1 วาย อัน ตี เฌาพรา วี กาลาง ดี อาโมวแซ ปอ อู จึบ. อัน ต็อห, “เบ โลว โบง ทึบ บีก บอด. แตห เบ โบง บีก ฆ็อง ฆึร พืน. เบ โลว ดึห กาตัม ลูย, บัด แบน เซณ บัด, จูด ซีนัม อี คอง, อี ฆูย คอน บอ ซีนัม อี เรณ แฆ. แฮะ ฮอต, เบ โลว แดะ ดูอี อี แหลว ดี ด็อะ, แตห อัน วี ดึห เซณ เฆ ตี, ด็อะ บีก อี มึห แปะ ราง อามู อามาด เฌาพรา, อี จืร เครูบ. 2 บีก ฆ็อง อู พืน, เบ โลว โบง แตห นา โต็ง อัน อา ฆึร ดี ดา กานีห, นา ตาง อัน พวน กานีห. เบ บอ โลว โบง แตห ดอน พืน ตาง แคะ ตี, แตห เฆ การัม. 3 บีก เฆ ตี พัน พืน เบ โลว จีณ แตห อึณ กาดึก แบน พืน ตาง อู พืน. แตห ฆึร พืน ตึอน วี แบน พืน ตาง อา พืน. 4 ปัน ตี เบ โลว วี ดึห บีก คอง, โบง โหยะ ดึก ดี อา พืน ตาง ตึอน, แตห โหยะ ตี กอย บลาก ดี โคบ, อู พืน อู บลาก. 5 บีก อู พืน, เบ โลว โบง โหยะ อัน พัน ฆึร โบ็ง, แตห บอ อา พืน การัม. โหยะ ปี ดึก เบ ดี บีก ตาง อา พืน ตึอน, เบ โลว ดึก ลาย กาซืร. 6 แฮะ ฮอต ปัน ตี เบ บอ โลว ดึห ครีว, โบง มัง กาเกียบ พัน ฆึร โบ็ง, แตห เบ ปึอน ดี กาเกียบ กาดึก บีก ตาง อา พืน ตึอน, แตห บีก ฆ็อง แคง ทึบ บีก บอด ตึอน วี แบน อู พืน.

7 แฮะ ฮอต, เบ วี โลว ดึห ฮึก มา แป, วี โบง บีก แตห อึณ ซีบลึก ทึบ บีก บลาก นา แดง นา เรต. แตห เบ โบง ฆึร ดี อู พืน. 8 บีก ฆึร ดี อู พืน ตี, เบ โลว โบง แตห อึณ การัม. แตห นา โต็ง โอย ฆึร กานีห, นา เตียม พวน กานีห. 9 บีก เฆ ตี, เบ โลว ดึห พัน พืน, จีณ แตห อึณ ลาย กาดึก แบน พืน ตาง อู พืน. ปอ เดา พืน ตึอน เบ โลว จีณ แตห อึณ ลาย กาดึก ปาย ตี. พืน ตาง อี มึห เดา พืน ตึอน, เบ โลว ดีฆับ กาแต พืน อึณเดา, แตห บลาก ดีฆับ ตึอน กอย บลาก นา อาต ทึบ บีก บอด ตึอน. 10 เบ บอ โลว โบง โหยะ พัน ฆึร โบ็ง, แตห เบ ดึก ดี บลาก ดี โคบ พืน ตาง ตึอน. แฮะ ฮอต, เบ บอ โลว โบง โหยะ ปอ พัน ฆึร โบ็ง, แตห เบ ดึก ดี บลาก ดี โคบ บีก ตาง ตึอน ปอ อู พืน. 11 แฮะ ฮอต, เบ โลว วี ดึห บ็อง, แตห เบ โบง บอ มัง กาเกียบ, พัน ฆึร โบ็ง กาเกียบ โหยะ ปี ดึห เบ ดี บีก ตึอน, แตห อา พืน ตาง ตึอน วี ลาย กาดึก แบน บีก ทึบ บีก อู พืน. 12 เซ เบ เบลห อูน บีก ตึอน ซีบลึก ทึบ บีก บอด, อึณ ดี กาโลย นา ปัน. บีก ดี บัต อู พืน, อาดา นา เตียม อัน อู กาแต ดี กาโลย โลง นา ปัน. 13 บอ นา เบรต อึณ ดี กาโลย อู บลาก อู กานีห. อาตี เบ โลว แตห อัน วี โลง บอ อา บลาก. ปาย ตี เบ โลว โบง แตห บีก ฮึก มาแป ตาง ตึอน วี ซีบลึก ทึบ บีก บอด ตึอน. 14 นา แดง บีก ฮึก มาแป ตึอน, เบ โลว วี เบลห ปอ อู พืน ปี โบง เบ ตา ฮูน มาบู อาโล็ง, จูด ซีนัม เรณ. วาย อัน ตี เบ โลว วี ดึห ฮูน มามัก อึม, วี เบลห นา แดง ฮูน มาบู ตึอน, แตห อึณ วี แบน ปอ อู ทาบ อี ซีบลึก ทึบ บีก บอด.

15 วาย อัน ตี เบ โลว วี ดึห เฮ กาทีน, โบง แบน, แตห เบ เบลห กาจ็อง, แตห อึณ แบน แรง ทึบ บีก บอด ตึอน. 16 แบน อู บลัะ เบ โลว โบง แตห นา จา อัน ฆึร กานีห, นา กาว็อห อัน อู กานีห ดี อู กาซาน. 17 แบน ดอน บลัะ เบ โลว โบง โดต อา โดต, แตห ฆาย ลาย กาซืร, แตห อึณ ปึอน ดึห แบน อา บลัะ, ลาย กาชึบ. 18 แตห เบ โบง แบน ฌึร ตี อา ฆึร บลัะ อาดา บลาก นา เตต. 19 แฮะ ฮอต, แตห เบ วี ดึห รึอน, โบง เจณ ดี ดัง แบน ตึอน. แตห เบ โบง พวน ฆึร โบ็ง. แบน อู บลัะ, แตห อึณ มึห เจณ รึอน ตี อา โบ็ง, อี กอย ดี ดัง อัน, แตห แบน กาจ็อง นา แดง. 20 บอ อาดา บลาก นา กัว เบ โลว โบง แบน อา ฆึร บลัะ. 21 บอ เจณ ดี ดัง อัน เบ วี โลว โบง ปอ พวน ฆึร โบ็ง. 22 อาดา บลาก นา เฆต ซีแง เบ บอ โลว โบง แบน ปอ เดา บลัะ. 23 แบน ปอ อา บลัะ เบ โลว โบง แตห อึณ แบน อา กาโตะ ดี บลาก นา เฆต ซีแง. 24 ดอน กาโตะ โลว มึห นา เตียม อัน อา บลัะ. ฆาย อา บลัะ โลว ลาย กาดึก ดี กาดัม อัน กอ ฌัม ดี กาแดะ อัน. ดี กาแดะ อัน ตึอน เบ โลว วี ดึห ควัง อู ควัง, แตห บอ แบน อา บลัะ ลาย กาดึก. บอ อา กาโตะ ตึอน เบ โลว โบง ปาย ตี. 25 แฮะ ฮอต โบง ปาย ตี อึณ ดี มึห แบน ดา บลัะ บอ เจณ ดี ดัง อัน ฆึร ดี เดา โบ็ง. แบน อู บลัะ ตึอน ดี มึห เจณ ดี ดัง อัน อา โบ็ง.

26-27 วาย อัน ตี เบ วี โลว ดึห เฮ กาทีน โบง แรบ กาลัง, แตห อึณ แบน พัน ณ็อง อาดา แรง อี กอย บลาก เบรต อู บลาก. ปอ พัน ณ็อง เบ โลว โบง อาดา บลาก เบรต ปอ อู บลาก, ปอ พัน ณ็อง โลว โบง อาดา บลาก ดี ปัน, อี มูห บลาก นา เฆต ซีแง. 28 แรบ อี กอย ดี กาแต แรง, เบ โลว โบง แตห อึณ โต็ง แคะ กาว็อห แรง อู บลาก, แตห อึณ กอย ดี กาแต นา จ็อง แบน แรง. 29 เบ โลว ปีด ครีว ดี แบน ตึอน. เบ บอ โลว ดึห ครีว โบง ควัง, ดึก ดี แบน, แตห อึณ ปึอน ดี ปลอะ แรบ ตึอน แคง ควัง. แตห เบ บอ ปีด ครีว ดี แรบ กาลัง ตึอน.

30 แฮะ ฮอต โบง แบน โมยว แบน โมยว ฌึร ตี, เบ โลว ซัม ทึบ บีก บอด ตึอน, แตห อึณ ปี แปะ แฮะ บยัะ โอว ดี แม ดอ กอย แม แดง นอน นี.

31 เบ บอ โลว โบง บีก ฆ็อง ปอ อู พืน. เบ โลว ดึห กาตัม ลูย อี แฮะ บัด แบน เซณ บัด, จูด ซีนัม อี คอง, อี ฆูย คอน บอ อี เรณ แฆ. ดูอี อี แหลว จีณ แฆะ บอ จีณ ราง โบห, อัน โลว โบง บีก ฆ็อง ตี, แตห อัน จีณ ราง อามู อามาด เฌาพรา อี จืร เครูบ, แตห อึณ กอย ดี บีก ตึอน. 32 วาย อัน ตี เบ โลว ดึห ครีว โบง ควัง, แตห เบ ฆ็อง บีก ตี ดี ร็อง พวน ณ็อง. เบ โลว โบง ร็อง ตี ตา เฮ กาทีน, วี ปีด ครีว. ร็อง พวน ณ็อง ตี, เบ บอ โลว โบง เจณ อัน พวน โบ็ง ตา รึอน. 33 เบ บอ โลว โบง มัง กาเกียบ, แตห เบ กาเกียบ บีก บอ ควัง ครีว อี ดึก ดี ร็อง ตึอน, แตห บีก ฆ็อง ปาย ตี. วาย อัน ตี เบ โลว ดึห ฌีดืก ตึอน แตห อัน กอย นา ปัน บีก ฆ็อง ตี. บีก ฆ็อง ตี ดี กาย็อห ทึบ บีก บอด, แตห อึณ มึห อู โปละ อี บอด ปอ อู โปละ อี บอด หลึอม โตต. 34 ปัน ตี เบ โลว ดึห ซีบลึก ตึอน เบลห นา แดง ฌีดืก, แตห อึณ กอย แคง โดง บอด หลึอม โตต. 35 กาโช็ง ตึอน ปี จัร โอว เบ โบง, เบ โลว เบลห นา อาต บีก ฆ็อง ตึอน, แตห อึณ กอย แคง ทึบ บีก นา กัว. ดัง เงา ออม ตึอน เบ ยี โลว เบลห อูน นา เตต, แตห กาโช็ง ฆาย ดัง เงา ออม กอย ลาย กาซืร.

36 แฮะ ฮอต ปัน ตี เบ โลว กาบีด มาโลห ทึบ บีก ตึอน, วี โบง บีก ฆ็อง ปอ อู พืน. เบ โลว วี ดึห กาตัม ลูย อี แฮะ บัด แบน เซณ บัด, จูด ซีนัม อี คอง, อี ฆูย คอน บอ อี เรณ แฆ. ดูอี แหลว จีณ แฆะ, จีณ ราง แบน โมยว แบน โมยว, อัน โลว โบง บีก ฆ็อง ตี. 37 เบ บอ โลว โบง ร็อง พัน ณ็อง ตา เฮ กาทีน, วี ปีด ครีว. แฮะ ฮอต, เบ โลว ดึห บ็อง โบง แตห อึณ แบน เจณ ร็อง. เบ บอ โลว โบง ควัง อี ดึก ดี ร็อง, แตห เบ ดึห บีก ฆ็อง ตี, ฮอย ดี ร็อง อัน, แตห อึณ กาบีด มาโลห ทึบ บีก บอด ตึอน.” ปาย ตี ดอ กอย อาโมวแซ แดง นอน เฌาพรา, เฌาพรา กาลาง แหน ดี อาโมวแซ แคะ ปี โลว โบง เฆ ดูอี อีซาเรลัะ.