1 ดอ อัน ตี เฌาพรา บอ ตึย อาโมวแซ ฮาว ฌัม โดง กอย คูนดีคัม พาโรว, แตห อัน ต็อห ดี อัน, “เฌาพรา ต็อห, ‘แตห แม ควาง ดูอี อีซาเรลัะ, แตห เฆ เลห ฮาว หลู ดี โอว. 2 เซ แม ตู แตห เฆ เลห ฮาว, โอว ดี แตห แม กาดูห ดูก ตาง. โอว ดี แตห มาโระ เฆ กืน ตัห ฌัม แคง มืง, แตห เฆ กอ โนะ แคง มืง บอ มืง. 3 แคง แบลง อึม นีลา ตึอน, มาโระ ดี บอ โนะ นา แคง. เฆ ดี บอ เลห แคง อึม ตึอน, ฮาว โฮะ ลึบ แคง กาง แม, ฮาว ลึบ แคง อึณอีด แม. เฆ ดี บอ กอย ดี กาโช็ง อีด แม. มาโระ เฆ ตี, เฆ ดี บอ ลึบ แคง กาง อามู อามาด แม บอ แคง กาง ดูอี ดอน อี อี กอย แคง มืง แม. เฆ ดี บอ นับ ดี ฮาว ลึบ แคง กาฟาง บอ แคง อึณปาน ปี ตา เบ โบง ปี ดี โฮม เบ. 4 เฆ ดี บอ ดัณ โฮะ ดี โดว โบ็ง แม บอ ดี โดว โบ็ง เฆ อามู อามาด แม, บอ ดี เฆ ดูอี ดอน อี อี มูห ดูอี อาโมยว แม.’”

5 แฮะ ฮอต กาลาง, เฌาพรา จัร อาโมวแซ แตห อัน กาลาง ดี อาโรน, “แตห แม ดึห อึณกรวน แม, โจะ นา แดง อึม แคง มืง แอฆึบ. บอ อึม แคง แบลง, อึม แคง โรง บอ อึม ดึง ดอน โมยว, แตห แม โจะ แด แม. มาโระ ดี บอ เลห แคง อึม, ฮาว ลึบ ดอน โปละ แคง มืง แอฆึบ.”

6 อาโรน มืร โบง ปาย ตี. แฮะ ฮอต, มาโระ บอ เลห แคง อึม, ฮาว ดอน โปละ, แตห กอ โนะ แคง มืง แอฆึบ บอ มืง. 7 เฆ ดูอี อี นับ ดี โบง มยัะหลัยะ แคง มืง แอฆึบ, เฆ ยี ฆาว ปวน ปี บึง เฆ, ณึง ปี ปาย อาโรน ดี โบง, แตห มาโระ เลห แคง อึม.

8 ปัน ตี คูนดีคัม พาโรว แดะ อาโมวแซ ฆาย อาโรน, แตห ฆาย ตัห ฌัม โดง กอย อัน. อัน มืร ต็อห, “แตห บาย ซาคึร ดี เฌาพรา. หมาณ, แตห อัน ดึห แวน มาโระ นี แคง โดง กอย โอว. แฮะ ฮอต, โอว ดี แตห ดูอี อาโมยว บาย เลห ฮาว, แตห เบ ปึอน ดี หลู ดี เฌาพรา ปี กรึบ เบ.”

9 อาโมวแซ วี ต็อห, “โอว บอ โรวเซ แม, แตห แม ปึอน กาลาง ดี โอว, ดอ เหมา โอว ดี โลว ซาคึร ดาง แม บอ ซาคึร ดาง เฆ อามู อามาด แม, บอ ดาง เฆ ดูอี แคง มืง แม, แกวะ ฮู แตห อึณ มึห มาโระ แคง กาง บอ แคง มืง, แตห อึณ มึห มี มาโระ อี กอย แคง อึม แบลง นีลา. เซ แม บอ ต็อห อาคราว อัน, โอว ดี บอ ซาคึร ดอ อัน ตี.”

10 “แตห แม ซาคึร แคหณา,” คูนดีคัม พาโรว วี ต็อห. อาโมวแซ ต็อห, “โอว ดี โบง ปี ต็อห แม ตี, แตห แม นับ, อาว มึห เฌาพรา ปอ กาดัง อี ปี เฌาพรา ปี กรึบ เย นี. 11 เฆ มาโระ ดี หราย ดี โดว แม. เฆ ดี บอ หราย แคง กาง แม บอ แคง กาง เฆ อามู อามาด แม, บอ แคง กาง เฆ ดูอี แคง มืง แม. อึณ ดี ฆีด มี มาโระ อี กอย แคง แบลง อึม นีลา ตึอน.”

12 อาโมวแซ ฆาย อาโรน แฮะ ฮอต เลห โดง กอย คูนดีคัม พาโรว ตึอน, อาโมวแซ วี ซาคึร ดี เฌาพรา, หมาณ, แตห อัน ดึห แวน มาโระ ปี เบลห อัน, อี แบน ดูก ดี คูนดีคัม พาโรว ตึอน. 13 ปัน ตี เฌาพรา มืร โทม ปี หมาณ อัน. มาโระ ตึอน บอ ยัม โตต, เฆ อี กอย แคง มืง บอ แคง กาง บอ แคง มาน ดอน โปละ. 14 เฆ ดูอี แอฆึบ วี ฆวา กาฌูะ มาโระ, แบน อึณปึม แบน อึณปึม. แคง มืง บอ มืง อึณ อูห อัม โกบ ยัม มาโระ. 15 อึณ ยี มูห คูนดีคัม พาโรว ตึอน, ดอ ยึร อัน ลอง ดูก มาโระ ตึอน อาว ฮู มึห, อัน ตู วี บยอง น็อห อัน. อัน วี กอย ปี บรีม. อัน ตู วี โทม โฆรห เฌาพรา, ตู วี โบง ปี ต็อห อัน ดี อาโมวแซ ฆาย อาโรน ตึอน. ปาย ตี อึณ แบน โตต ดอน โมยว ปี ดึอม กาลาง เฌาพรา ดี อาโมวแซ ฆาย อาโรน.

16 วาย อัน ตี เฌาพรา วี ต็อห ดี อาโมวแซ, “แตห อาโรน ดึห อึณกรวน อัน, มัห กาปูห อี กอย แดง กาดาย. วาย อัน ตี กาปูห แคง มืง แอฆึบ ดี แบน มากามูด อี ก็อะ อี.” 17 ปัน ตี อาโรน มืร มัห กาปูห ตา อึณกรวน อัน. แฮะ ฮอต, กาปูห แคง มืง แอฆึบ บอ มืง วี แบน มากามูด อี วี ตัห ก็อะ บอ ดูอี บอ โดว ซัดดาวา บอกาเฆลียด. เฆ วี กอย ดอน นา ดอน โปละ. 18 เฆ ดูอี อี นับ ดี โบง มยัะหลัยะ, เฆ วี ต็อห ดี ฆาว ปวน กานัม ปี บึง เฆ, แตห เฆ วี โบง แบน มากามูด. เฆ ยี ตู แป ดี โบง.

19 เฆ วี ต็อห ดี คูนดีคัม พาโรว, “ฌึร ตี แฮะ มูห ปวน เฌาพรา.” เฆ ปี บอ กาลาง ปาย ตี อึณ ยี ตู ลึบ แคง น็อห คูนดีคัม พาโรว, ตู แตห อัน บยอง น็อห. อึณ ตู แตห อัน โทม โบง ปี ต็อห อาโมวแซ ฆาย อาโรน ตึอน. อึณ แบน โตต ปี ดึอม กาลาง เฌาพรา ลอง อัน ตี.

20 แฮะ ฮอต ปัน ตี เฌาพรา วี ต็อห ดี อาโมวแซ, “ซีณวัห แตห แม เจว ยีต ฮาว กาตูณ คูนดีคัม พาโรว ดอ ฮาว อัน ฌัม ดี โคบ แบลง อึม. แตห แม ต็อห ดี อัน, ‘เฌาพรา ต็อห ดี แม, แม โลว ควาง ดูอี อาโมยว ปี อึบ อัน, แตห เฆ ฮาว เลห แคง มืง แม, แตห เฆ ปึอน ดี กรึบ อัน เฌา. 21 เซ แม ยี ตู แตห เฆ ฮาว, อัน ดี แตห มารอย กืน ตัห โรบ เบ. เฆ ดี ตัห กาดึม โนะ บอ โดว แม, บอ โดว เฆ อามู อามาด แม, บอ โดว เฆ ดูอี บอกาเฆลียด แคง มืง แม. มารอย ตี, เฆ ดี บอ โนะ แคง กาง เบ ดอน โปละ. บอ กาดาย โดง กอย เบ, มารอย ดี บอ โนะ.

22 ซีแง ปี โบง อัน ปาย ตี อัน ยี ตู แตห มืง โฆวเซน ปี ดอน โปละ. อึณ มูห โดง กอย ดูอี อาโมยว ปี อึบ อัน. โคว, อัน ตู แตห มารอย ลึบ. ปาย ตี เบ ดี บอ นับ, อึณ มูห เฌาพรา, อี กอย แคง มืง เบ. 23 อัน ดี กาย็อห ดูอี อาโมยว อัน บอ ดูอี อาโมยว แม, แกวะ แตห เฆ โลว คัม ดูก อู โมยว. แคหณา อัน ดี โบง นา หมึอม อาม ปาย ตี แตห เบ บอ นับ แคะ ตาง ปวน อัน.’”

24 เฌาพรา แฮะ ฮอต กาลาง ปาย ตี อัน มืร โบง ปี ต็อห อัน. มารอย ตึอน ตัห แบน พึง แบน พึง. เฆ ตัห กาดึม กาง คูนดีคัม พาโรว บอ กาง เฆ อามู อามาด อัน. มารอย เฆ ตี, เฆ โบง แตห อึณ ลึร โตต ดอน โมยว แคง มืง บอ มืง. 25 ดอ อัน ตี คูนดีคัม พาโรว แดะ อาโมวแซ ฆาย อาโรน ตัห ฌัม โดง กอย อัน. อัน ต็อห ดี ฆาย, “แตห เบ ดอน อี ฮาว หลู ดี เฌาพรา ปี กรึบ เบ, แตห เบ ยี หลู ดี อัน แคง มืง โดง กอย เบ ตี.”

26 อาโมวแซ วี ต็อห, “เย ตู ปึอน โบง ปาย ตี. ปี ปาย เย ดี กรึบ, โดว ซัดดาวา ปี ดี โลว หลู เย ดี เฌาพรา, เฆ ดูอี แอฆึบ ตู อึง. เซ เฆ ยึร ปี หลู เย, เฆ ยี ทาง อาว หมึอม. โยว เฆ ดี บอ ดึห มาว, วึณ เย, ง็อห ยัม อาซาก เย. 27 เย โลว ฮาว โดบ อึณเตณ อาดา โอย ซีแง, แตห เย ฮาว ฌัม อู โปละ แคง แปร ง็อง. แฮะ ฮอต, เย โลว หลู ดี เฌาพรา ปี กรึบ เย, แตห อึณ ปี แปะ แฮะ ดัม เฌาพรา เย โบง.”

28 ปัน ตี คูนดีคัม พาโรว วี ต็อห, “โอว ดี แตห เบ ฮาว แคง แปร ง็อง ตี, แตห เบ หลู ดี เฌาพรา ปี กรึบ เบ. โอว ยี ตู แตห เบ ฮาว โต็ง. ดอ ตี นี, โอว ยี หมาณ, แตห แม ซาคึร ดาง โอว.”

29 อาโมวแซ วี ต็อห, “โอว ฮี ฮอต เลห แคง โดง กอย แม นี, โอว ดี ซาคึร ดาง แม อู เฌณ. แคะ กืน มารอย ดอ ตี นี, แคหณา เฆ ดี บอ หราย, แกวะ ฮู แตห เฆ มึห โดง กอย แม, บอ โดง กอย เฆ อามู อามาด แม, บอ โดง กอย เฆ ดูอี กืน. แม ยี โลว ซาดีก, แกวะ แตห แม วี กาโลว เย, แกวะ ฮู แตห แม บยอง น็อห, ตู วี ควาง เย ฮาว หลู ดี เฌาพรา.”

30 ปัน ตี อาโมวแซ เลห โดง กอย คูนดีคัม พาโรว, วี ซาคึร หมาณ ดี เฌาพรา. 31 เฌาพรา มืร โทม ปี ซาคึร อัน. มารอย ตึอน บอ หราย โดง กอย คูนดีคัม พาโรว บอ โดง กอย เฆ อามู อามาด อัน บอ โดง กอย เฆ ดูอี กืน. แคะ กืน เฆ อาต ซาคึร อัน, อู โดว มืร อาว ฮู วี มึห. 32 ปอ อู เฌณ คูนดีคัม พาโรว ตึอน เบลห น็อห อัน ปี คา อาต. อัน ตู วี ควาง เฆ ดูอี อีซาเรลัะ เลห ฮาว.