1 เฌาพรา วี กาลาง ดี อาโมวแซ, “เบ โลว โบง กาโช็ง หลู ดี โอว, ตา เฮ กาทีน. แตห อัน มึห พวน ซีนา กาลัง. แตห บอ นา โต็ง บอ นา กาว็อห อัน พัน กานีห, บอ นา จา อัน โอย กานีห. 2 ดี กาโตะ อัน บอ พวน กาโตะ, เบ โลว โบง แตห อัน กาโตต บัต, แตห อึณ แบน อู ซีะ. เบ บอ โลว ดึห บ็อง, ปีด ดี กาโช็ง หลู, แตห อึณ กาบีด เฮ ดอน โปละ. 3 บอ อึณกรึห ปี ดี ตา ดอ หลู เบ, เบ โลว โบง ตา บ็อง. อึณกรึห ตี มูห ปูง ดี ดึห แวน เบรา เงา, บอ มัง โซก บอ ซีลัยะ อี ฮับ หนาม ปี โลว คร็อห เบ ดี กาโช็ง, บอ มัง แฌต ยัง เฆ พาน ดี อูน เงา นา แคง, อึณกรึห ฌึร ตี ดอน โมยว เบ โลว โบง ตา บ็อง. 4 แฮะ ฮอต, เบ บอ โลว โบง กาแบห ตา บ็อง, แตห เบ ดึห วัน บ็อง เบลห กาแวะ. เบ บอ โลว โบง ควัง, ดึก ดี กาโตะ กาแบห ตึอน, แตห บอ พวน กาโตะ มึห ควัง อัน. 5 กาแบห ตึอน เบ โลว เบลห นา ครึม บาง กาโช็ง หลู, แตห อึณ กอย ดี กาแต นา จา อัน. 6 แฮะ ฮอต, เบ วี โลว โบง มัง ฆอด อัน, ตา เฮ กาทีน, วี ปีด บ็อง. 7 เบ โลว ดึห มัง ฆอด, ปลอะ แคง ควัง อัน, แตห มัง ฆอด กอย นา เบรต บอ อา บลาก, แตห อี ปึอน ดี กาฆอด กาโช็ง หลู ตึอน. 8 กาโช็ง หลู ตึอน, เบ โลว โบง แตห อึณ กาโอ็ง, ตา แบน. แม โลว ซาดีก, โบง โตต ดอน โมยว แตห อึณ ปี แปะ แฮะ บยัะ โอว ดี แม แดง นอน นี.” ปาย ตี เฌาพรา จัร อาโมวแซ โบง.

9 วาย อัน ตี เฌาพรา วี ต็อห, “เบ โลว โบง แวง ทึบ บีก บอด. บลาก นา เตต เบ โลว โบง แตห นา โต็ง อัน อู มาย็อห กานีห. เบ บอ โลว ดึห กาตัม ลูย, บัด แตห อึณ แบน เซณ บัด, วี ด็อะ บีก ฆ็อง, แตห อึณ แบน ปี โล็ง แวง. 10 บอ ร็อง อา ฆึร ณ็อง เฆ เจณ ร็อง อา ฆึร โบ็ง เบ โลว โบง ตา บ็อง. เบ บอ โลว ดึห รึอน โบง ลาวัยะ อี ดึก ดี ร็อง บอ วัน รึอน แบน ณ็อง แบน ณ็อง, แตห อึณ กอย ดี กาแต ร็อง, แตห อึณ โปลม. 11 บอ บลาก นา กัว เบ โลว โบง โล็ง แตห อึณ ปี บลาก นา เตต ตึอน. แตห นา โต็ง อัน อู มาย็อห กานีห, วี ดึก บีก ฆ็อง. แตห อึณ บอ มึห ร็อง อา ฆึร ณ็อง เฆ เจณ ร็อง อัน, แตห อึณ ปี บลาก นา เตต ตึอน.

12 บลาก นา กาว็อห แวง ตึอน, อี มูห บลาก นา เฆต ซีแง, เบ บอ โลว โบง บีก, แตห นา กาว็อห อัน พัน ฆึร กานีห. แตห อึณ บอ มึห บีก ฆ็อง บอ ร็อง ฆึร ณ็อง บอ เจณ ร็อง อัน ฆึร โบ็ง. 13 บลาก นา เลห ซีแง แวง อัน บอ โลว โต็ง พัน ฆึร กานีห. 14 บีก ฆ็อง อี กอย ดี โคบ มาโลห แวง ตึอน, เบ โลว โบง แตห นา โต็ง อัน อู บลาก ฆึร ดี พัน กานีห. แตห เบ บอ โบง ร็อง อัน อู บลาก โอย ณ็อง, บอ เจณ ร็อง อัน โอย โบ็ง. 15 ดี โคบ มาโลห ปอ บลาก เบ โลว โบง บีก ฆ็อง ปอ ฆึร ดี พัน กานีห บอ ร็อง อัน โอย ณ็อง บอ เจณ ร็อง โอย โบ็ง.

16 โดง กอย มาโลห อี มูห โดง ลึบ ดูอี, เบ โลว โบง บีก ฆ็อง, แตห อึณ โต็ง อา ฆึร กานีห. เบ วี โลว ดึห กาตัม ลูย, บัด แตห อึณ แบน เซณ บัด, จูด ซีนัม อี คอง, อี ฆูย คอน บอ อี เรณ, แตห ดูอี แหลว ดี ด็อะ วี ด็อะ บีก ปัยะ. แฮะ ฮอต, แตห เบ บอ โบง ร็อง พวน ณ็อง บอ เจณ ร็อง พวน โบ็ง. 17 ร็อง ดอน ณ็อง อี กอย ดี โล็ง แวง โลว มึห บอ ลาวัยะ ตา รึอน บอ วัน รึอน อี แตห ร็อง ลาย กาดึก. เจณ ร็อง ตึอน ยี โลว โบง ตา บ็อง. 18 แวง ดี ฆลัง ตึอน โลว มึห นา โต็ง อู มาย็อห กานีห, นา ตาง พัน ฆึร กานีห, บอ นา จา ร็อง โลว โบง พัน กานีห. บอ บีก อี โลว ฆ็อง โลว จา ปี ร็อง. แฮะ ฮอต บอ โลว มึห เจณ ร็อง ตึอน ตา บ็อง. 19 อึณกรึห ปี ตา ดูอี แดง ตี ดอ โบง เฆ ทึบ บีก บอด ตี, อึณ บอ มูห โมยว เหมา โมยว อัน, บอ หล็อก วัน ทึบ บอ หล็อก วัน โล็ง, เบ โลว วี โบง โตต ดอน โมยว ตา บ็อง.” ปาย ตี เฌาพรา จัร เฆ โบง ทึบ บีก บอด ตึอน.

20 ปอ อู เฌณ เฌาพรา วี ต็อห ดี อาโมวแซ, “แม โลว จัร เฆ ดูอี อีซาเรลัะ แตห เฆ ตึย นามัน ซีงา, ปี กรีด เลห เฆ ดี เบล นามัน. นามัน ตี เบ โลว ฮับ แคง เงา ราง ตาง ตึอน, แตห เงา ราง มึห เงา, แตห อึณ บลาง เซเซ. 21 บอ อาโรน บอ เฆ ฆอน อีมาย อัน, เฆ โลว ลึมลา เงา ราง ตึอน. อัน กอย นา เรต บีก ตาง ตึอน อี ฆ็อง นา อาต ฌีดืก ตึอน. เงา ราง ตาง ตี เฆ โลว แตห อึณ มึห เงา เซเซ, แตห อึณ บลาง ดี อาต เฌาพรา อู ซีณ แคง หมึร กอ ฌัม ซีณวัห. เบ ดูอี อีซาเรลัะ โลว โบง ปาย ตี แตห เบ วี โดบ ปี จัร โอว ตี ดอน โจว ดอน บาน. แกวะ แตห เบ แวน ดอ เหมา.” ปาย ตี เฌาพรา กาลาง ดี อาโมวแซ ดอ กอย อัน แดง นอน เฌาพรา ตึอน.