แฮะ ฮอต ปัน ตี เฌาพรา วี ต็อห,

1 “แกวะ กาลาง นา ตู หมาน ลอง อี. แกวะ จอย ดูอี ตู หมึอม อี ซี แตห แม แบน ซักเซ บอ วี กาโลว ดี กาลาง โฆรห อี ตู หมึอม ลอง อี เฮา.

2 เซ อึณ มึห ดูอี กืน อี คราม ดี โบง นา ตู หมึอม, แกวะ แตห บอ เบ โดบ เฆ. เซ อึณ มึห อามู, เบ ยี โลว แบน ซักเซ, กาลาง แคะ ปี ยึร เบ. แกวะ บยอง นา หมาน, แกวะ ต็อห นา ตู หมาน, แกวะ โดบ โฆรห เฆ ดูอี กืน. 3 เซ อึณ มึห ดูอี ฆีน อี มึห อามู ปี โลว ซูงพยาด, เซ อัน แฮะ โบง นา ตู หมึอม, แกวะ จอย อัน, แกวะ กาโลว ดี กาลาง นา หมึอม ลอง อัน.

4 เซ อึณ มึห รันซู แม, เซ มัก อาโล็ง เฆ มาโลว อัน แฮะ หราย, เซ เบ ยี วี ยึร โดว ซัด ตี, เบ โลว วี ตึย ดี ดา กาณา อัน. 5 เซ อึณ บอ มึห ดูอี รู ดี เบ, เบ บอ ยึร มาโลว ดูอี ตึอน แฮะ เกห โกบ ตู แป อัน โกรว ปี ดาง อัน, เบ โลว จอย ดูอี ตี. แกวะ แตห เบ เบลห อัน.

6 เซ อึณ มึห ดูอี ฆีน, เซ อัน ยี มึห อามู ปี โลว ซูงพยาด, แกวะ ต็อห อาว โลว ซูงพยาด อามู อัน, แฮะ ลึห ซีคยา หมาบ อัน. 7 เซ อึณ มึห ดูอี พยาก ดูอี อี ตู มึห หมาบ, เบ แกวะ โทม โฆรห ปี พยาก อัน ตี ดอ เหมา. แกวะ ซูงพยาด ดี ง็อห ยัม ดูอี อี ตู มึห หมาบ, อี ตู โบง นา ตู หมึอม. อาเซ ยี โบง ฌึร ตี, โอว เฌาพรา ตู กาเว อัน ดอ เหมา.

8 เซ เบ โลว ซูงพยาด อามู อี ดอน โมยว, แกวะ ดึห ปี หมอน อี. รึอน ปี หมอน เฆ ตี, อึณ แตห เบ ตู ยึร นา หมาน. อึณ บอ แตห ดูอี หมึอม วี ชึม.

9 แกวะ โบง นา ตู หมึอม ดี ดูอี อาโมยว เฮา, อี กอย โดง กอย เบ. เบ แฮะ นับ ดูก ปี โลว คัม ดูอี อาโมยว เฮา. โคว, บอ เบ แฮะ ดึอม กอย แคง มืง แอฆึบ ตึอน.”

วาย อัน ตี เฌาพรา วี ต็อห,

10 “อาดา เดา ซีนัม เบ โลว ซัม แบน โมยว แบน โมยว. แฮะ ฮอต, เบ โลว วี โซะ โหงว, เบต เบล แบน โมยว แบน โมยว ปี ซัม เบ ตึอน. 11 เซ ยี ฌัม ซีนัม อึณบู, เบ ตู โลว ซัม มาเซ, แตห กาดาย ดีเหลา. ซีนัม ตี, แคะ อี เลห ราง อัน, แตห เฆ ดูอี ฆีน ดึห โฮม. แคะ ปี ตู โลว เฆ, แตห อึณ บอ แบน ปี ดี โฮม เฆ โดว ซัดดาวา แคง แปร บอ เฆ มาซีม ดอน โมยว. บอ มาน มางูน บอ มาน เฮ นามัน เบ โลว โบง ปาย ตี.

12 เดา ซีแง เบ โลว โบง ฆาน. ฮี ฌัม ซีแง อึณบู, เบ แกวะ โบง ฆาน มาเซ, แตห บอ มามัก เฆ มาโลว เบ ปึอน ดี ดีเหลา. หมาย อี แฮะ กอย แคง กาง เบ ซีณ ดอ ฆึอด เฆ บอ เฆ ดูอี อาโมยว เฮา อี กอย รึม โดบ เบ, แตห บอ เฆ วี ดีเหลา, แตห เฆ วี มึห โปลม กามาย, แตห เฆ วี ดาคึย.

13 เบ โลว โบง ซีคยา ดอน โมยว ปี ต็อห โอว ดี เบ. แกวะ หมาณ ดี เฌา ปอ กาดัง, แตห เบ ซาคึร หมาณ มี ดี โอว. แกวะ แตห เบ หมาณ ดี เฌา ปอ กาดัง ดอ เหมา.”

เฌาพรา แฮะ ฮอต กาลาง ปาย ตี อัน วี ต็อห,

14 “อู ซีนัม โอย เฌณ เบ โลว โบง บลอย แตห เบ บอ โรวเซ โอว. 15 บลอย ดอ โฆว เบ โลว โบง มาเฆียน อาบีบ ตึอน. อึณ มูห มาเฆียน เหลห ดอ เลห เบ แคง มืง แอฆึบ. บลอย ตี, อึณ มูห บลอย โฮม เบ คามูน ตู มึห ซีนัม บรัห. เบ โลว โบง โดบ ซีคยา ปี จัร โอว เบ โบง. อาดา บู ซีแง แกวะ โฮม คามูน อี ฮับ ซีนัม บรัห. เซ เบ ตู มึห ปี ดี หลู ดี โอว, แกวะ ตัห ฌัม โดง กอย โอว.

16 บลอย ฮาอา เบ โลว โบง วาย แฮะ ฮอต โซะ โหงว. ดอ อัน ตี โหงว ปี โซะ เบ ดอ โฆว, เบ บอ โลว หลู ดี โอว, แตห อึณ แบน บลอย โซะ โหงว.

บลอย ฮาโอย เบ โลว โบง อาต โตต ซีนัม. วาย แฮะ ฮอต เบ เบต อูน เบล ดี เฮ แบน โมยว แบน โมยว, เบ โลว วี โบง บลอย อูน เบล.

17 อู ซีนัม โอย เฌณ เฆ อีมาย ดอน อี โลว ตัห ฌัม โดง กอย เฌาพรา อี มูห ดา กาณา อี อึบ เบ.

18 เซ เบ ดี ง็อห หลู โดว ซัดดาวา ดี โอว, แกวะ หลู บอ คามูน ปี ฮับ เบ ซีนัม บรัห.

เซ เบ หลู โดว ซัดดาวา ดี โอว ดอ โบง เบ บลอย ตึอน, แกวะ อูน เบรียง โดว ตึอน, แตห กอ ฌัม ปา แคหณา.

19 เซ อึณ มูห ปี ซัม เบ แบน โมยว แบน โมยว, ดอ กาจูห อึณ ดี เบล, เบ โลว ดึห เบล ดัง อี หมึอม หลึอม โตต, แตห เบ วี หลู ดี เฌาพรา อี มูห เฌาพรา ปี กรึบ เบ.

เซ เบ ดัง ยัง ฆอน มาแป, แกวะ ฮับ อึม ปู มา อัน.” ปาย ตี เฌาพรา แฮะ กาลาง ดารา อัน แบน โมยว แบน โมยว ดี อาโมวแซ, แตห เฆ ดูอี อีซาเรลัะ วี โทม โบง โตต ดอน โมยว.

วาย อัน ตี เฌาพรา วี ต็อห,

20 “แตห เบ ยอด, โอว ดี ตึย อามู อามาด เฌาพรา แตห อัน แยต ดี อาต เบ, แตห อัน บัร รีด เบ ดอ ฮาว เบ โดบ อึณเตณ, แตห เบ ฌัม โดง แปะ แฮะ แรน อูน โอว อาดา เบ. 21 เบ ยี โลว โทม บอ โดบ โฆรห ปี กาลาง อัน ดี เบ. แกวะ แตห เบ โทม แวน โฆรห อัน. ปวน โอว กอย ดี อัน. โคว อัน ตี, เซ เบ แวน โฆรห อัน, อัน ตู วี ฆ็อห แวน หมาบ เบ.

22 เซ เบ ยี โทม ซีคยา ปี ต็อห อามู อามาด เฌาพรา ตี, เซ เบ บอ โบง โตต ปี ต็อห โอว ดี เบ ดอน โมยว, โอว ดี วี แบน รันซู ดี รันซู เบ. โอว ดี กาโฆห ดี ดูอี อี ซี กาโฆห ดี เบ. 23 อามู อามาด โอว, อัน ดี แยต ดี อาต เบ, แตห เบ ฌัม แคง มืง เฆ ดูอี อาโมวรีด บอ เฆ ดูอี เฮทีด, ดูอี เพเรซีด, ดูอี กานัณ, ดูอี ฮีวีด บอ ดูอี เยบูซีด. โอว ดี แตห ดูอี เฆ ตี ชึม โตต. 24 เซ เบ แฮะ ตัห ฌัม แคง มืง เฆ ตี, แกวะ กรึบ อารึบ ปี กรึบ เฆ ตึอน. แกวะ โดบ ฮีด เฆ. เบ โลว แวน อารึบ ปี เบลห อูน เฆ. เบ โลว ดอย กาลาต อารึบ ปี กรึบ เฆ, แตห อึณ ชึม. 25 เบ โลว กรึบ มี เฌาพรา อี มูห เฌาพรา ปี กรึบ เบ. เซ เบ โบง ปาย ตี โอว ดี ม็องการา ดัว ปี ดี โฮม เบ บอ อึม ปี ดี เดียง เบ. โอว ดี แร เซา, แร รอฆา, แกวะ แตห เบ เซา, แตห เบ บอกาเฆลียด คัะ ฆยามซา. 26 แคง กาง เบ อึณ ตู มึห อีบึณ อึณบรอต. อึณ มืร ตู มึห อีบึณ อี หมัน. โอว ดี บอ แตห อาซาก เบ โต็ง.

27 โอว ดี แตห เฆ รันซู เบ โยว กาเซา เบ. เฆ ดูอี แคง มืง ดอน มืง, เฆ ดี กาฟัร กาเฟียน ดอ ตัห เบ. โอว ดี แตห เฆ แบน น็อห เตียะ, แตห เฆ วี ฮาว เตา ดี อาต เบ. 28 โอว ดี ตึย มากาอาณ, แตห เฆ แยต ดี อาต เบ, แตห เฆ ซูต ดูอี เฮา เลห โดง กอย เฆ. บอ เฆ ดูอี ฮีวีด, ดูอี กานัณ บอ เฆ ดูอี เฮทีด, เฆ บอกาเฆลียด ดี เตา ดอ ตัห เบ. 29 โอว ยี ตู แตห เฆ เลห โตต แคะ อู ซีนัม, แกวะ แตห มาน มืง เบ แบน แปร, แกวะ แตห มา โดว ซัด แบร กืน. 30 โอว ดี ซูต เลห เฆ อี แจก, อี แจก. แตห เบ บอ แบร, แบน ดูอี กืน, แตห เบ แป ดี อึบ มืง ตี บอ มืง.

31 โอว ดี แตห มืง เบ จูห ดี โคบ อึม ดีโหนง เรณ, แตห กอ ฌัม อึม ดึง แคง มืง เฆ ดูอี พีลีที. มืง เบ อึณ มืร จูห ดี โดง กาฮ็อห นา เตต, แตห อึณ กอ ฌัม ดี แบลง อึม ตาง อี กอย นา กัว อึณ มูห แบลง อึม อูพาราด. โอว ดี ดัว ดี เบ เฆ ดูอี อี กอย แคง มืง ตี. โอว ดี แตห เบ อึบ เฆ. เบ ยี ดี ซูต เฆ เลห แคง มืง เบ. 32 แกวะ ดัว กาดีก ซัดฌา ดี เฆ ดูอี ตึอน. เบ มืร แกวะ ดัว กาดีก ซัดฌา ดี อารึบ ปี กรึบ เฆ. 33 แกวะ แตห เฆ อาโมยว ดูอี ตึอน กอย รึม โดบ เบ แคง มืง เบ. โยว เฆ กาซูห เบ แตห เบ โบง หมาบ, แตห เบ โบง นา ตู หมึอม ดี โอว. เซ เบ กรึบ อารึบ ปี กรึบ เฆ, อึณ ดี แตห บอ เบ เทว ดี โบง ปี เฆ. แฮะ ฮอต, เบ ดี บอ ชึม อาซาก เบ.” แคะ ตี เฌาพรา แฮะ กาลาง ดี เฆ ดูอี อีซาเรลัะ.