะ ดี เงา, เบ โลว ดึห โตต, มาวัด วีว มาวัด เวณ ดี อาต เฌาพรา. แฮะ ฮอต, ยัง ตึอน เบ แฮะ ปึอน โฮม. บอ หลูกหลาน แม ปึอน โฮม ยัง ตี, แตห อึณ โดบ ปี กาลาง อูน เฌาพรา.”

16 ปัน ตี อาโมวแซ วี ดีหมอด ลอง มาแป อี แบน ปี หลู อี ฆ็อห แวน หมาบ ตึอน. อัน กอ นับ, เฆ แฮะ ฮอต โดะ กาซึม โตต. โกบ ลอง อัน ตี, อัน บอ รู ดี อาเลอาซา ฆาย อาอีทามา อี มูห ฆอน อาโรน อี ซี กอย. อัน วี ต็อห ดี ฆาย, 17 “เหมา อึณ ปาย ปี ตู โฮม เบ ปี หลู อี แตห เฌาพรา ฆ็อห แวน หมาบ ตี ดี แวง ทึบ บีก บอด นี? ปี ดี โฮม ตี แฮะ บอด กาเซา. ปี หลู ตี อี แตห เฆ ดูอี บอกาเฆลียด วี กาล็อะ ดี เฌาพรา, อัน เฌา แฮะ ดัว ดี เบ โกบ หลู เบ ดาง เฆ. 18 โกบ ตู ดึห เบ หนาม อัน ฮาว แคง โฮง อี ซีงา บอด, เบ แฮะ กาอาบ โฮม ปี หลู ตี ดี นี, แตห อึณ โดบ แปะ แฮะ ดัม อูน โอว.”

19 อาโรน วี ต็อห ดี อาโมวแซ, “อาตึร นี, เฆ ดูอี กืน แฮะ ฮอต หลู ปี ดี หลู อี ฆ็อห แวน หมาบ. แฮะ หลู บอ ปี ดี หลู อี โดะ ดี เงา ดี เฌาพรา. โกบ อี ดูก อี หณาบ ตี อี แฮะ ฮอต ฌัม ดี โอว อาตึร, โอว ทาง, เฌาพรา แหนน ตู อึง เซ โอว โฮม ปี ดี หลู อี แตห เฌาพรา ฆ็อห แวน หมาบ อี.”

20 อาโมวแซ บอ ยึร โฆรห ตี, อึณ บอ กาหลูห ดี น็อห อัน.