วาย อัน ตี เฌาพรา วี ต็อห ดี อาโมวแซ, “แตห แม โทม ซีคยา. โอว ดี แตห อีกัด แม ฮาว กาลาง ดี คูนดีคัม พาโรว. โอว ดี แตห อาโรน กาลาง โฆรห แม ดี คูนดีคัม, แตห อึณ ปี ดูอี บยาน โฆรห เฌาพรา วี แค โฆรห เฌาพรา ดี อี เฮา. 2 ปาย ตี ปี ดี กาลาง แม ดี คูนดีคัม, อึณ ปี โอว กาลาง โฆรห ดี อัน. แคะ ปี ต็อห โอว ดี แม ดอน โมยว แม โลว วี กาลาง ดี อาโรน. แฮะ ฮอต, อาโรน ดี วี แค ดี คูนดีคัม, แตห อัน แตห เฆ ดูอี อีซาเรลัะ เลห แคง มืง อัน. 3 โอว ดี บยัะ นา หมึอม อาม กาเซา ดี เฆ ดูอี แอฆึบ, แตห อึณ แบน น็อห โยว ดี เฆ. โอว ยี ดี วี แตห น็อห คูนดีคัม พาโรว ตู บยอง ดอ เหมา. 4 อัน ตู วี โทม โฆรห แม. ดอ อัน ตี โอว ดี วี แตห เฆ ดูอี แคง มืง แอฆึบ วี กาดูห ดูก ตาง, แตห เฆ คัม หมาบ เฆ, แตห เฆ นับ ปวน โอว. ปัน ตี โอว ดี ตึย เฆ ดูอี อีซาเรลัะ ดอน ครึร, แตห เฆ เลห ฮาว ตัะ มืง แอฆึบ. 5 ดอ อัน ตี เฆ ดูอี แอฆึบ ดี บอ นับ, อึณ มูห โอว อัน เฌา, โอว แฮะ บยัะ ปวน ตาง ดี เฆ, โบง นา ตู หมึอม ดี เฆ. โคว, เฆ ดี แตห เฆ ดูอี อีซาเรลัะ เลห ฮาว ตัะ มืง เฆ.”

6 วาย อัน ตี อาโมวแซ ฆาย อาโรน โบง โตต ดอน โมยว ปี กาลาง เฌาพรา ดี ฆาย. 7 ดอ ฮาว กาลาง ฆาย โฆรห ดี คูนดีคัม พาโรว ตึอน, อาซาก อาโมวแซ แฮะ โนะ ดา ฆึร ซีนัม. อาซาก อาโรน ยี แฮะ โนะ ดา ฆึร ดี โอย ซีนัม.

8 วาย อัน ตี เฌาพรา วี ต็อห ดี อาโมวแซ ฆาย อาโรน, 9 “เซ คูนดีคัม จัร บาย โบง นา หมึอม อาม กาเซา, แตห แม กาลาง ดี อาโรน. แตห อัน ฌัต อึณกรวน ปี โฆ็ง อัน, แตห อึณ โจห นา อาต คูนดีคัม พาโรว. อึณกรวน ตี ดี วี แบน มาฮัณ อู เฌณ.”

10 ปัน ตี อาโมวแซ ฆาย อาโรน บอ ฮาว กาลาง ดี คูนดีคัม พาโรว, โบง โตต ปี จัร เฌาพรา ฆาย โบง. อาโรน มืร ฌัต อึณกรวน อัน นา อาต คูนดีคัม พาโรว บอ นา อาต เฆ อามู อามาด อัน. แฮะ ฮอต, อึณกรวน ตี วี แบน มาฮัณ. 11 คูนดีคัม พาโรว แดะ เฆ ดูอี อี มึห อางยาน บอ เฆ ดูอี อี นับ ดี โบง มยัะหลัยะ. เฆ บอ ฆาว ปวน ปี หณึม เฆ, ณึง ปี โบง อาโรน ตึอน. 12 ดอน อี บอ ฌัต อึณกรวน อัน, แตห อึณ บอ แบน มาฮัณ. อึณกรวน อาโรน ตึอน ยี แมง บลึอบ อึณกรวน เฆ ดูอี เฮา ดอน ณ็อง. 13 คูนดีคัม พาโรว มืร ยึร ดอน โมยว ปาย ตี. อึณ ยี ตู แตห อัน บยอง น็อห. อัน ตู โทม ปี ต็อห อาโมวแซ ฆาย อาโรน ตึอน. อึณ แบน โตต ดอน โมยว ปี ดึอม กาลาง เฌาพรา ดี ฆาย.

14 วาย อัน ตี เฌาพรา วี กาลาง ดี อาโมวแซ, “คูนดีคัม พาโรว มึห น็อห ดืร ปี บรีม. อัน ตู ซี แตห ดูอี เลห ฮาว. 15 แคหณา ซีณวัห แม โลว ฮาว หน็อะ อัน ดอ ฮาว อัน วีน ดี แล กาตัด บาง อึม. แตห แม หน็อะ อัน กาตัด แบลง อึม นีลา ตึอน. แตห แม วี โฆ็ง อึณกรวน อี ดึอม แบน มาฮัณ ตึอน. 16 แม ฮี ยึร คูนดีคัม, แม โลว ต็อห ดี อัน, ‘เฌาพรา ปี กรึบ เฆ ดูอี แฮแบร, อัน แฮะ จัร โอว ตัห ฌัม โดง กอย แม. อัน จัร โอว กาลาง ดี แม, “แตห แม แตห เฆ ดูอี อาโมยว โอว ฮาว, แตห แม แตห เฆ ฮาว หลู ดี โอว แคง แปร ง็อง.” กอ ฌัม อาตึร แม ยี ตู โทม ปี ต็อห โอว ดี แม. 17 ดอ ตี นี เฌาพรา วี ต็อห, อัน ดี แตห แม นับ, อัน มูห อัน เฌา. อัน เฌา ต็อห, โอว ดี มัห อึม แคง แบลง อึม ตี, ตา อึณกรวน นี. อึม ดี บยอง แบน หนาม อู เฌณ. 18 ปัน ตี เฆ มาฆา อี กอย แคง อึม, เฆ ดี ยัม. อึม อึณ ดี บอ อูห แคว, แกวะ แตห เฆ ดูอี แอฆึบ ปึอน ดี เดียง.’”

19 ปัน ตี เฌาพรา จัร อาโมวแซ กาลาง ดี อาโรน, แตห อัน ต็อห, “ดึห อึณกรวน แม, โจะ โซ็ง นา แดง อึม ดอน โปละ อี มึห แคง มืง แอฆึบ. บอ มูห อึม แคง แบลง, อึม แคง โรง, อึม ดึง บอ อึม กัง ดอน โมยว, แตห แม โจะ อึณกรวน แม นา แดง. แฮะ ฮอต, อึม ดี บยอง แบน หนาม อู เฌณ. ปาย ตี อึณ ดี มึห หนาม แคง มืง แอฆึบ บอ มืง. อึณ ดี บอ กอย แคง อึณตีณ บอ แคง กาโละ กาดาย เบ.”

20 อาโมวแซ ฆาย อาโรน มืร โบง ปี กาลาง เฌาพรา ดี ฆาย. อาโรน วี โจะ อึณกรวน อัน แตห บอ คูนดีคัม พาโรว บอ เฆ อามู อามาด อัน ปึอน ดี ยึร. อัน บอ มัห อึม แคง แบลง อึม นีลา ตึอน. ปัน ตี อึม วี บยอง แบน หนาม อู เฌณ. 21 มาฆา อี กอย แคง อึม ตึอน, เฆ บอ ยัม โตต. อึม แคง แบลง อึม นีลา มืร อูห แคว กาเซา, แกวะ ฮู แตห ดูอี ปึอน ดี เดียง. หนาม บอ มึห ดอน นา ดอน โปละ แคง มืง แอฆึบ.

22 เฆ ดูอี อี นับ ดี โบง มยัะหลัยะ แคง มืง แอฆึบ วี ฆาว ปวน กานัม ปี บึง เฆ, วี ณึง ดี โบง หนาม. คูนดีคัม พาโรว ยี ตู บยอง น็อห อัน. อัน ตู วี โทม โฆรห อาโมวแซ ฆาย อาโรน, แตห อึณ แบน โตต ดอน โมยว ปี ดึอม กาลาง เฌาพรา. 23 อัน วี เวณ แคง โฮว อัน, แกวะ แตห อึณ ลึบ แคง น็อห อัน. อัน บอ เบลห น็อห อัน, แกวะ แตห อัน โทม ดอ เหมา. 24 เฆ ดูอี แอฆึบ ดอน อี ยี ฮาว ฆึห ดีโฆละ โคบ แบลง อึม, แตห อึม เลห โกบ ตู ปึอน เฆ ดี เดียง อึม แคง แบลง อึม ตึอน.

25 อึณ กอ โนะ บู ซีแง เฌาพรา แฮะ แตห เฆ กาดูห ดูก ตี.