Manyvo Janejare'e remimota rupi janeikoa rewarà
13
Tijajiauvay jẽ ojeeve jaiko ipi, Jesu koty rewarà kõ rõmõ. Ãwitõ joeke'yry wauvay omõmirĩ ipi, tãwĩvo jaiko ojee. 2 Mirà janeremikuwa e'ã uu janepytery pè remẽ, tijaja'a katu ve ee ipi. A'evo jane kõ mõ yvapewarà kõ rè sikaepo oja'a katu uu ipyterà kõ pè remẽ.a 3 Ãmõ, jimopã'ãga pupe tui mãe kõ rè tijaja'a katu teve ipi. Janemopã'ã sõ remẽ, japota kuwa janere toja'a kupa. Ajawyi a'evo mãe kõ rè tijaja'a katu ipi. Ãmõ, ojimomorijau mãe kõ rè teve tijaja'a ipi. Jajimomorijau remẽ, japota teve kuwa janere toja'a kupa. Ajawyi a'evo tijaiko nijajimomorijaui remẽ.4 Ãmõ, kee a'e teve erekwa mãe kõ pè. Ikatu ikõ tapeiko penerekwarà kõ reve nẽ, a'e pejẽ. Aepo a'e teve wãivĩgwerà kõ pè. Ikatu ikõ tapeiko pemẽnà kõ reve nẽ, a'e pejẽ. Ãmõ kõ rè sõ pejimomy'a peiko remẽ, “Nivoi mã'ẽ tè ãwĩ kõ”, e'ità Janejare'e pejẽ ãmẽ, poromoe'yi remẽ. Pirujẽ ojimomy'a mãe kõ pè aepo e'ità.
5 Ãmõ, kee a'e pejẽ. Karakuri moatya rè ywesõ rõwã tapeja'a ipi. Manyvo peiko remẽ, tapepy'a katu jẽ peiko, [Janejare'e oja'a pene ipi rewarà mõ]. “Noporoity'ãi penereko”, e'ipa Janejare'e janeupe. 6 Sikuwa a'evo Janejare'e janerereko ipi. Ajawyi kee tija'e jajimokasia mõ:
“Erõvijã ywete tè epãtavõarà mõ ekoi. Ajawyi nakyje'ãi.
Ava nemoai kuwa'ãi”, tija'e jajimokasia mõ.b
7 Ãmõ, kee a'e teve pejẽ. Penõvijãgwerà kõ rè ikõ tapeja'a teve ipi nẽ, a'e pejẽ. Janejare'e ayvu omojenu pejẽ maekwerà kõ rè tapeja'a jẽ teve. Janejare'e rè ojirovija karuaru kupa maekwerà kõ rè tapeja'a jẽ teve. Ekoawerà kõ rè tapeja'a peiko ipi, eruparà kõ rõmõ tapeiko. Jesu Kiristu rè tapejirovija karuaru ivo kõ jẽ peiko. 8 Temirovija teãmã Jesu Kiristu. Niteei mã'ẽ rõmõ ekoi. Ãwitõ karamoe remẽ ekoi, ãwĩvo jẽ age'e remẽ ekoi. Mãerã tè ãwĩvo jẽ ekoità.
9 Ajawyi ava mõ sõ ãmõ rupi tè mã'ẽ pè, “Kee e'i Janejare'e mã'ẽ”, e'i remẽ, tapejimoripeoka ywe'e tite e'ã apijarà pè. Tapeity ywe'e tite e'ã Janejare'e ayvukwerà ipi. Janejare'e tè okatuaya rupi tè janerereko katu janepy'amokasi ipi. Ajawyi ava mõ sõ kee e'i peupe remẽ, “aje” tapejẽ tite e'ã: “Iteetejẽ rõwã tape'u”, e'i sõ peupe remẽ. Ãmõ, “Iteetejẽ sõ pejimi'u! Ãwĩvo remẽ Janejare'e naory'ãi pene”, e'i tite sõ peupe remẽ, “aje” tapejẽ tite e'ã. Wãisõ e'i mã'ẽ rè tapejimoripeoka e'ã. A'evoa rupi tekoua nijanepy'amokasioka'ãi ãmẽ ipi. Nijanepãtavõ'ãi teve aepo jaa.
10 Kee jaa rè tapeja'a. Jesu omãnõ janerereko katuarà rõmõ. Ojime'ẽma janeupewarà mõ omãnõ. Ajawyi tè jajimory kuwa Janejare'e rè ky'y. Tãmõ Moisesi remikusiwarerà rupi ekoi mãe kõ nojimory'ãi kuwa Janejare'e rè ipi. Manyvoa rã rõmõ rõwã ojimoane'e jẽ teima kõ jukaa rè iko kupa ipi. A'e kõ novãe'ãi Janejare'e pyri janevo Jesu rupi javãe mãe kõ rõmõ.
11 Ãmõ, kee a'e pejẽ. Kwaray upi upi Janejare'e pè oporegeta mã'ẽ rõvijã wasu ojuka teima mõ ipi. A'e ruwykwerà pẽ weroike Janejare'e tui upa mã'ẽ pè imojikuwaoka ijupe, “awyjepa” te'i mirà kõ aiwererà pè. Kamisa kupe kytyre weroike. A'evo paire teima reãgwerà weraa Jerusarẽ taa kupe kyty kupa ipi. A'e pè eãgwerà wapy kupa ipi. 12 Ajawyi Jesu omãnõ janeaiwererà repykarà mõ remẽ, Jerusarẽ taa kupe kyty omãnõ. A'evo oitypypyipaoka janeaiwererà kõ janewyi, omãnõa rupi, owykwerà rupi. 13 Jinõsĩa rõmõ tesõ omãnõ janeupewarà mõ. Temiojai rõmõ tesõ omãnõ. Ajawyi janerojai kupa remẽ, Jesu rè kõrijõ tè tijajirovija ãmẽ jaiko. 14 Nuvei janerena e'e ike yvy pè, nopa'ãi mã'ẽ. Ajawyi siãrõ jẽ janerena e'e rã jakupa ipi, Janejare'e reve janeikoa rã. 15 Ajawyi Janejare'e simoe'e py'y py'yi jaiko, Jesu kasia rupi. A'evoa kõrijõ tè janeremime'ẽ rõmõ ijupewarà mõ ky'y. A'evo jaiko teãmã, “Erõvijã ywete Jesu!” ja'e mãe kõ rõmõ.
16 Tijaja'a katu ãmõ kõ rè teve jaiko ipi. Toporoereko katu poropãtavõa rè poroereko ipi. A'evo jaiko remẽ, Janejare'e py'a rupi katuwarà kõ mõ ãmẽ jaiko. Janejare'e pewarà janeremime'ẽ maevo sõ tite ijupe a'evo jaiko mã'ẽ.
17 Ãmõ, kee a'e pejẽ. Tapeenu katu penõvijã kõ ayvukwerà ipi, Jesu koty rewarà kõ rõvijã kõ ayvukwerà. Pemogeta kupa remẽ, ijayvu rupi ikõ tapeiko ipi nẽ. Oja'a py'yi pene kupa ipi. Kãramõ ojimome'utà Janejare'e pè manyvo wereko oja'a pene maekwerà rè kupa. Ajawyi taperovija kõ ipi. Orytà ãmẽ oposiko pene kupa. Naperovija kõi sõ remẽ, ijãgyo kõrijõtà oposiko pene ãmẽ kupa. A'evo peikoa napepãtavõ'ãi kuwa.
18 Tapeporegeta jẽ Janejare'e pè oreupewarà mõ ipi. Orokuwa noroinõ gatui oreaiwererà mõ orepy'a pupe ipi. Oropota ivo kõrijõ tè oroiko ipi. 19 Apota Janejare'e emojivyoka pekoty kuise'ẽ. A'evoa rè ywesõ tapeporegeta Janejare'e pè eupewarà mõ ãmẽ ipi.
20 Ãmõ, kee a'e pejẽ. Ãwitõ kaneiru jarà weima kõ rè oja'a katu ipi, ãwĩvo ve Janerõvijã Jesu oja'a katu janere iko ipi. Omãnõa rupi janerereko katu teve ipi. Omãnõ maire Janejare'e omomoeraoka toiko mijẽ aekwery vo toiko iko. Jesu ruwykwerà rupi janerereko karuarua ojiãparõma janere. Janepy'amopiryvypy katuarà tè Janejare'e. 21 A'e pè aporegeta peupewarà mõ aiko ipi. Kee a'e ijupe: “Epãtavõ eretãrãgwerà kõ, Papa. Emokasi kõ neremimota rupi toiko kupa. Nekasia rupi tè a'evo ereko kõ. Nera'yry Jesu Kiristu oremoteeoka tè jẽ nepy'a rupi katuwarà mõ toroiko, okasia rupi, Papa”, a'e ijupe. Janejare'e kuwasi jamoe'e karuaru ipi mijã. Õ'õ, awyje katu ãwĩvo jamoe'e karuaru jaiko.
Kareta moawyjepaa
22 Aã kareta pemotekokuwaa mõ akusiwa pejẽ ajupa, eretãrãgwerà kõ. Nakusiwa pukui. Ajawyi imojenua rè pejapyaka remẽ, “hoõ” tapejẽ kõrijõ ãmẽ enu. Tapejimõarõ e'ã enu ãmẽ ipi.
23 Kee a'e jẽtà pemogeta, tapekuwa. Janeretãrã Timoteu oẽma jimopã'ãga pupe wyi ky'y. Novãeive epyri ajamã'ẽ. Ovãe sõ kuise'ẽ remẽ, araatà erupi penesa.
24 Apota ajimory pene pirujẽ, eremikusiwarerà rupi. Penõvijã kõ rè apota ajimory. Pirujẽ Jesu koty rewarà kõ rè teve apota ajimory. Aepo a'e tapekuwa. Ikewarà kõ Itaria yvy pewarà kõ opota ojimory pene teve ekareta rupi.
25 Janejare'e ikõ tapenereko katu okatuaya rupi penereko nẽ. [Awyjepa rã'ĩ akusiwa pejẽ ãmẽ ky'y.]