– Aã kwaima'e nivo miti ekoi orepõ'õ mè, e'i owari rõmõ kupa. Jane kõ pè ojavyoka moregetaa ipi. Ãmõ, “Tekoua repykwerà tapeme'ẽ e'ã jõvijã wasu Sesa remĩgwai kõ pè”, e'i tite ipi, e'i owari rõmõ kupa. Ãmõ, oupewarà mõ kee e'i: “Ije tè penõvijã rõmõ aiko, Janejare'e Remimuurerà rõmõ”, e'i ve ipi, e'i e'i kovenatu Piratu pè kupa.

3 Ãmẽ aepo jaa rè kovenatu Piratu oporegeta Jesu pè esa:

– Aje põ Juteu kõ rõvijã wasu rõmõ ene? e'i ijupe.

Ãmẽ e'i Jesu:

– Ene itõ aepo ere ije, e'i kõrijõ tè Jesu ovaja.

4 Ãmẽ kee e'i Piratu Janejare'e pè oporegeta mãe kõ rõvijã pè. Ãmõ, pirujẽ jane kõ pè e'i:

– Naesai 'ete ijaiwererà mõ ee. Mape jẽ rõwã imirai tijamomorijau ijukaoka, e'i ijupe kõ.

5 Ajamã'ẽ ojimoane'e jẽ kupa upa. Kee e'i Jesu pewarà mõ kupa:

– Nivoi ekoi ipi! Jane kõ omo'e remẽ omopirai kõ imõarõoka ipi, e'i owari rõmõ kupa. A'evo ekoi jypy remẽ, Karireja yvy pè. Ãmõ, Juteja yvy pè a'evo ekoi. Ajaate aã ike tè a'evo ekoi age'e ky'y, e'i owari rõmõ kupa.

6 Ãmẽ aepo wenu remẽ, kee e'i kovenatu Piratu ijupe kõ:

– Ha! Karireja wãnà mõ põkõ ãwĩ kwaima'e? e'i.

– Õ'õ, a'e wãnà tè ãwĩ, e'i ijupe kupa ãmẽ.

7 Ãmẽ aepo wenu remẽ, kee e'i:

– Ije rõwã Karireja wãnà kõ rõvijã. Eroti tè a'e rõmõ ekoi. Ãwijã mẽ kovenatu Eroti tè tokuwa, e'i. Jerusarẽ taa pè tè tui rã'ĩ age'e. Peraa awi ijupe ãmẽ, a'e tè te'i nẽ ijupe, e'i kovenatu Piratu ijupe kõ.

Weraa ãmẽ kupa, kovenatu Eroti kyty.

8 Ãmẽ kovenatu Eroti oryvay Jesu rè omã'ẽ remẽ. Jypy remeve, “Amã'ẽ kuwasi ee mijã”, e'i amãtejẽ, Jesu rekoa ojenu jenu ijupe remẽ. Ajawyi tè oryvay omã'ẽ ee ky'y remẽ.

– Maevo mãrãnà jikuwa e'ã oinõokatà okasia rupi tamã'ẽ ee, e'i tite oupe.

9 Ãmẽ iteetejẽ kovenatu Eroti oporegeta ipe Jesu pè. Nipui Jesu ajamã'ẽ. 10 Ãmõ kõ nivoi mã'ẽ omo'y teywete Jesu rè. A'evo Janejare'e pè oporegeta mãe kõ rõvijã kõ ekoi. Ãmõ, tãmõ Moisesi remikusiwarerà rè poromo'e mãe kõ a'evo ekoi. Iteetejẽ e'i teywete imo'y Jesu rè kupa upa, [ãwisõ kovenatu Eroti “aje” te'i ijukaoka ky'y]. 11 Ãmẽ kovenatu Eroti osota kõ reve Jesu oojai. “Wãisõ jõvijã”, e'i ijai kupa. Ajaire tyru poko ikatuay mã'ẽ mõ opypy Jesu rè imomojy rã'ãga kupa. Ajaire kovenatu Eroti omojivyoka Jesu imonooka kovenatu Piratu pè.

12 Ãmẽ a'e 'ary peve kovenatu Piratu, kovenatu Eroti revejẽ, ojimory ojee kupa ky'y. Jypy remẽ ojimoãpã ojee kupa mijã.

13 Ãmẽ kovenatu Piratu rena kyty werojivy Jesu eraa kupa remẽ, Piratu omoaty Juteu rõvijãgwerà kõ. Janejare'e pè oporegeta mãe kõ rõvijã kõ ve omoaty. Ãmõ, jane kõ atyryjarà. 14 Kee e'i ijupe kõ:

– Aã kwaima'e peeru erovake. Nivoi mã'ẽ pemo'y teywete ee mijã. “Jane kõ omõarõoka oõvijãgwerà pè ipi”, pejẽ ijupe. Ajamã'ẽ penovakeve amogeta esa remẽ, naesai 'ete ijaiwererà mõ ee. Peayvukwerà rupi katu rõwã amã'ẽ ee, nimanyvoi 'ete ekoi rewarà mõ. 15 Ãmõ, kovenatu Eroti kyty amonooka ipe. Ajamã'ẽ a'e teve nomomorijauoka tari, noesai ijaiwererà ee rewarà mõ. Ajawyi omojivyrĩ imuu ekoty. Nuvei ijaiwererà ee rewarà mõ nijajukaoka'ãi. Nivoi jajukaoka apijarà remẽ, e'i epe Piratu ijupe kõ.

16-17 (Ãmẽ tãmõ kõ jisyryawerà moete 'arà upi upi kovenatu Piratu imirai mã'ẽ mõ omoẽoka jimopã'ãga pe wyi ipi, Juteu kõ morya rõmõ.)^a Ãmẽ kee e'i epe Piratu aty wasu kõ pè:

– Ãwijã mẽ Jesu anõpã nõpãokatà rã'ĩ. Ajaire amoẽokatà, e'i epe.

18 Ajamã'ẽ kee e'i jane kõ:

– Ãnĩ, a'e rõwã teremoẽoka! Parapa eu ijupe mã'ẽ tè emoẽoka! Jesu ãmẽ emono ijukaoka! e'i e'i jane kõ.

Wapuka pukai tesõ aepo javo rõmõ kupa.

19 A'e Parapa okoty rewarà kõ revejẽ poromõarõoka Romã wãnà rõvijãgwerà kõ kyty ipi. Imirai tè a'e. Porojuka maekwerà tè a'e. 20 Kovenatu Piratu ãmẽ, “Tamoẽoka Jesu”, e'i tite oupe mijã. Ajawyi kee e'i epe:

– Ãnĩ, Jesu amoẽokatà, e'i epe ijupe kõ.

21 Ajamã'ẽ jane kõ ojimoane'e jẽ tesõ wapukai rõmõ. Kee e'i kupa:

– Yvyra jipokana rè emoputuputurioka Jesu ijukaoka! e'i kupa. Tomãnõ ikenẽ! e'i e'i tesõ wapukai rõmõ kupa upa.

22 Ãmẽ e'i mijẽ Piratu ijupe kõ. Moapy rõmõ aepo e'i:

– Manyvo rewarà mõ põ Jesu jajukaokatà? Mãi põ jypy remẽ imirai mijã, aja rewarà mõ tajukaoka? Na'evoi. Naesai ijaiwererà mõ ee mijã. Ajawyi anõpã nõpãokatà kõrijõ tè. Ajaire amoẽokatà ky'y, e'i tite Piratu mijã.

23 Ãmẽ ywesõ wapuka pukai kupa.

– Ejukaoka yvyra jipokana rè! e'i e'i jẽ kupa.

Ajaate “hoõ” e'i Piratu ijupe kõ ky'y.

24 – Aty wasu kõ remimotarà rupi ajukaokatà, e'i ky'y.

25 Ãmẽ jimopã'ãga pe wyi omoẽoka Parapa. Romã wãnà rõvijã kytyre poromõarõoka teipe a'e. Ãmõ, porojuka mã'ẽ teve ipe a'e. Ajamã'ẽ omoẽoka jẽ Piratu jane kõ ayvu rupi. Jesu ãmẽ ome'ẽ ipo kõ pè toeraa ijuka kupa ky'y.

26 Ajaate sota kõ weraa Jesu ijukatà ky'y. [Jerusarẽ taa kupe kyty weraatà kupa, imirai mã'ẽ jukaa rena kyty.] Ãmẽ pee rupi oo kupa remẽ, kwaima'e mõ reve ojiõvaisĩ kupa. Sireni taa wãnà mõ tè a'e. Simão eu erà pè. A'e ka'api'ity kyty wyi ojivy uu iko. Ãmẽ sota kõ kee e'i ijupe:

– Ja'e, aã yvyra jipokana ikõ emovy eraa nẽ, e'i ijupe wayvukasi rõmõ kupa.

Ãmẽ sota kõ yvyra jipokana omovy ijasi'y 'aryvo inõ kupa, toeraa Jesu rakypy rupi ãmẽ.

27 Ãmẽ aty wasu ve Jesu rakypy rupi oo iko kupa. Ãmõ, wãivĩgwerà kõ ve oo ojawa rõmõ iko. Ojiposi'apete tesõ ojawa rõmõ oo kupa. 28 Ãmẽ Jesu ojirova oporegeta ijupe kõ:

– Wãivĩgwerà, Jerusarẽ taa wãnà kõ, kee a'e pejẽ. Ere rõwã kuwasi peja'o mijã, e'i. Pene kuwasi peja'o mijã, e'i. Ãmõ, pememyry kõ rè kuwasi peja'o mijã, e'i. Pejẽ ywesõ pejimomorijauvaytà kãramõ peiko. 29 Kãramõ kee eutà: “Wãivĩgwerà kõ nimemyi 'ete mãe kõ ywesõ owa ekojẽtà ekoi, nomã'ẽ'ãi omemyry kõ momorijaua rè kupa rewarà mõ”, eutà.^b 30 A'evoa okwa remẽ pejimomorijauvaytà. Kee pejẽ ipetà ãmẽ yvytyry kõ pè: “Ejapakui e'aryvo ejuka”, pejẽ ipetà. Ãmõ, yvytyry miti kõ pè kee pejẽ tary ve: “Eẽ e'aryvo epijapa mõ tajimomorijau e'ã ãpã kõ po pè”, pejẽ ipetà pekyje rõmõ, e'i Jesu.^c

31 – Pejapyaka rã'ĩ. Ivo mã'ẽ teipe ije. Moko tesõ erereko emomorijau itõ ãwĩ kupa. Tysi tõ pejẽ. Ewyi wete pemomorijauvaytà kupa kãramõ. Ajawyi pene jẽ peja'o kuwasi mijã, a'e pejẽ, e'i Jesu.

32 A'e remẽ kwaima'e kõ imirai mãe kõ werokwa ve kupa, Jesu reve, tomomorijau ijuka kõ yvyra jipokana rè. 33 Ajaate tena kupe kyty werovãe kupa ky'y. Uve yvytyry mõ a'e pè, Kauvariu eu a'e yvytyry mã'ẽ pè. “Joãkãgwerà rena” jaa tè Kauvariu. [Imirai mã'ẽ jukaa rena teãmã a'e.] A'e kyty weraa Jesu ãmẽ ijukatà kupa. Omoputuputuri yvyra jipokana rè imõ'ã kupa, ãmõ kõ revejẽ, tojimomorijau omãnõ. Mytery pè Jesu omõ'ã kupa. Ãmõ imirai mã'ẽ i'ekatu kytyre omõ'ã kupa. Ãmõ, Jesu jau kytyre omõ'ã kupa. 34 (Ãmẽ Jesu e'i Uu pè:

– Papa, ejukaa teremo'y e'ã ee kõ. Notekokuwai wyi moko erereko kupa, e'i. Eitypypyioka awi ijaiwererà kõ iwyi kõ, a'e ene, e'i Jesu Uu pè.)^d

Ajaire sota kõ ojimarai rã'ĩ Jesu yrukwerà rè imosãi ojiupe.

– Ava põ opyytà ijyrukwerà? e'i imomo momo kupa.

A'evo wereko ipyy imosãi ojiupe kupa.

35 Ãmẽ aty wasu a'e pè ekoi. Opõ'ã a'evoa rè omã'ẽ kupa upa. Ãmõ, jõvijãgwerà kõ werõarõ tesõ Jesu. Kee e'i ojiupe kupa:

– Poroereko katuarà tè itõkõ ãwĩ mijã. Aje põ Janejare'e Remimuurerà tè ãwĩ? Emipyteporo põ ãwĩ? e'i. A'e ywe'e remẽ, owyjy kuwa ojireko katu rõmõ, e'i e'i ijai kupa.^e

36 Sota kõ ve ovãe Jesu ypy pè ijai kupa. Uvary aiwerà mã'ẽ ome'ẽtà Jesu pè toy'u kupa.^f 37 Kee e'i kupa:

– Aje ywete põ Juteu kõ rõvijã wasu rõmõ ene? A'e ywe'e remẽ, ewyjy moko pe wyi ejireko katu, teremãnõ e'ã, e'i ve ijai kupa.

38 Ãmẽ yvyra pee rè kee e'i ikusiwa kupa: “Aã Juteu kõ rõvijã wasu tè”, e'i ikusiwa kupa. A'e jikusiwarerà oinõ Jesu apyte 'aryvo kupa.

39 Ãmẽ imirai mã'ẽ yvyra jipokana rè ojasiko upa mã'ẽ mõ tẽ tesõ Jesu werõarõ tite. Kee e'i ijupe:

– Janejare'e Remimuurerà rõmõ rõwã põkõ ene? Ewyjy ajawyi yvyra jipokana re wyi ejireko katu! Ãmõ, ore ve orererowyjy rejupa, oro'e ene, e'i ijai upa.

40 Ãmẽ kwere'ĩ gyty tui mã'ẽ kee e'i Jesu oojai mã'ẽ pè:

– Aepo ere sõ, e'i ovoarà pè. Nejimomorijautà neiko ipe remẽ, neremomojy'ãi põ Janejare'e ajamã'ẽ? 41 Emã'ẽ, jane jevo'e katu janemomorijau itã'ã kupa. Nivoi jaiko mã'ẽ rè tè jajimomorijau jamãnõtà, e'i. Nuvei 'ete Jesu aiwererà mõ ee ajamã'ẽ mijã, e'i ovoarà pè.

42 Aepo e'i paire, kee e'i jẽ Jesu pè:

– Nejimojõvijãma neiko remẽ, eporijauesa rejupa ãmẽ, a'e ene, e'i Jesu pè.

43 Ãmẽ kee e'i Jesu ijupe:

– Hoõ, a'evotà. Ãwijã mẽ age'eve ereve neikotà Janejare'e rena^g pè. Aje ywete aepo a'e ene, e'i Jesu ijupe.

44 Werywete jane 'aryvo katu kwaray remẽ ky'y. Ãmẽ si apy'awarà mõ ijãpatõma. Pãtõma 'ejẽ ajaate ijãpẽ kwaray remeve. Pirujẽ a'e yvy rupi pãtõnusu. 45 Ameve Janejare'e moe'ea retãporà kamisa anamu okei. Yvate kyty wyi ojiãvasĩ.^h 46 Ãmẽ jakatu Jesu wayvo wapukai kee javo:

– Papa, nepo pè aitytà e'ãg. Ereraa awi nekoty rejupa, Papa, e'i.

Aepo e'i remeve, ojikyi oo. Opi iji'ãgekyia ky'y.ⁱ

47 Ãmẽ sota kõ rõvijã mõ a'evoa rè omã'ẽ remẽ, kee e'i:

– Haa! Aje ywete ivo mã'ẽ tè sikaepo ãwĩ! e'i.

Ajawyi Janejare'e omoe'e ywete upa, Jesu rewarà mõ.

48 Ãmõ jane kõ a'e pè ojatykapa upa. A'evoa rè omã'ẽ ãmẽ kupa. Ijãgyoay wete kupa. Ojiposi'apete pete tesõ kupa, wãgyo rõmõ. Ojisyry syry ojiwyi kupa ky'y. 49 Ajamã'ẽ Jesu jimorypawerà kõ mõ pirujẽ a'evoa rè omã'ẽ. Wãivĩgwerà kõ, Karireja yvy pewarà kõ. Kõi, Karireja yvy pè wyive Jesu rupi uu maekwerà kõ. A'e kõ kuipe'e sa'u opyta omãjã upa.^j

50-51 Ãmẽ uve Juteu rõvijã mõ ivo mã'ẽ. Manyvo ne'i'ãi ãmõ kõ ijupe mã'ẽ a'e. Juse Arimateja taa wãnà eu ijupe. A'e kee e'i ipi mã'ẽ: “Pirujẽ jane kõ omoẽoka Janejare'e o'arà kyty kupa remẽ ikatuaytà”, e'i ipi mã'ẽ. Ãmẽ ãmõ jõvijãgwerà kõ ojukaokatà Jesu remẽ, Juse “hoõ” ne'i. “Ãnĩ” e'i epe ijupe kõ mijã. 52 Jesu wauvay a'e. Ajawyi Jesu mãnõawerà ojenu ijupe remẽ, oo karumẽ kovenatu Piratu kyty. Kee e'i ijupe:

– Jesu reãgwerà taraa imokatu, e'i.

Ãmẽ kovenatu Piratu “hoõ” e'i.

53 Oo ãmẽ Jesu reãgwerà mowyjy yvyra jipokana re wyi. Ajaire ookwa okwa kamisa e'eay pupe. Kamisa e'eay “rijõ” eu mã'ẽ pupe tè a'evo wereko. Weraa ajaire imokatu takuru kwarà pupe. Nuveive teãgwerà mõ ipupe mã'ẽ tè a'e. 54 Ojikõtevẽ jẽ imokatu, jimoava 'arà renone, pãtõmà e'ãve.^k

55 Ãmẽ wãivĩ kõ ve oo Juse rupi, Karireja yvy kyty wyi uu Jesu rupi maekwerà kõ. A'e kõ omã'ẽ Jesu reãgwerà mokatua rè. [Ajaire Juse oovapy takurupe pupe remẽ, omã'ẽ teve ee kupa.]

56 Ajaire wãivĩ kõ ojivy oo. Moã vo ipije mã'ẽ mõ omoatytà rã'ĩ imoje'a je'a imokatu kupa, teãgwerà rè jainõ mã'ẽ. Juteu kõ rekoa rupi a'evo werekotà kupa. Ajaire ojimoava rã'ĩ kupa upa, “Jimoava 'arà remẽ ikõ tijajimoava ipi nẽ”, e'i tãmõ Moisesi remikusiwarerà rupi.^l