1 เฌาพรา วี ต็อห ดี อาโมวแซ, “แตห แม แดะ บอ อาโรน, อานาดาบ, อาบีฮู บอ เฆ ดา ตาง ดูอี อีซาเรลัะ บู ฆึร วี, แตห เบ โฮะ ฌัม โดง กอย โอว ดี นอน นี. แตห เฆ กรึบ โอว บอ กอย กายาน โอว. 2 แม อาโมวแซ, แม อู วี ยี โลว ตัห ฌัม เครียะ โอว. บอ เฆ ดูอี กืน อาว ปึอน โฮะ แดง นอน, กอย เครียะ โอว.”

3 ปัน ตี อาโมวแซ ฮาว กาลาง ดอน โมยว ปี ดึอม กาลาง เฌาพรา ดี อัน, แตห ดูอี กืน โทม. แฮะ ฮอต, เฆ ดูอี บอกาเฆลียด วี ต็อห ดี อัน, “เย ดี โบง โตต ดอน โมยว ปี ดัม อูน เฌาพรา ดี เย.” 4 ปัน ตี อาโมวแซ วี แดม อูน โฆรห เฌาพรา ดอน โมยว.

ปา แคหณา ซีณวัห อัน วี เจว ยีต, โบง กาโช็ง หลู ดี เฌาพรา, เบลห อูน ดี ดัง นอน ตึอน. อัน มืร ซัม ร็อง มาว ฆึร ดี อา ณ็อง, แตห อึณ ปี เฆ ดูอี อีซาเรลัะ ฆึร ดี อา ครึร. 5 วาย อัน ตี อัน ตึย เฆ กาโณม ฮาว หลู โดว ซัดดาวา ดี เฌาพรา. อัน แตห เฆ หลู มัก อาโล็ง, แตห อึณ แบน ปี ดี หลู อี โดะ ดี เงา บอ ปี ดี หลู อี กอย กาฌูะ โฮม รึม. 6 อาโมวแซ บอ ดึห หนาม มัก อาโล็ง อู กาแต, อูน แคง ซีลัยะ. ปอ กาแต อัน ดึห, คร็อห ดี กาโช็ง หลู ตึอน. 7 ดอ อัน ตี อาโมวแซ บอ ดึห บับ ปี แดม อูน ดารา เฌาพรา, แตห อึณ แบน ปี ลาย กาแซณ เฌาพรา ฆาย ดูอี. อัน วี ตีห แตห ดูอี วี โทม โตต. แฮะ ฮอต, เฆ ดูอี วี ต็อห, “เย ดี โบง ดอน โมยว. เย ดี โดบ ซีคยา โฆรห เฌาพรา ปี เบลห อูน อัน. เย ดี โทม โดบ เฌาพรา.”

8 เฆ แฮะ ฮอต ต็อห ปาย ตี อาโมวแซ ดึห หนาม ปี เบลห อูน อัน แคง ซีลัยะ ตึอน, วี คร็อห ดี ดูอี กืน. อัน บอ ต็อห, “นี, อาตี แฮะ มูห หนาม อี บยัะ ลอง โฆรห ปี กาแซณ เบ ดี เฌาพรา. โฆรห ปี กาลาง อูน เฌาพรา, อึณ แฮะ มูห แฮะ หมาน ดอน โมยว.”

9 ปัน ตี บอ อาโมวแซ บอ อาโรน, อานาดาบ บอ อาบีฮู บอ เฆ ดา ตาง บู ฆึร วี ตึอน, เฆ โฮะ ดี นอน ตึอน. 10 เฆ ปึอน ดี ยึร เฌาพรา ปี กรึบ เฆ ดูอี อีซาเรลัะ. นา ครึม เปลา อัน อึณ ปี อึณเตณ ปี เบลห แซณ เงียน เบลณ. อึณ บอ บลาง ปี ฆางหราว. 11 ปาย ตี เฆ ปึอน ดี ยึร เฌาพรา. เฌาพรา ยี ตู แตห เฆ ยัม. เฆ ดา ตาง ดูอี อีซาเรลัะ, เฆ แฮะ ฮอต ยอด เฌาพรา, เฆ ยี กอย ดาคึย, ปึอน โฮม, ปึอน เดียง ปี คา อาต.

12 เฌาพรา วี ต็อห ดี อาโมวแซ, “แตห แม โฮะ ฌัม โดง กอย โอว แดง นอน นี, แตห แม กอย ดี นี. โอว ดี ดัว มาว อา ดีพลาง ดี แม. ดารา ปี ดัว โอว ดี เบ, ปี กาลาง โอว, แตห เบ โบง, โอว แฮะ แดม อูน แดง มาว อา ดีพลาง ตี, แตห แม วี มาโนว เฆ ดูอี.”

13 ปัน ตี อาโมวแซ ฆาย อาโยวซูอา อี มูห ดูอี อี จอย อัน, ฆาย วี โฮะ แดง นอน เฌาพรา. 14 อาโมวแซ วี ต็อห ดี เฆ ดา ตาง, “เบ หน็อะ ยาย โดง กอย เบ นี, แตห ยาย กอ วี ตัห ฌัม โดง กอย เบ. อาโรน ฆาย อาฮูรา ฆาย กอย รึม โดบ เบ. ดอ ตู กอย ยาย, เซ อึณ บอ มึห ปี ตู ลาย ซีเพา เบ, เบ ปึอน กาลาง ดี ฆาย.”

15 วาย อัน ตี ดอ ฮาว อาโมวแซ โฮะ แดง นอน ซีนาย ตึอน, อึณอูะ วี ปลึก นอน บอ นอน. 16-17 อาโรง บลาง เฌาพรา มืร เลห โลง กอย ดี นอน ตึอน. เฆ ดูอี อีซาเรลัะ ยี ทาง อาโรง เฌาพรา อึณ ปี เงา บลาง, เงา อี กาซึม โตต แดง นอน. อาดา เดา ซีแง อึณอูะ ตึอน วี ปลึก นอน. ดอ ฌัม ซีแง อึณบู, เฌาพรา อี กอย แคง อึณอูะ, อัน วี แดะ อาโมวแซ. 18 อาโมวแซ วี โฮะ ลึบ แคง อึณอูะ, อาว ฮู ปึอน ยึร. อัน กอย แดง นอน อาดา พวน ฆึร ซีแง ดี พวน ฆึร หมึร.