“Jesu rè jẽsi tijaja'a jajimokasi mõ”, e'i mã'ẽ
12
A'evo 'evo karamoewarà kõ ekoi. Ojirovija karuaru itõkõ Janejare'e rè kupa ipi. Omãnõ tarà mẽ, ojirovija jẽ ee kupa. Ijatyray a'evo ekoi mãe kõ. A'e kõ pytery pè jaiko maevo sõ tite. Ekoawerà kõ rè tijaja'a jajimokasi jaiko, eruparà kõ rõmõ tijaiko ãmẽ. Uve iteetejẽ Janejare'e rè nijanemoja'arokari ipi mãe kõ.a Niwasui ãwĩ rapijarà poromopã'ãoka ipi. A'evo jaiko remẽ, ãpẽi maevo sõ tite jajirovija Janejare'e rè ipi. Ajawyi kee a'e pejẽ. Tijaity ãwĩ rapijarerà, a'e pejẽ. Ãwitõ pãnakõ ipowyijay mã'ẽ jaity ipi, tãwĩvo ãmẽ jaiko ky'y. Tijaitypypyipa ikõ ãwijã nẽ. Tijajimokasiay Janerõvijã rekoa rupi jaiko, ajaate ipyri javãe ky'y. 2 Jesu rè ikõ tijaja'a ywete jẽ ipi nẽ. Janerenoneporà tè Jesu. A'e tè Janejare'e rape oinõ janeupe. Ãwitõ pee wãparõ, ãwĩvo ve janereraatà upi ajaate javãe, jajirovija jẽ ee remẽ. Noity'ãi Uu rerovijaa mã'ẽ tè itõkõ Jesu. Yvyra jipokana rè omãnõ remẽ, Uu remimota rupi ekoi jẽ ipi. Oorya rã rè oja'a amãtejẽ. Ajawyi ojukaa rã rè noja'ai ãmẽ. Werõarõa rè noja'ai teve. Oorya rã rè kõrijõ tè oja'a amãtejẽ, Uu pyri janereraatà mãe rã rè tè oja'a. Ajawyi Uu pyri ekoipa ky'y. Wapy ipyri upa, Jõvijã wasu rõmõ. 3 Jesu ojimokasi jẽ Uu remimota rupi iko, nivoi mãe kõ omomorijauvay ipe remẽ. A'e a'e rè tapeja'a jẽ pejimokasi mõ peiko, nivoi mãe kõ pemomorijau remẽ ipi.“Janejare'e janemomorijau rã'ĩte janemotekokuwaa mõ ipi”, e'i mã'ẽ
4 Kee jaa rè tapeja'a. Nivoi mãe kõ pemomorijau ipe, Jesu rè pejirovija rewarà mõ. Ajamã'ẽ napejukaive kupa. Pejuve jẽ peiko. Ajawyi tapejimokasi jẽ ikõ Janejare'e rè peiko nẽ, pemãnõ e'ãve, a'e pejẽ. 5-6 Janejare'e “eãkarãgwerà” e'i jane ipi. Ajawyi janemomorijauoka rã'ĩte janemotekokuwaa mõ ipi. Ajare kee e'ipa itõkõ janemokasia mõ:
“Eãkarãgwerà, Janerõvijã ywete nemomorijau neaiwererà rewarà mõ remẽ,
tereenu rã'ĩ ijayvukwerà nejimotekokuwaa mõ.
Terejimõarõ e'ã enu.
Terejimokasiay jẽsi ee neiko ipi.
Wemiauvay kõ omomorijau rã'ĩ imotekokuwaa kõ rõmõ ipi.
A'evo wereko wãkarãgwerà kõ ipi”, e'ipa itõkõ.b
Aekwerà rupi katu janerereko ipi. Ajamã'ẽ penearaipa maevo aepo jaa wyi peiko ky'y. Ajawyi tapeja'a ywete jẽ ee pejimokasia mõ ky'y, a'e pejẽ.
7 Janeruu kõ janemomorijau teãmã janemotekokuwaa mõ ipi. Ãwĩvo ve Janejare'e janerereko wãkarãgwerà kõ rõmõ ipi, [tijajimoane'e e'ã janeaiwererà rè jaiko]. Ajawyi tapejimõarõ e'ã pemomorijau rã'ĩte remẽ, a'e pejẽ. 8 Janejare'e wãkarãgwerà kõ pirujẽ omomorijau rã'ĩte imotekokuwa kõ ipi. Napemomorijaui sõ pemotekokuwaa mõ remẽ, wãkarãgwerà kõ rõmõ rõwã penereko kuwa ãmẽ mijã. 9 Janeruu kõ yvy pewarà janemomorijau janemotekokuwaa mõ remẽ, jarovija kõ imomojy kõ ipi. Tysi tõ Janeruu yvapewarà ky'y! A'e ywesõ sirovija katu imomojy ipi. A'evo jaiko remẽ, jaiko jẽtà jaiko. 10 Janeruu kõ janeaiwererà rè omã'ẽ remẽ, janemomorijau rã'ĩ janemotekokuwa wekoa rupi ipi. Nipukui a'evo janerereko kupa ipi. “I'ete moko oroereko remẽ”, e'i jane kupa ipi. Ãwĩvo ve Janejare'e janemomorijau rã'ĩte janemotekokuwaa mõ. Janemokatua mõ tè a'evo janerereko ajamã'ẽ, ãwisõ ivo katua rupi tijaiko eruparà mõ ky'y. 11 Janejimomorijaua nijapotai epe ipi, ayay ipi rewarà mõ. Ajamã'ẽ kãramõ janemotekokuwapa remẽ, “I'ete emomorijauawerà”, ja'età ky'y. Ivopa jaiko wyi aepo ja'età kõrijõ tè janemotekokuwaa pè ky'y. Janepy'a katupa wyi aepo ja'età ky'y.
“Tijaity e'ã Janejare'e janerereko katua”, e'i mã'ẽ
12 Ajawyi kee a'e pejẽ. Pejimomorijau remẽ, tapejirovija jẽ Janejare'e rè peiko. Tapejipykãtã jẽ ee. 13 Tapejimokasi oterẽ jẽ ekoa rupi tapeiko. A'evo peiko remẽ, pevoarà kõ ve pevo jẽ ojimokasi jẽtà iko. Nikasi ywe'ei mãe kõ ve noity tite'ãi Janejare'e ãmẽ. Ojimokasi tary ve ãmẽ kupa.
14 Tapejimokasi ywete jẽ ãmõ kõ rè pejimory rõmõ ipi. Ivo tapeiko Janerõvijã ywete pewarà kõ rõmõ peiko jẽ ipi. Ãmẽ tè Janerõvijã ywete pyri peiko karuarutà ãmẽ. Ava jẽ rõwã omã'ẽ kuwa ee, na'evoi sõ remẽ. 15 Tapejireko katu ikõ pirujẽ peiko nẽ, ava jẽ rõwã tojisyry tite e'ã Janejare'e wereko katua wyi. Tapejimõarõ e'ã teve. Pe'ĩte ipe pejimõarõtà. A'e ve penoupatà ky'y. Ajawyi tapejireko katu ikõ peiko a'evoa wyi nẽ, a'e pejẽ. 16 Ãwĩvo ve tapejireko katu, ava jẽ rõwã ojimomy'a mã'ẽ rõmõ toiko. Ikatuay wete Janejare'e wãkarãgwerà kõ rõmõ janereinõ tijaiko. Ajawyi kee taoty e'ã: “Manyvoa rã rõmõ rõwã Janejare'e ãkarãgwerà rõmõ aiko”, taoty e'ã. Tãmõ Esau reruparà mõ tapeiko e'ã ipi. A'e teipe jõvijã rõmõ ekoità mijã, uu ayvu rupi. Ajamã'ẽ kee e'i itõkõ: “Manyvoa rã rõmõ rõwã erekoa rã. Amãnõtà amyay pè”, e'i tite oupe. Ajawyi itõkõ ome'ẽma ywe'e tite jõvijã rõmõ oikoa rã omõmirĩ pè wemi'õ ra'yrygà repy rõmõ!c 17 Ajawyi itõkõ a'evo paire tè tite ijãgyo tesõ ky'y. Ãmẽ tè tite itõkõ: “Moma'e rã sõpõkõ ame'ẽma!” e'i tite wãgyo mõ ky'y. Ajawyi itõkõ ojirojivy jẽ tite javo uu pè. Kee e'i epe ijupe: “Emoryoka jẽsi Janerõvijã ywete pè rejupa, ikatuay taiko, papa!” e'i epe uu pè ky'y. Oja'o tesõ itõkõ uu rovake aepo e'i remẽ. Ajamã'ẽ tuu kee e'i ijupe: “Manyvo noroereko'ãi ky'y, tuku!” e'i itõkõ ãmẽ ijupe. Eruparà mõ tapeiko ywe'e tite e'ã ajawyi! a'e pejẽ.
Mõrijõ yvytyry kõ rè tè poromosã'ãga mã'ẽ
18 Janerãmõi kõ vo rõwã javãe Janejare'e pyri ky'y. [A'e kõ itõkõ Sinai yvytyru ypy pè ojimoaty oporegetatà ijupe kupa.] Ipojy tesõ a'evo remẽ. Ãmẽ itõkõ Janejare'e reny okai maevo sõ tite yvytyrapyte 'aryvo upa. Tata wasu vo okai. Omoãpatõ tesõ tata rãtasĩ upa. Ijyvytu ai teve ipi. 19-20 Ãmẽ itõkõ jimi'a puku ojenu rã'ĩ ijupe kõ. Janejare'e poregeta tẽ tesõ ojenu teve ijupe kõ, Isaeu kõ pè. Wayvo tesõ ojenu yvytyrapyte 'aryvo wyi. Kee e'i itõkõ Janejare'e ojimomojyoka ijupe kõ: “Tapepãrõ e'ã erena pè, aã yvytyry pè. Teima kõ ve topãrõ e'ã. Mijarà kõ ve”, e'i itõkõ. “Opãrõ sõ eyvy pè mã'ẽ tapejapi japi takuru pè ijuka ikenẽ”, e'i itõkõ. Aepo Isaeu kõ wenu remẽ itõkõ, okyje ai tesõ enu kupa. Ajawyi tãmõ Moisesi pè kee e'i kupa: “Ene jẽ ipãwĩ ivo katu nemogeta. Ajaire e'i mã'ẽ nemojenutà oreupe”, e'i kupa. 21 Ojimonyijay tesõ ee omãjã kupa. Tãmõ Moisesi ve tesõ okyje ijayvu renu. Ajawyi kee e'i ajaire: “Atytypa tesõ akyje rõmõ aiko iwyi!” e'i imojenu.
22 Gyjea rupi rõwã javãe Janejare'e pyri ky'y. Oiko jẽ iko mã'ẽ pyri javãe ky'y. Ena pè tẽ tesõ javãe. “Jerusarẽ yvapewarà” eu ena pè. Sião yvytyry 'aryvo tui. Ijatyray emĩgwai yvapewarà kõ a'e pè ekoi. A'e kõ nijamoirõ irõma kuwa'ãi tesõ. A'e kõ pytery pè jaiko maevo sõ tite, Janejare'e rè oryvay mãe kõ rõmõ jaiko.d 23 Jesu koty rewarà kõ atyry a'e pè ekoi. A'e kõ pè Janejare'e “eãkarãgwerà ypykwerà kõ” e'i. Erà kõ ojikusiwapa ena pè, [ipyri oiko karuarutà mãe kõ rerà rõmõ]. A'e kõ pytery pè jaiko maevo sõ tite. Janejare'e pyri tẽ tesõ jaiko. Ivo katu poromosã'ãga poromoe'yi mã'ẽ tè a'e. A'e pyri jaiko. Ãmõ, mirà kõ omãnõma mãe kõ 'ãg kõ a'e pè ekoi. A'e kõ ojirovija karuaru Janejare'e rè, yvy pè ekoi jẽ kupa remẽ. Age'e Janejare'e reve i'ãg kõ ekoi ky'y. Ikatuay wete ekoipa kupa, Janejare'e kasia rupi. A'e kõ reve maevo sõ tite teve jaiko Janejare'e pè japoregeta remẽ.e 24 Jesu pyri javãema ky'y. A'e tè janereko pyaukwerà ome'ẽma janeupe. Omãnõa rupi janereru Janejare'e pyri. Ajawyi tãmõ Apeu mãnõawerà vo rõwã Jesu mãnõawerà. [Apeu reke'yry ojuka remẽ itõkõ, Apeu ruwykwerà eamai maevo sõ tite yvy pè upa. “Mape remẽ põ erepytà rejupa!” e'i weamai rõmõ.] Jesu sõsi janeaiwererà omoepypa owykwerà rupi, Janejare'e pyri tijaiko ky'y.
25 Ajawyi tapejirojivy ywe'e tite e'ã aekwerà kyty! a'e pejẽ. Tapejimokasi jẽsi Janejare'e ayvu renu peiko. Karamoewarà kõ vo rõwã tapeiko. A'e kõ itõkõ ojimoape kõrijõ Janejare'e ayvu renu tare'ã, tãmõ Moisesi omojenu remẽ. Ajawyi itõkõ Janejare'e omoma kõ jimo'yjẽ. Yvy omotytyoka ijapisioka kõ.f A'evo wereko kõ tãmõ Moisesi remimojenu noenu tari kupa remẽ. Tysi tõ yva pe wyi tẽ tesõ oporegeta janeupe remẽ, nijaenu tari remẽ! 26 Tãmõ Moisesi kõ pè oporegeta remẽ itõkõ omotytyoka tesõ rã'ĩ yvy. Okasia rupi a'evo Janejare'e werekooka. Aekwerà rè kee e'i ikusiwaoka: “Kãramõ aekwery vo tarà mijẽ ajo mijẽ remẽ. Yvy kõrijõ tè rõwã amotytyokatà ky'y. Yva tẽ tesõ amotytyoka tary ve kãramõ ajo mijẽ remẽ”, e'i ikusiwaoka.g Aekwerà rupi katu a'evotà ãmẽ wereko.
27 Aepo e'i maekwerà rupi sikuwa emimotyty rã kõ opatà ky'y. Notyty'ãi mãe kõ kõrijõ tè ojejatà iko. 28 Notyty'ãi ãmẽ Janejare'e rena. A'e kyty janereraatà opyri tijaiko karuaru ãmẽ. Ajawyi simoe'e ywete, Janerõvijã ywete rõmõ, a'e pejẽ. Janerereko katua rè simoe'età. Simomojy wetetà imoe'e, 29 ipojy ai tè mã'ẽ tè Janejare'e rewarà mõ.